شێعرێ هەورامیێ

هەو شلێ گیان! چن بە عەزرەت ئامشۆو یانەیتەنا چن بە تاسەو تاڵەتاڵوو زوڵفێ سەرشانەیتەنا بێ‌ڕەحم! ئیتر وەسێشا چی قژێ تاتا کەری مەر مەزانی پا عەزابەی عومروو من کۆتا کەری؟ هەو شلێ گیان! من مەسوو تۆ و تۆ شەراوی هەسمەنی هەنگەنا نیشوو لچاتەو، تۆ گوڵی نەوڕەسمەنی وەختێ زانی فه‌وتنۆم چاڵەو گوپیت تر چی خوی؟ هەنگوین وارۆ جە دەمتەو، چن بە عیشوە و ناز دوی تۆ هەسارێ و ڕووجیار و مانگەنی هەو چەم گەشێ تۆ نەمامی تازەیاواینی ئەرێ باڵاوەشێ سۆنەئاسا مویەری و ڕەوتێ کەری، چی وەربەرەو پەی تەماشەو ئا چەماتە تاسەما لایێو کەرەو گیانەکەم! ڕێزان گەڵاو داروو خیاڵیم دوور جە تۆ دەی وەسێشەن ئینتزاری، دا وەهاری بارە بۆ #که‌یوان_موحه‌ممه‌دی @hawramyanah

(تەنگەن هەناسەو پەنجەرەی) کێ وەهارێوەش دیەن ڕێزۆ گەڵا گەردەلوولەی هۆرکەنۆ داری جەپا ڕاو ژیای پەڕ بۆ دڕێ و پای پاروا ڕۆڵەکەو ئاواتەکەیم نیاوۆ سەرا یانە تەمیان و کپەن درزوو بەرەی سەردەمەی تەنگەن هەناسەو پەنجەرەی هەر کەسەی پاڵاش ئێنا پاو وێشەنە تۆشەنانەو سەختەڕای نا مێشەنە وێش بە حەق زانۆ جەئەسڵ و ڕیشەنە کەی بە فکروو چارەیەن چی کێشەنە کێت سوراغەن وەر بڏۆ کڵاوەو سەرەی سەردەمەی تەنگەن هەناسەو پەنجەرەی چێش جەیاگێ وێش مەنەن چی‌شارەنە ئا نە بەرز بێ و یاگەڕێز، نا وارەنە چێ سەوای ئاواتەکان ، نا پارەنە گۆش کەڕەن ، حەق بژنەوۆ هاوارەنە هۆرپڕۆ هەر یاگە شێرەی ماهەرەی سەردەمەی تەنگەن هەناسەو پەنجەرەی دۆس و ئەغیار نای جەیەک لیباسەنە ڕاوکەروو شێر و پڵەنگی ڕواسەنە ئا کەسێ فۆتیای ئەچی لێڕاسەنە هەر ئمێڏشان دووششەی‌بێ تاسەنە وەرگەمێشێنێ مەوان دۆسوو وەرەی سەردەمەی تەنگەن هەناسەو پەنجەرەی ئاسمان تاریک و تووڕەن هەردەمەی وێڵ بیەن فکر و نیەن خاتر جەمەی هەر دڵەن شیویان بە تاڵاوەو خەمەی گیان چ‌سووکەن دەرحەقوو نانەو ژەمەی جار دڵەی تەژنەن بە زاموو خەنجەرەی سەردەمەی تەنگەن هەناسەو پەنجەرەی #ڕەحمەت_سەففاری ( #شەفەق ) @hawramyanah

زوانم پردێوە جمێنە    فرەسەتێ تۆ نمەیش پۆرە                                      عەبدوڕەحیم سەعید گوڵکار داخێنێ داخێم ، داخێنێ داخ کریاو داخانا . داخێم  ، داختەرێ با داخیێ مەراقانە . جە عەزڵۆ بەداخاوا گه ره شێل کریانا دڵم سەرداو بێ مەیلی و دووری تۆ بەردەن دەمەرە . دەمم  پردێوە جمێنە نامای   نامێ تۆ گوزەرنەکەرڎە کۆراوێیم  مارۆرە ملو نامێ وڵاوێیای تۆرە  . وەشی ، وەشحاڵی سیابەختی وێمەن . ڕوێێ نەڎەیم بەی وەرو ڕێمەرە ، ئاخ و داخ و مەراقێوەم بەزوانی وەش دەرونی سۆتەمەنە بەبێ تەرس بکێشیش سەرو دمەیەرە  . دەسان دەسوو بێ کەسیم تاوەو فرەیی مەراقانە دەنگش سەرو دەروازەو باڵەخانەو ئەنجۆمەن و نەتەوە ێۆ کوشەکانە ڕۆی ڕۆشنا دریان دارو ئاڵۆچیانەرە  . پەلەوەرێ  باڵ مەڕیانا دلێ واگژە و ئاخ و داخانا بیەنا   خانو خانا پەی  داخا داخێیێ  داخانە زەمانەی چەوێڵی کردەنا بووڵە و بانا  . باخ و داخام سەرسەوزێنێ هێناسێ کاڵێچم تووڵە نەمامێ خەمام  ملاونا بەخەم و داخاوا سەرەمنیا سەرو شانەو ێۆترینیەرە تا مەراق نەکەرا بێ کەسیێنە . شەوگار تا سۆحێ دەموو ێۆترینیوە داخو خەما چنا حەوزو خەمامم قووڵ و بێ بن بیەن خومخانە و داخام ئەرە نیشتەی مەزانا قازانێناوەنا  قوڵێ مڎۆ گوڵاو گێرو ، جە خەمخانە و تۆنە . دیوەخان و مەراقام ژڵێوەش مێ جە مێمانی خەمبار/ مەراقە تازا . سۆچیا و چیاوە بییەو  وەربەردەو وڵاوییاو ئاخ و  لەیلێوەنا داخ کریاو سۆچیاو چیاوە بێیەی مەجنوون بیەیی ، وێم پەی وێمەنا . هێناسێم  کاڵێنێ ڕەقم بەردۆ دڵم سەردشا دەمم پردێوە وڕیێنە نامێ تۆش نمێ پۆرە . دەرونم سۆچیانو دڵ و جەرگم بەبریان کریان ئەوجا بەتاڵان بریان . پەلەوەرێ  باڵ مەڕیانا دلێ  واگژەو داخانە ، داخکریانا دلێ  چەوێڵی  ئیی چەرخە دڵڕەقەیەنە .                         هامنوو    ۲۷۲۲ @hawramyanah                               ★★                           ★★

وێرەگا یاوان ڕەفێقێوە هەژار ناوەش و دڵ پەڕ جە زام دەردٚەدٚار دیم گەڵاو ئازمایشێوەش نا دەسۆ ناڕەحەت بیانێوە جەرگم بی بەسۆ لێ دەسیشۆ دیان بەرگوو نامەکەیش ئادٚ خوێ و ئەم ناڕەحەت بیانێوە پەیش شادٚ بێ واچێ خودٚا وێش عادڵەن چی وەڵێ واچێنێ چێمە غافڵەن مەر بوەخشینم خودٚا کفرم فرەن واتەنم بارها خودٚا وێش کافرەن یانە بێ ڕۆن و برێنج و بێ قەنەن قاولەمێ بێ گۆشت و هەر ئاویش چەنەن ئننە ناشوکریم کەردٚەن خالقی پەی لەمێوە تاموو تێریو تاسقی ئیسە زانانم بە عەدڵ و حێکمەتیش چن رەدیفی نا خەزێنە و سنعەتیش پاسە دیم زانام جە قەورێ ئامەنۆ یا پەنەم نمواچۆ گەنجش ئێسەنۆ واتم ئەی وەشڵەت پەنە چن شادٚەنی چننە ڕۆحت سووکەن و ئازادٚەنی ئیسە وەشحاڵیت جە چێشین واچە پەیم تۆ کە سەر تا پات جە ئێشین واچە پەیم واتش ئارۆ دوکتروو زاموو دڵیم دیاوە لێ ئازمایشانوو موشکڵیم دوکترم واتش خودٚا ناورۆ وەرۆ ! قەن و چەوریت چن فرەن چن نا سەرۆ ! تۆ ئیتر مەشیۆ برێنج و گۆشت نوەری شیرینی و قەن لێ خوراکیت لاوەری هۆرمنوو کەرگێ خەتەرناکەن ئەمان میوە گردٚ کوودەن سەمێوەن بێ گومان نانە قەننش ناسەرۆ نانوو یەوێ خاس و هەرزانەن وەرەش سۆح و شەوێ شش سەعاتێ تاقێوە داروو وەری گردٚە ڕۆی پارێز کەری ، نان لاوەری واتم ئەی دوکتر ئیتر بێ خەم بیان خودٚا جەزات دۆوە ئەپێسە ڕازیەنان دەی خودٚا شۆکرت کە خەرجم کەم مەوۆ پێسە کەم کەم دوێ قەرانێم جەم مەوۆ دوێ قەرانێ جەم مەوۆ گێرفانە، پەی دوێ سرۆمێ شەربەت و حبێو سەرەی ئارۆ بێ ڕوەن، بێ برێنج و گۆشت و قەن گردٚ گەدٚان ئەم دەوڵەمەن هەی دەوڵەمەن #سه‌یێد_ڕه‌حمان_مه‌حموودی @hawramyanah

ئەشقوو تۆ سەرسەری نیا پێسەو جامێ سەرش کەروو چەنی شۆتۆ ئەدٚێم ئامان ,چەنی مەرگیم بەرش ڪەروو ✍#ڪەشەوان @hawramyanah

وەروە بوارە دڵوەشیم تەنیا بە تۆوە هەر مەنەن خەیلێن دڵم جە دڵوەشی گردٚوو ژیانی دڵ کەنەن شیرین نیەن تاموو دەمی تارەن دلێ دیدٚەو خەمی تۆ بۆ کە چەرمەو چەمیەنی شێوەت بە شێوازی قەنەن ڕەنگاوڕەنگوو بەرگوو من، ئیتر نمەگنۆ قامەتیم ماسۆڵە بێنێ تۆم دیەی ئیسەیچە کەفنوو تۆم سەنەن ڕۆجیاروو ئێمە زوو پڕان، خاکوو وڵاتی سەردٚەن و تۆمت بپاشە و نیشەرە، دڵسەردٚ سەردٚی تۆش چەنەن سەردٚەن قەراروو دڵوەشیم ئیتر ئومێدٚێوەم نیەن خەیلێن یەخ بەستەن دڵم یەخ نا ئه‌جۆ هەر ئاسنەن دڵ نا جە ئاتشگا بەڵام سەردٚەن مەتەرسە وارە بۆ یا نا جە پەشتەو زاوڵی دڵ کەی جە ڕووم و لەندەنەن من مەژگوو میشیاویم چەنەن بێ تۆ وەهارێوەم نیەن ئاخۆر چنوور و بەرزەڵەنگ دڵشا بە تۆوە هەر بەنەن هەم پەی سەرەی هەم پەی دڵی سەیێدٚ وەشش مسیەی نەلی چەرمەو چەمانت، واتەنم چن بێ گومان و بێ زەنەن #سه‌یێد_ڕه‌حمان_مه‌حموودی @hawramyanah

ژیوای نەد٘اری ، نمەزانی تاڵا قەتارەو خەما، بەد٘ یومن و زاڵا؟ ئەگەر تۆ زانی، نەد٘اری  زاڵا وێرەگا بۆنە، نەبیەی ڕەجاڵا! مەحاڵا دەرد٘ەم، ئەر تۆ نەزانی تۆ بد٘یە لاوە، هەناسەم کاڵا سەروو هەواری،دەیمێ بە یەکجار هۆرکەنمێ خەمێ، ئانه‌ کەماڵا پاسە مەزانی خەم بەردەواما ئینە گرد٘ وەرمەن یام کە خیاڵا دەوارێ بەسمێ جە سەرکەشاوە دۆس نەبۆ چاگە گرد٘ش بەتاڵا! پەناما خود٘ای گەورە و بێ نەزیر هەوارگاو دۆسی، ماواکەش دڵا #هومایون_موحەممەدنژاد @hawramyanah

سیاووینی ماچا: سیاوویننا و ئۆمێدٚ شێعرەمنە نەدٚانش پەڵە! چی سیاو نەوینوو، وەختێو ساباتوو مننە هەڵۆ، ملکەچوو دەسەڵاتوو "قەل"ین و کاوەتری، ئازادیش بە دانی ورەشۆ  و کەرگە، هێڵەژەرەژی پەی براکوشتەی هۆرمارۆ! چی سیاو نەوینوو وەختێ، ڕۆم، شەوتەر جە شەوێن و حەزێم لارەمل و قەڵەمم لچ‌پڕووزیاو تەنوورەو دەردانە؟ چی سیاووین نەبوو وەختێ موینوو، شێعرەما لچ‌پەڕوو گوڵ و بوڵبوڵین و ژیوایما پەڕ جە تڕحێوین! دەی با زوانوو شێعرێم ئیفلیج بۆ تەسویر و خوازەم، سوویا وەختێو جووڵەم، ڕەمای بێ‌جووڵەو ئەسپێوە دلێو تابلۆی مشۆ بە دوێ بزمارێ، دیواروو یانەیمۆ دریان قەنارە! چی سیاووین نەبوو وەختێ ویژدان پاژنەو بازاڕینە خنێڵا و هەشپشی، هەمارەکانە بە قووتیم خلێرانی کەرا! نە دڵداری قولەبانا باوش مەنەن و نە ماچێ کافی‌شاپی، لەرە وزۆ ئێحساسی! وەختێ وەشەویسی بە گەرمی باخەڵێ  و مودێلوو ئوتۆمبێلی باڵا کەرۆ چی سیاووین نەبوو؟ وەختێ نەهەو ژیوایما بە گلکەو سەروو ماشەی و سیاسەتوو بارووتی بەندٚا با هەر واچا سیاووینا وەختێو هەرچی ڕوێنێ، دڵ پەرسەشا و چرکێو هەزار فاتێحێ پەی ژیوای وزۆرە کڵپەی گڕینوو زوانیم، ئاویرش کەردەن پاو شێعرێم! با هەر واچا... ئینە دەنگوو من نیا هاواری کپیاو میللەتێوەن سووری ونێشا، ئینا قۆزەکوو پاو "بیتکوین"ێوەنە عەمرێن، کۆڵبەروو هۆمێدٚینا و جەردێ نمازا بیاوۆ بارگا ئاااااخ سەرەم! دوکتور! هانامەن، ترامادۆڵێوە...! #شارۆ @hawramyanah

«شه‌که‌ته‌نان شه‌که‌ت لالۆ» شه‌که‌ته‌نان شه‌که‌ت لالۆ ده‌سوو وێمه‌و ده‌سوو شاریه‌و ده‌سوو وه‌ریه‌و ده‌سوو هوایه‌و ده‌سوو مانگێ ده‌سوو خودٚایه‌و ژیانم بیه‌ن قه‌ره‌ لالۆ شه‌که‌ته‌نان فره‌ لالۆ شه‌وه‌م شه‌وگاروو پاییزی ڕێوم ده‌یجۆروو ئازیزی نمام وادٚه‌و گه‌ڵاڕێزی جه‌مین ماچی ڕوه‌و دێزی وشکه‌ن هانه‌ و ده‌ره‌ لالۆ شه‌که‌ته‌نان فره‌ لالۆ شیویان سات و مانگ و ساڵم دیویان دیسان نه‌حسی تاڵم مڕیان هه‌ردوو لاق و باڵم ڕنیان جه‌ باخ مێوه‌ی کاڵم یانه‌م نیشته‌ن هه‌ڕه‌ لالۆ شه‌که‌ته‌نان فره‌ لالۆ ساڵه‌م یه‌کسه‌ر بێ‌وه‌هاره‌ن که‌ش و کۆ مات و ئه‌وگاره‌ن خاکه‌لێوه‌م په‌نج و تاره‌ن هه‌رچی ساڵ خۆزگه‌ وه‌ پاره‌ن سۆتێ وه‌نی و نه‌ره‌ لالۆ شه‌که‌ته‌نان فره‌ لالۆ تاریک بیه‌ن یانه‌و دڵی نمه‌شنیۆ لام ڕوه‌و گوڵی قه‌دٚاخه‌ن ده‌نگوو بوڵبوڵی بووڵه‌ وه‌شتێنه‌ زاوه‌ڵی شادٚی نمه‌ی به‌ره‌ لالۆ شه‌که‌ته‌نان فره‌ لالۆ شه‌ماڵ بیه‌ن تۆف و زلان ڕواسی بیێنه‌ قازی که‌ڵان بانگوو مزگیشان دان قه‌لان دیواخان بیه‌ن یاگێ شه‌لان شێتخانه‌ بیه‌ن مه‌ره‌ لالۆ شه‌که‌ته‌نان فره‌ لالۆ هه‌ڵۆی ئاسمانی مه‌ردێنێ قاڵاو قسێش زلێ بیێنێ ژه‌ره‌ژی خاڵێش شه‌ردێنێ قاچێ شێریشان مه‌ڕدێنێ وه‌رگێ بیێنێ وه‌ره‌ لالۆ شه‌که‌ته‌نان فره‌ لالۆ مانیا و لێوه‌ و هه‌رده‌نان همه‌ی پڕچن جه‌ ده‌رده‌نان جه‌ ژیانی دڵسه‌رده‌نان دره‌ختێوه‌ پایوه‌ مه‌رده‌نان نه‌مه‌نه‌نم وره‌ لالۆ شه‌که‌ته‌نان فره‌ لالۆ لالۆ هه‌وارێ چۆڵێنێ بیرێ خه‌مان فره‌ قووڵێنێ نامه‌ردێ پیاماقووڵێنێ ڕه‌فیقێ گردٚێ زۆڵێنێ ڕه‌هنه‌ما بیه‌ن هه‌ره‌ لالۆ شه‌که‌ته‌نان فره‌ لالۆ لالۆ ڕاو ڕاسی سه‌خڵه‌ته‌ن به‌شوو ڕاسواچی مه‌ینه‌ته‌ن وه‌ڵادیموو سکێ شه‌هوه‌ته‌ن دانسقه‌و لێمان غیره‌ته‌ن گه‌وادٚ بیه‌ن پیای سه‌ره‌ لالۆ شه‌که‌ته‌نان فره‌ لالۆ کۆن سیاچه‌مانه‌و هه‌واران کۆن که‌پره‌ و تارمه‌و که‌لاران کۆن زرمه‌و ناڵوو سواران کۆن گه‌له‌ پاڵوو دواران هه‌ڵیزه‌ بێ‌که‌ره‌ لالۆ شه‌که‌ته‌نان فره‌ لالۆ کۆن گیانوو ئه‌من و گیانوو تۆ کۆن سه‌وزایی چنوور و لۆ کۆن وه‌رکه‌مه‌ر تا که‌رمێش بۆ کۆنه‌زامان ئاماینێ سۆ بووه‌کۆره‌ بیه‌ن سه‌یره‌ لالۆ شه‌که‌ته‌نان فره‌ لالۆ کۆن ترووسکه‌و چراوه‌و که‌وێڵی کۆن یه‌کڕه‌نگی گردٚوو خێڵی کۆن قه‌سه‌موو تاڵوو سوێڵی کۆن وێژدان به‌ جیای به‌رتێڵی پاژنه‌ بیه‌ن سه‌ره‌ لالۆ شه‌که‌ته‌نان فره‌ لالۆ دڕه‌ و داهاڵ سه‌روو ڕایه‌و په‌نگه‌ڵ وێش چه‌سپنان مایه‌و ژیان دریان ده‌سوو وایه‌و گیرما وارده‌ن ده‌سوو شایه‌و بنچینه‌ که‌وت له‌ره‌ لالۆ شه‌که‌ته‌نان فره‌ لالۆ کۆن مه‌وله‌وی واچم خاڵۆ وێش‌ئاسای قۆڵێ هۆرماڵۆ ده‌مش سه‌روو خاڵان ماڵۆ تۆموو عه‌شق و وه‌فای کاڵۆ بۆ به‌ خه‌مه‌وه‌ره‌ لاڵۆ شه‌که‌ته‌نان فره‌ لالۆ ئاخ په‌ی سه‌یدی ڕاوه‌ به‌یۆ ساتێ جه‌ لامانۆ سه‌یۆ که‌رۆ هاوار ده‌م به‌ مه‌یۆ خۆ کافرستانی نیۆ بچنۆ باڵاشه‌ره‌ لالۆ شه‌که‌ته‌نان فره‌ لالۆ په‌ی قادٚری و لێفه‌شڕه‌که‌یش په‌ی هاواری و دڵه‌په‌ڕه‌که‌یش په‌ی قه‌ڵاخوانێ و ده‌ره‌که‌یش په‌ی مه‌له‌ به‌رزه‌فڕه‌که‌یش کۆله‌ی که‌رۆ گه‌ره‌ لالۆ شه‌که‌ته‌نان شه‌که‌ت لالۆ په‌ی عه‌شقه‌که‌و جه‌هان‌ئارای چه‌نی خه‌می وێش ونارای دڵ به‌ شه‌ره‌فی سپارای په‌ی پاییزی و خه‌زان وارای وه‌فاش که‌رد به‌ ماره‌ لالۆ شه‌که‌ته‌نان فره‌ لالۆ خه‌ڵکی په‌شێو و ماته‌مه‌ن خێڵخانه‌ی مه‌ینه‌تشان جه‌مه‌ن ئانه‌ فره‌ بۆ، ده‌روون خه‌مه‌ن مه‌رده‌ی ئاسان ژین ئه‌سته‌مه‌ن قه‌ورسان بیه‌ن مه‌نزه‌ره‌ لالۆ شه‌که‌ته‌نان فره‌ لالۆ ئاخ په‌ی مه‌ردمه‌که‌و جارانی وێش بدٚو وه‌روو وارانی بلۆوه‌ هه‌واروو داڵانی خۆرێڵه‌ و میشاو و هاڵانی دیسان به‌سۆ که‌پره‌ لالۆ شه‌که‌ته‌نان فره‌ لالۆ لالۆ توو خودٚا تۆ بۆرێوه‌ سه‌رده‌ن با ئه‌یره‌ێ که‌رمێوه‌ ده‌ورشه‌نه‌ جه‌مێ بێمێوه‌ سرووده‌و گاتای بوانمێوه‌ واچم زاڵم بمره‌ لالۆ شه‌که‌ته‌نان فره‌ لالۆ به‌ڵ ئاته‌شگا ڕۆشنه‌ بۆوه‌ شه‌وقش وه‌ڵاتی گێرۆوه‌ تاریکی وێش بشارۆوه‌ پنداری نیک دیسان به‌یوه‌ درۆزن بلۆ مه‌ڕه‌ لالۆ شه‌که‌ته‌نان فره‌ لالۆ #موعته‌سه‌م_شافێعی @hawramyanah

ساعبێ تاران، مەرگوو ترمیناڵی پاو داریت دیەن؟ وەستەرەی ڕۆحوو هەناسەی پەی ئەوەڵ‌جاریت دیەن؟ جادٚەپیمای نیمەشەو، ڕازەی نەواچیاو ویرەکا پەی لوای تا ئەوپەڕوو ژاروو سەروو زاریت دیەن؟ ماتوو تەنیایی دلێو قاڵوو ترووکناو بێ‌کەسی پاڵدەسی تەنیاتەری دۆسوو خەفەتباریت دیەن؟ ساکەکەو بێتاقەتی کێشماڵوو ڕەنجوو شانەکان قورسەباری تاڵوو بێ‌تۆیی دلێو شاریت دیەن؟ هەر مەبڕیۆوە شەوەو ڕاو دەس بە فەرمانەو خەمی سەر وزی سەرشانوو شیشێ و حەسرەتوو پاریت دیەن؟ دڵ مەتاوی گێری کۆڵێ و ڕوو بە ئیجباریش بەری پەی نەیاوای وەزیەرە و یاوای بە ئازاریت دیەن؟ چەم جەماموو دەنگێوی نائاشناو گۆشوو دڵین پەڕ بیەو تاکسی مەسیروو دەربەسی یاریت دیەن؟ پای تەقالاو ئەو دمایشان، بانگوو ساعبوو غوربەتین ترمیناڵوو پەنجوو ساعبی و حاڵوو بێزاریت دیەن؟ #خالێد_ئه‌حمه‌دی @hawramyanah

پاییز! وەسێشا کەم گەڵا ڕێزنە خەمێم فرێنێ و سەوزێم مەدێونە! خەزان خۆ ناستش، گەڵا جە دارا واچدێ بەیاوە ناسک نازارا بازە با شەماڵ وەهاری بارۆ سپاو گوراڵا دیسان ونارۆ ✍ #هومایوون_موحەممەدنژاد @hawramyanah

هێشتا دڵەکەم هەر بە تەماو تۆن و بەتاسەن هێشتا بە ئومێدٚت نەفەسم گەرمەهەناسەن هێشتا شەوێ تا سەعبێ خیاڵت مەشۆ سەرنە گیانم بە خڤەو تۆوە لکەم دان و وراسەن شاهێدو منا دەفتەروو ئەشعاری خەمینیم تیشكێوەم ئەچا عەشقی گەڵایێرە کیاسەن ڕازی ‌بە بە مەرگوو خەموو هێجرانی هەناسەم چۆڵا بەر و بوومێ تۆ نەبی چن کەڕ و کاسەن دووکانێ کە نریابۆ سەروو بانێ قەدٚیمی بێ ڕەونەق و چۆڵ ئی دڵە بازارێ کەساسەن کەس تۆنی نەفەس تۆنی ئومێدٚ تۆنی مەسیحا بۆ زیننە کەره‌و ئی دڵی، خەم وه‌رم و خوراسەن چن حاڵوو دڵی فاڕۆ کەسم بەزموو حزووریت. لاو مەشرەبوو عەشقیوە بیەیت ئەسڵ و ئەساسەن #ئاڵۆز @hawramyanah

ماتی یە هەن سەرەش ئامان عەبدولڕەحیم سەعید/ گوڵکار دەلاکش نیا بادٚی هەوان تا سەر و سمێڵێش تاشۆ هارتەر و زوان د ر ێ ژا بێ دەنگی ★ قیراوە بۆ زاڎ چەشتەی بە لارە ملی با حەر مە ڕ ی ۆ هۆڕێ بێ دەنگی . ★ جاڕەشەنە کۆنە دانەو بێ دەنگی پەی که‌وتەی ڕای کاروان و قرمە و قاڵی . ★ بە هەوانتە چەنی تەژنایی پەی تەژنایی ئازادی مەماڕێۆ بێ دەنگی سویش نەبۆ سەرەشەنە . ★ جە بێ دەنگینە چن وەشا دەسێو باڵێ زوان مەڕیۆ تەقا ڕانێ ئەر تار نەنرێوە ئی ماتیە ★ بێ دەنگی ماڕۆش ؛ نۆتە سەدٚان ئی ماتیە بۆنە هاوار ، مۆزیک و دەروونیەنە! ★ دلێ وێ نە قووڵایی ڕۆحی و گیانی شیرنیەنە ماتی یە هەن سەرەش ئامان ئامان سەرەش مشۆ ماڕۆ زوان و بۆ هەزار تیکی سامناکی ئی بێ دەنگیە ! ★ سەرەش ئامان سویش ئامان سەرەشەرە ماڕۆ سامناکی ڕۆزگاروو ماتیو فەلە بێ دەنگێ . ★ سەرەش ئامان با تاشیۆ سەرەش ؛ نەزڕیۆ مەڕیۆ بۆ هەزار تیکی ئی ماتی و بێ دەنگییە . @hawramyanah

ئەسەف چا ڕۆی کە هیچوو وێم سپاراری بە نیمێوە ئەسەف عەمرێ تەماموو وێم وناراری بە نیمێوە بیــــانێ وەرموو ئا شێتەی کە زڕیابێنە لێڵ و بووڵ بیا هەنگاموو ئا کۆرەی نەزانێ تەخت و نزم و قووڵ بڕێ  تۆ نەرمە وارانا انا الحق چەمنە مزیۆرە بڕێ تۆ هەورەگرمێوا بە هق هق دەمنە مزیۆرە خیاڵێت مەولەوی و هیتلر ئێرادەو من بەرا ڕارە گولوولێ یا خۆ هەرسی با جوانی من مدٚا وارە هەتا ئاویرەقوولەو ئی دلێ زاخیچ نەلۆ یەکسەر دەروونوو مننە تاریکی تەمامەن حاکما و ڕەهبەر بەڵام چی ڕانە وێم و تۆ و غەیروو توویچ نمێنێ لام حەکایەت! زاموو پەشتێمان و ئا شیشێ چڕێنێش جام #ناتێق_ئه‌داک @hawramyanah

خۆڵکنامە ئی جارە قەرار پاسەن هەناسێ شاهۆ و کۆساڵانی گوزەرشا گنۆ دامانوو ئاویەری و سەخاوەتوو ناسک خیاڵاو هەورامانی سفرێوی هەزار ڕەنگی شاعێرانەی پاییزانە پەی سەرجەم شێعردۆساو وەڵاتی یاوۆرە. پی بۆنەوه «کانوونوو ئه‌هوورای» پێسه‌و بنکێوی فەرهەنگی ئەدەبیو زانکۆ کورسانی و ڕاوه‌به‌روو ئی پاییزانه‌ شێعره‌ی بە شانازیوە جە شمەی ئازیزی داوا که‌رۆ، ئه‌چی گلێره‌وه‌بیه‌ینه‌ به‌شدارێ بیدێ. ئامایتا دڵگەرمی ئێمە و یەکدەنگی وەڵاتین

هەگبێوە وشێ گورج و گۆڵێ ئامێتەو خەزانی پەی سازنای ڕەنگاڵە شێعرێوە ڕەشبەڵەکشا، پەی زەماوندٚەو ئی‌ سەردەمی خێزنا خەیاڵم مرۆڤایەتی، ڕەنگاوڕەنگی وەڵگاشەنە پەی شادٚی ژیوای                    هەلاجی کەرێ! #شارۆ @hawramyanah

من ئاشق و تۆ فاتێحوو جەنگوو ئەشقوو وەشەویسی ئیساتێ کە، تۆ قارەمان، من بێ دیفاع ، بێ مدرامان ئامێنی و فەتحت کەردەنا بۆرێ وێرانم مەکەرە... تۆڵەو ئەشقی، وەشەویسین... ئاوەدٚانین ... کەرەم ئاوا با وێت تاوی چەنەم ژیوی بە بێ جەنگ و بە بێ داوا .. ✍️#کەشەوان @hawramyanah