СУНТАРСКИЙ УЛУС 🕊️🕊️🕊️

Ытыктабыллаах Сунтаар улууһун олохтоохторо, күндү тыа сирин туруу үлэһиттэрэ, биир дойдулаахтарбыт! «Сунтаар улууһа (оройуона)» муниципальнай оройуон дьаһалтатын аатыттан, улуустааҕы депутаттарын Сэбиэтин уонна тус бэйэбит ааппытыттан Эһигини барыгытын ыам ыйын 22 күнүнэн – Сайылык күнүнэн ис сүрэхпититтэн итиитик-истиҥник эҕэрдэлиибит! Ил Дархан Айсен Николаев саха төрүт үгэһин чөл тутар, салгыы сайыннарар, тыа хаһаайыстыбатын аһын-үөлүн дэлэтэр уонна тыа хаһаайыстыбатын үлэһитин суолтатын үрдэтэр туһуттан, 2018 сыл сэтинньи 6 күнүгэр таһаарбыт 150 №-дээх Ыйааҕынан хас сыл аайы, ыам ыйын 22 күнүгэр бэлиэтиир Сайылык күнүн олохтообута. Бүгүн сайылык саха ыалын олоҕор – дьаһаҕар ылар суолтатыгар болҕомто ууруллар, сайдарыгар саҥа тыын угуллар. Сайылык – бу биһиги саха дьонун олоҕор ытык сир, төрүт үгэспит уонна өбүгэбит кэриэс суола. Сайылыкка тахсыы – айылҕаҕа чугаһааһын, сүөһү иитиигэ, үлэҕэ-хамнаска бэринии, сайыҥҥы кэм кэлиитэ. Бу күн биһиги былыргылыы сайылыкка тахсан, айылҕалыын биир буолуубут, өбүгэбит хаалларбыт үтүө үгэстэрин салҕааһыммыт бэлиэтэ буолар. Биһиги улууспут дьоно-сэргэтэ сайылык олоҕун суолтатын, үгэстэрин ытыктаан, кэнчээри ыччакка тиэрдэргэ кыһаллан олоробут. Сайылык күнэ – биир иллээх ыал түмсүүлэрин, биир дойдулаахтар сомоҕолоһууларын, кэлэр кэскилгэ эрэл үөрүүтүн күнэ. Бу күн биһиги төрөөбүт сирдэригэр олохторун анаабыт дьоммутугар ытыктабылбытын биллэрэбит. Кинилэр сыралаах үлэлэринэн биһиги тыабыт сирэ сайдар, улуус олохтоохторун маанылаах сандалыларыгар мэлдьи сибиэһэй ас-үөл, саха төрүт аһа-үөлэ дэлэйэр. Күндү биир дойдулаахтарбыт! Эһиэхэ чэгиэн доруобуйаны, дьиэ кэргэҥҥэ дьолу-соргуну, үрдүк ыамы, өҥ дьылы, хас биирдии саҕалааһыҥҥытыгар ситиһиилэри баҕарабыт. Быйылгы мэччирэҥ, от үлэтин кэмэ табылыннын, саха омук сомоҕолоһуутун, чэлгийэ сайдыытын уонна утума салҕанарын кэрэһитин быһыытынан сайылык үтүө үгэстэрэ көлүөнэттэн көлүөнэҕэ бэриллэ турдуннар! Сунтаар улууһун баһылыга А.В. Григорьев Улуус депутааттарын Сэбиэтин бэрэссэдээтэлэ У.Д. Попова

https://max.ru/id1424005501_gos/AZ5Jo-ZPVXo *Сунтаарга ГИБДД саҥа дьиэтин тутуутугар бастакы хардыы оҥоһулунна* 🔹️🔹️🔹️Сунтаарга суол бэрээдэгин көрөр-истэр, нэһилиэнньэ нус-хас олоҕун хааччыйар ГАИ сулууспатыгар улахан уларыйыылар күүтэллэр. «Ньургуһун» оҕо саадын аттыгар саҥа административнай дьиэ тутуутугар анал сир тыырылынна. Сир көрүллүүтэ бырайыак олоххо киирэригэр булгуччулаах усулуобуйанан буолар. Өскөтүн былааннаммыт бырайыак күрэххэ кыайыылаах тахсар уонна тустаах үп-харчы көрүллэр түгэнигэр, бэриллибит миэстэҕэ саҥа эбийиэк тутуллуоҕа. Бу хардыы улууска бэрээдэги уонна куттала суох буолууну хааччыйыы таһымын өссө үрдэтиэҕэ диэн эрэнэбит. _Сунтаар улууһун дьаһалтатын пресс-сулууспата_

https://max.ru/id1424005501_gos/AZ4-nZX9VTM *Сунтаар улууһугар уочараттаах суолталаах эбийиэктэр тутуллуохтара* 🔹️🔹️🔹️Сунтаар улууһун баһылыга Анатолий Григорьев Саха Сирин Государственнай сакаастыыр сулууспатын генеральнай дириэктэрин эбээһинэһин толорооччу Андрей Осекритовтыын көрсүһүүнү ыытта. Мунньах сүрүн сыалынан улуус сиригэр-уотугар олоххо киириэхтээх тутуу былааннарын уонна кэлэр өттүгэр үлэ хайысхатын быһаарыы буолла. Кэпсэтии тутаах боппуруоһунан улуустааҕы больничнай комплекс иккис уочаратын тутуута буолла. Бу олохтоохторго олус күүтүүлээх уонна суолталаах эбийиэк буоларын быһыытынан, үлэни түргэтэтэр сорук турар. Былаан быһыытынан, кэлэр ыйга бу тутууга аналлаах официальнай аукцион биллэриллиэхтээх. Маны таһынан, салайааччылар лицей-интернат тутулла турар саҥа дьиэтин уонна Кириэстээх нэһилиэгин «Саргы Түһүлгэтэ» култуура киинин иккис уочаратын тутуутун боппуруостарын сиһилии кэпсэттилэр. Бу былааннар олоххо киириилэрэ улуус социальнай-экономическай туруктаах буолуутугар уонна олох таһымын тупсарыыга улахан төһүү күүс буолуоҕа. _Сунтаар улууһун дьаһалтатын пресс-сулууспата_

https://max.ru/id1424005501_gos/AZ4MC-WiDpM 🎖️ *Сунтаар соҕотох бэтэрээнэ* Кыайыы 81 сылын көрсө Сунтаар улууһун баһылыга Анатолий Григорьев улуус соҕотох тыыннаах хаалбыт бэтэрээнигэр Мартын Герасимович Григорьевка ыалдьыттаата. Бу көрсүһүү үйэлээх кырдьаҕаска ытыктабыл уонна барҕа махтал бэлиэтэ буолла. Кырдьаҕас саллаат санаата бөҕөх, кэпсэтэрэ сэргэх, өссө да105 сааспар диэри тиийиэм диир. Анатолий Григорьев бэтэрээҥҥэ Сунтаар улууһун олохтоохторун аатыттан махтал тылларын тиэрдэн, Өрөгөй күнүнэн эҕэрдэлээтэ. Кини бэтэрээн хорсун быһыыта уонна олоҕун суола эдэр көлүөнэҕэ холобур буоларын бэлиэтээтэ. Мартын Герасимович Григорьев — биһиги бүгүҥҥү күммүт тыыннаах дьоруойа. Кини курдук дьон баарын тухары Кыайыы өрөгөйө өлбөт-сүүппэт үйэлээх. _Сунтаар улууһун дьаһалтатын пресс-сулууспата_

Ытыктабыллаах Аҕа дойду сэриитин бэтэрээнэ Мартын Герасимович! Күндү тыыл бэтэрээннэрэ, сэрии огдооболоро уонна сэрии оҕолоро! Эһигини барыгытын Улуу Кыайыы бырааһынньыгынан "Сунтаар улууһа (оройуона)" муниципальнай оройуон дьаһалтатын, улуус дьокутааттарын Сэбиэтин уонна тус бэйэбит ааппытыттан истиҥник эҕэрдэлиибит! Бу күн биһиги дойдубут устуоруйатыгар саамай ытык күн. Бу күн биһиги сэрии толоонугар кыргыспыт хорсун сэрииһиттэр, тыылга килбиэннээхтик үлэлээбит аҕа көлүөнэ дьон үтүө ааттарыгар сүгүрүйэбит. Бу күн сүһүөхтээх бэйэбит сүгүрүйэн туран Аан дойдуну өстөөхтөн босхолообут кыайыылаах көлүөнэҕэ дириҥ махталбытын тиэрдэбит! Мартын Герасимович уонна да атын саха хорсун буойуттара, Аҕа дойдуларын көмүскээбит дьоруойдар, биһиэхэ эйэлээх олоҕу туруулаһан, тыыннарын да толук уурары кэрэйбэккэ хорсуннук сэриилэспиттэрэ. Кинилэр сырдык ааттарын умнубаппыт, хорсун быһыыларын ыччакка холобур гынабыт. Тыыл бэтэрээннэрэ, сэрии огдооболоро уонна сэрии оҕолоро, эһиги сэрии сылларыгар олус элбэх ыараханы көрсүбүккүт, хорсуннук тулуйбуккут. Эһиги тыылга кытаанах үлэҕит, барыны кыайар үтүө санааҕыт, оҥорбут сиэртибэҕит – бу барыта Кыайыыбыт туһугар биир сомоҕолоһуу буолуу холобура. Эһиги оҕо сааскытын, эдэр кэмҥитин сэрии алдьархайа былдьаабыта. Ол гынан баран хайа да түгэҥҥэ дойдугутугар бэриниилээх хаалбыккытыгар, олох салҕанарыгар, Кыайыы буолуоҕар эрэли сүтэрбэтэххитигэр биһиги сүгүрүйэбит, киэн туттабыт. Улуу Кыайыы күнүн быйыл эмиэ судургута суох быһыыга-майгыга бэлиэтиибит. Байыаннай дьайыыга Аҕа дойдубут интэриэһин, эйэлээх олоҕу уонна дойдубут суверенитетын көмүскүүр кэммитигэр кыайыылаах-хотуулаах көлүөнэ чаҕылхай холобура биһиэхэ улахан суолталаах. Аҕа дойду Улуу сэриитин кэмигэр Ийэ дойдуларын көмүскээбит эһээлэрбит, аҕаларбыт, аймах-билэ дьоммут хорсун быһыылара фашизмы утары охсуһууга тулуурдаах, дьулуурдаах буоларга, дойдубутун таптыырга уонна көмүскүүргэ үөрэтэр. Улуу Кыайыы күнүнэн! Киһи аймаҕы Аҕа дойду сэриитигэр 1941-1945 сылларга көмүскэспит саха хорсун боотурдарыгар, күүстээх, бэйэни харыстаммат үлэнэн Кыайыыны уһансыбыт биир дойдулаахтарбытыгар, билигин Анал байыаннай дьайыыга дойдуларын көҥүлүн, инники сырдык кэскилин иһин туруулаһа сылдьар буойуттарга Албан аат! Национализм, фашизм эһиннин! Аан дойдуга ил-эйэ эрэ баар буоллун! Сунтаар улууһун баһылыга А.В. Григорьев Улуус дьокутааттарын Сэбиэтин бэрэссэдээтэлэ У.Д. Попова

https://max.ru/id1424005501_gos/AZ4HecLtNpk *Махтанабыт. Киэн туттабыт. Сүгүрүйэбит.* 🕯🕯🕯Аҕа дойду Улуу сэриитигэр олохторун толук уурбут, Кыайыыны уһансыбыт буойуннары ахтан-санаан, ыам ыйын 8 күнүгэр Өйдөбүл уонна кутурҕан күнэ ыытыллар. "Ахтылҕан чүмэчитэ" бүтүн Арассыыйатааҕы аахсыйаҕа дьон-сэргэ көхтөөх кыттыыны ылан, Ленин болуоссатыттан сэлэлии хааман Албан аат болуоссатыгар өйдөбүнньүк чүмэчи уотун уматаллар. Улуус баһылыга Анатолий Григорьев мустубут дьоҥҥо туһаайан, хорсун буойуннарбыт ааттарын үйэтитии ытык иэспит буоларын бэлиэтээтэ уонна чуумпуруу мүнүүтэтин биллэрдэ. Ити кэннэ ытык сиргэ сибэкки гирляндата уурулунна. Сөҕүрүйбэт Кыайыы уотун иннигэр бар дьон көмүс буукубанан суруллубут биир дойдулаахтарын ааттарыгар сүгүрүйэн, сибэкки дьөрбөлөрүн уурдулар. Уостубат өйдөбүл чүмэчитэ хас биирдиибит сүрэҕэр үйэлэргэ умайдын!

https://max.ru/id1424005501_gos/AZ4Ha6SVASw *Сунтаарга Кыайыы параада: 200 тиэхиньикэ уонна өлбөөдүйбэт өйдөбүл* 🚩🚩🚩Ыам ыйын 8 күнүгэр Сунтаар сэлиэнньэтин киин уулуссаларынан Кыайыы өрөгөйдөөх параада ааста. Тэрээһин саамай чаҕылхай түгэнинэн «Өлбөт үйэлээх автополк» буолла. Быйылгы аахсыйаҕа уопсайа 200-чэ тиэхиньикэ мотоцикллартан саҕалаан ыарахан массыынанарга тиийэ кыттыыны ылан, улуус олохтоохторугар дьиҥнээх бырааһынньык тыынын бэлэхтээтэ. Параады Сунтаар улууһун баһылыга Анатолий Григорьев салайан ыытта. Байыаннайдыы киэргэтиллибит тиэхиньикэлэр хомсомуоллар паамытынньыктарыттан Албан аат болуоссатыгар диэри айаннаан, Кыайыы былааҕын тэлимнэтэн уонна дьоруой эһээлэрэрин мэтириэттэрин иннилэригэр тутан сүгүрүйүү сиэрин-туомут толордулар. Бу аахсыйа Сунтаар улууһугар 2016 сылтан саҕалаан ыытыллар. Сэрии бэтэрээннэригэр, тыыл үлэһиттэригэр сүгүрүйүү уонна бүгүн дойду көмүскэлигэр сылдьар буойуннарбытынан киэн туттуу туоһута.

https://max.ru/id1424005501_gos/AZ4HC672Kps *Өрөгөй уонна Сүгүрүйүү бэлиэтэ: Кыайыы былааҕа күөрэйдэ* 🚩🚩🚩Ыам ыйын 8 күнүгэр, Улуу Кыайыы үтүө үгэһинэн, Албан аат болуоссатыгар Кыайыы кыһыл былааҕын өрө таһаарыы сиэрэ-туома ыытылынна. Өрө күөрэйбит кыһыл былаах биһиги хорсун буойуттарбыт сырдык тыыннарынан уонна кыайыыга дьулуурдарынан ситиһиллибит ытык бэлиэ. Оччотооҕу кэмҥэ Рейхстаг үрдүгэр анньыллыбыт былаах бүгүн эмиэ киэҥник тэлээрэрэ оонньуур. Кыайыы кыһыл былааҕа хорсун буойуттар уонна тыылга сырдыгы-хараҥаны силбээн, күнү-түүнү билбэккэ үлэлээбит ытык дьоммут күүстээх санааларын туоһута. Кыайыы күнэ — Өрөгөй күнэ!

https://max.ru/id1424005501_gos/AZ4F-KjIBQM *Сунтаар улууһун баһылыга Анатолий Григорьев сэрии кыттыылааҕын огдообото Дария Пахомоваҕа ыалдьыттаата, махтал суругу уонна өйдөбүнньүк бэлэҕи туттарда.* 🎗🎗🎗Оччотооҕу сэрии сылларын ыар тыынын билбит, тыылга үлэлээбит уонна эйэлээх олоҕу уһансыбыт кэрэһиттэрбит кэккэлэрэ күн-түүн аҕыйаан иһэр. Кинилэр ортолоругар Сунтаар улууһун ытык олохтооҕо, сэрии кыттыылааҕын огдообото Дария Пахомова. Кини ийэ хорсун быһыытын дьиҥнээх холобурунан буолар. Дария Пахомова эдэркээн кыыс сылдьан, сэрииттэн эргиллибит биэс оҕолоох аҕаҕа кэргэн тахсыбыта. Кырачаан оҕолору бэйэтин оҕолорун курдук иитэн, таптаан, салгыы өссө биэс оҕону күн сиригэр көрдөрөн, уопсайа 10 оҕону иитэн атахтарыгар туруорбута. Бу хас биирдии дьахтартан тахсыбат, күүстээх санааны уонна сылаас сүрэҕи эрэйэр хорсун быһыы. Ытык кырдьаҕас оҕолорун, сиэннэрин тапталларыгар угуттанан өссө да уһун үйэлэннин! _Сунтаар улууһун дьаһалтатын пресс-сулууспата_

https://max.ru/id1424005501_gos/AZ4F6iYlOE4 *КИМ ДА УМНУЛЛУБАТ, ТУОХ ДА УМНУЛЛУБАТ!* 🎗🎗🎗Аҕа дойду Улуу сэриитэ Сунтаар сиригэр-уотугар хаалларбыт бааһа дириҥ уонна ыарахан. Бу кэмнэрдээҕи устуоруйа хас биирдии улуус дьонун таарыйар чахчылардаах. Ол курдук, 1941 сыллаахха сэрии саҕаланыаҕыттан Сунтаар сириттэн уопсайа 2756 киһи ийэ дойдутун көмүскүү барбыта. Кинилэр Москва анныгар, Сталинградтааҕы кыргыһыыга, Курскайга уонна Берлини ылыыга хорсуннук сэриилэспиттэрэ. Ол эрэн, кыайыы сыаната олус үрдүк этэ. Сэриигэ барбыт дьонтон уопсайа 1092 киһи эрэ тыыннаах эргиллибитэ. 1664 буойун кыргыһыы хонуутугар охтубута эбэтэр сураҕа суох сүппүтэ. Сэрии фронунан эрэ бүппэтэҕэ. Сунтаар улууһун устуоруйатыгар саамай ыарахан балаһатынан тыылга буолбут аччыктааһын буолар. Сэрии сылларыгар кураан уонна кытаанах сут турбута. Ити сылларга тыылга аччыктааһынтан уонна ыарыыттан 4500 кэриҥэ киһи суох буолбута. Бу фронтан эргиллибэтэх дьон ахсааныттан икки төгүл элбэх. Ордук элбэх сүтүктээх нэһилиэктэринэн Түбэй, Сиэйэ, Наахара, Күндэйэ буолаллар. Улуу Кыайыы күнүн көрсө улуус баһылыга Анатолий Григорьев салайааччылаах делегация бастакы хомуурга барбыт буойуттар ааттарыгар турар Обоччолоох пааматынньыгар өйдөбүнньүк гирлянданы уурдулар. Биһиги иэспит кинилэр ааттарын умнубат буолуу. Хас биирдии Сунтаар киһитэ бэйэтин эһээтин, хос эһээтин аатын билэрэ — бу устуоруйаҕа саамай күндү бэлэҕинэн буолар. _Сунтаар улууһун дьаһалтатын пресс-сулууспата_

📽📽📽Быйыл республика үрдүнэн номнуо 51 термоточка бэлиэтэнэн, ыксаллаах бэлэм буолуу режимэ биллэрилиннэ. Онон сиэттэрэн, Сунтаар улууһугар баһаары утары үлэлиэхтээх сулууспалар күүстэрин уонна кыахтарын тургутан көрдүлэр. Бу туһунан НВК ханаалыгар көстүбүт сюжеты көрүҥ🙌

https://max.ru/id1424005501_gos/AZ4AbjqZdGk 🇷🇺🇷🇺🇷🇺Байыаннай дьайыыга кыттыыны ылан, төрөөбүт Сунтаарын сиригэр Денис Попов — Дьоҕур этэҥҥэ эргиллэн кэллэ. Кини «Боотур» этэрээтин састаабыгар киирэн, саперунан чиэстээхтик сулууспалаан, байыаннай иэһин бигэтик толордо. Сунтаар улууһун баһылыга Анатолий Григорьев уонна патриотическай иитиигэ специалист, байыаннай дьайыы бэтэрээнэ Владимир Ведерников буойун-саперу кытта ирэ-хоро кэпсэттилэр. Денис курдук хорсун санаалаах, дойдуларын таптыыр уолаттар баар буоланнар, биһиги эйэлээх халлаан анныгар олоробут. Киниэхэ доруобуйаны, этэҥҥэ буолууну уонна эйэлээх олоҕор ситиһиилэри баҕарабыт. _Сунтаар улууһун дьаһалтатын пресс-сулууспата_

https://max.ru/id1424005501_gos/AZ4AYLkPOgY *Сунтаар кэскиллээх мадьынылара Россия түһүлгэтигэр кыайыы өрөгөйүн биллилэр.* 🏆🏆🏆Чебоксары куоракка ыытыллыбыт мас тардыһыытыгар Россия чемпионатыгар Сунтаар улууһун кэскиллээх спортсменнара дойдуларын аатын үрдүктүк тутан, ситиһиилээхтик кытыннылар. Турнир түмүгүнэн биһиги эдэр спортсменнарбыт — Богдан Прокопьев, Жанна Чалбанова, Зафарджон Решетников уонна Валерия Николаева уопсайа 2 кыһыл көмүс уонна 1 боруонса мэтээли аҕаллылар. Үрдүк ситиһиилээх спортсменнары уонна кинилэри бэлэмнээбит тренердэри улуус баһылыга Анатолий Григорьев уонна тустаах тэрилтэ салайааччылара үөрүүлээх быһыыга-майгыга эҕэрдэлээтилэр, Сунтаар аатын Россия таһымыгар дорҕоонноохтук ааттатан, улуус спорка кэскилэ бигэтин көрдөрбүттэрин иһин истиҥ махтал тылларын эттилэр. Маннык кыайыылар атын да оҕолор спорка дьулуһалларыгар, чөл олоҕу тутуһалларыгар үтүө холобурунан буолаллар. Сунтаар эдэр мадьыныларын инникитин да улахан күрэхтэһиилэр, аан дойду таһымнаах кыайыылар күүтэллэр. Эһиги кыайыыгыт — улууспут киэн туттуута! _Сунтаар улууһун дьаһалтатын пресс-сулууспата_

https://max.ru/id1424005501_gos/AZ38yXmndS8 *Сунтаар улууһа ойуур баһаардарын утары охсуһууга бэлэм: «Эрдэттэн бэлэмнэнии — кыайыыга тирэх»* 🔹️🔹️🔹️Саха сиригэр сааскы кэм саҕаланыаҕыттан, республика үрдүнэн номнуо 51 термоточка бэлиэтэнэн, ыксаллаах бэлэм буолуу режимэ биллэрилиннэ. Онон сиэттэрэн, Сунтаар улууһугар ойуур баһаарын утары үлэлиэхтээх сулууспалар күүстэрин уонна кыахтарын тургутан көрдүлэр. Ойуур баһаарын кытта охсуһууга бириэмэни сүтэрбэт, суһал быһаарыныыны ылынар уонна хас биирдии сулууспа бэйэ-бэйэтин кытта ситимнээхтик үлэлиирэ улахан оруоллаах. Сунтаар улууһун баһылыга Анатолий Григорьев бэлиэтииринэн, уоту кытта охсуһууга «эрдэттэн бэлэмнэнии — кыайыыга тирэх» диэн принцип тутуһуллар. Бу тэрээһиҥҥэ барыта 30 техника уонна 90 киһи таҕыста. Бэрэбиэркэ кэмигэр хас биирдии техника туруга, үлэһиттэр анал таҥастарынан уонна туттар тэриллэринэн хааччыллыылара сиһилии бэрэбиэркэлэннэ. Специалистар бэлиэтииллэринэн, Сунтаар улууһа ойуур баһаарын көрсөргө толору бэлэм. Ол эрээри, хас биирдии олохтоох уоттан сэрэхтээх буолара, айылҕаҕа сылдьыы быраабылатын тутуһара сүрүн көмө буолуоҕа. _Сунтаар улууһун дьаһалтатын пресс-сулууспата_

https://max.ru/id1424005501_gos/AZ38hcKccA4 🔹️🔹️🔹️Быйыл Сунтаар улууһа төрүттэммитэ 225 сылын бэлиэтиир үбүлүөйдээх ыһыах ыһыллыаҕа. Улуус баһылыга Анатолий Григорьев анал хамыыһыйа чилиэннэрин кытта сынньалаҥ паркатын көрдүлэр. Манна төрүт үгэһи тутуһан саҥа тутуулар дьэндэйиэхтэрэ. Ол курдук, медицинэ үлэһиттэригэр, авиатордарга уонна оскуола дириэктэрдэригэр анал балаҕаннар тутуллуохтара. Тутуу бастакы хаамыылара саҕаланнылар — сирэ быһылынна, былааннара бигэргэннэ. Бу саҥа балаҕаннар Ыһыах кэмигэр эрэ буолбакка, кэлэр да өттүгэр парка тупсарыгар, норуот үгэһин үйэтитэргэ күүс буолар сиринэн буолуоҕа. _Сунтаар улууһун дьаһалтатын пресс-сулууспата_

*Ытыктабыллаах Сунтаар улууһун олохтоохторо уонна ыалдьыттара!* 🔴Ыам ыйын 8 күнүгэр киэһээ 18:00 чаастан “Өлбөт үйэлээх автополк” автопробекка ыҥырабыт, “Хомсомуол” пааматынньыгыттан “Ленин” болуоссатыгар диэри тимир көлөнөн барыы. 🚙🚗 🔴Киэһээ 19:00 чаастан “Өйдөбүл төлөнө” сэлэлии хаамыы. Хаамыы “Ленин” болуоссатыттан “Албан аат” болуоссатыгар диэри. Кыайыы күнүгэр аналлаах “Умнубаппыт, киэҥ туттабыт, сүгүрүйэбит” “Өлбөт үйэлээх автополк”, “Өйдөбүл төлөнө” Арассыыйа аахсыйаларыгар ыҥырабыт.🇷🇺

📽📽📽 Ыам ыйын бастакы күннэрэ сунтаардарга күүрүүлээх үлэнэн уонна сомоҕолоһуу тыыннаах саҕаланнылар. Нэһилиэк иһигэр ыытыллар үгэс буолбут хомунуу-ыраастаныы үлэлэрин сэргэ, бу сырыыга анал байыаннай дьайыы кыттыылаахтарын дьиэ кэргэттэригэр күүс-көмө буолууга улахан болҕомто уурулунна. Бу туһунан НВК ханаалыгар көстүбүт сюжеты көрүҥ🙌

https://max.ru/id1424005501_gos/AZ3iNMVGdRU *Сомоҕолоһуу күүһэ - үлэҕэ!* 🕊🕊🕊Үлэ күнүн көрсө Сунтаар дьоно-сэргэтэ уонна тэрилтэлэр үлэһиттэрэ көхтөөх субуотунньукка таҕыстылар. Кыһыны быһа мунньуллубут бөҕү-сыыһы хомуйан, уулуссалары ыраастаан, нэһилиэк сирэ-уота тупса түстэ. Бырааһынньык саамай суолталаах түгэнинэн улуус дьаһалтатын эр дьоно тэрийбит аһымал ааксыйалара буолла. Кинилэр биир киһи курдук түмсэн, байыаннай дьайыыга сылдьар уолаттар дьиэ кэргэттэригэр оттук маһы бэлэмнээтилэр. Уопсайа 62 киһи күүһүн түмэн саһаан маһы бэлэмнээһин үлэтин ыыттылар, байыаннай сулууспалаахтар 13 ыалларыгар маһы тиэйэн биэрдилэр. Бу ааксыйа улахан тирэх уонна өйөбүл буолар. Бу курдук Күөх Маай бырааһынньыга дьону сомоҕолоон, үтүө дьыалаҕа түмэн үлэ көдьүүстээх, таһаарыылаах буолла. 📽 үлэ хаамыытын улуус баһылыга Анатолий Григорьев кэпсиир👆 _Сунтаар улууһун дьаһалтатын пресс-сулууспата_

https://max.ru/id1424005501_gos/AZ3dJqitXiQ 🇷🇺🇷🇺🇷🇺Сунтаарбыт биир хорсун уола, Игорь Корнилов, анал байыаннай дьайыыга бэйэтин ытык иэһин чиэстээхтик толорон, этэҥҥэ дойдутугар эргиллэн кэллэ. Кини бэйэтин баҕатынан хантыраак баттаһан, Ийэ дойдутун көмүскэлигэр туруммута. Билигин Игорь төрөөбүт-үөскээбит Тойбохойун сиригэр-уотугар салгыы олохсуйар, үлэлиир-хамсыыр былааннаах. Саллаат буолан Ийэ дойдутун көмүскээбит буоллаҕына, билигин кини тыа хаһаайыстыбатын ылсан дойдутун сайыннарыыга күүс-көмө буолуоҕа. Киниэхэ инники олоҕор ситиһиилэри, чэгиэн туругу уонна үтүө баҕа санаалара туола туралларыгар баҕарабыт. _Сунтаар улууһун дьаһалтатын пресс-сулууспата_

https://max.ru/id1424005501_gos/AZ3cs0B3Sk8 *Сунтаарга Саха Өрөспүүбүлүкэтин күнүн үрдүк таһымнаахтык бэлиэтээтилэр* 🔹️🔹️🔹️Сунтаар улууһугар Саха Өрөспүүбүлүкэтин күнүн үөрүүлээхтик уонна үрдүк күүрүүлээхтик бэлиэтээтилэр. Бу күн сунтаардар мустан, дойду сайдыытыгар тус кылааттарын киллэрбит үтүө үлэһит дьонун чиэстээтилэр. Тэрээһин сүрүн чааһыгар улуус баһылыга Анатолий Григорьев итиитик-истиҥник эҕэрдэлээтэ. Кини бэйэтин тылыгар өрөспүүбүлүкэ сайдыыта хас биирдии киһи тус кыһамньытыттан уонна үлэтиттэн тутулуктааҕын тоһоҕолоон бэлиэтээтэ. Үөрүүлээх быһыыга-майгыга улуус бастыҥ үлэһиттэригэр Арассыыйа Федерациятын уонна Саха Өрөспүүбүлүкэтин үрдүкү наҕараадаларын туттарда. Бу күн эдэр көлүөнэҕэ эмиэ ураты суолталанна. 14 саастарын туолбут оҕолор Арассыыйа Федерациятын гражданинын пааспорын үөрүүлээхтик тутан, дойду эппиэтинэстээх гражданнара буолалларын билиннилэр. Бэлиэ күнү көрсө Үөрэҕирии түмэлэ Сунтаар улууһун сырдык тыыннаах дьонугар аналлаах быыстапканы арыйда. Бу экспозицияҕа улууспут сайдыытыгар сүдү кылааттарын киллэрбит чулуу дьоммут сырдык сэбэрэлэрин, кинилэр олорон ааспыт суоллара үйэтитиллибит мэтириэттэрин сэргии көрдүбүт. Тэрээһин кэмигэр мустубут дьон санаата көтөҕүллэн, наҕараадаламмыт биир дойдулаахтарын сылаастык эҕэрдэлээтилэр. Үтүө үлэһит дьонунан киэн туттар Сунтаар сирэ өрөспүүбүлүкэ бэлиэ күнүн ити курдук биир сомоҕо буолан көрүстэ. 📽 Үтүө түгэни анал устууга көр👆 _Сунтаар улууһун дьаһалтатын пресс-сулууспата_