Dn Abel Kassahun Mekuria

“ከኃጥአን የኀዘንን ሸክም የሚያቀለው ደስታ ከአንቺ ተወለደ” “ዘያቀልል እምኃጥአን ፆረ ኀዘን እስመ እምኔኪ ፍስሐ ተወልደ” መልካም የማኅሌተ ጽጌ ቁመት!!!

እስኪ የርእሰ ማዕምራን መሪጌታ ብርሃኑ ውድነህን ውድ መዝሙር ልጋብዛችሁ። እጅግ በሚመስጥ ግጥም እና በሚያራራ ዜማ የተከሸነ ነው። ስሙት እና ውቀሱኝ! https://youtu.be/ufcU-6jLDxU?si=P881REKjOEGWM5ZP

እመቤታችን ታዛችን፣ መደገፊያ የሃይማኖት በትራችን ከመውደቅ ትሰውረን። ከወደቅንም ፈጥና ታንሣን፤ አትተወን!!!

እግዚአብሔር የሚፈራ ሰው ምን ያስፈራዋል?! አምላካችን “እግዚአብሔር ማን ነው?” ብለው የተገዳደሩት ትዕቢተኞቹ እነ ፈርዖንን ያስጨነቀው በምድር ላይ በጣም ትንሽ በሆኑ እና በሚናቁ እንደ ዝንብ እና እንቁራሪት ባሉ ነፍሳት ነው። በፊቱ ራሳቸውን ዝቅ ያደረጉ እነ ዳንኤል ግን ለተራቡ አናብስት ቢሰጡ፣ ሦስቱ ወጣቶች ደግሞ ወደሚንቀለቀል እሳት ቢጣሉም ልባቸው ለደቂቃ እንኳ አልደነገጠም። እግዚአብሔርን የሚደፋፈሩ ሰዎች በጥቂት ነገር ሲፈሩ ሲጨነቁ ይታያሉ። እርሱን የሚፈሩ ግን በምድር ሌላ ምንም የሚያስፈራቸው ነገር የለም። “አንተ ከእኔ ጋር ነህና ክፉን አልፈራም” መዝ 23:4 ዲያቆን አቤል ካሣሁን መስከረም 26 - 2019 ዓ. ም. (የትኛው ድርሳኑ ላይ እንዳነበብሁት አሁን ከተዘነጋኝ የሂፖው ሊቀ ጳጳስ አውግስጢኖስ የተገኘ ምክር)

+++ በዚህ ንጉሥ ታምናለህ? +++ በሐዲስ ኪዳን ከተጻፉ እና ስለ እምነት ሲነሣ በጣም ከሚያስደንቁኝ ታሪኮች መካከል አንዱ የሰብአ ሰገል ታሪክ ነው። ብዙ ኪሎ ሜትሮችን አቋርጠው ወደ ቤተልሔም ዋሻ የመጡት ሰዎች የሩቅ ምሥራቅ ነገሥታት ነበሩ። የንግሥናን ምንነት እና ክብር ሲወራ ሰምተው ወይም ከመጻሕፍት አንብበው ሳይሆን በመሆን ያውቁታል። በብዙ ሠራዊት ታጅበው ከያሉበት የወጡትም “የተወለደውን የአይሁድ ንጉሥ” ፍለጋ ነበር። ይሁን እንጂ ንጉሡን ያገኙት ግን በጦር አለቆች ተከቦ፣ ባማረ እልፍኝ ውስጥ ቅንጡ አልጋ ላይ ተኝቶ፣ ውድ በሆነ የተልባ እግር ጨርቅ ተሸፍኖ አልነበረም። ምስኪኗ ድንግል ማርያም ታቅፋው፣ ደካማው ሽማግሌ ዮሴፍ ከፊቱ ቆሞ፣ እንስሳት ከበውት፣ ባረጀ ጨርቅ ተጠቅልሎ በበረት ውስጥ ተኝቶ ነው ያዩት። ታዲያ ይህን በመመልከታቸው ንጉሥነቱን አልተጠራጠሩም። ለምን? ብለውም የምርምር ጥያቄም አላቀረቡም። በዝምታ ውስጥ ያለ ጠንካራ እምነታቸውን እንደ ያዙ ወድቀው ለጌትነቱ ሰገዱለት። እጅ መንሻም አቀረቡለት። ልዑሉን አምላክ በትሕትናው ወራት አለመጠራጠር እንዴት ያለ እምነት ነው? እነዚህ የሩቅ ምሥራቅ ነገሥታት ለእኔ ከጥበብ ሰውነታቸው በላይ የእምነት ሰውነታቸው ይበልጥብኛል። እነሆ እግዚአብሔር ስለ እኛ ድኅነት ሲል ራሱን ባዶ ያደረገ ሰው በመሆን አንድ ጊዜ ዝቅ ካደረገ በኋላ እንግዲህስ ሁለተኛ ተዋርዶ የለበትም። ከዚህ በኋላ የእግዚአብሔርን ልዕልና እና ትሕትና የምታየው በአንተ ሕይወት ውስጥ ነው። ከፍፍ ሲያደርግህ ልዕልናውን፣ በመናቅ እና በመረሳት ውስጥ እንድታልፍ ሲያደርግህ ደግሞ ትሑት አምላክ መሆኑን ትረዳለህ። ነገር ግን አንተ በየትኛው ሁኔታ ብታየው ነው ንጉሡን የምታምንበት? ሁልጊዜ ተአምር ሲያደርግ፣ ከእሳት ነጥቆ ሲያወጣህ እና በከፍታው ላይ ሲያቆምህ ብቻ ነው ወይስ በሕመም እና በደዌ፣ በብዙ ውርደት እና መናቅ፣ በበረት ውስጥ እንደ ማደር እና ብጫቂ እንደ መልበስ ባዶ ሲያደርግህም ጭምር እንደ ሰብአ ሰገል በዝምታ ውስጥ ታምነዋለህ? ወድቀህስ ትሰግድለታለህ? ዲያቆን አቤል ካሣሁን መስከረም 24 - 2019 ዓ. ም. ቻይና፣ ጓንዡ

"በዕብራይስጥ ማሪሃም የተባልሽ የተመረጥሽ ቅድስት ድንግል ማርያም ሆይ አሁንም ልጅሽን እለዋለሁ... ለቤተ መቅደስህ ተክል ያደረግኸኝ አቤቱ ሆይ፤ የውጭ ተክል አታድርገኝ... የመጻሕፍት መጀመሪያ የምትሆን ኦሪት ደመና የምትጋርደኝ፣ ከቅዱስ ወንጌል ፈሳሽ የምጠጣ ከጎንህ ከፈሰሰው ደም የምረካ ልሁን፡፡ በእናትህ በድንግል ጸሎት የሃይማኖት አበባ ላብብ፣ የጽድቅ ፍሬን ላፍራ። ከቅዱሳንህ ሐዋርያትም ከቃላቸው ፍሬ የተነሣ እስከ ዘለዓለሙ ድረስ የተባረከ የወይን ቦታ ልባል። የጽድቅን ፍሬ የሚያስቀረውንም የኃጢአት እሾህ ጠምዝዘው፤ ከደጁም አሜከላውን አረሙንም ሙጃውንም ንቀለው፡፡ አቤቱ ከእኔም አርቀው" አባ ጊዮርጊስ ዘጋስጫ የውጭው ተክል አርዮስን ለማውገዝ ሃይማኖታቸው የቀና ሦስት መቶ ዐሥራ ስምንቱ ሊቃውንት ለተሰበሰቡበት "የብዙኃን ማርያም" በዓል እንኳን በሰላም አደረሰን! ዲያቆን አቤል ካሳሁን https://t.me/Dnabel

የመስቀል በዓልን አስመልክቶ ከፋና ብሮድ ካስቲንግ ሬድዮ ጋር ያደረግነውን አጭር ጭውውት ጋብዣለሁ!

“መስቀል መልዕልተ ኩሉ ነገር ያድኃነነ እምጸር” - “መስቀል ከሁሉ ነገር በላይ ነው፤ ከጠላትም ያድነናል” ቅዱስ ያሬድ እንኳን አደረሳችሁ!

"አሁንም አሁንም ወደቅሁ ብሎ የሚያዝን (ተስፋ የሚቆርጥ) አይኑር። ንስሐ የሞተን (በኃጢአት) እንኳን ከመቃብር ታነሣለችና” ቅዱስ ዮሐንስ አፈወርቅ

“ጌታ እግዚአብሔር ኃይሌ ነው፤ እግሮቼን እንደ ዋላ እግሮች ያደርጋል፤ በከፍታዎችም ላይ ያስሄደኛል” ዕን 3:19

የጌታውን እናት የሰላምታ ድምጽ ሰምቶ በማኅጸን በደስታ የዘለለውን (የሰገደውን) ጽንስ፣ በንጉሡ ፊት በክፉት የደነሰችው ልጅ አንገቱን አስቆረጠችው። ጽንሱ ስለ ሕይወት መምጣት በጠባቡ አዳራሽ በማኅጸን ሲያመሰግን፣ የሄሮድያዳ ልጅ ግን የነቢዩን ሕይወት ስለ ማስጠፋት በሰፊው የንጉሡ አዳራሽ ዘፈነች። አዲሱ ዓመት የኢትዮጵያ ልጆች በሄሮድያዳ ምክር የማይሄዱበት፣ ከእግዚአብሔር ዘንድ የተማሩ ሆነው የሚያድጉበት በጎ ዘመን ያድርግልን!!! ዲያቆን አቤል ካሳሁን https://t.me/Dnabel https://youtube.com/channel/UCRvatZyeFOJtXnAjZSOdrZg

+++ የአዲስ ዓመት ስለት +++ በኖኅ ዘመን የነበሩት ሰዎች አመጸኞች ሆኑ። የእግዚአብሔርን የምሕረት ጥሪ እምቢ ብለው መንገዳቸውን በፊታቸው አበላሹ። ምድሪቱንም በግፋቸው ሞሏት። ስለዚህም እግዚአብሔር ከትውልዱ ጻድቅ የነበረው ኖኅና ቤተሰቡን አስቀርቶ ሌሎቹን ከምድር ጋር ያጠፋቸው ዘንድ የጥፋት ውኃን አዘነመ። የታላላቅ ቀላያት ምንጮች ሁሉ ተነደሉ። የሰማይ መስኮቶችም ከፈቱ። ምድር በአምላክ የቁጣ ውኃ ተጥለቀለቀች። በመርከቢቱ ከነበሩት በቀር ምድር አንዲት ነፍስ አልቀረላትም። እግዚአብሔር ከዚህ ሁሉ ቁጣ በኋላ በመርከቡ የነበሩትን ኖኅንና እንስሳት አራዊቱን አሰበ። በምድርም ላይ ነፋስን አሳለፈ። የቀላያቱን ምንጮች የሰማዩንም መስኮቶች ደፈነ። ዝናሙንም ከሰማይ ከለከለ። ሞልቶ የነበረውም ውኃ ቀስ በቀስ እየጎደለ መጣ። በመጽሐፈ ኩፋሌ እንደ ተቀመጠው በውኃ ተጥለቅልቃ የነበረችው ምድር ግልጥ ሆና የታየችው በመጀመሪያው ወር መባቻ ላይ ነበር።(ኩፋ 7፥1) ባለ ዘመኖቹ እኛ ልክ በኖኅ ጊዜ እንደ ነበሩት የቀድሞ ሰዎች ክፋታችን ተካክሏል። መንገዳችንን በእግዚአብሔር ፊት አበላሽተናል። ምድርን በግፋችን ሞልተናታል። ስለዚህ እግዚአብሔር በእነርሱ ላይ ያወረደው የጥፋት ውኃ ለእኛም ይገባን ነበር። እኛ ግን እርሱ እስኪቀጣንም አልጠበቅንም። እርስ በእርሳችን እየተጋደልን ምድራችንን በጥፋት ደም አጥለቀለቅናት። ወንድም ወንድሙን በጥይት ነደለ፣ በስለትም ሰውነቱን ከፈተ። የቁጣው ደም ከሰው እየመነጨ ምድርን ሸፈነ። ታዲያ በዚህች ጎስቋላ ምድራችን ላይ የፈሰሰውን ደም የሚያደርቅ የይቅርታ ነፋስ መቼ ይነፍሳል? እንደ ውኃ ያጥለቀለቀንስ ደም መቼ ይጎድላል? የምንሰማው መጨካከንስ እያደር እያደር የሚቀለው መቼ ነው? አሁን እኮ የመጀመሪያው ወር (መስከረም) መባቻ ነው። ምድራችን የሸፈናት ጥላቻ እና መገዳደል ተገፍፎላት ዳግመኛ ግልጥ ሆና አናያትም? የእኔ የአዲሱ ዓመት ስለቴ ይህ ነው። የእናንተስ? ዲያቆን አቤል ካሳሁን ጷጉሜን 5፣ 2014 ዓ.ም. አዲስ አበባ

“እግዚአብሔርን በመውደድ፣ በመንፈሳዊ ንቃት እና በንስሐ ራስህን ካላዘጋጀህበት፤ በትንሣኤ እና ከሞት በኋላ ባለ ዘላለማዊ ሕይወት ማመንህ ምን ጥቅም አለው?” አቡነ ሺኖዳ ሣልሳዊ

ሰይጣን መንፈሳዊ ሕይወትን ለመኖር ወስነህ ስትጀምር በእነዚህ ሁለት ሐሳቦች ይዋጋሃል። 1. አንተ ለዚህ ሕይወት እንደማትሆን እና መቼም እንደማትለወጥ ሹክ ይልሃል። ይህን የሚያደርገው ተስፋ ቆርጠህ የያዝከውን ሩጫ እንድታቆም ነው። የሚገርመው ግን መለወጥ ባትጀምር ኖሮ ሰይጣን “አልተለወጥህም” አይልህም። 2. ገና ከመጀመርህ የደረስህ እና ለመፈጸም ጥቂት የቀረህ አስመስሎ ያሳይሃል። ብዙ ርቀህ እንደ ሄድህ አስበህ ልክ እንደ ጥንቸሏ ተዘናግተህ እንድትተኛ እና የጽድቅ ነገር ሁሉ ጠላት የሆነው ትዕቢት እስረኛ እንድትሆን ያደርግሃል። አሁንም ሰይጣን “ደርሰሃል” እያለ ሲክብህ ገና እግርህን ለማንሣት የምትጣጣር እንደ ሆንህ አቅምህን በደንብ ያውቀዋል። ጀማሪ ስትሆን ሰይጣን “አትችልም” ብሎ ተስፋ በማስቆረጥ ወይም “ደርሰሃል” እያለ ያለ ልክ በማመስገን ወጥመዱ ውስጥ ሊጥልህ ይሞክራል። “በሰይጣን እንዳንታለል፤ የእርሱን አሳብ አንስተውምና” 2ኛ ቆሮ 2:11 ዲያቆን አቤል ካሳሁን abelmekuria2@gmail.com

ዝምታ ራሳችንን የምናይበት ጥሩ መጽሔት(መስታወት) ነው። አብዛኛውን ሰዓት በወሬ ተጠምዶ የሚውል ሰው ራሱን የሚመለከትበት እድል አይኖረውም። በሌሎች ኃጢአት ሲፈርድ፣ ሲተችና ሲያማ ስለሚውል የራሱን ስህተትና ውድቀት ለማወቅ ይቸገራል። ቀኑን ሙሉ እንዲሁ ሲያወራ የሚውል ሰው የሚያሳዝነው ዝም አለማለቱ ብቻ ሳይሆን የሚጠቅም ነገር የማይናገር መሆኑም ጭምር ነው። ነገር ግን ማር ይስሐቅ እንደሚለው "አንድ ሰው ከሰዎች ጋር ብዙ ማውራት ባቆመ ጊዜ ወደ ራሱ ይመለሳል። በእግዚአብሔርም ፊት ምግባሩን ማቅናት ይጀምራል" የሥጋ አንደበታችንን መቆጣጠርና ዝም ማስባል ስንችል የነፍስ ጆሮአችን ንቁህ መሆን ይጀምራል። ስለዚህም ነፍሳችን ሳይሰለች ከልባችን ደጅ ቆሞ የሚያንኳኳውን የመልካሙን እረኛ ድምጽ ትሰማለች። ደጇንም ከፍታ ታስገባዋለች። ከእርሱም ጋር ለእራት ትሰየማለች።(ራእይ 3፥20) በእውነት ይህ እንደ ምን ያለ መታደል ነው? ቅዱስ ዮሐንስ ሐጺር "የዝምተኛ ሰው ጆሮ የእግዚአብሔርን ድንቆች ትሰማለች" ያለው ለዚህ ይሆን?! ዲያቆን አቤል ካሣሁን abelzebahiran@gmail.com

በአንደኛው የዓለም ጦርነት ወቅት በግብጽ ስለ ተፈጸመ አንድ ታሪክ ላስታውሳችሁ። በላዕላይ ግብጽ ይኖር የነበረ አንድ ምስጉን ካህን በጊዜው የከተማው ከንቲባ ወደ ሆነው ባለሥልጣን ቢሮ ሄዶ ቤተ ክርስቲያንን በሚመለከት ለከንቲባው ጥያቄ ያቀርብለታል። ይሁን እንጂ ከንቲባው ግን በንቀት ያን የእግዚአብሔር ካህን እያመናጨቀ በጥፊ መትቶ ከቢሮው ያስወጣዋል። በዚህ ድርጊት እጅግ ልቡ ያዘነውም ካህን እንባውን እያፈሰሰ ለአገልግሎት ወደሚጠበቅበት የቅዱስ ጊዮርጊስ ቤተ ክርስቲያን ገብቶ የጸሎት ሥርዓቱን አስጀመረ። ካህኑ በቤተ ክርስቲያን ሆኖ ሲጸልይ ሳለ ያ ከንቲባ በመንገድ ሲሄድ ድንገት ዙሪያው ጨለመበት፣ በፈረስ የተቀመጠ አንድ ሰውም ከመንገዱ አስቁሞ "ለምን ካህኑን እንደዚያ አዋርደህ ሰደብህ?" ሲል ጠየቀው። ከንቲባውም ገና መልስ መስጠት ሳይጀምር ያ ፈረሰኛ ፊቱን በጥፊ ጸፋው። ከምቱ ጥንካሬም የተነሣ አንድ ዓይኑ ጠፋ። ይህ እንደ ሆነም ወዲያው ጨለማው ተገፈፈ። ያ ፈረሰኛ ማን ነው? ካህኑ ሄዶ እንባውን ካፈሰሰለት ከሰማዕቱ ከቅዱስ ጊዮርጊስ ውጭ ማን ሊሆን ይችላል። ዲያቆን አቤል ካሳሁን abelmekuria2@gmail.com አዲስ አበባ