شێعرێ هەورامیێ
1 105
Subscribers
+124 hours
+17 days
-430 days
- Subscribers
- Post coverage
- ER - engagement ratio
Data loading in progress...
Subscriber growth rate
Data loading in progress...
ئازیز وەهارەن ئازیز وەهارەن
دیسان سا دیسان فەسڵی وەهارەن
قاقبەو ژەرەژان نە پای کۆسارەن
قومری تووتیان نە پای جۆبارەن
سەرزەمین سەوزەن هەتا دیارەن
نەسیم فەرەحبەخش شکۆفە دارەن
زمستان لوا عومری دووبارەن
بوڵبوڵ جاڕ کێشا فەسڵی وەهارەن
هەر ئاوەن کنیۆ چوون بلووری ساف
وێش وزۆ بە وار نە قەڵوەزە و تاف
سۆسەن بە خەندە و نەرگسان چەممەس
بەردەن بە تاڵان غەمان بە دەربەس
هەوای فەرەحبەخش فەسڵی وەهاری
ساز و ئاهەنگوو قومری وقەناری
تووتی گەناسەو کۆترەکەو زڕکەو
زەردەوەلەکە و پەپوەکەی بێخەو
ئی ساز و سۆزە بەزمی وەهارەن
غەم بارش کەردەن هەرکە غەمبارەن
گوڵی ئەرغوان چوون عەرووسی نۆ
ساڕیشش کەرۆ زامی کۆنە و نۆ
تەنتەنەی وەهار گوڵان هەزار ڕەنگ
جۆغ بەستەی مەلان بە نەغمە و ئاهەنگ
قەتارەی قازان پەی کۆی سەبەلان
چوون ئاواتوازان کەران دەسەملان
نە فەسڵی وەهار گردکەسێ شادٚەن
دڵەی من نەبۆ ڕەنجش بەربادٚەن
دڵەی من نەبۆ حەدیقەی غەمان
نە وەشی وەهار نە شادی دڵان
من پی حاڵەوە وەی بێقەراری
ئیجا بە من چێش وەشی وەهاری
شهوقی گوڵ زەمەق شکۆفەو دارا
ئیجا بە من چێش سەیری کۆسارا
وەنەوشە نە چەم رێحانوو باغا
عەترشا پەی من هەر ئاخ و داخا
«عەدمی» وەسێن ئی قیل و قاڵە
عومرێوە ویەرد ئامایش مەحاڵە
#مامۆسا_عهدهمی
@hawramyanah
👍 7
تاسەباریم شاتەوە یاوا و نەپەرساتەو وەنەم
دوورەپارێزیت جە لا باوا و نەپەرساتەو وەنەم
دڵ شکایەت لاو هەسێڵەو باخوو جێژوانی بەرۆ
زامێ چەقنا، مێخەکێ ساوا و نەپەرساتەو وەنەم
بەختەباروو تاقەتیم "قالوا بلا"ش بێ پەی چەمات
تانە لووتوو بێدڵیم تاوا و نەپەرساتەو وەنەم
دار و دەشت و ئاسمان و وەر، چەمێ بێنێ وەنەت
چن زەریفیت دابێ سەرکاوا و نەپەرساتەو وەنەم
ڕەوتە ڕاو یاوای وەشەسیایی درێژەو یاگە پام
لیزمە وارانوو خەمات ساوا و نەپەرساتەو وەنەم
بادیگاردێ سەیرێ عەشقیت تۆموو دەخڵێشا بڕی
گەنمەجاڕوو ئی دڵی ناوا و نەپەرساتەو وەنەم
تۆ حەکیموو هەرچی دەردٚێنی خودٚای دابۆش دەوا
لاچەمێوم کەردٚە بێ داوا و نەپەرساتەو وەنەم
#خالێد ئهحمهدی
@hawramyanah
❤ 4👏 2👍 1
وێزتەیهو
چکۆ بزانوو من
چنی ماتڵوو منەنی تۆ
تۆ چکۆ ماتڵوو مننی
چنی بزانوو من
وینوتوە.
★
چکۆ ماتڵت بوو
چنی بزانی تۆ
وینیمهو
چکۆ وینیمهو
تا بزانی ماتڵەتنا
تا بێزوتهو
★
ماتڵ مبە تا بزانی
منیچ مزانوو
تاڵاوەو ماتڵ بیەم
چنی واردێنهو
تا وێزتەیهوت
ماتڵ مبە تا بزانوو
تۆیچ تاڵاوەو
وڵاویاو من/ ت
بە چە ئێشێوە
چەشتێنە و
واردێنهو
★
تاڵاوە و
هات و نەهاتوو
نادیاری عێشقیا
دەلاقە بیەن بە چەمێوە
پەی دیای
تۆ بە بە چەم
با من پا دەلاقەرە بیێونە و
بێزوتهو
★
پا بە پا
تا پەی بەرمێ
بە یۆترینی.
ئیلا و ئەولا
وەر و دما
هەر چوار لاوە
ئیسەتێ ئەی هوون
هەوانتە
چنی یاومێ
بە سەوای
★
ئارۆ ڕوێوەن
بە پاخروا
بنیادٚم
بە پای پیادٚە
فەرامۆشیش
چکیانەرە
پا بە پا تا پەی بەرۆ
مەزانۆ کێ پیادٚهن
کێ جەمەنە دلێ یارانە
عاجز بیەن و
تەقیان تەنیایشەرە
#عهبدولڕهحیم_سهعید
@hawramyanah
👏 1
نشتمان
ئەی بیەو تۆ سەدٚ وجوودٚێش نای پەنە
بێ وجوودٚت وێڵەنان لێ وێمەنە
بێمنەت واچوونە تۆ دنیامەنی
سەرچەمەی پەڕ گەوهەر و هیوامەنی
ئاسمانتەو شێتەهەورەینان دەمەی
جار مواروو جار ڕفانۆم وادەمەی
ڕوو بە هەر لایەی بەرۆم، بێئێختیار
نا دمامەو چارەنووسەی نادیار
گا مەوێنوو ئینتزاروو لێبەران
گا جە حەسرەت وێڵەنان تا هەندەران
جار شەکەت مەگنوو مەنیشوو سەرکەشان
چۆڕەچۆڕ هەڵسی مجوو پەی بێبەشان
جار جە دەریا چوون شەپۆلەی بێقەرار
هەم کزە و تۆفانەکەت مەوزۆم کەنار
ئەم جە ئاسمان و زەمین بێزارەنان
هەرچی ڕا بێ واتەبێش دیوارەنان
مەر جە تۆ چێشم گەرەک بێ نشتمان
غەیر جە ئاو و عێزەت و یەک تیکە نان
پەی عەلاجوو زامەکانم پەی دەوای
بەش شنەو ئازادٚی بۆ سەوقاتوو وای
#ڕهحمهت_سهففاری (#شهفهق)
@hawramyanah
👍 3🔥 1👏 1
وارە واران پەی دەرداما تاوێو وارە بە دەرمانێو
خەمێ جەمشا جەما لاما یانەو دڵیما وێرانێو
بۆرێ واران یەواش نەم نەم وارە ملوو ھەناسارە
جەوھەری بێ ڕەنگ و ڕیا ملوو ئی دەنگ و باسارە
چەمێ ماتێ، خوێ لاتێ، پەیێ پاڵاشا بی پاتێ
دەسی ھاڵی چکۆ ناڵی؟ بێ ڕۆڵێنێ ئەدٚا و تاتێ
تکا واران سارا تەژنەن، ناڵەش یاوان ئەو گەردوونی
شەتوو دیدٚەی خرۆشیان و تانێ مدٚۆنە سەیحوونی
تکا واران زەمین ماتا سەوزە و گوڵێ ھەراسانێ
نەمامێ ئارەزووی مەردێ، یۆ یۆ بێ سەر و سامانێ
زوەن ھەراڵەو ئی دارا پڕووزیا و دیدٚە زامدارا
نە دێهات سەروەش و خوڕەم نە تامش ھەن وەشی شارا
بۆرێ واران ھەنێم ڕازێ باڵێ گێرانە ھامڕازێ
ملا و مازانێما تەنیا خەمێ کۆنێنێ با تازێ
بۆرێ واران عەزیز مەردەن دڵم ھەراڵەی ئاو بەردەن
جەسەو ئاواتەکا زامدار، سینەم کۆگاو خەم و دەردەن
بۆرێ واران دەسم گێرە بەرەم شۆنەو خەیاڵارە
دەسم بنیە دەسوو یاری سەرینوو وردەخاڵارە
چەمێ سەراسەر با جامێ عەزیزم وێش گنۆ دامێ
جە تاوەو وەشەسیاییما ڕەقیبێ بانێ سەرسامێ
بەرەم یاگێو سەرش جەنگ بۆ خەم و پەژارە بێدەنگ بۆ
چۆپی کێشۆ ڕۆڵەو شادٚی شنەو ئازادی سەرھەنگ بۆ
#ماریا_عهزیزی_هانه
@hawramyanah
👏 7👍 1❤ 1😢 1
بنویسە بە ئاوات وەنە تەگبیروو نەژیوای
بنویسە بە تەقدیر وەنە زەنجیروو نەژیوای
کێ هەن کە خەیاڵات نەبۆ هەمساروو پیاسەیش
کێ هەن کە جوانی نەبۆ سەرباروو هەناسەیش
دەردٚێنێ بیێنێ بە هەزار ساڵوو قەڵایێ
شەوقێنێ بیێنێ بە سەماو زەردٚە گەڵایێ
یاوێنمێوە پا تێژە بڕوو تێخوو نەیاوای
یاوێنمێوە پا تاڵە قــلەو بێخوو نەیاوای
بڕیاتەر ئەچانەینمێ ئومێدٚ ڕێزۆ خەماوە
سۆچیاتەر ئەچانەینمێ یەهەر تکیۆ چەماوە
زاخێوە جە لاشەی مەنەنۆ ڕۆحێ وناراش
کۆچێوە جە ڕۆحی مەنەنۆ لاشێ وجاراش
#ناتێق_ئەداک
@hawramyanah
❤ 6👏 1
ئەی تەماشاو تۆنە چەم تەرسۆ سەوای
بۆو وەشەسیایی مدٚەی و تاموو لوای
تۆ خەم و تاسەو دڵی لێوەیمەنی
ئاشنا پەی هەستە بێوێنەیمەنی
عەینوو مووسیقای حزوورت شادٚیا
پەی دڵیم شەوقوو مەبارەکبادٚیا
مەر تەمەنناو تۆنە دڵ وەش بۆ دەمێ
تۆ نەبی دەورم حەسارا و وادەمێ
ئەی ترازواو تۆنە نامیزانەنا
تا گران واچی هەڵای هەرزانەنا
پەوکەتی ڕەنجم مدٚەی و تۆریەی چەنەم
پاسە زانی عەمروو نووحی نا پەنەم
خۆ نەوەش کەوتەی بە یاو و لەرز نیا
قۆزە بەی شۆشێ هەوای مازا جیا
ڕاو هەناسەی فرسەتوو گیانی مەدٚۆ
پاو پەشیمانی پەلامارەت مدٚۆ
پەس نەواچی هەرچی واچوو هەر هەنە
بێوەفاییم کەردٚ و ئادٚە هەر مەنە
بازە با ئی دەردٚێ وێم واچوو پنەت
کاتێوەت زانا دڵم تۆریا چنەت
پێسە گۆپێوی وەهاری کوشتە بۆ
تاموو شەپڵاخەو تەوەرگێش چەشتە بۆ
تاقەتم تاق و چەمم مەدٚیۆوە لات
هێزوو زەنگۆڵاو دڵیم مڕیۆنە پات
#مانیا
@hawramyanah
👍 14❤ 7
ئی باخە ئەگەر ساڵێوەتەر پێسە بمانۆ
تاقانە ولەش مەگنۆ دەسوو حەزرەتوو وایۆ
تا کاوەترەو ئەشقی چەنش یانە بسازۆ
مێڕیۆوە لەق و پۆ جە کزەو هەور و هەڵایۆ
یاوای بە حەز و تاسە ئەپی حاڵە مەحاڵەن
مەر سەوزە بنیشۆ بە سەروو ئا زلە مایۆ
پەڕچینە دڕێ کەی مەکەران جەنگوو کڕێوەی
پی زقمە سەیەو مەرگی گنۆ سەوزە گەڵایۆ
ئەر بینە هەسارێوە بیاوینە بە ئاسمان
تا ویر بە زەمین تاسە کەرۆ نەی وەروو ڕایۆ
بۆ بدٚیەنە دار گێرە چەنەش دەرسوو ژیایی
مەمرۆ بە جەفاکاری زەمانەی، سەروو پایۆ
تا دەور و بەروو باخی نەتنمێ بە گوڕاڵێ
هەرگیز نمەکێشمێ نەفەسەی گەرمە جە نایۆ
ئی باخەیە با ئێمە کەرم یاگە ژوانەی
تا زەردەوەروو عمری مەنەن پا ملەگایۆ
#ڕهحمهت_سهففاری (#شهفهق)
@hawramyanah
❤ 4👍 1👏 1👌 1
01:01
Video unavailableShow in Telegram
قیبلهم ئێعدامم
شێعره: #میرزا_ئهحمهد_داواشی
ئهوهوانای: #فهرشید_ڕۆستهمی
@hawramyanah
❤ 10👍 3👏 1
وێ گۆڵدایێو سامناک
ڕاشاو من!
پەناوانە
فچنە گۆشوو وەهاریرە
جە کناچێوە
کە دەخیلش بەستەبێنە سەخاوەتیت
کە زایفەلەقوو حەزەکاش
بە هەزار هومێدٚێ
چرۆش کەردەبێ
چن یەسێ جە ساماڵی مشەمەر و
چن تیشکێ جە خەرمانوو ڕۆجیاریت
درێخ چی کەرد؟!
پەرسە کۆڵاناو هەورامانی؛
ئا کناچە هار و هاجێ
دامانشانە بێ
ویر ماراوە؟!
کە ئیسە
بوموو کۆلاوارەو سی ساڵەیینە
زەمینگیرەنە...
بە گردوو ئانیشا
یۆوەم نێگانە
زەردٚەخوەشا نیا!
حەتمەن واچە:
گردٚ زاندێ
چننە ساڵێن
نەوازیانهو
هیچ دەنگێو
دەساندەسوو گۆشاشنە
بەڵام
بەڵام کێ هەن بزانۆ؟!
چننە وەختێن
دەنگش
دەساندەسوو هیچ گۆشێونە
نەوازیانهو...
پەرسە
کێ هەن بزانۆ؟!
کێ ڕاشا؟
کە هۆکاروو بێدەنگیم چێشا...
پەی ڕەفێقێو شاعێری
کە واتش:
وەشی وەهنی و
خەمی پیر حەقیقەتا
نامێوەنە بنویسە:
داخۆم بزانۆ؟!
ئی کناچێ
کە تا مەرزوو هیلاکی
گژیاینە
گلکەچەموو ڕۆحیشنە
دەموو چن زاما و
چن قووڵە ترەکاش بێنابێ
تا وێ گۆڵدایێو سامناکنە
چەنی جریوەو زەردٚەخوێوە
پا بنیۆنە حەریمی ڕۆشنوو جە ئەدٚا بیەو شادٚی...
ڕاشا گیان!
ئی تەناقۆزی پەی گردوو دنیای شی کەرهو
کە کناچێوە
شێعرێش سنوورێ نمەژناسا و
وێش
ئوتاقێوە دوو دەر سێنە
شەو و ڕۆی
ورازۆ یۆرە...
#ژوان
وەهاروو۲۷۲۲
@hawramyanah
👍 5