مودەڕڕیس - Mudarris

فێرخوازانی قەدرگران، پاش ڕاگەیاندنی فەرمی مودەڕڕیس و گەیاندنی شوناس و پەیامی ئەکادیمیا، بە باشمان زانی لەم قۆناغەدا، مامۆستایانی ئەکادیمیاتان پێ بناسێنین. ​بەڕێزان: مامۆستا سەید عومەر ​مامۆستا ڕەوەند هۆشمەند مامۆستا سەردەم دەرباز مامۆستا کەیوان کاوە ​مامۆستایان، مودەڕڕیسی زانستەکانی قۆناغی یەکەمی ئەکادیمیا دەبن و لەگەشتی دوو ساڵەی زانستیدا، هاوڕێ و هاودەمتان دەبن. مامۆستایان و ئێمەش وەک ستافی ئیداری، تەواوی هەوڵمان دەخەینەگەڕ، زانستێکی پوختتان پێشکەش بکەین، بە شێوازێکی ئاسان و هاوچەرخ، بە جۆرێک کە پشتیوان بە خوای گەورە، کۆی چەمکە شەرعی و ئیمانی و زانستی و فیکرییەکان، لای فێرخواز بچەسپێنێرێت و ڕێگای مەعریفەی ڕووناک ببێتەوە. ​بۆ ئاگاداریتان لەپۆستی داهاتوودا، دەرگای فەرمی ناونووسین دەکرێتەوە و لینکی فۆڕمی تۆمارکردنی ناوتان پێشکەش دەکەین. هیممەتتان بەرز بێت و ئامادەبن. ​خوای گەورە، کات و عیلم و هیممەتی مامۆستایان و فێرخوازانمان بەرەکەتدار بکات. ​#ئەکادیمیای_مودەڕڕیس #دڵۆپ_بۆ_دەریا

​قوتابییانی خۆشەویست و دۆستتانی ڕێگای بەرز و ڕووناکی زانست، هاوتەریب لەگەڵ ڕاگرتنی بنەماکانی ڕاگەیاندنی فەرمی، بە پێویستی دەزانین فەلسەفە و لۆجیکی پشت دیزاینی لۆگۆی ئەکادیمیاکەتان پێ بناسێنین، کە تەنها هێمایەکی سادە نییە، بەڵکو گوزارشت لەڕوانگە و پەیام و قووڵایی ئەو گەشتە مەعریفییە دەکات کە پێکەوە دەستی پێ دەکەین: ​زانستی ڕەسەن و تەکنەلۆژیای سەردەم: ناوی (مودەڕڕیس) بە کالیگرافییەکی کوردی-ئیسلامی ڕەسەن نەخشێنراوە. ئەمە ئاماژەیە بۆ ئەوەی کە ئێمە دەست بە ڕەسەنایەتیی زانستە شەرعییەکانەوە دەگرین. لەهەمان کاتدا، بە ستایلێکی مۆدێرن و هێڵکاریی پاک کێشراوە، بۆ ئەوەی پەیامەکەمان بە زمانێکی هاوچەرخ و لەڕێگەی تەکنەلۆژیای نوێوە بگاتە هەموو ماڵێک. ​شوناسی نیشتمانی و کلتوری: لەبەشی سەرەوەی پیتەکاندا، نەخشی هاوچەرخی جەمەدانی کوردی بەکارهاتووە. کە گوزارشت لەناسنامەی کلتوری ئێمە و زانستخوازانی کورد دەکات، هەروەها خزمەتکردنی فێرخوازانی نیشتمان و گەیاندنی زانستی بەرز، بە زمانی دایک و لەسەر خاکی کوردان. ​دروشمی (دڵۆپ بۆ دەریا): ئەم دەستەواژەیە جەوهەر و لۆجیکی ئیمانی ئەکادیمیاکەمانە. ڕێگای عیلم و گەیشتن بە پلەکانی مەعریفە، بە یەک چرکە نییە، بەڵکو پڕۆسەیەکی بەردەوام و قۆناغ بە قۆناغە.​ هەر وانەیەک کە دەیخوێنیت، هەر لاپەڕەیەک کە دەیدۆزیتەوە، وەک دڵۆپێکی پڕ لەبەرەکەت وایە. کۆبوونەوەی ئەم دڵۆپە بچووکانەی هیممەت و ئیخلاسی ئێوەیە، کە لەداهاتوودا دەبێتە دەریایەکی قووڵ لەزانستی پاڵفتە، عەقیدەی دروست و کردەوەی چاک، کە کۆمەڵگاکەمانی پێ ڕووناک دەبێتەوە. ​ئەم شوناسە، دەبێتە ناونیشانی فەرمی سەرجەم بڕوانامە و کتێب و وانەکانمان. داواکارین لە خوای کارزان، هیممەتمان بەرز و هەنگاوەکانمان ڕاست و پڕ بەرەکەت بکات.

مودەڕڕیس دڵۆپ بۆ دەریا بەناوی پەروەردگاری زانای کارزان خۆشبەختانە ئاشکرا و بەرچاوە، کە بە بەردەوامی ژمارەی خوێندکارانی زانستە شەرعییەکان لەنیشتیمانمان، ڕوو لەزیادبوونە، ڕۆژانەش چەندین نموونەی بەرزی هیممەتی گەنجانمان دەبینن، لەفێربوون و فێرکردندا، سەرەڕای سەختی ژیان و کەمی دەرفەت. دەمێکە بە پێویستی دەزانین، لەو ڕووەوە خزمەتێکی شایستە بە گەنجانمان بکەین و پێکەوە لەپڕۆژەیەکی هاوبەشدا کۆببینەوە، کە تیایدا ڕەسەنایەتی دوێنێ و ئاسانکاری و پێشکەوتنی ڕۆژگار کۆبکرێتەوە. بۆیە لەسۆنگەی هەستکردنمان بەم بەرپرسیارییەتە، دەرهەق بە زانست و زانستخوازان، هەستاین بە دامەزراندنی ئەکادیمیای ئۆنلاینی (مودەڕڕیس). لێتان شاراوە نییە، زۆرێک لەزانستە شەرعییەکان، دابەشدەکرێن بۆ سێ ئاست: ئاستی سەرەتا، ناوەند، کۆتایی. ئاستی سەرەتاش، وەک یەکەم هەنگاو بۆ گەشتن بە پلە باڵاکانی عیلم، گرنگییەکی تایبەت و کاریگەرییەکی بەرچاوی هەیە لەسەر ڕێڕەوی هەر خوێندکارێک. بۆیە ئێمە لە(ئەکادیمیای مودەڕڕیس) وەک هەنگاوی یەکەم، بەوپەڕی هەوڵمانەوە بۆ ئاستی یەکەمی زانستەکان لەخزمەتتاندا دەبین، بە ڕەچاوی ڕێچکە و ڕێبازی پێشینی چاکمان لەفێربوون و فێرکردندا، ئامێتە لەگەڵ ئاسانکارییەکانی سەردەم. تایبەتمەندییەکانی مودەڕڕیس: ١ـ لەمودەڕڕیسدا، خوێندکار ئاستی یەکەمی هەموو زانستەکانی قۆناغی یەکەمی زانستەکان ئەخوێنێت. وەک: نەحو، سەڕف، بەلاغە، ئەدەب و لوغە، موستەڵەحی حەدیس، ئوسوڵی فیقهـ، فیقهـ، تەفسیر، حەدیس، ئاداب، تەزکییە.  ٢ـ خوێندکار لەسەر بەرچاوڕوونیەکی تەواو ئەبێت، بە کۆی زانستە شەرعییەکان و بیروباوەڕ و فیکر و بژاری دەروون. ٣ـ لەمودەڕڕیسدا، ڕەچاوی ئاستی زانستی و سەرقاڵی هەموو چین و توێژەکانی کۆمەڵگا کراوە و بۆ هەموان دەست ئەدات. بۆیە ماوەی خوێندن دوو ساڵە، هەفتانەش تەنها سێ وانە دەخوێندرێت. ٤- دەرگای بەژداری بۆ هەموان کراوەیە و هیچ مەرجێکی پێشوەختە نییە. هەرچەند باش وایە، بەژداربوو خوێندنی قۆناغی سەرەتایی قوتابخانەی تەواو کردبێت. ٥- هەموو ئاسانکارییەکانی ڕۆژ و تەکنۆلۆژیا، فەراهەم کراوە، لەدیزاینی وردی وانەکان و هێڵکاری و بەرزی کوالیتی، لەئاستی ناوەندە گەورەکانی جیهانی ئیسلامیدا. ٦- خوێنکار، بە ئاسانی پەیوەندی بە مامۆستایانەوە ئەکات و پرسیارەکانی ئەگەیەنێت، بۆ نەمانی هیچ ناڕوونییەک. ئەمەش چارەسەری گەورەترین کێشەی خوێندنی ئۆنلاینە. ٧- بۆ ڕزگارکردنی فێرخواز لەتێکەڵی و کۆکردنەوەی تەرکیزی، لەیەک کاتدا تەنها یەک زانست دەخوێنرێت و لەکۆتایی هەر زانستێکدا، تاقیکردنەوە ئەنجام ئەدرێت، لەکۆتایی ئەکادیمیاشدا، بڕوانامەی تایبەت بە ئاستی یەکەم دەدرێت بە خوێندکاران. ٨- مەنهەجەکانی ئەکادیمیا، مەنهەجی ڕەسەن و پشت پێ بەستراون لەجیهانی ئیسلامیدا. ٩- بێگومان خوێندن بێ بەرامبەرە. لینکی کەناڵی تیلیگرام: https://t.me/mudarrisacademy لینکی کەناڵی یوتیوب: https://youtube.com/@mudarrisacademy?si=lY-VARrP_6CFuaUP