Halima Ahmedova

«Бошдан оёғим нур, Бошдан оёғим...» ✍️ Ҳалима Аҳмад 📺 Маҳлиё Хуррамова .🚀 Бизни кузатинг: Telegram|  Facebook | web-sayt

Suratini chizibdi shamol, Umrimning bo'sh varaqlariga. Singib borayotgan menmanmi Kunbotarning shafaqlariga. Olulanar bulutlar maʼyus, Ruhda nedir ko'piradi boz. Va qushlarning ozod parvozi Ko'zlarimga sanchilar xolos. Nahot sevdim aqlimdan ozib, Qanotlarning soyasini jim. Axir men ham bir tola nurday Gulni qalqitgani kelgandim. Uydan haydab qorong'ulikni, Qayg'u kuyin chalganda dilim - Yuragimni ushoqday sepib, Tongni kutgan men emasmidim?! Endi menga ohangday zavqli G'animlarning qahqahasi ham. O'ynayapman chirpirak bo'lib Havolarda hazondek bu dam. Yozolmasman ismingni nechun, Umrimning bo'sh varaqlariga. Qara, qanday cho'kyapman, Xudo, Kunbotarning shafaqlariga. oktabr, 2023 @halima_ahmad

Менга шодлик юбор, Ва яшил умид, Райҳонлар нафаси сўнаётган дам, Ишқдай беғуборлик юборгин яна, Ўзимда тонгларинг кўрайин мен ҳам… Ва борай қушларнинг анжуманига. Парвозни ўрганиш учун олай дарс, Катталашиб борар ахир кундан кун, Дунё билан менинг орамдаги дарз. Менга шодлик юбор, Қайғудан ортган. Ва дил пардасида чалгувчи рубоб, Сени маст айласа, ёзғирма мени, Кўзим косасида чайқалган гулоб. Менга шодлик юбор Ва беғуборлик Бунча кўп киряпман ернинг тушига, Ҳолим ўхшаб борар лаҳзама-лаҳза, Соҳилнинг денгизга талпинишига. Шафақ кўзгусидан ўчирмай тургин, Ҳали ҳам кўнглимга беряпман пардоз. Руҳимдаги баланд туғёнлар билан — Бандангман, бандангман, бандангман, холос. Менга шодлик юбор, Ғамдай чиройли, Ва тундан сокинлик, қалдирғочдан сас. Дилимдаги дилни, Жондаги жонни, Соғиниб боряпман, нафасма-нафас… Менга шодлик юбор, Ғамдай чиройли. @halima_ahmad @Mahliyo_Xurramovaa

«ҚАҚНУС»НИНГ ЯНГИ СОНИ «Қақнус» кўрсатувининг навбатдаги сони севимли шоирамиз Ҳалима Аҳмедова ижодига бағишланади. Съёмка 8 июнь соат 12:30 да бўлиб ўтади. ТОМОШАБИН сифатида иштирок этмоқчи бўлганлар 6 июнь соат 12:00 га қадар @baxt_va_hayot_maktabi га боғланинг ва рўйхатдан ўтинг. @halima_ahmad

СЕН МЕНИ ИШОНТИР Сен мени ишонтир муҳаббатингга, Дегилки, сен учун яралдим, илло. Йиғлаб илтижо қил: мунис дунёда Сенинг дийдорингдан бўлмайин жудо. Сен мени ишонтир эртакларингга, Мангуга кетишинг билсам-да атай. Дегилки, бир тола сочим қолдиргум, Куйдиргин, шу лаҳза ёнингга қайтай. Сен мени ишонтир қайғуларингга, Гарчи заққум улар, сен дегилки, бол- Тўйиб ичаверсанг, дардларинг кетар, Фақат тақдирингда қолар бир савол. Сен мени ишонтир соғинчларингга, Токи мен ишонай: соғинчлари ҳақ. Она ўлимига ишонмай, гўрни Қайта қазиётган етимдай илҳақ. Сен мени ишонтир... Ҳалима АҲМЕДОВА https://t.me/azob4

Бухоролик ижодкорларнинг телеграм каналлари рўйхати: Омон Мухтор: https://t.me/Omon_Muxtor Садриддин Салим Бухорий: https://t.me/SadriddinSalimBuxoriy Тилак Жўра: https://t.me/tilakjura1947 Азиз Саид: https://t.me/vaqt_manzili Ҳалима Аҳмедова: https://t.me/halima_ahmad Султонмурод Олим: https://t.me/Sultonmurod_OLIM Сулаймон Шодиев: https://t.me/SulaymonShodiyev Нодира Афоқова: https://t.me/Nodirasheriyati Вафо Файзуллоҳ: https://t.me/Vafo_Fayzulloh Чоршамъ Рўзиев: https://t.me/chorshamruziev Санобар Меҳмон: https://t.me/Sanobar_Mehmonova Абдунаби Ҳамро: https://t.me/abdunabihamro Муҳаммад Азим: https://t.me/azim202 Бобоқул Усмон: https://t.me/BoboqulUsmon Жасур Эсан: https://t.me/JasurbekEsanov Рухсора Нур: https://t.me/tanqidvatalqin Гулзода Ғайратова: https://t.me/yozuvlarimdan Сабина Расулова: https://t.me/SabinaRasulova_ijodi Муслима Ҳамроз: http://hamroz.uz Ҳамид Насруллоев: https://t.me/hazrati_insonim Ҳамзабек Турдиев: https://t.me/hamzabek81 Рўзимурод Маҳмуд: https://t.me/RuzimurodMahmud Моҳигул Ўктам қизи: https://t.me/+0WK2LujgMzAzZDZi Инобат Очилова: https://t.me/inobatbuxoriy Илҳом Салимов: https://t.me/salimov_blogi Мадина Ваҳобова: https://t.me/VahobovaMadina Нилуфар Рухсор: https://t.me/Nilufar_Rux Мактуба ШАЙДО: @Maktubashaydo Лайло Ҳайитова: https://t.me/Leyla_Tun_Qizi Дилшод Ражаб: @dilshod_rajab_ijodi Бобур Бобомурод: @bobur_bobomurod Зарнигор Ибрагимова: https://t.me/zarasohili Зилола Тошева: https://t.me/zilolakamol1992 Дилафрўз Эшонова: https://t.me/dildagilaringiz Дилобар Меҳмонова: https://t.me/mehmonovad Дилобар Жўраева: https://t.me/Dilobar_Joraeva Аброр Пир Муҳаммад : https://t.me/abrorpirmuhammad Олия Равшанова: https://t.me/nazmnavosi Зухро Асадова: @bloknotasadova Зиёда Шодиева: https://t.me/sherlarziyoda Самад Муҳаммад Дамин: https://t.me/SamadMuhammadDamin Шерзод Ғойиб: https://t.me/Sherzod_Goyib_sherlari Собир Салимович: https://t.me/Sobirsalimovich0172 Аҳмад Ҳайдаров: https://t.me/Ahmad_HAYDAROV Баҳром Солиев: https://t.me/Bahrom_Soliyev Тилланисо: https://t.me/TillanisoEN Махсумахоним: https://t.me/Maxsumaijodi Хуршид Неъмат: https://t.me/xurshidnemat_channel Обид Қўлдош: https://t.me/azob4 Агар Сиз бу рўйхатга кирмаган бухоролик ижодкорларнинг телеграм каналлари ҳақида маълумотга эга бўлсангиз, @obid_85 телеграм манзилига юборишингиз мумкин. https://t.me/nurzuyo5

Ҳалима АҲМАД @halima_ahmad

5. Хазина бор жойда тождор илон бўлади, дейишади. Балки бобомнинг катта хазинаси бордир, дея ўйладим ичимда. Ва ундан жигарранг китобни беришини ёлвориб сўрадим. Бобом ниҳоят эриди. Сандиқни очаётганда жуда чиройли куй таралаётгандек бўлди. Ўша куй ҳали-ҳануз қулоғимдан кетмайди. Сандиқ очилгач, ичидаги ранг-баранг китобларни кўриб менинг ҳам оғзим очилди. Бобом у ерда жуда кўп Қуръон китоблари билан бирга Навоийнинг девонларини сақлар экан. Ўшалар ичидан жигарранг китобни менга олиб берди. Китобни кўксимга босдим. Юрагим гупурлаб кетди. Бу гупурлашдан Лайлининг майин овозию Мажнун оёғидаги занжирларнинг шиқирлаши эшитиларди. Агар шоир бўлсам, мени шу китоб шоир қилди. Агар шоир бўлмасам, ишқнинг кўзидаги изтиробни, мунаввар қайғуни кўрсатиб, мени одам қилди шу китоб… Хотираларнинг нақшинкор даричасини секин ёпаман. Ва деразамга тинимсиз гул чизаётган февралнинг кўзларига миннатдор боқаман. Юрагимда илдиз отган ишқнинг, мукаррам соғинчнинг титроқларига қўшилиб, Навоийни соғинаман, унга талпинаман: Дунёга келтирдинг буюк кўнгилни, Ишқ аҳли ҳақ сўзга бўлганда маҳтал. Дилларни поклаган шу назм ҳаққи, Сенга шараф бўлсин табаррук феврал… … Ҳирот боғларида кезган хаёлнинг Қалбидан таралгай ўзбекона ҳис… То ҳануз ўзини излаб юрганлар — Сиз ҳам Навоийни соғинганмисиз? Фарҳод наърасидан уйғонганмисиз Виждон кенгликларин босганида ис. Мол-дунё жанггидан ғолиб чиққанлар — Сиз ҳам Навоийни соғинганмисиз? Навоий кирмаган уйлар қоронғу, Навоий кирмаган кўнгиллар зиндон. Ўзига маҳлиё эй назмбозлар — Кўринг, Навоийдан маст бўлди жаҳон. Шаъм торин паришон айлангизлар бот, Токи ёруғ бўлсин ботиннинг азми. Минг йилда ҳам балки қайтиб келмайди, Навоийдек шоир ва унинг назми. Ишқ гавҳари пинҳон эрур жон ичра, Ушшоқ ҳажр туни чўкмагайдир тиз. Эй, ошиқлик дардин эрмак билганлар — Ҳали Навоийни ўқимагансиз… Эй долғали аср, қўрқмасман сендан Қанча турланмагин, бўлма шиддаткор. Кўксимдаги ишқнинг алангасида Сенинг шиддатингдан баланд жунун бор. Навоий бахш этди менга бу ишқни, Токи томиримда оқиб турар қон. Бу ишқ Ўзбекистон бўлиб боқади Ярмида замину, ярмида осмон. … Феврал, юрагимга қўйгин бошингни, Шунда нур оқади жисмимда сим-сим. Ногоҳ қуш тилида сайрайди жоним: Навоий, Навоий, сизни соғиндим! Манба: «Ўзбекистон адабиёти ва санъати» газетаси, 2014 йил 6-сон @halima_ahmad

4. Кунлар ўтгани сайин китобни, тўғрироғи, Лайли билан Мажнунни соғина бошладим. Бир куни бобом хонасидан чиқиб кетгани заҳоти кирдиму токчадан жигарранг китобни изладим. Аммо китоб жойида йўқ эди. Шунда бутун хонани бурчакларига караб чиқдим. Лекин тополмадим. Шу пайт уйнинг ёнбошида турган сандиқ ёдимга тушди. Сандиқнинг калити энг юқоридаги токчада турарди. Калитни олдиму сандиқни очмоқчи бўлдим. Не кўз билан кўрайки, сандиқнинг тепасида тождор оппоқ илон бошини кўтариб турарди. Азбаройи қўрққанимдан бақириб юбордим. Ва шошилиб ташқарига отилдим. Менинг овозимни эшитган бобом қаердандир пайдо бўлди. Пинагини ҳам бузмай: — Китоб ўғрисининг аҳволи ана шунақа бўлади, — дедию хонасига кирди. Ортидан мен ҳам кирдим. Бобом сандиқ ёнида турган ундан бир -чимдим олиб илоннинг устига сепди. Илон бир зумда ғойиб бўлди. Мен эса азбаройи қўрққанимдан дағ-дағ титрардим. Бобом менга: — Бу илон безарар. Узок йиллардан буён келиб туради, — деб тушунтирган бўлди. @halima_ahmad

3. Зўр бериб жигарранг китобни варақлайман. Суратларда акс этган манзаралардан ниманидир тушунгим келади. Баъзан ҳис қилгандек бўламан. Фақат китоб ўртасида дарахтга занжирлаб ташланган — сочлари, тирноқлари ўсган қишлоғимиздаги Йўлдош девонага ўхшаб кетадиган йигитнинг суратини кўрганимда ичимга қандайдир ларза ўрмалаб киради. Йиғлагим келади. Нега уни дарахтга занжирлаб қўйишган? Уни қутқаргим келади. Ҳатто тушларимга кириб чиқади бу сурат. Яна бобомга юзланаман: — Бобо, нега бу йигитни занжирлаб қўйишган? Бобом ўзини эшитмасликка олиб яна мудрайди. Бу жигарранг китобни жуда яхши кўраман. Бобомдан яшириб бир куни кўчага олиб чиқиб ўртоқларимга кўз-кўз қилганман. Бобом билиб қолиб мени роса койиган. — Қизим, уни фақат шу ерда томоша қил. Йиртиб қўйсанг, сендан Навоий хафа бўлади, — деганди ўшанда. Шунда мен ҳовлиқиб: — Навоий ким, бобо? У қаерда яшайди? — деб сўраганман. Бобом эса кўксини кўрсатиб: — У жуда катта шоир, мана, бу ерда яшайди, — деган. Мен эса ўшанда ҳеч нарсани тушунмаганман. Йиллар ўтаверди. Мен жигарранг китобни томоша қилишни канда қилмадим. Ва ниҳоят, мактабга бордим. Ўқиш-ёзишни ўрганиб олдим. Энди жигарранг китобни бемалол ўқий бошладим. Аммо уни ҳануз уқий олмасдим. Айниқса, суратдаги йигитни нега занжирлаб қўйганига ҳеч жавоб тополмасдим. Ёшим ўн олтига кирганда жигарранг китобни кўнглимдаги ҳислар билан варақлаб, нималарнидир тушунгандек бўлдим. Лайлига ҳавасим келди, Мажнунни орзу қилдим. Мажнун оёғидаги занжирлар ҳалқасининг нури ногаҳон кўксимга кўчганини сездим. Лайлининг қаро зулфи зулфимда тебрангандек бўлди. Бир куни бу китобни бобомдан сўрамай мактабга олиб бордим. Муаллимимиз китобни кўриб: — Жуда нафис китоб экан, — деди. Бу гапдан сўнг барча синфдошларим китобни қўлма-қўл қилиб томоша қилишди. Ногаҳон парта устида турган сиёҳдонни бир синфдошимиз билмай туртиб юборди. Ва китобнинг варағи устига сиёҳ сачради. Ўша куни дилим ҳуфтон бўлди, бобомдан роса гап эшитдим. Кейин, бу китобни менга қайта бермаслигини айтди. @halima_ahmad

2. Бобом ғазални ўқиб тугатади. Дераза ортида менинг рангин тугмачалар қадалган калишчам қорга тўлади. Аммо совуқ қотмайман. Бобом қироат билан ўқиган ғазалнинг қуёши бутун вужудимни қиздиради. Шу дамда ичкарида ўтирган бобомни қаттиқ соғинаман. Ва отилиб ёнига кираман. Унинг юзидаги ажинлардан боғимизнинг ариқчасига ўхшаб сув оқади. Рўмолим билан унинг кўз ёшларини артаман. Бобом ширин жилмаяди. Мени эркалайди. Қўлларимга парвардаю туршаклар беради. Ёнига жойлашиб ўтириб оламан. Менинг ғазалхон бобом бирпасда ҳув ўша баланд осмондан тушиб, оддийгина меҳрибон бобога айланади. Мен эса уни доим ғазал ўқиганда чиқадиган юксакликда кўришни истайман. Бобомга эркалик қиламан: — Бобо, чиройли суратлари бор китобингизни беринг. Бобом токчадан мен севиб суратларини томоша қиладиган жигарранг китобни олиб беради. Сандалнинг чўғига оёғимни тоблаб китобни аста варақлайман. Унда чиройли бир йигит билан қизнинг, кенг саҳрода югуриб юрган оҳуларнинг суратлари бор… Бобом менга таъкидлайди: — Бу Ҳазрат Навоийнинг «Лайли ва Мажнун» достони. Эҳтиёт бўл, яна йиртиб қўймагин. Мен бобомни саволга кўмаман: — Лайли ва Мажнун нима дегани? Бу достон нима ҳақида? Бобом оғир тин олади. Ва лўндагина жавоб беради: — Ҳали ўқишни ўргансанг, ўзинг ўқиб билиб оласан… Рости гап, бобом ўқиган ғазаллар менга руҳ, ҳарорат бағишласа-да, уларнинг мазмунига тушунмайман. Фақат сўзлардаги оҳанг ва яна нимадир афсунлагани афсунлаган. Бу афсун ичидан сира ҳам чиқиб кетгим келмайди. @Halima_ahmad

1. Бобом ғазални ўқиб тугатади. Дераза ортида менинг рангин тугмачалар қадалган калишчам қорга тўлади. Аммо совуқ қотмайман. Бобом қироат билан ўқиган ғазалнинг қуёши бутун вужудимни қиздиради. Шу дамда ичкарида ўтирган бобомни қаттиқ соғинаман. Ҳалима АҲМЕДОВА ЖИГАРРАНГ КИТОБ Январ елкасига осмон пўстинини ташлаб, секин оёқлайди. Баъзи-баъзида офтобнинг эҳтиросли шивирлари юракнинг қулоғига чалинади. Ва ниҳоят феврал кириб келади. Бу ойнинг кириб келиши билан изғиринли кунлар яна озодликка чиқади. Феврал аёзининг ҳикматини қаранг: чидаганга чиқарган бу ҳаётни, дейди. Яна кўнгил деразаларига эринмай гул чизади. Мавҳум шакллар суратини машҳур мусаввирлардан ҳам зўр чизади. Феврал ҳикмату сирларга тўла ой. Бу ой қиш билан баҳорнинг ўртасидаги кўприкка ўхшайди. Ундаги шиддат қор остидаги бойчечак, бинафша, ялпизларнинг қўшиғига куй басталайди. Ҳаётнинг қорнидаги яшил фаслига изтиробдан туғиладиган ишқнинг, умиднинг сабоғини ўтайди. Феврал ойида туғилганларга ҳавасим келади. Аммо бу ойда туғилганларнинг бари ҳам Навоий ёхуд Бобур бўлолмайди. Хазону қорлар кўмиб кетган хотираларнинг нақшинкор даричасини очаман: бобомнинг равоқли кулбаси, кулба ўртасида сандали, ундан сал нарироқда катта сандиқ. Сандалга оёғини тиқиб, саксовул чўғидан ҳузур топаётган бобом мук тушиб китоб ўқийди: Истаганлар бизни саҳрои балода истангиз, Водийи ҳижрон ила дашти фанода истангиз. Бобом йиғлаб ўқийди, бағри қонга тўлиб ўқийди. Ташқарида гоҳ капалакка, гоҳ оққушга ўхшаб ёғаётган қорлар -бобомнинг овозини эшитади. Ва деразадан ичкарига секин мўралайди. Бобом ўқишда давом этади: Вомиқу Фарҳоду Мажнундеклар ул водий аро, Бўлсалар пайдо, мени ҳам ул арода истангиз. Сўзнинг бағридаги ишқдан, сўзнинг жавҳаридаги ҳароратдан эриб кетади капалак қорлар, оққуш қорлар… Исмсиз саҳрода қалбини йўқотган телбадек жунунланади бобомнинг -ноласи: Юз аларнинг ишқича дарду, балоу ғуссага Толиб эл бошига келган можарода истангиз. Кулба ёнида қорга кўмилган чинор бу ноладан кучланади. Ва оғир силкинади. Унинг силикинишидан минг йиллик ғуссалар тўкилади. Замин секингина оҳ тортиб қўяди. Бу оҳ бориб яна бобомнинг қалбига чирмашади: Эйки истарсиз саводул важҳ фиддорайндин, Бохабар бўлмоқ мени юзи қарода истангиз. Энди борлиқ юзини аёзнинг совуқ тирноқлари тирнай бошлайди. Илоҳий азоб ортида кўриниб турган ҳаловат ширин энтикади. Кулбадан таралаётган оҳанг аёзнинг юрагини илитади: Кўнглум ул зулф ичрадир, зинҳор ишқим шарҳини, Истаманг мен телбада, ул мубталода истангиз. Совуқ шамоллар муз устида сирғаниб югуради. Тириклик зулфида осилиб қолган бир тола умид минг толага айланади. Ва ишқ шарҳини тузган азал котибига истиғфор айлайди. Шу лаҳзада бобомнинг кулбаси жаннат боғидан ўғирланган олмага айланади. Олманинг ичидан эса шаффоф соғинчнинг мукамбар ифори таралади: Нукта янглиғким, вафо узра қилур котиб рақам, Ишқ ўтининг доғини аҳли вафода истангиз. Музлаб қолган ариқчанинг кўзлари осмонга тўлади. Ариқчанинг кўзидан осмон сирғалиб чиқади-да, бобомнинг овозига келиб қўшилади: Оғзи шавқидин Навоий итти, они истар эл. Ё адам даштида, ё мулки фанода истангиз… @Halima_ahmad

🍃🍃🍃 Qo'rqmang ! Yo'lingizni to'sib chiqsa ham... Garchi bo'yingizga ohista bo'ylar, Sizga yomonlikni ravo ko'rmaydi Sodda pechak gullar, devona gullar... Noraso dunyoning ishini ko'ring- Na guldur va yoxud na maysadurlar. Gul bo'lgisi kelar gulga o'ralib Sodda pechak gullar, devona gullar... Ko'nglida bir telba isyon bordayin, Hatto daraxtlarga dil berar ular. Sevgisi bejavob oshiqqa o'xshar Sodda pechak gullar, devona gullar. Osmonga talpingan ko'yi lol, hayron, Kuzakning ko'ziga tikilib kular. Ishq so'rab Xudoga bormoqchi balki Sodda pechak gullar,                        devona gullar... ✍️Halima Ahmedova @halima_ahmad @HAYOT_MAKTABI

Birinchi oktabr ajoyib kun bo'ldi!! Hayotdagi eng qadrli, eng aziz insonlar - ustozlar bayrami - xuddi shunday ustoz Halima Ahmedovaning ham tavallud topgan kunlari!! Ularga uzoq umr, tinchlik-xotirjamlik tilaymiz, doimo sog'-u salomat bo'lib yuring!!🌷🌷 Payg'ambar yoshi muborak bo'lsin!! @halima_ahmad

https://www.youtube.com/watch?v=gO-g6PPe5nQ @halima_ahmad

Shoira Halima Axmedovaga Bir ayol yig'laydi kuzakni quchib. Tonglardek ko'zida qotgan shabnami... Men uni shamoldan bildim tanidim. Bazo'r yonayapti ko'nglining shami... Huv ana olisdan kelar xo'rsinish. . . Ovozin titratgan g'amnok yurakdir... Balkiy alamlardan unga nishona . Yuzdagi ajinlar dardli yo'lakdir... Jon deb surar edi yuzu-ko'ziga... Onasi o'stirgan xayrigullarni... Juda ko'p qumsaydi aniq bilaman. Qishlog'iga eltar o'sha yo'llarni... U ayol ko'nglida bir qiz yig'laydi... Qishlog'in tark etgan poytaxtda izi. U olis qishloq ham kutadi uni... Bir kun kelar deya ,,shoira'' qizi ... Sarvinoz Sadaf 17 / 02 / 17 15:31 @SarvinozSaDaF

Boshdan oyog‘im nur, Boshdan oyog‘im... Shaffof havolarga ketdim chirmashib, Agar menga boqsang, Shu lahza quyosh — Raxshona ko‘zlaring ketar qamashib. “Sog‘inib yashadim” — Bu qanday kalom? Boshqa so‘z na hojat, Sharhga na hojat. Quyoshni boshimga ko‘tarib bugun — Qayoqqa ketayapman, betoqat... Ming yillik zindondan Chiqqan mahbusday, Ko‘zim mung libosin yirtib tashladi. Hatto tegramdagi zulmatli olam, Vo ajab, Nurlarga do'na boshladi... “Sog‘inib yashadim”... Nega buncha kech?! Qismatning izmiga yo‘qdir hech sabab. Asrashga qodirdir nahotki meni Xazon g‘azabidan Shu bir og‘iz gap?!.. Boshdan oyog‘im nur, Boshdan oyog‘im... @halima_ahmad