د/ مريم عبد القادر

سؤال كل الناس بتسأله في سرها.. ليه أروح لأخصائية تأهيل نفسي وأنا ممكن أفضفض لصاحبتي؟ --- *أنا مش هسمعك بس... أنا هأهلك* ناس كتير بتدخل تقولى أنا مش مجنونة عشان أروح لحد نفسي أنا بس محتاجة حد يسمعني وعندهم حق صاحبتك هتسمعك.. هتتعاطف معاكي.. هتقولك "معلش" بس بعد المكالمة هتنامي وتصحي تلاقي نفس المشكلة، نفس القلق، نفس النوم المتقطع *الفرق بين الفضفضة والتأهيل النفسي؟* الفضفضة بتخفف اللحظة التأهيل بيغير النمط أنا شغلي مش أسمعك وأقولك برافو انتي قوية شغلي 3 حاجات مهمة أفهم الخريطة بتاعتك واعرف ليه جهازك العصبي دخل وضع الطوارئ ومش عارف يخرج؟ هل ده قلق من الطفولة؟ هل ده احتراق من ضغط شغل وبيت؟ هل ده نوم بايظ مبوظ كيمياء مخك؟ التشخيص الصح هو 50% من العلاج أفك النمط .. كلنا عندنا جمل جوه دماغنا بتعيد نفسها أنا لازم أرضي الكل لو غلطت هبقى فاشلة محدش هيحبني لو قولت لا الجمل دي هي الل بتعمل القلق في الجلسات بنفكها ونبني مكانها جمل جديدة واقعية أبني تصميم جديد .. زي الجيم بالظبط هديكي نصايح تناسب حالتك هديكي تمارين يومية لجهازك العصبي ترجعك لوضع الأمان خطوة بخطوة بعد شهر هتلاقي نفسك بتردي بطريقة مختلفة من غير ما تفكري *أنا مين؟* أنا [مريم عبد القادر] أخصائية تأهيل نفسي مؤمنة انك مش محتاجة تتصلحي انتي محتاجة أدوات ترجعك لنفسك مش بشخصن أمراض ولا بكتب أدوية أنا بساعدك تبني نظام يخليكي تعرفي تتعاملي مع القلق والنوم والضغوط من غير ما تنهاري كل مرة لو انتي من الناس الل - بتنام جسمها تعبان ودماغها صاحي - بتفكر كتير وتحلل كل كلمة - بتحسي بذنب لو قولتي لا - جربتي الفضفضة ولسه تعبانة فمكانك واختيارك الاول هو ساعة لقلبك .. اونلاين و مباشر مكانك الآمن هنا بدون حكم بدون "انتي مكبرة الموضوع" بحبكم فى الله https://whatsapp.com/channel/0029Vb7aLHVGehEG6ehsIH2A

ولادنا كلنا مهما وصل بيهم السن محتاجين القرب محتاجين الدعم محتاجين التوجيه اللطيف بكرر اللطيف يعني الخفيف يعني بالراحه يعني بدون انتقاد لاذع يعني بدون اتهام بدون اظهار اسوء ما فيهم وده بيكون داعم قوي ان هما يستقبلوا مننا النصيحه مهما كان السن ف في مساحه لتأثيرك في حياتهم حتى لو عدوا سن 16 سنه .. اه ما فيش تربيه بعدها .. لكن في صداقه في صحوبيه في قرب في تعلم بالقدوة لو كنا طبعا اتعاملنا قبل 16 بشكل امن كل انسان حسب نمطه سواء كان سمعي او بصري او حسي لو كنتى بتتعاملي غلط في ما سبق اعتذري على الل فات وحاولي تكوني مُشارك او داعم علشان تعملي مساحه تتسمعي فيها بعدين ولادنا كنز ممتد لينا بعد وفاتنا مضطرين والاضرار ده انا الل بحطه لكى .. مضطرين نعاملهم كويس عشان منخسرهمش مهما غلطوا هما بني ادمين .. بشر .. خطائين .. وربنا بيحب الخطائين مقالش الل اعمارهم ايه ساعة لقلبك للاستشارات والتدريب د/مريم عبد القادر https://whatsapp.com/channel/0029Vb7aLHVGehEG6ehsIH2A

كل واحد فينا محتاج حاجه معينه هي الل بتشبع احتياجه المطلوب في الوقت المحدد الل هو محتاجه يعني لو انا عاوزه كوبايه مايه بارده لا سخنه ولا ساقعه وبقول لك اديني كوبايه ميه رحت جبتى مكسرات وعصائر واكل وحاجات كتير حلوه ده مش هيشبع احتياجي للمياه ابدا وانتى كمان لو عايزه كوبايه قهوه عشان تفوقي وانا رحت جبت لك حله محشي وفرخه وانت عايزه تفوقي مش هبقى كده اديت الاحتياج المطلوب الفكره هنا ان كلنا بنبذل مجهود خرافي في ناحيه ووارد جدا جدا تكون هي دي الناحيه الغلط ال غير مشبعه للطرف الاخر واحنا نقعد نغني طول الوقت بنقول ظلموه ونقول بنعمل ومقطعين نفسنا وقايدين صوابعنا العشره شمع في حين ان احنا فعلا مش بنعمل المطلوب كل واحده فيكم تبص بعين العقل بعين المعلومه الل وصلتها من الكلام ده ايه الل الشخص الل قدامك محتاجه راجلك محتاج ايه بجد مش انتى عايزه تدي له ايه زوجتك محتاجه ايه انتى كمان محتاجه ايه حددي بوضوح احتياجاتك واحتياجات الل قدامك واشتغلى عليها في ناس يفرق معاها اوي الخدمات ناس تانيه يفرق معاها المشاعر ناس ثالثه يفرق معاها الوقت الل بتقضيه معاهم ناس تانيه يفرق معاها تشجيع والمدح والتهليل كل واحد فينا ربنا خلقه بطابع معين ونمط معين وبصمه مختلفه اختلاف البصامات ده يأكدلك اختلاف الطباع و الاحتياجات و المفاتيح الل ممكن نستعملها مع الناس علشان نكون في علاقات مريحه #الاحتياجات ساعة لقلبك للاستشارات والتدريب د/مريم عبد القادر https://whatsapp.com/channel/0029Vb7aLHVGehEG6ehsIH2A

‏صورة من توتو السندريلا

‏صورة من توتو السندريلا

‏صورة من توتو السندريلا

‏صورة من توتو السندريلا

‏صورة من توتو السندريلا

البنت بتقولكم انها لما جات السيشن الدكتورة قسمتلها الخطة لـ 3 حاجات وقالت لها دول أساس التعايش مع الفيبروميالجيا في كل العالم *1. تنظيم النوم والطاقة* ده أهم حاجة قالت لها تنام وتصحى في نفس المعاد كل يوم حتى في الإجازة. تبعد الموبايل قبل النوم وتعمل روتين هادي زى دش دافي أوضة ضلمة تنفس عميق لأن قلة النوم بتزود الألم 10 أضعاف *2. حركة خفيفة مش عنيفة* مش جيم تقيل. مشي خفيف 15-20 دقيقة، سباحة تمارين إطالة. في الأول هتوجع، بس بعد أسابيع الجسم بيبدأ يفك هيه كانت بتبدأ بـ 5 دقايق بس في اليوم *3. تهدئة الجهاز العصبي* التوتر هو الزرار اللي بيعلي الألم. سلمى اتعلمت حاجتين - تكتب مشاعرها كل يوم 10 دقايق بدل ما تكتمها - تعمل تمرين تنفس: شهيق 4 ثواني، حبس 4، زفير 6 والأهم من كل ده طلبت منها متابعة مع دكتور روماتيزم ومناعة + متعبة واستمرار على التأهيل النفسي علاج الألم نفسيا عشان المرض ده محتاج فريق مش دكتور واحد. وفيه علاجات دوائية وغير دوائية الدكتور بيختارها حسب حالتك فمهم جداً متاخديش أي دوا من تجربة حد تاني هيه النهاردة لسه بتتعب بس بقت عارفة تتعامل مع الموجة بدل ما الموجة تغرقها تمت قصة حقيقية فيبروماليجيا ساعة لقلبك للاستشارات والتدريب د/مريم عبد القادر https://whatsapp.com/channel/0029Vb7aLHVGehEG6ehsIH2A

٨اللي محدش بيقوله عن الفيبروميالجيا إنك بتحاربي على جبهتين في نفس الوقت *جبهة جسمك وجبهة الناس* هية وصلت لمرحلة كانت بتصحى الصبح مش عارفة هتلبس إزاي من كتر ما كتفها واجعها وفي نفس الوقت بتفكر هترد تقول إيه لما حد يقولها "انتي شكلك كويس أهو بطلي كسل" في يوم انهارت كانت في عزومة عيلة وكلهم بيضحكوا وهي قاعدة حاسة بدوخة وضباب في دماغها - اللي بنسميه "fibro fog" - مش قادرة تجمع جملة على بعضها طنط قالت ما تقومي تساعدينا بدل القعدة دي قامت دخلت المطبخ ووقعت طبق من إيدها من غير قصد من كتر ما إيدها منملة ساعتها عيطت مش عشان الطبق عشان حست إنها بقت عبء روحت بيتها وقررت تعمل وقفة كتبت ورقة وقسمتها نصين *على اليمين حاجات بتزود الوجع* - السهر - إني أقول "آه موافقة" وأنا تعبانة - القهوة الكتير والسكر - إني أفضل متكتفة طول اليوم - إني أفضل أفتح كلام الناس اللي بيوجع *على الشمال حاجات بتهدي الوجع شوية* - حمام دافي قبل النوم - إني أقول لجوزي أو ماما "أنا النهاردة طاقتي صفر محتاجة مساعدة" - المشي البطيء - إني أسامح نفسي لو اليوم باظ - صحاب بتصدقني من غير ما أثبت حاجة وبدأت رحلة التصالح روحت لدكتورتى وقلت لها: أنا تعبت من إحساس الذنب الدكتورة قالت لها جملة عمرها ما نسيتها > "الفيبروميالجيا مش بتاخد منك صحتك بس، بتاخد ثقتك في نفسك. علاجك مش دوا بس، علاجك إنك ترجعي تصدقي جسمك تاني." ساعتها عملت اتفاق جديد مع اللي حواليها بعتت رسالة واحدة لجروب العيلة والشغل "يا جماعة أنا عندي مرض مزمن اسمه فيبروميالجيا، بيعملي ألم في عضلاتي وتعب طول الوقت. مش معدي ومش خطير بس بيخليني أيام مش قادرة أعمل حاجات عادية. أنا مش بطلب شفقة، بطلب بس لما أقول إني تعبانة تصدقوني، ولما أعتذر عن خروجة تعرفوا إني فعلاً مش قادرة مش زعلانة منكم ناس كتير مردتش وناس قليلة جداً قالت "سلامتك احنا جنبك" ودول اللي كفاية النهاردة بقالى سنة ونص متشخصة ولسه بتوجع؟ آه لسه بتعب من كلام الناس؟ ساعات بس الفرق إنها بطلت تحارب الوجعين لوحدها بقت لما تتعب جسدياً تريح جسمها من غير ما تجلد نفسها نفسياً وعايزة أسيبلك 3 جُمل تثبتيهم على التلاجة 1. *أنا مش بتدلع أنا بتعايش* 2. *راحتي مش أنانية، دي علاج* 3. *اليوم الوحش مش معناه حياة وحشة دي موجة وهتعدي* قصة حقيقية فيبروماليجيا ساعة لقلبك للاستشارات والتدريب د/مريم عبد القادر https://whatsapp.com/channel/0029Vb7aLHVGehEG6ehsIH2A

بعد ما لفيت ع الدكاترة وخلاص عرفت اسم الل عندي، افتكرت إني هرتاح... طلع التعب الحقيقي لسه بيبدأ. كنت بشتغل في مكان والحمد لله المدير كان طيب بس مش فاهم. كنت بطلب أقوم أتمشى 5 دقايق كل ساعة عشان جسمي بيخشب، كان بيبصلي كأني بتهرب من الشغل. في يوم مقدرتش أرفع دراعي من الوجع، طلبت أروح بدري. زميلة قالت بصوت واطي بس سمعته: "ما كلنا تعبانين يعني، هي بتدلع". ساعتها فهمت إن الفيبروميالجيا مش بس وجع جسم، وجع إنك طول الوقت محتاجة تبرري إنك موجوعة. قررت اسمع كلام دكتورتى و أعمل 3 حاجات غيرت حياتي: بطلت أشرح لكل الناس تعبى مش كل الناس هتفهم، ومش مهم يفهموا. بقيت أقول جملة واحدة بس .. عندي حالة مزمنة بتعملي ألم عضلي وإرهاق، زي أي مرض مزمن. اللي يحب يفهم هيفهم، واللي مش عايز خلاص. اتفقت مع جسمي بدل ما أحاربه اروضه زمان كنت بعند، لو تعبانة أنزل وأخرج وأقول هبقى كويسة. دلوقتي بقيت أسمعه. يوم طاقتي 80% بعمل كل اللي ورايا. يوم طاقتي 20% بسمح لنفسي أرتاح من غير تأنيب ضمير. بقيت أعمل To-Do List صغيرة جداً 3 حاجات بس في اليوم. لو عملتهم ببقى بطلة. لقيت مجتمع صغير دخلت جروب بنات عندهم فيبروميالجيا على فيسبوك. أول مرة حسيت إني مش لوحدي. واحدة كاتبة: "حاسة إن جسمي مضروب بشاكوش" نفس الجملة اللي كنت بقولها لنفسي ومكسوفة أقولها. روتيني دلوقتي اللي الدكتورة ساعدتني فيه الصبح: دش دافي + تمارين إطالة 10 دقايق بس، مش جيم عنيف. الضهر: بمشي ربع ساعة في الشمس. بالليل: بمنع الموبايل قبل النوم بساعة، وبعمل تمارين تنفس عشان أنام. النوم هو العلاج رقم واحد عندنا. وفي أيام انتكاسة، بعيط وبتعب وبقول ليه أنا؟ بس بقيت عارفة إنها موجة وهتعدي. الانسانة اللي كانت بتستحمل عشان متقولش "لأ" لحد، اتعلمت تقول "لأ" عشان نفسها. لو انتي زيى، عايزة أقولك.. انتي مش كسولة. انتي مش بتدلعي. انتي بطلة عشان مستحملة وجع مش متشاف كل يوم وبتكملي. قصة حقيقية فيبروماليجيا ساعة لقلبك للاستشارات والتدريب د/مريم عبد القادر https://whatsapp.com/channel/0029Vb7aLHVGehEG6ehsIH2A

اسمي سلمى، عندي 31 سنة. صحيت في يوم عادي جداً، جسمي كله بيوجعني كأني كنت بجري طول الليل. قلت برد عادي وهيروح. مراحش. أسبوع، اتنين، شهر... كل يوم بصحى كأني مضروبة. رقبتي، ضهري، كتافي، حتى صوابع إيدي. ومعاه إرهاق فظيع، أنام 10 ساعات وأصحى تعبانة أكتر. لفيت على كل الدكاترة. تحاليل دم زي الفل. أشعة مفيهاش حاجة. دكتور يقولي: انتي بتدلعي. دكتور يقولي: ده اكتئاب. حد قالي: انتي محسودة. بدأت أشك في نفسي، هو أنا بجد بتخيل؟ هو أنا بقيت كسولة؟ لحد ما دكتورة مريم قالتلي كلمة أول مرة أسمعها: *فيبروميالجيا.* مرض مزمن بيخلي الجهاز العصبي يترجم أي إحساس عادي على إنه ألم مضاعف. مش التهاب، ومش بيبان في التحليل، عشان كده محدش بيصدقه. ملهوش علاج نهائي بيخفيه، بس ليه إدارة: نوم منتظم، حركة خفيفة زي المشي والسباحة، تقليل التوتر، وأكل صحي، وبعض الأدوية اللي الدكتور بيكتبها عشان تهدي إشارات الألم. أهم حاجة اتعلمتها؟ إن الوجع حتى لو مش متشاف، فهو حقيقي. وإني مش محتاجة أثبت لحد إني موجوعة عشان أستحق الراحة. أنا لسه بتعب، في أيام بقع خالص ومش بقدر أقوم من السرير، وفي أيام ببقى كويسة وبحاول أعيش عادي. لو انتي بتحسي بنفس الأعراض دي: وجع متنقل في الجسم كله بقاله أكتر من 3 شهور، إرهاق مستمر، نوم مش مريح، زغللة وعدم تركيز... متسكتيش وقولي "هتعدي". يتبع قصة حقيقية فيبروماليجيا ساعة لقلبك للاستشارات والتدريب د/مريم عبد القادر https://whatsapp.com/channel/0029Vb7aLHVGehEG6ehsIH2A

وحشتووووونى كتير وشكرا للناس الجميلة الل افتقدتنى وحسيت بغيابى وسألت عليا ♥️♥️♥️♥️♥️♥️♥️

يا امهات يا قمرات لخبطة النوم أثناء الأيام الاولى للمدرسة شييييييئ طبيعى كنا متعودين نسهر وننام متأخر مفيش مشكلة يناموا شوية فى وسط النهار ويصحوا ويناموا متأخر مفيش مشكلة خاااالص ساعة لقلبك للاستشارات والتدريب د/مريم عبد القادر https://whatsapp.com/channel/0029Vb7aLHVGehEG6ehsIH2A

دائما يأتى الامل من داخل الألم يتعجب الانسان من سريان الأحداث بشكل مخالف لأهواءه .. ولا يعلم أن هذا الترتيب هو سر نجاته دائما عُد الى الله استسلم لأمره انتظر عطاياه ف فيها الخير العظيم بحبكم فى الله د/مريم عبد القادر https://whatsapp.com/channel/0029Vb7aLHVGehEG6ehsIH2A

اقدار الله تأتي في الوقت المناسب دائما ما ندعو دعوات ودعوات ونترجى الله ان يؤتينا شيء في وقت معين وهيهات لا قبول ولا رساله ولا اي حاجه واحنا نقعد نستعجل المؤمن بقى بيبقى واثق في ربنا ان الفرج جاي وان الدعوه هتتقبل بس امتى مش عارفين فمضطر يبقى عنده تسليم وصبر وانتظار لأمر الله لحين حدوث الشيء المرغوب او الدعوه المطلوبه وقت ما تيجي بقى يااااه على فرحه الانسان بقبول دعوته ولانها مش هتجيله غير في وقت مناسب وفي وقت يكون في اعز الاحتياج لها فعلا وفي وقت مُحكم ومرتب للغايه ف بيفرح بيها ويتفاجئ ويشكر ربنا وينعم ويستمتع بالدعوه تقبل الله دعواتنا واياكم ورزقنا الله فرحه القبول في الوقت المناسب مع الرضا والتسليم لامر الله احبكم في الله وحشتوني كثير وانتظروا الجديد ساعة لقلبك للاستشارات والتدريب د/ مريم عبد القادر https://whatsapp.com/channel/0029Vb7aLHVGehEG6ehsIH2A

ربنا سبحانه وتعالى خلقنا مختلفين مفيش حد فينا بصمته زي الثاني ولا تفكيره زي الثاني ولا عقليته زي الثاني ولا ادراكه زي الثاني ولا استيعابه زي الثاني وعشان كده ممكن حد يحكي موقف قدامنا وكل واحد فينا ياخده بمعنى مختلف تماما تماما وبناء على اختلاف المعنى .. اذا بقى في فكر مختلف وتفسير مختلف واكيد اكيد اكيد رد فعل مختلف عشان كده بليز يا جماعه ادرسوا انماط شخصيه .. اقراوا عنها في ناس بتفهم بدماغها .. بودانها وناس بتفهم بعينيها وناس بتفهم بمشاعرها وبين هذا وذاك وتلك في ارواح بتروح ونفسيات بتدمر وحياه بتتهد وخلافات قائمه ليوم الدين الدراسه مش عيب والعلم مش عيب ان انا اتعلمه وابقى عارفه ان انا محتاج اقوي نفسي في الزاويه دي عشان اعرف اتعامل مع الاشكال المختلفه في حياتي اعتبارا من ان العائلات مختلفه ما هو احنا مش كلنا قالب واحد ومش كلنا بنفسر الكلام بنفس المعنى وده مش معناه ان انتى مش فاهماني اذا انت وحشه اطلاقا ولا انا مش فاهماكي فانا وحشه اطلاقا الموضوع مختلف تماما كله بيفهم بطريقته وكله بيحلل بمستوى فهمه وفي النهاية رد الفعل الل بيختلف لان في ناس بتبقى عادي ..ترجمه الجمل قدامها او الكلمات بتبقى سهله وبسيطه وفاهمه الانسان على حقيقته فمهما خرف قدامهم هما فاهمين وفي ناس بتبقى قاعده في وضع الاستعداد والهجوم لو قالت كلمه انا عارف قصدها السيئ وعارف نيتها السيئه وعارف قصدها القا.تل برده وهنا في الزاويه الايجابيه وفي الزاويه السلبيه كل واحد بقى مع فهمه وادراكه الدنيا بتبقى خربانه على الاخر بليز افهموا بعض افهموا كل واحد بيفهم الكلمه ازاي مفيش مشكله اني ابرر لك طالما انتى تهميني .. لو متهمنيش خلاص يلا مع السلامه باي باي شايفاني كده .. انا ابو كده ولا يهمني طالما انتى ما تهمينى بليز .. انا دايما اقول للناس متبرروش لكن العلاقات الل محتاجينها حاولوا مش بشكل كبير بس فهموا الل قدامكم مره واثنين وثلاثه بس .. انتم قصدكم ايه لو مفهموش بعد كده حاولوا تقللوا احتكاكات عشان نقل المشاكل ومع الوقت والمحاوله ومحاوله توضيح طريقه فهمك للطرف الاخر هتلاقي الدنيا بتفك شويه بشويه ف هنا جاية اقولك برري بعض الشيء للناس الل تهمك .. الل متهمكيش يلا بالسلامه وشد الباب وراك من واقع جلساتى ساعة لقلبك للاستشارات والتدريب د/مريم عبد القادر https://whatsapp.com/channel/0029Vb7aLHVGehEG6ehsIH2A

الناس عايزه تعيش في سلام وامان والدنيا تبقى لطيفه والراجل نفسه الدنيا تبقى حلوة وهادية ومراته مش نكديه خالص والست نفس الموضوع عايزة ولادها متربيين وهاديين ومؤدبين وبيسمعوا الكلام و الدنيا كلها تبقى بيييس وحلوه خالص كله عاااايز دا بدون اي مجهود يعني الست يا حاج الل نكديه ومش لطيفه وبتعمل دوشه انت فقدتها احتياج مهم من احتياجاتها الاساسيه فبقت مضطربه فبقت نكديه ومش عاجباك وانتى يا ست الناس ولادك الل مش مؤدبين ولا هاديين ولا بيسمعوا الكلام هما كمان ناقصهم احتياج مهم من احتياجاتهم الاساسية مش بياخدوه عشان كده هما متعفرتين ف ازاي كل واحد فينا حارم التانى من احتياجه الرئيسي الل هو مرتبط بيه في علاقه ايا ما كان نوعها حارمه من الاحتياج وعايز رد الفعل الحلو .. طب ما تبص على الل انت بتقدمه عمرك في حياتك ما تقدم خير وامان وتلاقي شر الا لو الشخص الل قدامك غير سوي .. وانا مش بتكلم عن الغير اسوياء .. انا بتكلم عن العادي وانتى يا ست الام العسل ولادك عمرهم ما هيبقوا شادين ومجننينك الا عشان مش بياخدوه فتعالوا كده نتكلم مع كل طرف في العلاقه الل احنا فيها و عايزينها تبقى هاديه انت محتاج ايه وانا محتاجه ايه ونحاول نتفق على حاجة واحده بس من الاحتياجات ونشوف النتيجه بعد اسبوع اتنين تلاته واوعدكم هتلاقوا الدنيا غير ساعة لقلبك للاستشارات والتدريب د/مريم عبد القادر https://whatsapp.com/channel/0029Vb7aLHVGehEG6ehsIH2A

سألتنى بتسجلى السيشن ؟ قولت لها لا بخط إيدها الكلمتين الل فى الصورة ودا طبعا من كتر الخذلان الل عاشته فى حياتها مفيش علاقة دخلت فيها كانت آمنه الشخصيات المريضة الل قابلتها علمتها اختياراتها كلها للأسف كانت غلط والنتايج كانت قاسية جداااا ف اتحولت لكائن تانى مشوه غريب كتوم مش فاهم نفسه مش شايف حاجة كويسة مش مصدق ان فى ناس كويسة لسه رفقا بقلوب الناس لان مستحيل تتخذل وهي مقدمتش خير لازم تكون اعطت كتير وحاوطت ودعمت وافنت حياتها للناس الل كانوا فى دايرتها احفظوا الجميل ارحموا مشاعر الناس وليها لازال الخير موجود بس لاااااازم تتغيرى وتواكبى تطورات الحياة ومتعطيش غير لما تاخدى ومتقدميش حد عليكى لأنه هيستقِل بيكى انتى جميلة وربنا خلق فطرتك دى عشان تحافظى عليها مش عشان تبعتريها للى يسوا والل مايسواش من واقع جلساتى ساعة لقلبك للاستشارات والتدريب د/ مريم عبد القادر https://whatsapp.com/channel/0029Vb7aLHVGehEG6ehsIH2A