رسائل مجهول

بقى عندي تكييف في اوضتي للنوم و الشغل و انا عندي 25 سنة تقريبا قبلها قعدت ربع قرن باتعامل بطرق التبريد البلدي بتاعت بيوتنا بخلاف مروحة المصانع الحربية أو مروحة السقف الأوشا كان فيه ملقف المسقط المنور هوا شراعة البيت سيب شباك المطبخ عامل تيار مع شباك أوضة ابوك و البلكونة و السطوح بخلاف أوبشن أن بيتكم يكون بحري تبريد من نوع تاني أنا مفتقده مش موضوع هوا ساقع زي بتاع التكييف كان اسمه طراوة تبريد لروحك مش لجلدك و عضمك تبريد من نوع غريب اولا بيتبني عليه دايما نشاط ما زي ما خليكو ده الجو حلو مستعجلين ليه أو زي فلان نام الهوا سطله أو الهوا خده او تسمع الله على شوية الهوا الحلوين دول ما تقوم تعلق لنا على الشاي طراوة بتدفعك للتفاعل مع الحياة جايلك مشوار متعبية حياة نسمة الهوا دي على بال ما وصلت لك كانت عدت على غيط و بلكونة ناشرة غسيل و دخان طالع من فرن عيش بلدي و حد سارح في الشارع ببخور و عيل مستحمي و واقف في الشباك و حد فارش بنعناع الناس اللي بتتريق على ابهاتنا و اعمامنا اللي كانوا بيقعدوا في البيت و البلكونات بالفنلة الحمالات و فاكرينها عفانة دي ناس فاهمة مش عايزة مللي من الطراوة يفوتها يعني تكاد تكون الطبطبة الوحيدة في اليوم انا بافتقد الطراوة دي و بادور عليها رغم التكييف اللي في كل حتة باحط فيها رجليا بيت و شغل و عربية بس هو هوا ساقع كمبروسور و فريون لا بيهز ريحانة زارعها ولا حتة غسيل منشرها ولا بيخلي ورق الشجرة يوش و يطير العصافير ولا حتى بيقولك جيرانك طابخين ايه النهاردة

لــ عمر طاهر