မြတ်ဗုဒ္ဓ၏ တရားတော်များ သစ္စာရွှေစည် Thitsarshwesi

အဆင်ပြေတာတွေချည်း ဖြစ်စေချင်တဲ့ မေတ္တာစိတ် _________________ မေတ္တာဆိုတာ သတ္တဝါအားလုံးရဲ့ အပေါ်မှာ ချမ်းသာစေချင်တာ၊ ဘေးရန်တွေ ကင်းစေချင်တယ်၊ ကျန်းမာရေးကောင်းစေချင်တယ်၊ နှလုံးစိတ်ဝမ်း ငြိမ်းအေးစေချင်တယ်၊ အဆင်မပြေတာ ဘာမှမဖြစ်စေချင်ဘူး၊ အဆင်ပြေတာတွေချည်း ဖြစ်စေချင်တယ်၊ ကောင်းစေချင်တယ်။ သတ္တဝါတွေရဲ့ အကျိုးစီးပွားကို လိုလားတဲ့ စိတ်ကလေး အလွန်အဆင့်အတန်းမြင့်တဲ့ စေတနာလေး အလွန်ကောင်းတယ်။ အဲဒီမေတ္တာစိတ် ခဏခဏဖြစ်အောင် လုပ်ပြီးတော့လည်းပဲ ကိုယ့်ရဲ့ကံကို မြှင့်တင်ရမယ်ပေါ့နော်။ အဲဒါကိုလည်း နှုတ်နဲ့အရင် ရွတ်ဆို။ "အားလုံးသော သတ္တဝါတွေ ဘေးရန်ကင်းကွာ ကိုယ်စိတ်နှစ်ဖြာ ကျန်းမာချမ်းသာကြပါစေ။" ဒီလောက်ဆိုရင် ရပြီ။ အဲဒါကို ထပ်ခါထပ်ခါ ရွတ်ဆိုနေရင် ကြာရင် စိတ်ဝင်စားပြီးတော့ ကိုယ့်စိတ်က အဲဒီထဲမှာ သက်ဝင်လာနိုင်လိမ့်မယ်။ အဲဒါ မေတ္တာဓာတ်တွေ ဖြစ်လာမှာ။ ဝီရိယရှိဖို့ လိုတယ်၊ ကြိုးစားဖို့ လိုတယ်နော်။ (သစ္စာရွှေစည်) ⁠#မေတ္တာထားရမယ် #ဓမ္မရသ #တရားတော်များ #DhammaTalks #မေတ္တာဓာတ်

သဲအိမ်ဆောက်တမ်း ကစားနေတာထက် မပိုဘူးလို့ ဘဝရဲ့အပေါ်မှာ မြင်ဖို့လိုတယ် _____________________________ လောဘမကင်းသေးတဲ့ ပုထုဇဉ် သတ္တဝါရဲ့ စိတ်၊ သေခြင်းတရားဟာ လောဘနဲ့ ရင်ဆိုင်နေရတဲ့ လူတိုင်းအတွက် အလွန်ကြီးမားတဲ့ ကြောက်မက်ဖွယ်ရာ ဘေးကြီးပဲ။ နော်... သေခြင်းကြီး သက်သက်က ဘေးလား၊ လောဘမကင်းလို့ ဖြစ်တဲ့ ဘေးလား၊ ဘယ်ဘေးက ပိုကြီးတာလဲ ကိုယ့်ဘာသာကိုယ် မြင်အောင်ကြည့်။ ရဟန္တာပုဂ္ဂိုလ်တွေကျတော့ သေခြင်းဟာ သူတို့အတွက် ကြောက်စရာ ဟုတ်သေးရဲ့လား။ (မဟုတ်ပါဘူးဘုရား)။ သူတို့က ဘဝမှ မမက်တော့တာကိုး။ ဒါကြောင့် မိထွေးတော်ဂေါတမီ ပရိနိဗ္ဗာန်စံခါနီးမှာ သူ့ရဲ့ ဆွေတွေမျိုးတွေ တပည့်တွေ ငိုကြယိုကြတော့ သူ ဘယ်လိုပြောတာတုန်း။ 'ဟဲ့... ဒါ ငိုရမယ့်အချိန်မဟုတ်ဘူး၊ ဒါ ပျော်ရမယ့်အချိန်' လို့ ပြောတယ်တဲ့။ သာမန်သတ္တဝါတွေရဲ့ အမြင်၊ သာမန်သတ္တဝါတွေရဲ့ ခံစားချက် ဘယ်လောက်ကြီးမားတဲ့ ကွဲပြားခြားနားမှုကြီးလဲ မြင်အောင်ကြည့်နော်။ အဲတော့ ပြောချင်တာက ဘာတုန်း၊ သေခြင်းတရားကို ပြပြီးတော့ မြတ်စွာဘုရား ဘဝရဲ့ မကောင်းတဲ့ ဒုက္ခသစ္စာသဘောကို အမြင်ခိုင်းတာ။ ကျုပ်တို့က သေခြင်းတရားကို မမြင်တဲ့အခါကျတော့ ဘဝရဲ့ ဒုက္ခသစ္စာသဘောကို မြင်ဖို့ ပိုဝေးသွားတာပေါ့။ သူက သေခြင်းကို အမြဲတမ်း မျက်ကွယ်ပြုထားတာလေ။ ဟုတ်တယ်မဟုတ်လား။ နေ့စဉ် လှုပ်လှုပ်ရှားရှားနဲ့ တစ်ခါတည်း သွားလာ ပြောဆိုနေတဲ့ အရှင်လေးတွေကြီး မြင်နေရတာ။ အဲတော့ စိတ်ကူးက အရှင်နဲ့ ပတ်သက်ပြီးတော့ပဲ တွေးကြံနေတယ်။ ကိုယ့်ဘဝအတွက် တွေးရင်လည်းပဲ ရှင်ဦးမယ့် အနေအထားနဲ့ပဲ ပတ်သက်ပြီးတော့ တွေးတယ်၊ ဟိုဘက်က နိဂုံး အဆုံးသတ် သေခြင်းတရားက ပါမလာဘူး၊ ဖြစ်နေတယ်၊ ဟုတ်လား။ အဲတော့ ဒုက္ခကို မမြင်ဘူး ဖြစ်တယ်။ ဘဝရဲ့ သဘောက ဘာတုန်း၊ ဒုက္ခပဲ။ သူ့ဘာသာသူ ဘာကြီးဖြစ်အောင် လုပ်ထားတာ၊ ပြီးတော့ ပြီးသွားရတယ်။ သဲအိမ်ဆောက်တမ်း ကစားနေတာထက် မပိုဘူးလို့ ဘဝရဲ့အပေါ်မှာ မြင်ဖို့လိုတယ်။ သစ္စာရွှေစည်ဆရာတော်

လောကကြီးမှာ ဖြစ်ဖြစ်သမျှ သဘာဝတရားတွေဟာ အကြောင်းတရားရှိလို့ ဖြစ်တာ။ အကြောင်းတရားသာမရှိရင် ဘယ်လို အကျိုးတရားမှ ဖြစ်မှာ မဟုတ်။ ဆိုလိုတာက ဆင်းရဲတယ်ဆိုတဲ့ ဒီဒုက္ခ နော် ဒီအကျိုးတရားတွေဟာ အလိုဆန္ဒလောဘ သမုဒယသစ္စာ ဒီအကြောင်းတရားကြောင့် ဖြစ်တာ။ အကယ်၍ အကြောင်းတရားကိုသာ ချုပ်ဆုံးအောင် လုပ်နိုင်မယ်ဆိုရင် ဒုက္ခဆိုတဲ့ ဒီအကျိုးတရားတွေဟာလည်း ရပ်ဆိုင်းသွားမယ်။ ဒါသစ္စာလေးပါးကို ဟောတာပါပဲ။ (သစ္စာရွှေစည်)

သတိနဲ့ နေခြင်းဟာ အကောင်းဆုံးနေနည်း ____________________________ သူတော်ကောင်းဆိုတဲ့ဂုဏ်ဟာ အကြီးမားဆုံးပဲ။ ဘာကို ကြည့်ပြီးတော့ သူတော်ကောင်းလို့ ပြောတာလဲ။ စိတ်ဓာတ်လေးကောင်းတဲ့လူကို သူတော်ကောင်းပြောတာ၊ စိတ်ဓာတ်ယုတ်တော့ သူယုတ်မာ ဖြစ်သွားတာပဲလေ။ ဟုတ်လား။ အခု သတိထားနေခြင်းအားဖြင့် အဲ့ဒီစိတ်ကလေးက တဖြည်းဖြည်းနဲ့ မကောင်းတာတွေ နည်းနည်းပြီးတော့ ကောင်းသွားမယ်လို့ ပြောတာ။ ညစ်နွမ်းတာတွေနည်းနည်းပြီးတော့ ဖြူစင်သွားမယ်လို့ ပြောတာ။ ယုတ်ညံ့တာတွေ နည်းနည်းပြီးတော့ မြင့်မြတ်သွားမယ်လို့ ပြောတာ ဘယ်သူလဲ။ ဒီစိတ်ကလေးကို ပြောတာ။ စိတ်ကလေးနဲ့ လူလုပ်နေရတာနော်။ စိတ်ဆင်းရဲရင် လူဆင်းရဲမယ်။ စိတ်ချမ်းသာရင် လူချမ်းသာမယ်။ စိတ်အောက်တန်းကျရင် လူအောက်တန်းကျမယ်။ စိတ်မြင့်မြတ်ရင် မြင့်မြတ်သူပဲ။ အဲ့ဒါ လက်ခံတယ်မဟုတ်လား။ အဲ့လိုဆိုရင် ဒီစိတ်ကို အကောင်းဆုံးဘက်ကို အကြီးမားဆုံး ပြောင်းလဲပေးနိုင်တဲ့ ဒီနည်းလမ်းကို ကျုပ်တို့ ဘာဖြစ်လို့ နော်... မေ့လျော့ထားသင့်သလဲ။ ဒါကို ဘာဖြစ်လို့ ဒါ အရေးကြီးဆုံး အလုပ်လို့ ဘာဖြစ်လို့ ထိပ်ဆုံးမှာ မထားဘဲ နေနိုင်ရသလဲ။ သဘောပေါက်တယ်နော်။ ဒါကြောင့် သတိနဲ့နေခြင်းဟာ အကောင်းဆုံးနေနည်းလို့ ပြောတာ။

၁၆-ကြိမ် တရားစခန်း မန္တလေးတိုင်းဒေသကြီး၊ ပြင်ဦးလွင်မြို့နယ်၊ ပြင်စာ-ရွှေချောင်း သစ္စာရွှေစည်ကျောင်းတိုက်၌ ၁၃၈၈ ခုနှစ်၊ ဝါဆိုလဆန်း(၄)ရက်နေ့မှ (၁၂)ရက်နေ့ ထိ။ (၁၈–၇-၂၀၂၆ မှ ၂၆–၇-၂၀၂၆) နေ့ထိ (၁၆)ကြိမ်မြောက် (၇)ရက် တရားစခန်း ဖွင့်ပါမည်။ ----------------------- (အသက် ၂၀-မှ ၆၀၊ ယောဂီများကိုသာ လက်ခံပါမည်) ၁၈–၇-၂၀၂၆-နေ့ နေ့လည် ၁၂-နာရီမှ ညနေ-၅ - နာရီ အတွင်း အရောက်လာရပါမည်။ ကြိုတင် မလာရပါ။ မလာဖြစ်ပါက ၁၅-၇-၂၆ ရက်နောက်ဆုံးထား၍ အကြောင်းကြားပေးပါရန်။ အတက်အဆင်း ရှိပါသည်။ ကျန်းမာရေး ကောင်းမွန်သူ ဖြစ်ရပါမည်။ မိမိကျရာ နေရာတွင်သာ ကျေနပ်စွာ နေနိုင်ရပါမည်။ စခန်းပွဲရက်အတွင်း မိမိနှင့်တကွ အားထုတ်ဖော်ယောဂီများ ထိရောက်စွာ-ချမ်းသာစွာ- တရားနှလုံးသွင်းနိုင်ရန်အတွက် (၁) ဖုန်း(လုံးဝ) မသုံးရပါ။ ယူလာသောဖုန်းများအားလုံး အပ်ရပါမည်။ ဖုန်းမအပ်နိုင်လျင် မလာပါနှင့်။ ဖုန်းသုံးသည်ကိုတွေ့လျင် တောက်လျောက်ပြန်လွှတ်ပါမည်။ (၂) မဖြစ်မနေကိစ္စမှ လွဲ၍ စကားမပြောရ။ တရားမဆွေးနွေးရ။ ပရိတ် ပဋ္ဌာန်း မရွတ်ရပါ။ စကားပြောသော ယောဂီများတွေ့ရှိပါက နောက်တကြိမ် ဝင်ခွင့်အတွက် ခက်ခဲနိုင်ပါသည်။ ဤ(၂)ချက်ကို လိုက်နာနိုင်မှသာ လာပါ။ ဤ(၂)ချက်ကို အထူးတင်းကြပ်ပါမည်။ မှတ်ချက်။ လူဦးရေ ကန့်သတ်ထားသောကြောင့် ကြိုတင်စာရင်းမပေးဘဲ လာရောက်လျှင်လက်ခံမည် မဟုတ်ပါ။ လူအစားထိုးလည်း လက်မခံပါ။ တရားစခန်းသို့ မလာရောက်နိုင်ပါက “လူပြည့်နေ၍ ဝင်ခွင့်မရသော တခြားယောဂီများဝင်နိုင်ရန် အတွက်” (၁၅–၇-၂၀၂၆) ရက် နောက်ဆုံးထား၍ ဆက်သွယ်ပေးပါရန် မေတ္တာရပ်ခံအပ်ပါသည်။ မဆက်သွယ်ဘဲ ပျက်ကွက်ပါက နောက်တကြိမ်ဝင်ခွင့်ရမည် မဟုတ်ပါ။ စာရင်းပေးသည့်အခါ တယောက်ချင်းစီ၏ အမည်/ အသက်/ မှတ်ပုံတင်နံပတ်/ နေရပ်လိပ်စာ/ ဖုန်းနံပတ်-တို့ကို ထည့်သွင်းပေးပါ။ အိပ်ယာလိပ်/ ခြင်ထောင် မိမိတို့ သောက်နေကြ ဆေးဝါးတို့ကို ယူဆောင်ခဲ့ပါ။ ယောဂီဟောင်းများ ဘုရားရှိခိုးစာအုပ်၊ ယောဂီတဘက်များ ယူဆောင်ခဲ့ပါရန်။ ဆက်သွယ် စာရင်းပေးသွင်းရန် ဖုန်း 09944826626 စာရင်း ပေးသွင်းချိန် မနက် ၈ - နာရီမှ ၁၀ - နာရီ၊ နေ့ခင်း ၂-နာရီမှ ညနေ ၅ နာရီထိ၊