ASTUECSF official

ቁጥር 18. ጳውሎስ ሕይወት ለውጥ ካገኘ ከሶስት ዓመታት በኋላ ከጴጥሮስ ጋር ተገናኘ። ይህንም ያደረገው የሐዋርያነትን ስልጣን ለመቀበል ወይም ለመማር አልነበረም። ከላይ እንደተገለጸው በስደቱ ምክንያት እና ጴጥሮስን ለመጠየቅና ለመተዋወቅ እንጂ(ሐዋ.9፥26-30)። ቁጥር 19. ጳውሎስ ሌሎቹን የኢየሩሳሌም ሐዋርያት (የአስቆሮቱን ይሁዳ ሳይጨምር)  እንዳላየ ይናገራል። በዚህ ክፍል የተጠቀሰው ያዕቆብ ምናልባት የእልፍዮስ ልጅ ነው ተብሎ ይገመታል። እልፊዮስ ከማርያም እህት ያዕቆብን ወልዷል። በስጋ ዝምድና የጌታችን የአክስት ልጅ ስለሆነ የጌታ ወንድም ተብሏል። ያዕቆብ በኢየሩሳሌም ቤተክርስቲያን ዋና መሪ ነበር (ሐዋ.21፥18) ። በዚህ ስፍራ ጳውሎስ እንደሚለው ከሆነ በኢየሩሳሌም ጉዞው ያገኘው ጴጥሮስን እና ያዕቆብን ብቻ ነበር። ቁጥር 20. የመሃላ አነጋገር ነው ። ጳውሎስ ስለ ራሱ የሚናገረው መሉ በሙሉ እውነት እንደሆነ የእግዚአብሔርን ስም ጠርቶ ያረጋግጥላቸዋል። ቁጥር 21-24.  ጳውሎስ በኢየሩሳሌም የቆየው ለ15 ቀናት ብቻ ነበር።በይሁዳ ዙሪያ ባሉት አካባቢዎች አልሰበከም።ነገር ግን ይህን አካባቢ ትቶ ከአይሁድ ወገን ውጪ ለሆኑት ለመስበክ ወደ ሶሪያና ኪልቅያ ሄደ። በደቡባዊው የእስራኤል ክፍል በይሁዳ ያሉ አብያተክርስቲያናት ጳውሎስን በአሳዳድነቱ ነበር የሚያስታውሱት። የይሁዳ ማህበሮች የሚላቸው የአይሁድን ሃይማኖት ትተው የክርስቶስን ወንጌል የሚከተሉትን ነው። ስለ ክፉ ስራው በሙሉ ሰምተው ነበር ።ጳውሎስ በይሁዳ ወንጌልን ባለመስበኩ የይሁዳ ክርስቲያኖች የተለወጠውን ጳውሎስ የማየት አጋጣሚ አልነበራቸውም ። ሆኖም ግን በሶሪያ እና ኪልቅያ የሰበከውን ስለ ሰሙ ስለ እርሱ እግዚአብሔርን ያመሰግኑ ነበር።