📓Usmon Azim

* * * “Кузни севасизми? - деди аёл. – Келса, кузда роса кезамиз ҳали. Бирга томоша қиламиз. Жуда гўзал бўлади куз. Йўқ, фақат сариқдан иборат эмас кузнинг ранги. Сариғи - юз турфа. Қизғиши - минг хил. Қирмизи – минг хил. Жигарранг баргларни ҳам топасиз. Қон бўлган жигардай... Ўшанда ҳувуллаб қолади юрак. Сизни соғинаман ўшанда. Ёнимда турсангиз ҳам сизни соғинаман. Ёнимда туриб, олисларда бўлсангиз ҳам сизни соғинаман. Ёнимда бўлмасангиз ҳам...” Шундай деди бир аёл баҳорнинг энг гуллаган чоғида. “Қачон айтган эди бу гапларни? – ўйлади эркак. – У ҳозир қаерда? Қачон кўрган эдим? Яна учрашганмидик? Нега уни соғинганим соғинган? Ёнимда бўлмаса ҳам, нега уни соғинаман? Ёнимда эдими ё? Ҳозир ҳам ёнимдами? Ёнимда туриб, олисларга юрганмикан эҳтимол?..” Тақдир чалкашиб кетган. Куз эса худди ўша аёл айтгандай: ҳатто жигарранг барглар ҳам бор. Қон бўлган жигардай... Усмон Азим https://telegram.me/usmon_azim

* * Мен сенга осмонни келтирдим, севгим, Анов икки тўзғин булути билан, Нимта ойи билан, Ҳудуди билан — Мен сенга осмонни келтирдим, севгим. Мен сенга баҳорни келтирдим, севгим, Ёмғирлари билан, Селлари билан, Гулларни уйғотган еллари билан — Мен сенга баҳорни келтирдим, севгим. Мен сенга саодат келтирдим, севгим, Кўнглинг равшан бўлсин — Чироғи билан, Бедорлиги билан, Чарчоғи билан — Мен сенга саодат келтирдим, севгим. Сенга бир тинч дунё келтирдим, севгим. "Мана, олгин, дедим, Ҳамма нарса тахт — Мана бу меҳрдир, Мана бу-чи — бахт..." Сенга бир тинч дунё келтирдим, севгим. Севгилим, подшоҳлар сендай сахиймас — Менга баҳори йўқ куз келтирдинг сен. Яна осмони йўқ рўз келтирдинг сен, Севгилим, подшоҳлар сендай сахиймас. Қатра иқболи йўқ куз келтирдинг сен. Энди иккимизда ҳамма нарса бор! Қани, кетдик, жоним, Бел букилгунча, Томир узулгунча, Жон тўкулгунча... Яшашга иқрормиз, ўлимга иқрор. Усмон Азим https://telegram.me/usmon_azim

Сахродаги дарахт. Дарё йўлин бурди. Дарё-хиёнат. Қушлар, боғлар, воҳа-хиёнатга қул. Фақат саҳро қолди-тўзғиган офат. Ёлғиз дарахт қолди соғинчда машғул. Қуёш шаршарасин дарахтга тўкди. Севги изҳор этди шу тахлит сахро! Қумли лаби билан баргларин ўпди, Оловли қучоқлар айлади барпо. Дарахт жим термилди саҳро сатхига: -Қайда кун кўрмайин подшоҳдир тақдир. Мени бўғиб ўлдир иссиқ бағрингда, Ёҳуд саксовулга тезроқ айлантир!... Усмон Азим https://telegram.me/usmon_azim

ЎЛИМГА КЎНИКМАГАН УЙ Аёл ухлаб қолди охири. Юраги сиқилиб деразага боқди эркак. Қоронғулик. “Қўркмайсанми болам, қоронғуликда?!”... Аёл чўчиб уйғонди. Алла айтди хириллаб- (Йиғи томоғини бўққан) Ва шошиб тебратди бўм-бўш бешикни. Усмон Азим https://telegram.me/usmon_azim

* * * «Мени қарғишинг урди», деди эркак. «Мен сизни қарғамаганман», деди аёл... Эркак жим қолди. Англади, Демак, уни Худо урган. Шундай аёлни ташлаб кетгани учун Худо урган!.. Усмон Азим https://telegram.me/usmon_azim

Соғинишдан ўтдим... Кетар йўл, туман- Сенсизлик дунёнинг қучоғи музли. Уйғонмоқ оғир бу йўқлик уйқудан- Ҳамма нур тарк этди кул чўккан кўзни. Соғинчнинг гуллари! Қоп-қора гуллар! Гул эдинг барибир! Гул эдинг ахир! Даҳшат сукунатда чўкди қайғулар Боғларида гули қолмаган тақдир. Қолдирган дунёнгда бўм-бўз кезаман, Ҳечликнинг ичида ҳечман... Ҳечман... Ҳеч... Жунжикиб сезаман, тўниб сезаман- Қуёш ботиб кетди. Қуёш йўқдир. Кеч. Усмон Азим https://telegram.me/usmon_azim

КУЗ КЕЧАСИ Хазонрез. Куз етди юракка — Маромни бузди. Заъфарон юлдузлар кўлмакда — Кўкда ҳам кузми? Шамолда шовуллаб дарахтлар Тунга таралди… Негадир йиғлади бир одам — Кўнгил яралди. Усмон Азим https://telegram.me/usmon_azim

МЕҲРИБОНЛИК УЙИ Бу уйда меҳр кўп – аммо Онанинг меҳри қаерда? Отанинг меҳри қайда? Болакайлар эса ғуссага ўхшар... Дунё! Эшитяпсанми, дунё! Яна келганимда, болалардан бири ҳам қолмасин бу уйда. Онадай бахт олиб кетсин уларни, отадай бахт етаклаб кетсин... Эшитяпсанми? Дунё эса жим турар. Ота-онадай бахтни қаердан топишни билмайди бу дунё. Усмон Азим https://telegram.me/usmon_azim

*** Қанотлари кесилган қушлар Ер ҳукмига этиб риоя, Умрларин этагин ушлаб Яшайдилар монанди соя. Тушларида энтикиш, парвоз, Аммо тушнинг умри қисқадир. Ҳамма ташвиш – бахтга иқтибос, Чин ҳаётдан чала нусхадир. Усмон Азим https://telegram.me/usmon_azim