Hindu ဘာသာရေး အသိပညာ

ယနေ့ကျရောက်တဲ့ အနန္တကျသုရ်ဒရှီးနေ့နှင့် ဂနေ့ရှ်ပွဲတော်၏ ရုပ်ပွားတော်ရေမျှောပူဇော်တဲ့ (ဗီဆာဂျန်း) နေ့ထူးမှာ အားလုံးအတွက် မင်္ဂလာအပေါင်း ခံစားရပါစေ။ အတားအဆီး ဒုက္ခဟူသမျှကို ဖယ်ရှားပေးပြီး အမြတ်ဆုံးပူဇော်ထိုက်တဲ့ ဂနေရှ်ဘုရားရှင်၏ မေတ္တာရိပ်အောက်မှာ သာဝကတိုင်း မကောင်းမှုမှန်သမျှ ကင်းဝေးကြပါစေကြောင်း ဆုမွန်ကောင်းတောင်းအပ်ပါတယ်။ ဒီကနေ့ ရေမျှောပူဇော်မှုနှင့်အတူ ဘုရားရှင်၏ ကရုဏာတော်များ တစ်ကမ္ဘာလုံးသို့ စီးဆင်းပျံ့နှံ့ပါစေ။ ဘဝရဲ့ အခက်အခဲဒုက္ခတွေကို ရှင်းထုတ်ပေးနိုင်တဲ့ ဂနေ့ရှ်ဘုရားရှင်၏ ကောင်းချီးမင်္ဂလာကြောင့် ယုံကြည်သူ သာဝကအားလုံး စိတ်ဆင်းရဲ ကိုယ်ဆင်းရဲများ ပပျောက်နိုင်ကြပါစေ။ #HRK

ယနေ့ဟာ ဂဏေ့ရှ်ကျသုရ်ထီးခေါ် ဘုရားရှင်ဂနေ့ရှ်ပွင့်တော်မူသောနေ့မြတ်ဖြစ်ပါတယ်။ သာ၀ကတိုင်းအားလုံးရဲ့ဘ၀မှာ ဘုရားရှင်ရဲ့ အနန္တမေတ္တာကြောင့် အခက်အခဲ၊ ဒုက္ခ၊ ဆင်းရဲ၊ အမင်္ဂလာအပေါင်းပပျောက်၍ အောင်မြင်ခြင်း၊ သုခ၊ မင်္ဂလာ၊ ဉာဏ်ပညာတို့ကို အစဉ်ရရှိပါစေ။ Ganapati Bapa Morya 🙏🏻

ဂနေ့ရှ်ဘုရားပွင့်တော်မူသောနေ့ ပူဇော်ပွဲအလှူ။ လူသားတို့၏ဘဝမှ အမင်္ဂလာတရား၊ အခက်အခဲအပေါင်းအား ပပျောက်စေ၍ ကောင်းခြင်း မင်္ဂလာအဖြာဖြာ အောင်မြင်ခြင်းကိုပေးသနားတော်မူသော ဂနေ့ရှ်ဘုရားရှင်ပွင့်တော်မူသောနေ့မြတ်တွင် ဂနေ့ရှ်ဘုရားပူဇော်ပွဲ ပြုလုပ်မည်ဖြစ်၍ နည်းများမဆို ပါ၀င်လှူဒါန်း ကုသိုလ်ပြုနိုင်ပါတယ်။ ပူဂျားတစ်ခုလုံးစာအတွက် ၅ သိန်းကျပ်။ ပူဇော်ပွဲအစုံအလင်နှင့် ရေစင်သွန်းခြင်းအတွက် ၅ သောင်းကျပ်။ စတုဒိသာ (၁) ဦးစာအတွက် ၃ ထောင်ကျပ်။ လှူဒါန်းနိုင်ရန် နံပါတ်။ 09977332895 Kaung Khant Naing

ဂနေ့ရှ် ကျသုရ်ထီး ခေါ် ဂနေ့ရှ်ဘုရားရှင် ပွင့်တော်မူသောနေ့မြတ်။ ၂၀၂၆ ခုနှစ် စက်တင်ဘာလ ၁၄ ရက် (တနင်္လာနေ့) သည် အတားအဆီး ဒုက္ခအပေါင်းကို ပယ်ဖျောက်ပေးတော်မူသော ဉာဏ်ပညာနှင့် အောင်မြင်မှုဆိုင်ရာ ဂနေ့ရှ်ဘုရားရှင် (ဗီဏယက်ခ်) ဖွားမြင်ပွင့်ထွန်းတော်မူသည့် နေ့ထူးနေ့မြတ် ဖြစ်သည်။ ဟိန္ဒူဘာသာတွင် မည်သည့် မင်္ဂလာကိစ္စ၊ ပူဇော်ပွဲကိုမဆို စတင်ချိန်၌ အဦးဆုံး ရှေးဦးစွာ ရှိခိုးပူဇော်ရသည့် ဘုရားရှင်ဖြစ်ပြီး၊ ကြုံတွေ့နေရသော အခက်အခဲများကို လွန်မြောက်စေကာ ကောင်းကျိုးချမ်းသာကို အပြည့်အဝ ဆောင်ကြဉ်းပေးစွမ်းနိုင်သော ဘုရားရှင်အဖြစ် ယုံကြည်ကြည်ညိုကြသည်။ မယ်တော် ပါရ်ဗသီးသည် စန္ဒကူးနှင့် နနွင်းမှုန့်တို့ဖြင့် ပုံဖော်ဖန်တီးထားသော ရုပ်တုငယ်ကလေးမှတစ်ဆင့် မဟာဂဏပသီး၏ အလိုတော်အတိုင်း ကေလာ့ရှ်တောင်ထက်တွင် ဂနေ့ရှ်ဘုရားရှင် ဖွားမြင်ပွင့်ထွန်းလာခဲ့ခြင်း ဖြစ်သည်။ ဤနေ့မြတ်မှစတင်၍ ဂနေ့ရှ်ဥထ်ဆဗ်ကို အထွတ်အမြတ်ထား ကျင်းပကြသည်။ ကျသုရ်ထီး သိထိ နှင့် ပူဂျားပြုလုပ်ရန် အချိန်အခါ။ ကျသုရ်ထီး သိထိ စတင်ချိန် - ပြီးဆုံးချိန် စက်တင်ဘာလ ၁၄ ရက် နံနက် ၈:၀၆ နာရီ မှ စက်တင်ဘာလ ၁၅ ရက် နံနက် ၈:၄၄ နာရီ အထိ။ နေ့လယ်ပိုင်း ဂနေ့ရှ်ပူဂျာ အခါတော်မြတ် နံနက် ၁၀:၄၇ နာရီမှ နေ့လယ် ၁:၁၄ နာရီအထိ (ကြာချိန် စုစုပေါင်း ၂ နာရီ ၂၇ မိနစ်) ဂနေ့ရှ် ဗီဆာဂျန်း (ရေမျှောပူဇော်သည့်နေ့) စက်တင်ဘာလ ၂၅ ရက်၊ ၂၀၂၆ (ကြာသပတေးနေ့) ကျသုရ်ထီးနေ့တွင် ညဘက် ကောင်းကင်မှ လမင်းကို လုံးဝမကြည့်ရှုရန် အထူးရှောင်ကြဉ်ရပါမည်။ တစ်ချိန်က လနတ်မင်း (ကျန္ဒြဒေ့ဗ်) သည် ဂနေ့ရှ်ဘုရားရှင်၏ ဝမ်းဗိုက်နှင့် ဆင်ဦးခေါင်းတော်အသွင်ကို ပြက်ရယ်လှောင်ပြောင်ခဲ့ဖူးသဖြင့် "ကျသုရ်ထီးနေ့တွင် ၎င်းကို ကြည့်ရှုသူ မည်သူမဆို မဟုတ်မမှန် စွပ်စွဲပြစ်တင်မှုများနှင့် ရင်ဆိုင်ရပါစေ" ဟူသော ကျိန်စာသက်ရောက်မှု ရှိနေသောကြောင့် ဖြစ်ပါသည်။ ဥပုသ်သီလ စောင့်တည်ခြင်းနှင့် ကပ်လှူပူဇော်နည်း ကပ်လှူရန် ပစ္စည်းများ ဂနေ့ရှ်ဘုရားရှင် အထူးနှစ်သက်တော်မူသည့် မိုဒက်ခ်၊ လဒူးရ်၊ နို့နှင့် နို့ထွက်ပစ္စည်းများ၊ မြေဇာပင်တို့ကို ဆက်ကပ်ပူဇော်နိုင်ပါသည်။ (သတိပြုရန် - သူလ်ဆီး/ပင်စိမ်းရွက်ကို ဘုရားရှင်ထံ လုံးဝမတင်လှူရပါ) မန္တြ ရွတ်ဖတ်ခြင်း ဤနေ့တွင် ဂနေ့ရှ်ဘုရားရှင်ကို အာရုံပြုကာ ဘုရားရှင်၏ ဂုဏ်တော်ကထာများကို နာယူကြည်ညိုသင့်ပြီး "ဥုမ် ဂံန် ဂဏပသယေ နမဟ်" မန္တြကို စိတ်အာရုံစူးစိုက်၍ ရွတ်ဖတ်ပူဇော်ပါ။ ဥပုသ်စားသောက်မှု စည်းမျဉ်း ပူဂျာပြီးဆုံးချိန်မှစ၍ ဆန်၊ ဂျုံနှင့် အခြား ကောက်ပဲသီးနှံများကို ရှောင်ကြဉ်ကာ သစ်သီးဝလံ၊ နွားနို့၊ သစ်သီးဖျော်ရည်၊ မြေပဲ၊ သာကူ၊ ငှက်ပျောသီး၊ ကန်စွန်းဥ၊ ပိန်းဥ၊ ပီလောပီနံ စသည့် ဧကာဒရှီး ပ်ရဆားဒ်ဖြင့်သာ သီလစောင့်တည်ရပါမည်။ ကျန်းမာရေးအခြေအနေကြောင့် အစားအသောက် အပြည့်အဝ မရှောင်နိုင်သူများအနေဖြင့် ညဘက် လထွက်ပြီးချိန်မှသာ ထမင်း သို့မဟုတ် ရိုတီကို စားသုံးနိုင်သော်လည်း တတ်စွမ်းပါက ကောက်ပဲသီးနှံရှောင်ခြင်းသည်သာ အကောင်းဆုံးဖြစ်ပါသည်။ #HRK

ယနေ့ညမြတ်ဟာ ဟိန္ဒူဘာသာရဲ့ အထင်ကရ ည ၄ ညထဲမှ မိုးဟရာသ်ရီး ခေါ် ကရိသ်ျှဏ ဘုရားရှင် ပွင့်တော်မူတဲ့ ညထူးညမြတ်ဖြစ်ပါတယ်။ ဤညမြတ်ဟာ ဘုရားရှင်ကရိသ်ျှဏ သာမက ကာလီမယ်တော်နဲ့ပါ ဆက်စပ်သော ညမြတ်ဖြစ်ပါတယ်။ ဘုရားရှင် ကရိသ်ျှဏနှင့် ယိုးဂမာယာမယ်တော်မြတ်တို့ဟာ ဤညမြတ်မှာ ပွင့်ထွန်းတော်မူခဲ့ပါတယ်။ ကာလီမယ်တော်ပွင့်တော်မူတဲ့နေ့မြတ်လည်းဖြစ်တဲ့အတွက် ယခုညမြတ်မှာ ကရိသ်ျှဏဘုရားရှင်ရော ကာလီမယ်တော်ကိုပါ အထူးပူဇော်သင့်ပါတယ်။ ကရိသ်ျှဏ ဘုရားရှင်ဟာ လူအပေါင်းကို မာယာမှ ကယ်တင်ရန် မကောင်းမှုအဓမ္မကို ပယ်ဖျက်ရန် နူးညံ့သော ရူပတော်ဖြင့် ဆင်းသက်တော်မူသကဲ့သို့ ကာလီမယ်တော်ဟာလည်း လူအပေါင်းကို အဓမ္မမှုရန်မှ ကယ်တင်ရန်အတွက် အခက်ထန်ဆုံး ရူပတော်ဖြင့် ပွင့်ထွန်းခဲ့ခြင်းဖြစ်ပါတယ်။ ထို့အတွက် ယနေ့ညမြတ်မှာ ဘုရားရှင်နဲ့ မယ်တော်ရဲ့ အနန္တမေတ္တာကို ခံယူရန်အထူးအရေးကြီးပါတယ်။ ကရိသ်ျှဏသည် ကာလီ။ ကာလီသည် ကရိသ်ျှဏ။ #HRK

ကရိသ်ျှဏ ဂျန္မာရှ်တမီးနေ့မြတ် (ခေါ်) ကရိသ်ျှဏဘုရားမြတ် ဖွားမြင်တော်မူသော နေ့မြတ်။ ၂၀၂၆ ခုနှစ် စက်တင်ဘာလ (၄)ရက်နေ့သည် လွန်ခဲ့သော (၅၂၅၃)နှစ်က ကရိသ်ျှဏဘုရားရှင် ဖွားမြင်တော်မူသော ကရိသ်ျှဏ ဂျန္မာရှ်တမီး‌ ခေါ် ဂိုကူးလ်အာရှ်တမီး ဖြစ်သည်။ ညပူဂျားလုပ်ရန်အချိန်မြတ်မှာ စက်တင်ဘာလ ၄ ရက် ည ‌‌‌‌၁၁ နာရီ ၄၁ မိနစ် မှ စက်တင်ဘာလ ၅ ရက် ညဉ့်ဦးယံ ၁၂ နာရီ ၂၈ မိနစ်အထိ ၄၆ မိနစ်ကြာမြင့်မည်ဖြစ်သည်။ ဥပုသ်ဖြေရန်အချိန်မှာ စက်တင်ဘာလ ၅ ရက် နံနက် ၅ နာရီ ၅၂ မိနစ်‌နောက်ပိုင်းဖြစ်သည်။ ဥပုသ်ယူမည့်သူများသည် မိမိကျန်းမာရေးအခြေအနေအရ သင့်တော်သလို စောင့်ထိန်းနိုင်ပါတယ်။ စောင့်တည်လိုက်နာရန် စည်းမျဉ်းများ။ ၁) မနက် ၄ နာရီလောက်ထ၍ ခန္ဓာကိုယ် အပြင်ပိုင်း သန့်ရှင်းအောင် ရေချိုးသန့်စင်ပြီး သန့်ရှင်းစင်ကြယ်သော အ၀တ်ကို၀တ်ပါ။ ၂) အရှေ့အရပ်သို့ မျက်နှာမူပြီး ဆံကလ်ပ်ယူ (ကျွန်တော် / ကျွန်မ မည်သူမည်ဝါသည် ဥပုသ်ကို အသေအချာစောင့်တည်ပါမည်) သက်သေပြုပါ။ ၃) မနက် ၄ နာရီခွဲမှာ မံန်ဂလာအာရ်သီး လုပ်ပါ။ ၄) ကောင်းသောအတွေး၊ ကောင်းသောအလုပ်၊ ကောင်းသောစကားသာဆိုပြီး တစ်နေကုန် ကရိသ်ျှဏဘုရားရှင်ရဲ့ နာမတော်ကို ရွတ်ဖတ်ရင်း အနုဿတိပွားများပါ။ ၅) ဘုရားရှင်ရဲ့ ဘုန်းတော် ဂုဏ်တော်ကို နှလုံးသွင်းပြီး ဟရေကရိသ်ျှဏ မဟာမန္တရားကို ၁၆ ပတ်အနည်းဆုံးပုတီးစိပ်ပါ။ ၁၆ ပတ်၊ ၂၅ ပတ်၊ ၆၄ပတ် ၊ ၁၀၈ ပတ် နိုင်သ၍ ပုတီးစိပ်ပါ။ ၆) ရေမသောက်ဘဲ ဥပုသ်စောင့်လို့ရသည်။ ည ၁၂ နာရီ အထိ ရေမသောက်ဘဲနေပါ။ ရေသောက်မှရမည့်သူများ ရေသောက်ပြီး ဥပုသ်ယူလို့ရသည်။ ဥပုသ်မနိုင်၍ တစ်ခုခုစားလိုပါက မိမိလိုအပ်သလောက် ကောက်ပဲ၊ အနှံရှောင်ပြီး အသီး၊ နွားနို့၊ မြေပဲ၊ သာကူ၊ ငှက်ပျောပေါင်း၊ ပိန်းဥ၊ ကန်စွန်းဥ၊ ပီလောပီနံ၊ သစ်သီးဖျော်ရည်၊ သစ်သီး အစရှိသော ဧကာဒရှီး ပ်ရဆားဒ်ဖြင့် ဥပုသ်စောင့်တည်နိုင်သည်။ အသား၊ ငါး၊ သခွားသီး၊ ကြက်သွန်ဖြူ၊ ကြက်သွန်နီ၊ ခရမ်းသီး စတာတွေ ရှောင်ရမည်။ အရက်သောက်ခြင်း ၊ ဆေးလိပ်သောက်ခြင်းကို ရှောင်ရှားရမည်။ ၇) ဆင်းရဲချို့တဲ့သူများကို လှူဒါန်းပါ။ ကာမဂုဏ် လိင်ကိစ္စတွေ ရှောင်ရှားပါ။ ၈) နွား နှင့် အခြားတိရစ္ဆာန်များအား အစာကျွေးပါ။ ၉) ထိုရက်တွင် သူလ်ဆီး ပင်စိမ်း လုံး၀ မခူးရပါ။ လိုအပ်ပါက ထိုနေ့မတိုင်ခင် ကြိုခူးထားပါ။ ပူဂျားပြုလုပ်လိုသူများသည်လည်း မိမိတို့ အဆင်ပြေသလို တတ်ကျွမ်းသလို ပြုလုပ်နိုင်ပါတယ်။ အရေးအကြီးဆုံးဟာ မိမိတို့၏ ‌ဘက်သီး ခေါ် ယုံကြည် ဆည်းကပ်မှုပဲဖြစ်ပါတယ်။ ဟရေး ကရိသ်ျှဏ။ #HRK

ယနေ့သည် ရက်သျှားဗန်ဓန်း ခေါ် မေတ္တာကြိုးချည်နှောင်ပွဲတော်နေ့မြတ်ဖြစ်ပါသည်။ ရက်သျှားဗန်ဓန်းသည် နှစ်ပေါင်း (၅) ထောင်ကျော်ခန့် ကရိသ်ျှဏဘုရားမြတ်လက်ထက်တွင် အထင်အရှားပေါ်ထွန်းခဲ့သောငှား သ်ရေသားယုဂ်ကာလတွင်ပင် ‌စတင်ခဲ့ခြင်းဖြစ်၍ ကာလအားဖြင့် အလွန်အင်မတန်ကြာမြင့်လှပြီဖြစ်ပါသည်။ ကရိသ်ျှဏဘုရားမြတ်အား ဒြောပသီးမှ သွေးတိတ်စေရန် ဆာရီစဖြင့် ကြိုးချည်ပေးခဲ့ခြင်းကြောင့် ကရိသ်ျှဏဘုရားမြတ်မှ ဒြောပသီးအား အကာအကွယ်ပေးခဲ့ပါသည်။ သ်ရေသားယုဂ်တွင်ပွင့်တော်မူခဲ့သော ဗာမနဘုရားဇာတ်တော်တွင်လည်း အထင်အရှားရှိတော်မူပါသည်။ ထိုအကြောင်းကို ရှရီမတ်ဒ်ဘဂ၀သံမ်ကျမ်းနှင့် ဗိသ်ျှဏုပူရာဏ်တို့တွင် အကျယ်တ၀င့်ရေးသားထားပေးသည်။ ဇာတ်တော်သည်ကား တစ်ရံသောအခါက လောကတွင် အလွန်ဩဇာကြီးမားသော ဘလိဘုရင်မင်းမြတ်တစ်ဦးရှိခဲ့ပါသည်။ ထိုဘုရင်သည် ပ်ရလားဒ်မင်းမြတ်၏ မျိုးဆက်ဖြစ်သလို အသူရာမျိုးရိုးဖြစ်ပေသည်။ ဘလိဘုရင်သည် ထိုအချိန်တွင် လောကသုံးပါးအား အုပ်ချုပ်လေသည်။ ထို့အတွက် နတ်ဒေ၀တာတို့တွင် နတ်ပြည်အား ထိန်းချုပ်ခွင့်မရှိချေ။ ထိုအခါ နတ်ဒေ၀တာတို့၏ တောင်းပန်မှုကြောင့် ဘုရားမြတ် ဗိသ်ျှဏု (ဗစ်ရှ်နူး) သည် လောကသို့ ဗာမနအသွင်ဖြင့် ဆင်းသက်လေသည်။ ထိုအခိုက်တွင် ဘလိမင်းမြတ်သည် ‌လူ့လောကတွင် အလှူဒါနပြုနေလေသည်။ ဘလိမဟာရာ့ဂ်ျသည် ဗာမနဘုရားမြတ်ကို မြင်သည့်အခိုက်တွင်ပင် လွန်စွာ ကြည်ညိုသဒ္ဓါတရားဖြစ်ပေါ်၍ မိမိပိုင်ဆိုင်သမျှဘုံလောကတို့ကိုသာမက မိမိကိုယ့်ကိုပါ လှူဒါန်းလေသည်။ သို့အတွက် ဘုရားမြတ်ဗာမနက ဘလိမင်းမြတ်အား ဆုသလ်လောကအား ပေးသနားပြီး အုပ်ချုပ်စေလေသည်။ ဘလိမင်းမြတ်ဟာ ဘုရားမြတ်ကို အလွန်ကြည်ညိုသောကြောင့် ဆုသလ်လောကတွင် နေ့စဉ်ဘုရားမြတ်အားဖူးမြော်ခွင့်ရအောင် တောင်းဆုပြုလေသည်။ ထိုအခါ ဘုရားမြတ်သည် ဆုသလ်လောကအား ထိန်းသိမ်းကာကွယ်သူအဖြစ် ဘလိမင်းမြတ်အား ဖူးမြော်ခွင့်ပေးလေသည်။ လက်ရှ်မီးမယ်တော်သည် ဗိုက်ကွန်ဋ္ဌလောကသို့ ဘုရားရှင် ဗိသ်ျှဏုကို ပြန်လည်ခေါ်ဆောင်ရန် ဆုသလ်လောကသို့လာ၍ ဘလိမင်းမြတ်အား မောင်တော်အဖြစ်သတ်မှတ်ခါ ရာခီးချည်ပေးခဲ့ပါသည်။ ဘလိမင်းမြတ်မှ လက်ရှ်မီးမယ်တော်အား လက်ဆောင် ဘာပြန်ပေးရမလဲဆိုသောအခါ ဗိသ်ျှဏုဘုရားမြတ်အား ဗိုက်ကွန်ဋ္ဌလောကသို့ ပြန်လည်ခေါ်ဆောင်ခွင့်ပေးရန် ဆိုလေသည်။ ထို့အတွက် ဘုရားမြတ်ဗိသ်ျှဏုသည် ဗိုက်ကွန်ဋ္ဌလောကသို့ ပြန်ရောက်လာသော်ငှား ဝါတွင်း ၄ လလုံးတွင် ဆုသလ်လောက၌ ဘလိမင်းမြတ်အတွက် တည်တော်မူလေသည်။ ထိုအချိန်မှစ၍ ရက်သျှားဗန်ဓန်းအစဉ်အလာပေါ်ပေါက်ခဲ့ခြင်းဖြစ်သည်။ ကျွန်ုပ်တို့ ဟိန္ဒူဘာသာရေးအသိပညာအဖွဲ့မှလည်း မြန်မာနိုင်ငံအတွင်း မှီတင်းနေထိုင်ကြသော တိုင်းရင်းသား ပြည်သူတို့နှင့် ဟိန္ဒူဘာသာဝင်အပေါင်းအား ညီအစ်ကို မောင်နှမများသဖွယ် သတ်မှတ်၍ ရာခီး ခေါ် မေတ္တာနှောင်ကြိုး ချည်နှောင်လျက် ဘေးရန်ဒုက္ခအဖြာဖြာမှ ကင်းဝေးစေရန် ဆုတောင်း ပတ္ထနာပြုလိုက်ပါသည်။ #HRK

ရက်သျှားဗန်ဓန်း ခ) မေတ္တာနှောင်ကြိုးချည်ပွဲတော်။ ၂၀၂၆ ခုနှစ်၊ ဩဂုတ်လ ၂၈ ရက် (သောကြာနေ့) မှာ ကျရောက်မဲ့ "ရက်သျှားဗန်ဓန်း" ဟာ မောင်နှမတွေကြားက ဖြူစင်တဲ့ ချစ်ခြင်းမေတ္တာနဲ့ အပြန်အလှန် စောင့်ရှောက်မှုကို ဖော်ညွှန်းတဲ့ မင်္ဂလာရှိသော မေတ္တာနှောင်ကြိုးချည်ပွဲတော် ဖြစ်ပါတယ်။ ရက်သျှားဗန်ဓန်း ဆိုတဲ့ စကားရပ်အတိုင်း "အကာအကွယ်ပေးသော မေတ္တာနှောင်ဖွဲ့မှု" လို့ အဓိပ္ပာယ်ရပြီး မင်္ဂလာရှိတဲ့ ရာခီးကြိုးချည်နှောင်ရန် အကောင်းဆုံးအချိန်ကတော့ နံနက် ၅ နာရီ ၅၁ မိနစ်ကနေ နံနက် ၁၀ နာရီ ၄၈ မိနစ်အတွင်း ဖြစ်သလို နေထွက်ချိန်ကနေ နေဝင်ချိန်အတွင်း ပြုလုပ်သင့်ပါတယ်။ ဒီအစဉ်အလာအရ အစ်မ (သို့မဟုတ်) ညီမဖြစ်သူက မောင် ဒါမှမဟုတ် အစ်ကိုရဲ့ ညာဘက်လက်ကောက်ဝတ်မှာ မွန်မြတ်တဲ့ "ရာခီး" ကြိုးကို ချည်နှောင်ပေးရင်း ကျန်းမာပျော်ရွှင်ဖို့ ဆုတောင်းမေတ္တာပို့သကြပါတယ်။ အစ်ကိုနဲ့ မောင်တို့ကလည်း မိမိတို့ရဲ့ အစ်မ သို့မဟုတ် ညီမကို ဘဝတစ်လျှောက်လုံး ဘေးဒုက္ခအန္တရာယ်တွေကနေ ကာကွယ်စောင့်ရှောက်ပေးပါ့မယ်လို့ သစ္စာကတိပြုကာ လက်ဆောင်ပစ္စည်းတွေ အပြန်အလှန်ပေးအပ်ရင်း ဘုရားရှင်ရှေ့မှောက်မှာ မေတ္တာသစ္စာကို ခိုင်မြဲစေကြပါတယ်။ ဒီမွန်မြတ်တဲ့ ဓလေ့ဟာ လွန်ခဲ့တဲ့ နှစ်ပေါင်း ၅၀၀၀ ခန့်၊ ရှရီကရိသျှ်ဏဘုရားရှင် လက်ထက်တော်ကတည်းက စတင်ခဲ့တာ ဖြစ်ပါတယ်။ မတရားမှုကို နှိမ်နင်းရင်း ကရိသ်ျှဏဘုရားရှင်ရဲ့ လက်တော်မှာ စကြာထိခိုက်ဒဏ်ရာရကာ သွေးထွက်ခဲ့စဉ် ဒြောပသီက မိမိရဲ့ ဆာရီအစကို ဖြဲပြီး အမြန်ဆုံး စည်းနှောင်ပေးခဲ့တဲ့ မေတ္တာတရားကြောင့် ဘုရားရှင်က ဒြောပသီကို ညီမအရင်းသဖွယ် သတ်မှတ်စောင့်ရှောက်ခဲ့ပါတယ်။ နောင်တစ်ချိန် ကောရဝတို့က ဒြောပသီကို လူပုံအလယ်မှာ အရှက်ခွဲဖို့ ကြိုးစားချိန်မှာလည်း ဘုရားရှင်က အဆုံးမရှိတဲ့ ဆာရီအဝတ်တန်ဆာကို တန်ခိုးတော်နဲ့ ဖန်ဆင်းပေးပြီး ဒြောပသီရဲ့ ဂုဏ်သိက္ခာကို အပြည့်အဝ ကာကွယ်စောင့်ရှောက်ပေးခဲ့ပါတယ်။ ယနေ့ခေတ်မှာတော့ ဒီမင်္ဂလာပွဲတော်ဟာ မောင်နှမတွေကြားမှာသာမက ဆွေမျိုး၊ မိတ်ဆွေသူငယ်ချင်းတွေကြားမှာပါ တစ်ဦးနဲ့တစ်ဦး အပြန်အလှန် လေးစားတန်ဖိုးထားမှု၊ စောင့်ရှောက်လိုမှုနဲ့ စစ်မှန်တဲ့ ချစ်ခြင်းမေတ္တာကို ဖော်ကျူးတဲ့အနေနဲ့ ရာခီးကြိုး ချည်နှောင်ဆုတောင်းပေးတဲ့ အလေ့အထတစ်ခုအဖြစ် ဆက်လက်တည်ရှိနေဆဲ ဖြစ်ပါတယ်။ #HRK

ယနေ့ Nag Panchami ခေါ် ‌မြွေမင်းများအား ပူဇော်ရန်နေ့မြတ်တွင် ဖူးမြော်သင့်သော တစ်နှစ်တွင် ၂၄ နာရီသာဖွင့်သော Nagchandreshwar Mahadev ဘုရားကျောင်း။ Ujjain Mahakaleshwar Jyotirling ဘုရားကျောင်းရှိ Nagchandreshwar Mahadev ဘုရားကျောင်းကို Nag Panchami နေ့မတိုင်ခင် သန်းခေါင်မှစ၍ ၂၄ နာရီသာဖွင့်ပါတယ်။ ဒီဘုရားရှင်အား ဖူးမြော်ခြင်းဖြင့် Spiritual Protection ရရှိပြီး မိမိတို့အပေါ်ရှိသော Kaal Sarpa Dosh နှင့် ရာဟု၊ ကေသု ဂြိုဟ်မင်းတို့၏ မကောင်းသော သက်ရောက်မှုများကို ပပျောက်စေပါတယ်။ #HRK

နားဂ်ပန်ကျမီး (ခေါ်) မြွေမင်းပူဇော်ပွဲ။ ၂၀၂၆ ခုနှစ်၊ ဩဂုတ်လ (၁၇) ရက်နေ့ဟာ နားဂ်ပန်ကျမီးနေ့မြတ်ဖြစ်ပါသည်။ ဟိန္ဒူဘာသာတွင် မြွေသည် အလွန်အရေးပါသောဖြစ်တည်မှုတစ်ခုဖြစ်ပြီး ဘုရားရှင် အသီးသီးတို့ထံ ခစားရသော သတ္တဝါများဖြစ်သည်။ ထို့အတွက် မြွေတို့သည် ဟိန္ဒူဘာသာတွင် အလွန်အရေးပါပေသည်။ ဟိန္ဒူဘာသာတွင် "နားဂ်" နှင့် "ဆရ်ပ" ဟူသော အသုံးအနှုန်းတို့ဖြင့် မြွေကို ခေါ်‌ဝေါ်ကြပေသည်။ ထိုအသုံးအနှုန်း တစ်ခုကြားတွင် ကွာဟချက်များရှ်ိပေသည်။ "ဆရ်ပ" သည် ယေဘူယျအားဖြင့် မြွေအားလုံးကို ခေါ်ဝေါ်ပြီး သာမန် တိရစ္ဆာန်မြွေတို့ကိုလည်း ဆရ်ပဟုသာ ခေါ်ဝေါ်ကြသည်။ "နားဂ်" သည် နတ်တန်ခိုးအား ပိုင်ဆိုင်သော မြွေမင်း အကြီးအကဲများအား ခေါ်ဝေါ်သော အသုံးအနှုန်းဖြစ်ပေသည်။ သို့ပေငှား နားဂ်များသည်လည်း မြွေကဲ့သို့သာ အဆင်းသဏ္ဍာန်ရှိကြပြီး ပုံမှန်ထက် ကြီးမားသောမြွေမင်းများကို ခေါ်ဝေါ်ခြင်းဖြစ်ပေသည်။ ထိုမြွေမင်း ဒေ၀တာများအား အရိုအသေပြု ပူဇော်ကြသောပွဲကို နားဂ်ပန်ကျမီးဟုခေါ်ပြီး ဤပွဲတော်တွင် မြွေ ဒေ၀တာများအား ရည်စူး၍ ပန်း၊ နနွင်း၊ ထမင်း၊ မုန့်ချို၊ နွားနို့တို့ဖြင့် ကပ်လှူပူဇော်ကြသည်။ နားဂ် ဒေဝတာတို့ကို ရည်စူး၍ ယနေ့တွင် ကပ်လှူပူဇော်ကြသော်လည်း ဟိန္ဒူဘာသာ၀င်များဟာ ထိုမြွေတို့အား ကိုးကွယ်ဆည်းကပ်နေခြင်းမဟုတ်ဘဲ ရိုသေလေးစားမှုကိုသာပြသခြင်းဖြစ်ပါသည်။ ဟိန္ဒူဘာသာအရတွင် ကိုးကွယ်ထိုက်သူမှာ ဘုရားရှင်သာဖြစ်ပါသည်။ ဂရုဒ ပူရာဏ်ကျမ်းအရ ထိုနေ့တွင် မြွေမင်းတို့ကို ပူဇော်၍ ကုသိုလ်ပြုသူတို့၏ ဘ၀တွင် ကောင်းကျိုးမင်္ဂလာများသာရရှိမည်ဖြစ်သည်။ နားဂ်ဒေ၀တာများကို ပူဇော်ခြင်းဖြင့် ကောင်းကျိုးမင်္ဂလာ၊ အကာအကွယ်များရရှိပြီး မိသားစု၏ ကျန်းမာခြင်း၊ မကောင်းသော အမင်္ဂလာများ ပပျောက်ခြင်းတို့ကို ဖြစ်ပေါ်စေလိမ့်မည်။ မိမိ၏ ဘ၀တွင် မထင်မှတ်ဘဲ ကျရောက်တတ်သော အခက်အခဲများ၊ တုန်လှုပ်ခြောက်ခြားစေသော ဘေးရန်များကိုပါ ပပျောက်စေမည်ဖြစ်သည်။ နားဂ် ဒေ၀တာများသာမက ဘုရားရှင်ရှီဗားနှင့် မာနဆာဒေဝီတို့ကို ပူဇော်ကြပေသည်။ မာနဆာဒေဝီအား နာဂေးရွှရီ၊ နားဂ်မားဟူ၍လည်း ဒေသအပေါ်မူတည်၍ ခေါ်ဝေါ်ကြပေသည်။ မာနဆာဒေဝီသည် ဘုရားရှင်ရှီဗားနှင့် မယ်တော် ပါရ်ဗသီးတို့၏ သမီးတော်ဖြစ်ပြီး သူမ၏ စွန့်လွှတ်အနစ်နာခံမှုကြောင့် မြွေများအား အစိုးရသော မြွေတို့၏ မိခင် မယ်တော်အဖြစ်သတ်မှတ်‌ပါသည်။ ထို့အတွက် ဟိန္ဒူဘာသာတွင် မာနဆာဒေဝီအား မြွေမယ်တော်အဖြစ် သတ်မှတ်ကြသည်။ ဘုရားရှင် သျှိဗ (ရှီဗား) ၏ လည်ပင်းတွင် ဗာဆူကီ မြွေမင်းသည် ခွေပတ်လျက်ရှိပြီး ဘုရားရှင်၏ အဆိပ်ခပ်သိမ်းအား အောင်နိုင်သော ဂုဏ်တော်နှင့် ခက်ထန်သော သတ္တဝါကိုပင် ငြိမ်းချမ်းစေသောဂုဏ်တော်ကို ဖော်ညွှန်းလျက်ရှိသည်။ ဘုရားရှင် ဗိသျှဏု (ဗစ်ရှ်နူး) သည်လည်း ခေါင်းများစွာရှိသော အနံန်းသ သျှေးသျှ မြွေမင်း၏ သလွန်ထက်တွင် လဲလျောင်းလျက်ရှိနေခြင်းသည် ဂုဏ်တော်ခပ်သိမ်းအား ပိုင်ဆိုင်တော်မူခြင်း၊ အဆုံးအစမရှိသော အနန္တဂုဏ်တော်ကို ပိုင်စိုးတော်မူခြင်းနှင့် သဘာ၀တရားကို ပိုင်တော်မူခြင်းကို ဖော်ညွှန်းလျက်ရှိသည်။ မယ်တော်မြတ် မာရီအမ္မာန်းအားလည်း ရံဖန်ရံခါတွင် မြွေများအုပ်မိုးလျက်လည်း တွေ့ရှိတတ်ပေသည်။ ထိုမြွေများအနက် အနံန်းသ သျှေးသျှမြွေမင်းသည် အကြီးမြတ်ဆုံးဖြစ်ကြောင်း ဘဂ၀ဒ်ဂီသာကျမ်းတွင် ဖော်ပြထားပြီး ဗာဆူကီမြွေမင်းသည်လည်း မြွေတို့၏ အကြီးအကဲဖြစ်ပေသည်။ မြွေမင်းများဖြစ်ကြသော အနံန်းသသျှေးသျှနားဂ်၊ ဗာဆူကီနားဂ်တို့နှင့်တကွ အထက်လောက၊ အောက်လောကနှင့် ကမ္ဘာမြေပြင်ပေါ်ရှိ မြွေတို့သည် အစဉ်အမြဲ ငြိမ်းချမ်းသာယာစွာရှိကြပါစေ။ အကျွန်ုပ်တို့အပေါ် မေတ္တာ‌တရားထားရှိ၍ ဘေးရန်အန္တရာယ်များကို ဖယ်ရှားပေးပါစေသား။ #HRK

အလှူကိစ္စများနှင့် စပ်လျဉ်း၍ အများသတိပြုရန်။ Hindu ဘာသာရေး အသိပညာအဖွဲ့သည် ဘုရားပွဲကာလများတွင် ဘုရားကျောင်းအချို့အတွက် လိုအပ်သည်များကို လှူဒါန်းနိုင်ရန်၊ အများကုသိုလ်ပြုနိုင်ရန်၊ စုပေါင်းဒါနပြုနိုင်ရန် တိုက်တွန်းနှိုးဆော် အလှူငွေကောက်ခံလေ့ရှိပါသည်။ ထိုကဲ့သို့အလှူငွေကောက်ခံရာတွင် HRK Page မှ တင်ထားသော ပို့စ်ပါအတိုင်းသာ ဒါနပြုရန် အများအား သတိပေးလိုပါသည်။ ယခုအခါ အချို့သောလူများဟာ Fake Profile များဖြင့် HRK Team ၏ အများကုသိုလ်ယူနိုင်ရန်ပို့စ်များကို အဖွဲ့၏ ခွင့်ပြုချက်မယူဘဲ ကူးယူတင်ပြီး မိမိတို့ကိုယ်တိုင် အလှူငွေကောက်ခံလျက်ရှိကြောင်း ကြားသိခဲ့ရပါသည်။ ထိုကဲ့သို့သော အလှူငွေကောက်ခံခြင်းပို့စ်များဟာ HRK Team ၏ ခွင့်ပြုချက်မရှိဘဲ တင်ထားခြင်းဖြစ်သည့်အတွက် သတိပြုရှောင်ရှားကြရန် အသိပေးအပ်ပါသည်။ အလှူအတွက် စုပေါင်းဒါနအဖြစ် ကူညီပေးလိုသူများသည် HRK Team နှင့် သက်ဆိုင်ရာပုဂ္ဂိုလ်များကို ရှင်းလင်းစွာပြောပြပြီး ခွင့်ပြုချက်ကို ဦးစွာရယူရန် မေတ္တာရပ်ခံအပ်ပါသည်။ အလှူငွေများလှူဒါန်းရာတွင်လည်း HRK Team Page မှသာ အများအတွက် အသိပေးမည်ဖြစ်ပြီး တင်ထားပေးသောပို့စ်ပါ ညွှန်ကြားချက်များအတိုင်းသာ လှူဒါန်းရန် အထူးမေတ္တာရပ်ခံအပ်ပါသည်။ #HRK

ဆာ၀န်း(န်)လ ပူဂျားနှင့် Kedarnath ဘုရားကျောင်း Akhanda Jyoti တစ်နှစ်စာအလှူ။ ယခု ဆာ၀န်း(န်)လမြတ်မှာ ရှေ့နှစ်က Kedarnath ဘုရားကျောင်းမှာ ဆွမ်း (၁၀) နှစ်စာလှူခဲ့သလို မငြိမ်းမီး တစ်နှစ်စာ စုပေါင်းလှူဒါန်းမှာဖြစ်ပါတယ်။ မငြိမ်းမီးလှူခြင်းဟာ မိမိဘ၀မှာရှိတဲ့ အမိုက်အမှောင်တွေကို ဖယ်ရှားပေးပြီး ထိန်လင်းတဲ့ လမ်းကြောင်းပေါ်ကို ရောက်ရှိအောင် အထောက်အပံ့ပေးမှာဖြစ်ပါတယ်။ ၂၅ သိန်းခန့် ကျသင့်မှာဖြစ်ပြီး နည်းများမဆို ပါ၀င် ကုသိုလ်ပြုနိုင်ပါတယ်။ အလှူငွေပိုခဲ့ပါက အခြားဘုရားကျောင်းများအတွက် လှူဒါန်းသွားမှာဖြစ်ပါတယ်။ စုပေါင်းဒါနပြုရမှာဖြစ်ပြီး အောက်ဖော်ပြပါ နံပါတ်သို့ လှူဒါန်းနိုင်ပါတယ်။ 09977332895 Kaung Khant Naing

ဆာ၀န်း(န်) ရှီဗာရာသ်ရီး ခ) သျှိဗရာသ်ရီး။ ၂၀၂၆ ခုနှစ်၊ ဩဂုတ်လ ၁၁ ရက် အင်္ဂါနေ့သည် ဆာ၀န်း(န်) လ၏ အရေးအကြီးဆုံး သျှိဗရာသ်ရီး ပူဂျားနေ့မြတ်ဖြစ်ပါတယ်။ ပူဇော်ရန် မင်္ဂလာအချိန်ကာလ (၄) ခုရှိပေသည်။ ပထမ ပူ‌ဂျားအချိန်မြတ်မှာ ည ၆ နာရီ ၃၃ မိနစ်မှ ည ၉ နာရီ ၂၂ မိနစ်ဖြစ်၍ ဒုတိယ ပူဂျားအချိန်မြတ်မှာ ည ၉ နာရီ ၂၂ မိနစ်မှ ညဉ့်ဦးယံ ၁၂ နာရီ ‌၁၁ မိနစ်အထိ ဖြစ်ပြီး တတိယ ပူဂျားအချိန်မြတ်မှာ ညဉ့်ဦးယံ ၁၂ နာရီ ၁၁ မိနစ်မှ သန်းခေါင် ၂ နာရီ ၅၉ မိနစ်အထိဖြစ်၍ စတုတ္ထ ပူဂျားအချိန်မြတ်မှာ သန်းခေါင် ၂ နာရီ ၅၉ မိနစ်မှ အရုဏ် ၅ နာရီ ၄၈ မိနစ်အထိဖြစ်သည်။ ထို့အနက် ပူဂျားလုပ်ရန် အသင့်တော်ဆုံး နိရှိသကာလ်ပူဂျား ကာလမှာ ညဘက် ၁၁ နာရီ ၄၈ မိနစ်မှ ညဉ့်ဦး ၁၂ နာရီ ၃၃ မိနစ်အထိ ကြာချိန် ၄၅ မိနစ်တိတိဖြစ်သည်။ * ဥပုသ်ဖြေရန်အချိန် * ဆာ၀န်း(န်) သျှိဗရာသ်ရီးအတွင်း ဥပုသ်ယူသူများအတွက် ဥပုသ်ဖြေရန်အချိန်ကာလမှာ ၂၀၂၆ ခုနှစ်၊ ဩဂုတ်လ ၁၂ ရက်နေ့ မနက် ၅ နာရီ ၄၈ မိနစ်နောက်ပိုင်းဖြစ်သည်။ ရွတ်ဖတ်ရန်များမှာ - Panchakshara Mantra (နမဟ် သျှိဗယ) - Panchakshara Stotram - Lingashtakam - Rudrakshtakam - Shivashtakam #HRK