👑بيتُكٍ مملكتُك مع أم البنين 👑

📌 راكي حايرة منين تبداي تنظيم بيتك كلش فوضى 📌راكي حابة ديري برامج معينة تحددين بها مهامك وتنظفين بها بيتك 📌راكي حابة تتعلمي مهارات منزلية وتولي تخدمي بذكاء وتحافظي على وقتك وتستغليه فيما ينفع 📌راكي حابة تتعلمي تديري لكل حاجة مكانها 📌راكي حابة قواعد مضبوطة تخرجلك برنامج أكل اسبوعي وقائمة مشتريات شهرية مضبوطة. 🌸كل هذه الأمور في دورة #الملكة_النشيطة لترتيب البيوت، راح تلقاي فهاد الدورة القواعد والأساسيات تاع بيت مرتب ونظيف لي لازم كل امرأة تكون على علم بيهم ✅ تبدا دورتنا  يوم 12 جويلية ان شاء الله، التسجيلات مفتوحة والعدد محدود ✅ 📂📍الوقت والسعر والمحاور والشروط وجميع التفاصيل تواصلن معي في الخاص نرسلهالكم ان شاء الله🌸                      الخاص: @oum_elbanin

السلام عليكم 🌸 dorilflor متعدد اسطح على شكل رغوة لاموس ^^ نمسح بيه الزجاج و الخشب هايل ✅ الزجاج يللللمع يخرج 🌸 الخشب يبرق عجبتني نتيجته ✅ ويمسح اسطح اخرى كما هو موضح في الصورة 🔴سعته وسعره ⬇️ 300ملل 210دج #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

السلام عليكم 🌸 #تجربتي_مع... منشفة الزجاج والأثاث من ماركة ميدينات 🔵الزرقاء ( للزجاج...الاينوكس...الخ)✅ 🔘الرمادية للأثاث ✅ الزرقاء :170دج الرمادية 190دج هايلين✅🌸 #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

🌸 السلام عليكم وشراكم لبنات 🌸 عساكن بخير 🌸 كنت سقسيتكم من قبل في صفحتي على الفايسبوك على الاخطاء لي نديروها اثناء البناء وهذا المنشور كان فيه بزاف تعليقات مفيدة اللهم بارك لي تحب تقرا تستفاد تفضلن الرابط: https://www.facebook.com/share/p/18tF3X1Zpp/ اوالان راح نحكيلكم على الأخطاء لي نشوفهم انا يديروها النساء في إختيار بيوتهن من وجهة نظري طبعا🌹 وزيدو نتوما شاركوني في التعليقات بالامور لي تشوفوها غلط في البنيان او اختيار البيت ⤵️ نحن كنساء معروفين أنو نشوفو لأمور الزينة قبل الجودة كي يكون امر جميل خلاص مانحوسوش نفهمو إذا ذو جودة او لا وإذا عملي او لا وهذا اكبر خطأ ومن بعد تجي الندامة ونحصلو ونتعبو في التنظيف والتنظيم 1⃣أولا اختيار الأرضيات والصبايغ لازم نخيرو ارضيات يكونو عمليين سواء في اللون او الملمس كي تسيقي ماتهبلكش بشهوبية والآثار و و و هذا يكون بالتجربة وسؤال الناس لي مجربة واهل الاختصاص ، سقسي مليح قبل ماتشري، نفس شي بالنسبة للصبيغة نخيرو صبيغة لي تمتم يروح منها القلم مثلا او اثار اليدين ...كذلك نخيرو صبيغة لي اذا قاسها لماء ماتتقشرش وتتنفخ ...نخيرو صبغة ضد الرطوبة ..الخ 2⃣انا ضد الصبغة في المطبخ نحبو من لفوق للتحت فايونص ويكون فايونص رطب سهل التنظيف ويخرج يلمع بسهولة مانحبش صبيغة لي نحصل كيفاش نحيلها الترسبات او الفايونص لحرش matte حصلة في التنظيف ونخاف يخسر من ليبرودوي ويغيضك من بعد 3⃣ انا ضد أني نكثر الأواني والامور الخشبية والبامبو خاصة في الأماكن الرطبة لانو لازملهم حذر كبيييير من الماء وينشفو مليح مليح وإلا يتنفخو ويصرالهم تلف وكما هو معلوم نحن الجزائريات نحبو ترغوين و المنظفات فنجتنب قدر المستطاع الامور الخشبية في المطبخ والحمامات خاصة،إلا اذا كان خشب مقاوم للماء والرطوبة صح هنا يجي حطة✔️ 4⃣ أنا ضد لي يغلفو لحيوط بالورق تاع الحائط لأنو إذا تشمخ يولي بشع يدير فقاعات وإذا حبيتي تعاودي صبغة وتنحيه عذااااب 5⃣ أنا ضد لي تكون عندهم مساحات ومايديروش بلاكارات نحب بلاكارات ومساحات تخزين فكل دورة ينحو عليك غبينة كبيرة. 6⃣أنا ضد المرحاض والحمام مع بعض أكيد ❌ 7⃣أنا ضد الصالة مفتوحة على الكوزينة سلبياتها اكثرمن ايجابياتها اذا جاك ضيف حصلة...واذا طيبتي حاجة روايح وترسبات كلها فالصالة ، اذا نويتي تسيقي صالون لااازم تسيقي المطبخ...الخ 8⃣ضد أنو المطبخ يكون بلا باب 9⃣ضد التعلاق و les etageres murales نحب كللللش مخفي ومايبانش ومانحب حتى حاجة تبان رغم انو راااهي بزاف توندونس تاع يحطو بلارات على برا وليزيتاجاغ ...الخ لكن انا نشوفو اكبر غلطة لانو لمرا راح تتعب بزاف في التنظيف 0⃣1⃣ انا ضد لي يليكيديو تحت الحوض او تحت بينوار ، لعكس لي راح تبني ننصحك انو هاداك اكثر مكان لازم يكون متقون مليح الانابيب ملاح وتكون جودتهم عالية ...ماكانش ثقابي ... مفيني مليح لانو راح تحطي ماعنك كامل تما قضيانك ...الخ اذا كان ثقوب او قطرات راح تباصي مع الحشرات والروائح الكريهة وتكرهي ڨاع مطبخك 1⃣1⃣ إذا كنت ميسورة الحال أشري الالات والاجهزة الكهرومنزلية ذات جودة عااااالية جدا وماتستخسريش راحة بال المراة ونفسيتها لمليحة بعد سلامة منهجها ودينها تكون في هدوء ونظافة وتنظيم بيتها هكدا باش تضاين معاك لانو انا نأمن بزاااف بمثلنا الشعبي ( لي تبع رخسو يرمي نصو ) ✔️ 2⃣1⃣ كل ماهو خشبي ديريه مقاوم للماء وكل ماهو حديدي ديريه إينوكس أصلي 3⃣1⃣خصصي غرفة غسيل صغيرة buanderie حطي فيها كل ماهو باسينات ماشينة لافي ساش لانج مواد تنظيف ادوات تنظيف 4⃣1⃣ننتبهو مليح للثقوب لي موجودة في جميع أنحاء البيت ونغلقوها باش نجتنبو الحشرات والقوارض 5⃣1⃣لمجيريات تاع الدوش او مطبخ او حمام او بالكون غلاقهم مادابيك يكونو ثقابي ديالو بزاف صغار ورقاق باش ميدخل والو ماديروش لغلاقات لخشان 6⃣1⃣ اثناء التأثيث نقصو قدر المستطاع و أشرو الضروري تاع الضروري فقط ماتكثروش ليكادر والديكورات الرقيقة الصغيرة من بعد تحصلو في تنظيفها وتنظيمها وتمتم تروح موضتها tout ce qui est simple est beau 🔴هذا مااستحضرته حاليا و الله اعلم ✅ و حبيت نقولكم أنو علابالي ماشي ڨاع الناس تقدر دير هاد شي لكن كاين ناس تانيك تقدر و حبت تدير وماتعرفش فنعاونوها ونبهوها باش ماتغلطش، ومليح نتعلمو أمور ماتعرفو وقتاش ربي سبحانو يرزق 🌹 أسأل الله ان يصلحنا وأن يرزقنا وإياكن بالبيت الواسع والمركب الهنيئ والجار الطيب دمتن في رعاية الله وحفظه كانت معكن اختكن في الله أم البنين صاحبة صفحة #بيتُكِ_مملكَتُكِ_مع_أم_البنين 🌹 #ممنوع_تعليقات_الرجال ❌ #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

°° والله يا أخيتي لو قرأت ألف كتاب في إدارة الوقت .. ولو دخلتي آلاف الدورات لتنظيم النفس لو لم يبارك لك الله عز وجل في وقتك .. لن تنجزي شيئا لا تعتمدي على نفسك وقوتك، استعيني بالله سبحانه واطلبي المعونة منه، وعرضي نفسك لمواطن البركة مثل قراءة القرآن والحفاظ على الأذكار، والبكور وابتعدي عن المعاصي، وابتعدي عن المعاصي، ابتعدي عن المعاصي (كالغيبة والنميمة وتتبع عورات النساء وبيوتهن، والكذب والاختلاط والتبرج والنمص ...الخ )، هي سبب الشؤم ونزع البركة وقلة التوفيق .. 💧 🌹وفقنا الله وإياكن وأعاننا وبارك في أوقاتنا🌹 منقولة بتصرف🖊 أسعد الله صباحكن

السلام عليكم☕️ مساء الأنوار 🌸 🔴من طرائف التسجيل في دورة الملكة النشيطة ^^ 🔴 شهر كامل و ام البنين تنشر انو دورة الملكة النشيطة التسجيلات مفتوحة فيها ✅ وتنتهي بإنتهاء المقاعد وتبدأ في تاريخ كذا وتخلاص كذا وشروطها فالخاص كذا وكذا... لكن قبل ماتبدا الدورة بيوم واحد ليلتها يطيحو الرسائل كي شتا 💦🚿ياأم البنين والله ماشفت الإعلان فضلا غدوا صباح نروح لابوسط ياأم البنين راني فلابوسط اصبري عليا ( هادي على 3 تاع عشية مسكينة^^ ) ياأم البنين من فضلك لازم ندخل لانو عندي ظرف شهور الجاية منقدرش ياأم البنين دوك دوك نبعتلك من فضلك نبعت؟؟( هادي على 11تاع ليل) ( كاين لي تدي الحساب متهدرش معاك شهر تفاشيك من بعد تبعت ديك ليلة وتقولي تفضلي الوصل كي شغل تحطني زعما في الأمر الواقع ^^ ) مالا راني اعيد واكرر ياناس ياملكات يانشييطات يافحلات🎉 الدورة راح تبدأ يوم 12 جويلية إن شاء الله 🌹 المقاعد محدودة وكي يخلاصو مستحيل نزيد نشد مانقدرش نخدم فضغط ماتحرجونيش في آخر ليلة فضلا عزيزات ✅ والحاضر يعلم الغائب 📞🛎 باينين كنتو فقرايتكم تخلو الليلة الأخيرة وتحفظو ^^ ⏳🔨 ساعة وساعة 🌹 تفاصيل دورة الملكة النشيطة تلقاوها على هذا الرابط ⬇️ https://t.me/Baytouki16/190 أما بالنسبة لتفاصيل التسجيل تواصلن معي على الخاص @oum_elbanin

السلام عليكن حياكن الله ملكات👑 ليوم إن شاء الله راح نحكو على أمر هو يبان صغير وكاين حتى لي تقدر تقولك كيفاش توريهولنا هذا امر بديهي❓لكن محاينو كباااار وإذا مارتبناهش وماخططنالوش مليح راح تتهد صحتنا ويديلنا وقت كبير كبير كبير لي هو 🚿🚿🚿 ( #التنظيف_العشوائي_كي_تجي_العين🧹🧺🚿🛁) في السنوات الأخيرة في الجزائر والله المستعان ولات العين تروح ويبطاو باش يرجعوها يومين 3 ايام أو أكثر وولات السيتيرنة من الضروريات ، تلقاي ربة البيت يتراكمو عليها الامور لماعن...لحوايج...ترسبات الفرن..الغبار ..الثلاجة وماتقدرش تتحرك بدون مااااء 🚰غير لفوق لفوق وكي تجي العين تحيرلها منين تبدا وتولي تجري من ومن تتعب قبل ماتبدا الله المستعان و احيانا تترك الاولويات وتروح للثانويات ويروح الماء وتلقى روحها مادارتش الاساس ⬇️ كي تجيك العين و حالتك تكون بزاف مرونة تبداي بالامور لي تستهلك الماء اكثر : 🪣 أولا تغسلي لبوادن ولباسينات وتبداي فتعمارهم وإذا عندك سيتيرنة هي الاولى فالتعمار 🪣ثانيا لماعن يتغسلو وحطيهم فسلة يقطرو 🪣ثالثا مسح الفرن والبوطاجي والطابلة من الترسبات وعقميهم 🪣رابعا الحمامات و تسياق الارضيات الاكثر اتساخا 🪣خامسا الملابس غسلهم يشد الوقت وحسب ظرف كل بيت اذا الماشينة اوتوماتيكية او لا اذا متوفرة او لا اذا سيتيرنة كاينة او لا ، لذلك تعاملي معاهم حسب ظروفك 🧺  ) اذا عندك اوتوماتيكية شعليها تدور قبل غسيل الماعن وروحي تخدمي شغلك كيما رتبناه اذا معندكش الماشينة والسيتيرنة تبداي بيهم مباشرة قبل الماعن قبل ماتروح العين اكيد ثم كملي شغلك كيما رتبناه اذا عندك سيتيرنة وماشينة نصف اوتوماتيكية ماتبدايش بيهم خاطر يشدولك الوقت كملي شغلك بالترتيب لي مديتهولك ثم روحيلهم حتى اذا راحت فالنص تكملي بواش عمرتي او فوضي مهمتهم لاحد افراد الاسرة وخلاص 🪣سادسا نروحو للامور الناشفة طي ملابس ...وفرز الاواني وفرز البيت هادي تقدري تخليهم لغد من داك خاطر تكوني عييتي غد من داك تقدري تبداي برنامجك وروتينك العادي مسح الغبار ثم مسح الارضيات ..الخ  هادي ترتيبات للمبتدئات ولينا كامل على كل حال كي يكون الماء عندو بزاف ماجاش ويجي ويعطيك بخلعة وتتلفلك ^^ روحي بهاد الخطوات باش تلقاي روحك وإلا إذا مشيتي بعشوائية راح تروح لعين وتلقاي الأمور المهمة مانظفتيهمش وتتقلقي وكنصيحة أخيرة لمو بشي لي قدرتو وديرو سيتيرنة كبيرة هايلة وضرورية تربحي بيها صحتك أكثر شي  🌺 #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

تعديل : عندي عامين تقريبا ملي استعملتهم معلاباليش اذا مزالو الان وبنفس الجودة

#تدبيرة_منزلية🏡 السلام عليكن ملكات كنت حطيتها من قبل لكن عاودتهالكم ببعض التعديلات ⏬ كل ماتطيبي مثلا شربة ، عدس ، لوبيا .. طعام مفور...كسرة...بعض الحلويات. 🍲قبل ماتاكلو من القدرة بملعقة نظيفة وناشفة  فرغي في قدر اخر خليه يبرد ثم بعدما يبرد الاكل  حطي فبوغت مونجي غذائية وخبيها فالمجمد 💯 ( كانت نبهتني اخت في التعليقات اننا مانحطوش ماكلة ساخنة في البلاستيك معها حق بارك الله فيها) استعمليها في ذلك الاسبوع فقط ثم جددي ماتطوليش بيها فالمجمد  تلقايها كي تحصلي مثلا: مانضتيش بكري.. خرجتي وراح الحال على لغداء ... عندك خرجة ضرورية.... رجعتي من الطبيب.. رحتي لداركم وراجلك بقى وحدو... تلقاي الاكل رغم اني ضد المجمد بزاف بزاف  كل يوم بصح نحبو احيانا يسلك خاصة لي تربي..لي مريضة... تحاول تعاون روحها ب أمور هكدا ، باش ماتدخلش في ضغط👍💯✅ كاين وين احيانا يتبدل القوام او الذوق ممكن نعم وممكن لا، لكن تبقى طريقة لي تسلكك بزاف وبالنسبة للتعليقات السابقة لي قالولي لي يسلك هو البطاطا مقلية او بيري نقولكم كااااين ناس ظروفها مختلفة تماما،  كاين لي ترجع من برا بالشقيقة عينها ماشي قادرة تفتحها فما بالك تقلي...كاين لي ولادها مياكلولهاش بيض مغلي او مقلي ...كاين زوجها مايستناش حتى تطبخ و و و ....كاين لي عندها الرضع تفطن تلقاها 12 مباشرة تجبد تسخن، مانيش نقول ماكلة المجمد مليحة ومانيش نقول صحية و و و لكن قلت احيانا تسلك فالحصلات وخيرمن ماكلة برا خاصة قي الصيف. #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/