•"مشعات ذماري"•

قولوا قبل فتره اشتغلت في بقاله وسط حاره اول حاره بحياتي اشوفها كلهم حراف موت الكبير والصغير العيال والبنات كلهم حراف اشتغلت ثلاثه ايام والأمور طيبه يجي الزبون واجيب له طلبه واشل الفلوس والامور تمام ، اليوم الرابع جاء لي شيبه استغفرالله بس اول ماوصل قال هات لي كيلو وزيدهن ولا والله لخرج للحاره الثانيه اشتري منها .. ايش ازيد ياحاج قول ايش تشتي قال كيلوا سكر قلت ابشر جبت له سكر وزوت له شويه قال بتضحك عليا هذا نص كيلوا رجع زلطي !! ياحاج النص الكيلوا الزياده غير الكيلوا ذي اشتريته انت قال اننا سارق ولا سارق وكل مابسر لعندي وعاده يشتي يصيح وانا افعل ملعقه سكر للكيس خمس معالق سكبت له ورجع قال ايوه هكذا .. لجل تأكلها حلال ياولدي ، والنصاب هذا قد معه قطمه سكر بـ٤٠٠ريال وصاحب المحل قد قال لي اي نقص بالمحل عيكون من حسابي وبيننا اتفاق .! اليوم الثاني جوا لي عشرين جاهل وفي وقت غلط في الظهر بعد الغداء وقت الساعه السليمانيه ، قلت لنفسي سهل بانجزهم الحين هم ماعيشتروا الا اثنين او ثلاثه والباقي مرافقين تبعهم .. وصل الجاهل الأول جاب لي خمسين افلاس قدهي بتذوب من العرق اللي بيده ماسك لها في يده اسبوع.. اول مره اشوف زلط يمنيه افلاس ماعد تقبلش هي حق الجاهل هذا هههههههه جاب لي الخمسين وكذا طنن حق نص دقيقه وبيبسر الماسه وفي الماسه خمسين نوع جعاله جلس خمس دقايق بيشوف ايش عيختار وانا واقف منتظر له يشتري ارجع اخزن ، بعدين قال هات لي من هذا وبيأشر لي بأصبعه .. نزلت ادوره له اقله هذا وهو يقول لا وهذا برضو لا.. رويته الجعاله كلها وهو بيقول لا لا يابن الح** ايش تشتي مني .، وكان به في الماسه كيكه عائليه قيمتها الف ريال ماقد اكلتهاش انا .. قلت له هذي قال ايوه ...! صدمني الطفل هذا وشكله كان حالي قلت له مابش ياخي رحلك هذي حقك الخمسين وهو نزل ثنتين دموع(دموع التماسيح) قطعين قلبي كنت حساس وعندي مشاعر رجعت قلت له هاه شلها على حسابي .. شلها و فر هارباً مش داري ليش هرب لكن بعد ماهرب الجهال ذي كانوا جمبه كلهم قدهم بيبكوا يشتوا مثله !! يالله دخيلك هذولا عشرين جاهل والكيك في البقاله ماغيرهن خمس حبات. فكرت شويه ورجعت قسمت الخمس الحبات للعشرين الجاهل كل واحد قطعه صغيره. خمسه الف قرحت .. الله يلعن مشاعري ويلعن حناني كانوا يسموني القلب الحنون هههه ، اليوم الثاني تجي عجوز تشتري زبادي وتشكي لي ان الزبادي وجبتهم لليوم كامل ووتشكي لي انهي مرمله ومعها سبعه جهال قمت اجيب لها حبه تونه على حسابي .. تخيلوا كان يجي زبون يتشري بـ٢٠٠ ريال واجيب له بخمسميه ع حسابي !!! " جلست عشرين يوم في البقاله وفجأه اجي ابسر البقاله من بعيد ابسرها كامله. اجي وقدهي فاضيه ماعد فيها الا الحفاظات حق الجهال واشوف الصنودق ومافيه الا الخمسين ذي ماتمشي حق ذيك الجاهل .. صاحب البقاله كان عتوقع فيه جلطه وبعدين من قسم لقسم ومن محكمه لمحكمه ودفعنا له ٣٠٠الف ، العائلة كامله حقنا كانت هذك اليوم تضربني ياعيبه والضرب مسحوا كرامتي لوما الله جعلني اتحمل الضرب هذك ولا كنت شاوقع مهبول وتصيبني شحنات كهربائية بعد اسبوع من الحادثه هذي عاد المفتاح حق البقاله معي رحت فتحت البقاله وشليت الحفاظات وبعتهن بألفين وقيمتهن الرسميه ثمانيه الف، ورحت خزنت طيرت الضيق اللي صابني واخفيته من الوجود .. ومن هذك اليوم وقعت ذماري اصلي ..!!