ادبیات سئونلر

زلیمخان_یعقوب مندن سالام اولسون! منی یئر اوزوندن آییرما، تانریم! یئرده سیرداش ائله چیچک‌لرینه! منی گؤی اوزوندن آییرما، تانریم! دردیمی سؤیله‌ییم فلک‌لرینه. اؤپوم سیلدیریمی، قایادان کئچیم، چکیم سیغالیمی، صحرادان کئچیم، دالغایلا دانیشیم، دریادان کئچیم، قوش منی چؤللرین کولک‌لرینه! هاردا جیدیر وارسا، یاریشیم اولسون، هاردا ساواش وارسا، باریشیم اولسون، ساغلام توخوم اولسون، قارا شوم اولسون، قاناد تاخ قلبیمین دیلک‌لرینه! ازلدن دوستویام آغرینین، آهین، بیر صادیق قولویام عشق آدلی شاهین. مندن سالام اولسون قادیر آللاهین- منه سالام وئرن ملک‌لرینه! https://t.me/Adabiyyatsevanlar

ایوب_کلبجرلی توخونسا تئلینه باهار نفسی بیل کی یول گلیرم سوراق دی مندن عؤمرومو عشقینه قوربان وئرردیم نه وعده نی سوروش  نه واختی مندن سنسیز چیچک آچماز باغچالار باغلار سنسیز باتیب گئدر بیللور بولاق لار من سنی ایتیرسم دونیام داغیلار سن منی ایتیرسن  نه چوخدو مندن سندن آیریلاندا جان قالمیر جاندا جان کیمی یوخ اولور جاندا جهاندا آی منیم اوره ییم  سن اولمایاندا ایوبون اؤزوده اوزاقدی مندن https://t.me/Adabiyyatsevanlar

بابک احمدی- گفتمان فلسفه، اندیشه_ی انتقادی و ایدیولوژی _...(خ...ن_ی حاکم ابزار تولید فکری و معنوی را هم افزون بر ابزار تولید مادی در.mp4

بهروز صدیقی یئنه یئنه پراپانول، یئنه کدئیین‌ یئنه تقویم‌لری چئینه‌ییر سیچان سینه‌م‌ده سه‌ یئر‌یییر سؤزون سرگیسی یالین اللریمده گؤینه‌ییر گومان اونا بنزر الی قوینوندا، دالغین اؤتور کوچه‌میزین پاییزلیغیندان یاخیلمیش یاراسی باخیش دا یایغین من اونو تانیرام آرازلیغیندان یئنه پراپانول، یئنه کدئیین دالغالار قوینوندا قیرمیزی ساعات چیلپاق آیاغیمدا تیکان کوچوک‌لر و حیات کیشنه‌ین دلی‌سو بیر آت https://t.me/Adabiyyatsevanlar

قاسم نوربخش (غزللی) دوماندا گؤرونمز دان‌اولدوزوم...! گلسن قوناق، آچیق دوغولاردان گونش گتیر آزمان قارانقولوق‌لارا، درمان گونش گتیر عارسیز، دونوق خزللیگه بنزردیر ایلیک‌یاز! سپمیر عطیر، نه گول، نه ده ریحان گونش گتیر! باخ: آغ گؤیرچین، آل قانادیندان قیفیللانیب! طیلسیم قفس‌لر اوچماغا، آی جان گونش گتیر! سیرتیق یئل آچدی، اوسونونو تؤزلو آنلارا اشگیل چاشیتدی کروانی یولدان، گونش گتیر! چیخماز، ایتیب دوماندا گؤرونمز دان الدوزوم! گؤزدن چالیبدی شاعری سانجان گونش گتیر! نوح هاردا بس؟ دنیزلری ده، قارقیدیب کولک طوفان قیران گمی‌لره یئلکان، گونش گتیر! پوزمان ساواشلارا، آتومون بومباسین آچان! ظولمون سئلینده، آخدیریب آل‌قان گونش گتیر! قانسیز سطیر‌لریمده اوره‌ک، چات یول آختاریر پوزغون غزللی‌یم، غمیم آرتان گونش گتیر وولقان کیمیندی، من‌لیک ایله یئر جوشوب-داشیر! داش قلبینه هلاک اولور اینسان، گونش گتیر ! https://t.me/Adabiyyatsevanlar

م. خوشنام منه پاییزدان یازما ، اوره ییم چوخ کوورک دیر ، اوشویه بیلر . منه خزلدن یازما ، اوره ییم چوخ اینجه دیر توکوله بیلر . منه آغاج دان یازما ، اوره ییم یاپراق -یاپراق اسه بیلر . منه گوزلریندن یاز !... یازکی عومرومون سونونا دک - گوزلرینده اویوماق ایسته ییرم . قارا گوزلرین ! هم گئجه م همده گوندوزوم اولوب ! سن بیلمه سنده !... https://t.me/Adabiyyatsevanlar

عمران صلاحی دانیشماق کیمی عاشیق ا توروب شکسته اوخور نه غملی چالیر‌نه خسته اوخور منی ترپدیر‌ ،منی یاندیر یر. منیم دردیمی ،منه قان ی یریر بو میخانادا، بیرمنم، بیر سن بیرده عاشیقلار بولبول ا وخو یور، اوخوماقلارنان ایپک توخ یور عاشیقین سسی بو چولده یانیر سسی اوجالیر شعریم اویانیر یولدان آزیرام من بو شعریمی سنه یازیرام آنادیلیمی من اونوتمادیم ائوه دئمیشدیم من گله جگم ساعات سگگیزده. امما نیله ییم خیالیم سیزده! من ایسته ییرم بوردا آغلیام بیر اوشاق کیمی من ایسته ییرم شعریمی یازام دانیشماق کیمی! https://t.me/Adabiyyatsevanlar

اوشاق ادبیاتی کریم قربانزاده ایندیکی بو نئچه سطیری یازیرام شیرین-شیرین  یاغیش یاغیر و من اوشاقلیق گونلرینه قایتمیشام اوگونلر سحردن آخشاما دک کوچه- باجادا اویناردیق ،باهاردا یاغیش یاغماسایدی ،قورولوق اولسایدی کوچه نین اوشاقلاری دسته قوروب قاپی- قاپی گزییب بئله اوخویاردیق . آلا داغین بولودو یئتیملرین اومودو آللاه بیر یاغش گوندر آچا بوغدا قورودو ** چاخ داشی ؛ چاخماخ داشی یاندی اوره گیم باشی آللاه بیر یاغش گوندر گویرسین داغلارین باشی ** نرگیز خاتین نه ایسته ر ؟ آللاهدان یاغش ایسته ر الی قولو خمیرده بیر جه قاشیق سو ایسته ر ** چاخ داشی ؛ چاخماخ داشی یاندی اوره گیم باشی آللاه بیر یاغش گوندر گویرسین داغلارین باشی ** بئله لیک له نذیر آشی بیشیرمک اوچون هر ائودن بیرزاد آلاردیق، قاپی قونشو بیریسی یارما، بیریسی دوگو اوبیریسی قورو آش گویو باشقاسی یاغ ... ویا بیر قارا پول بیزه وئرردیلر، سئوینجک قاپیدان چیخاندا تشکور اوچون  بئله اوخویاردیق حق برکت ؛ حوق برکت بو قاپی یا چوخ برکت حق برکت ؛ حوق برکت بو قاپی یا چوخ برکت... یاغیش یاغاندا کوچه ده اویناماغین باشقا دادی واریدی هرزاد بیر بهانه ایدیر اویناماغا  یاغیش یاغاندا  بئله اوخویاردیق. یاغدی یاغیشلار بانلادی قوشلار حیوان گامیشلار هارادا یاتارلار؟  یاغدی یاغیشلار بانلادی قوشلار حیوان گامیشلار هارادا یاتارلار؟ تکرار...   https://t.me/Adabiyyatsevanlar

اوشاق ادبیاتی

اوشاق ادبیاتی ۲۴ ساعات یوخویلا آییقلیق دا ۲ یازار: صمد بهرنگی چئویرن: منیژه جم‌نژاد 🐫 جوان بیر آغا-خانیم، بالاجا بیر اوغلان، بیرده آغ، پارلاق بیر ایت‌تولاسی ائندیلر. اوغلان دو٘ز احمدحسین بویدایدی، قیساشالوار، آغ جوراب، ایکی‌رنگ آچیق باشماق گئیمیشدی، دارانمیش تو٘کلری یاغلانمیشدی. بیر الینده آغ گؤزلویو واریدی، اوبیری الی‌له ده آتاسینین الیندن یاپیشمیشدی. تولانین زنجیری خانیمین الینده‌یدی. قوللاری، قیچلاری چیلپاق ایدی، باشماغی اوجادابان ایدی، یانیمیزدان کئچنده خوشاگلیم عطری بورنوموزا دَیدی. قاسم آیاغی آلتیندان بیرپارچا قابیق گؤتوروب، برکدن اوغلان‌جیغازین پی‌سَریندن ووردو. اوغلان دؤنوب بیزه باخیب دئدی: دارقا شاییرد لار!...احمدحسین سینیرله دئدی: ایتیل آنا قوزوسو!... من فورصت تاپیب دئدیم: ایندی گلرم خایالاریوی پیچاق لا کسرم! اوشاقلارین هامیسی گو٘لدولر. آتا اوغلانین الیندن چکیب نئچه متر اویانلیقدا بیر هتله گیردیلر. گئنه هامی‌نین گؤزو ماحمودون تازا باشماقلارینا دؤندو. ماحمود دوستجا دئدی: منه باشماغین اؤنمی یوخدو. ایسترسینیز سیزین اولسون. سونرا او٘زونو احمدحسینه توتوب دئدی: گل بالاجا، گل باشماقلاری چیخار، آیاغینا گئی. احمدحسین شک‌لی ماحمودون آیاقلارینا باخیب، ترپشمه‌دی. ماحمود دئدی: نیه دوروب باخیرسان؟ تازا باشماق ایسته‌میرسن؟ دی گل آل. بو گز احمدحسین دوروب گئدیب باشماقلاری چیخارماق اوچون ماحمودون اؤنونده اییلدی. بیز او٘چوموز باخیر، بیرسؤز دئمیردیک. احمدحسین ماحمودون آیاغینی برکدن توتوب چکدی، آما اللری زو٘یدو، دالیسی او٘سته پیادایولا ییخیلدی. ماحمود لا کورگؤز بتر گو٘لدولر، دئدیم ایندی سانجیلانارلار. احمدحسینین اللری قارالمیشدی. کورگؤز تئز- تئز ماحمودون بؤیروندن ووروب دئییردی: دئمه‌دیم ماحمود؟...هاها..ها.. دئمه‌دیم؟..هه..هه..هه!...احمدحسینین بارماق یئرلری ماحمودون آیاغیندا گؤرونوردو. بیز اوچوموز توولاندیغیمیزی یئنی آنلادیق. او ایکی حوقاباز یولداشین گو٘لمه‌سی بیزه ده داراشدی. بیزده گو٘لمه‌یه باشلادیق. احمدحسین ناراحات، خالقین آیاق آلتیندان دوردو، بیرآز بیزه باخیب اودا گو٘لدو. گول ها گول! پیادا گئدنلر بیزه باخیر کئچیردیلر. من اَییلیب ماحمودون آیاغینا یاخیندان باخدیم. باشماق هاردایدی! ماحمود یالنیز آیاغینی بویامیشدی، ائله‌کی آدام  تازا باشماق گئیدیینی دو٘شونوردو. قریبه حوققایدی!                           ٭٭٭ ماحمود دئدی: آلتی یاندان تاس اوینایاق. منیم دؤرد قیرانیم واریدی. قاسم نئچه‌سی اولدوغونو دئمه‌دی. او ایکی یولداشین بئش قیرانی واریدی. زیور بلیط ساتانین اوغلو بیر تومنی واریدی. احمدحسینین پولو یوخودو. بیر آز آشاغی‌لیق‌دا باغلی بیر تو٘کان واریدی. اورا گئدیب تاس تؤکمه‌یه باشلادیق. اویونو باشلاماغا پو٘شک آتدیق. اول پو٘شک زیورین اوغلونا دو٘شدو. تاس آتدی، بئش گلدی. بیر قیران زیورین اوغلوندان آلدی. سونرا گئنه تاس آتدی، ایکی گلدی. تاسی ماحمودا وئردی. ماحمود دؤرد گتیردی. ایکی قیران قاسمدان آلدی سئوینجک اللرینی بیربیرینه سو٘رتوب دئدی: بابا برکت! بختیمیز قووزاندی. بئله‌سی ایکی- ایکی تاس آتیب اویناییردیق. خوش گئییملی ایکی جوان ساغ الدن گلیردیلر. احمدحسین قاباغا قاچیب یالواردی: بیر قیران...آغا بیرقیران وئر...سنی آللاه!..کیشی‌لرین بیری احمدحسینی الی‌له ووروب ایته‌له‌دی. احمدحسین قاچیب قاباقلارینی کسیب یالواردی: آغا بیر قیران وئر...بیر قیران‌کی بیرشئی دئییل... سنی آللاه... بیزیم قاباغیمیزدان کئچرکن، جوان کیشی احمدحسینین بوینوندان یاپیشیب قووزادی، قارنی او٘سته خیاوان قیراغیندا نرده‌نین اوستونه قویدو. احمدحسین خیاوانا ساری، آیاقلاری پیادایولا طرف آسلاق قالدی. احمدحسین آیاقلاری‌نی یئره یئتیرمک اوچون ال-آیاق چالدی، ائله اوردا آرخین قیراغیندا دوردو. ایکی قیز بیر اوغلان گو٘له-گو٘له سول الدن گلیردیلر. قیزلار قیسا خوش‌رنگ دون گئیمیش، اوغلانین ایکی یانیندا گئدیردیلر. احمدحسین قاباغا قاچیب قیزلارین بیرینه یالواردی: خانم سنی‌الله ایکی‌قیران وئر...آجام...بیر قیران کی بیر شئی دئییل. سنی‌الله!... خانم بیر قیران!...قیز سایمادی. احمدحسین گئنه یالواردی. قیز کیفیندن پول چیخاریب احمدحسینین اووجونا قویدو. احمدحسین سئوینجک بیزه ساری گلیب دئدی: منده آتیرام. زیورین اوغلو دئدی: پولون هانی؟ احمدحسین اووجونو آچیب گؤرستدی. اووجوندا ایکی قیرانلیق واریدی. قاسم دئدی: گئنه یولچولوق ائله‌دین؟ احمدحسینی وورماق ایسته‌دی، ماحمود الینی توتوب قویمادی. احمدحسین بیرسؤز دئمه‌دی. اؤزونه یئر آچیب اوتوردو. من دوروب دئدیم: من یولچولارلا تاس اوینامارام. ایندی منیم بیر قیرانیم واریدی. دورد قیرانیمدان اوچ قیرانیمی اودوزموشدوم. آردی وار... https://t.me/Adabiyyatsevanlar

اوشاق ادبیاتی گوزل بیرسس اوشاق دونیاسیندان https://t.me/Adabiyyatsevanlar

اوشاق ادبیاتی «مئشه‌نین قلبینده‌کی ایشیق» کؤچوروب، اویغونلاشدیران: ویدا حشمتی بیر زامانلار اوج‌سوز-بوجاقسیز بیر مئشه‌ده بیر بالاجا تولکو عاییله‌سی ایله یاشاییردیلار‌. بو بالاجا تولکو هر گون ماجرالا پئشینده قاچیردی. بیر گون مئشه‌نین درینلکلرینده هئچ گؤرمه‌دییی بیر چیچه‌یی تاپماق خیالی ایله یولا چیخدی. گونش یاواشجا اوجالاندا بالاجا تولکو ائودن چیخدی و مئشه‌نین بیلینمه‌ین بؤلگه‌سینه دوغرو یولا دوشدو. یولدا قوشلارین اوخوماغیندان و الوان بویالی کپه‌نک‌لرین اوچوشوندان لذت آپاریردی. بالاجا تولکو چوخ سئوینیردی. بیر آز سونرا بیر آغاجین آلتیندا توکلری گؤی رنگلی اولان بؤیوک بیر قوش گؤردو. بو قوش مئشه‌نین افسانه‌لی «گؤی توکلو زومرود» قوشو ایدی. زومرود قوشو بالاجا تولکویه محبت‌له باخیب دئدی: -گون آیدین بالاجا تولکو. من سنی مئشه‌نین گؤزل چیچکلری اولان یئره آپارارام. آمّا اوّل سنه اوچ تاپماجا دئیه‌جه‌یم. اونلاری تاپسان سنی چیچکلرین یئرینه آپارارام. بالاجا تولکو هیجان‌لا تاپماجالاری تاپماغی قبول ائتدی. ایلک تاپماجا «گؤی اؤزونده پاریلدایان اولدوزلارین سرّی» نه‌دیر؟ تولکو گئجه گؤی اوزونه باخدی و اولدوزلارین شکلینی بیرلشدیریب، بیر قلب شکلینه بنزه‌تدی. گؤی‌توکلو زومرود قوشو بو جوابدان چوخ خوشلاندی. ایکینجی تاپماجا «مئشه‌نین ان سورعتلی‌سی کیمدیر؟» سوروشدو. تولکو بیراز دوشونوب، دئدی: - یئل مئشه‌نین آن سورعتلی‌سی دیر. چونکی هئچ حیوان یئلین سورعتینه چاتا بیلمز. بو جواب دا دوغرو ایدی. سون تاپماجا دا بو ایدی. «ان قیمتلی خزینه نه‌دیر؟». تولکو گینه بیر آز دوشوندوکدن سونرا دئدی: - آن قیمتلی خزینه عاییله و یولداشلاریمین سئوگی‌سی‌دیر». زومرود قوشو بو جوابی ائشیدینجه، گؤزلری یاشالدی و بالاجا تولکویه تبریک دئدی.  سونرا بالاجا تولکونو مئشه‌نین لاپ درین یئرلرینه آپاردی. اوردا ایشیل-ایشیل پاریلدایان گؤرکملی بیر چیچک واریدی. بو چیچک بوتون مئشه‌نین قلبی ایدی و تکجه اوره‌یی‌تمیز و صاف وارلیقلار اونو گؤره بیلردی. بالاجا تولکو بو گؤزل چیچه‌یی گؤردوکده چوخ سئویندی. او اؤزونو چوخ خوشبخت بیلیردی. او مئشه‌نین دؤرد بیر یانینی آیدینلادان بیر  ایشیغین اولدوغونو آنلادی. بالاجا تولکو بو ماجرانین سونوندا ائوینه و عاییله‌سی‌نین یانیندا قاییتدی. او بو گؤزل گونون ماجراسینی عاییله‌سی ایله پایلاشدی. او گئجه بالاجا تولکو اولدوزلارین آلتیندا یاتدی و مئشه‌نین بیر قورویوجوسو اولدوغونو حیسّ ائدرکن یوخویا گئتدی. https://t.me/Adabiyyatsevanlar

اوشاق ادبیاتی اوشاق ادبیاتی هرهفته پنجشنبه گونو ادبیات سئونلر کانالیندا، اوشاق ادبیاتینا دایر یازیلارینیزی بیزه گوندرین. https://t.me/Adabiyyatsevanlar

هئچ بیر صاحبی تاپیلمادیغیندان دا بو جور عاقبت‌له اوزلشمیشدی. ایکینجی عائله‌‌سیندن ده خبر چیخمامیشدی. بئله‌جه ائوسیز، ائشیکسیز، کیمسه‌سیز کوچه‌لرین بیرینده‌جه وفات ائتمیشدی. قریبه‌دیر کی، عؤمور بویو اوشاقلارینی اوره‌کدن سئویندیرمه‌ین، عکسینه  گؤزویاشلی قویان بو آدام، بو دفعه‌ ده اؤز طرزیندن قالمادی. یئنه ده ضربه‌‌نی اونو ایسته‌ین، اونونلا آز-چوخ ماراقلانان قیزینا ووردو. ایندی بو زده‌دن زاواللی قیزجیغاز نئجه قالخاجاقدی؟ باخ، بورادا هر کس اؤزونو سؤزون بیتدییی یئرده حسّ ائدیردی...  بو حادثه‌‌ ایسه طلبه‌‌لرده درین ایزلر بوراخدی و گئتدیکلری هر یئرده کیمسه‌سیز آداملارا مناسبتی کؤکوندن دَيیشدی. سئوینج ایسه آتاسینا سون اولادلیق بورجونو وئریر، اونو لیاقتلی شکیلده دفن ائدیر و بیر ده اونیوئرسیتئته گلمه‌یه‌جه‌یینه قرار وئریر. بئله‌جه ۳-جو کورسدان اعتباراً عالی تحصیل آلدیغی یئری ترک ائدیر. سئوینج بو سارسینتی‌یلا همین یئرده اوخویا بیلمه‌یه‌جه‌یینی دریندن آنلاییردی. اونون داش اوره‌کلی‌لیییندن اثر-علامت قالمامیشدی. حیات اونون داش اوره‌گینی بیر ده ازمیش، پارچالامیش، حتی جیلالامیشدی...  https://t.me/@adabiyyatsevanlar