صَحٍيف‏

معلومة أول مرة أعرفها، كلنا عارفين إن الأنبياء ربنا كلمهم، بس هل كنتوا تعرفوا إن فيه "صحابي" ربنا كلمه "كِفاحًا" يعني مباشرة بكلمات صريحة، من غير وسيط.. وربنا قاله كمان: تمنَّ عليّ أعطك؟ يعني قولي إنت بتتمنى إيه؟ 📌 يلا بينا نحكي حكاية "عبد الله بن عمرو بن حرام" قصة فيها حب، ورؤيا، وجبر خاطر يخلّي عينك تدمع من النعيم! بس زي ما اتفقنا أنا أحكي وإنتوا تدعوا لي❤️ 🍁 عبد الله كان من الأنصار، الأبطال اللي فتحوا قلوبهم وبيوتهم لنصرة النبي عليه الصلاة والسلام.. كان من النقباء الاثني عشر اللي بايعوه في بيعة العقبة، يعني راجل من الأساسات الأولى للدولة، قلبه معجون بحب الله ورسوله. 🍂 في يوم من الأيام، تحديدًا ليلة معركة أُحُد، وكانت ليلة مش عادية أبدًا.. عبد الله نام، وشاف رؤيا هزت كيانه! أول ما فتح عينه، قام واغتسل واتعطر ورفع إيده ودعي: اللهم خذ من دمي اليوم حتى ترضى! يعني يا رب استشهد 🍂 وبعدها نادى على ابنه الشاب "جابر"، وقعد معاه قعدة وداع أخيرة وقال له: ـــ يا جابر.. أنا شوفت في منامي إني هكون أول واحد يتقتل بكرة في المعركة.. وأنا والله يا بني، مفيش على الأرض حد أحب إليّ بعد رسول الله.. منك أنت!. جابر اتصدم! الكلام نزل على قلبه زي الجمر، خصوصًا إنه الولد الوحيد لأبوه، ووراه 9 بنات محتاجين رعاية! 🍂 عبد الله حس بكسرة قلب ابنه، فـ طبطب عليه وكمل: ـــ بس أنا بتمنى الشهادة، وحاسس إن أجلي جه.. عشان كده بوصيك بأخواتك البنات خير، وعليّا دين لحد من اليهود، سدّه عني. يوم المعركة، دخلوا المسلمين وصوت السيوف بدأ يجلجل وعبد الله نزل الأرض شايل روحه على كفه، بيقاتل قتال واحد بايع الدنيا وعينه على الجنة! وفجأة وسط المعمعة دي.. استشهد عبد الله، ونال اللي اتمناه، وكان فعلاً أول شهيد سقط من المسلمين في اليوم ده زي ما شاف في رؤياه بالضبط! 🍂 خلصت المعركة.. وجابر راح يدور على أبوه، لقاه متغطي بثوب.. رفع الغطا وقعد يبكي ويبوسه، والصحابة يصبروه ويقولوا له بس يا جابر، لكن هو ماكنش قادر يستوعب حزنه. النبي صلى الله عليه وسلم كان شايف جابر وهو منهار، فقرب منه وقاله: ـــ يا جابر.. ألا أخبرك ما قال الله لأبيك؟ جابر انتبه، ورفع راسه ومسح دموعه وقاله بلهفة: ـــ بلى يا رسول الله! قولي أرجوك! 🍂 فرد النبي صلى الله عليه وسلم وقاله: ـــ يا جابر.. ما زالت الملائكة تظلل أباك بأجنحتها حتى رفعتموه.. ويا جابر، والذي نفسي بيدي، إن الله لا يكلم أحدًا إلا من وراء حجاب، ولكنه كلم أباك كفاحًا بلا ترجمان! قاله: يا عبدي، تمنَّ عليّ أعطك!. 🍁تخيلوا معايا المشهد.. شهيد في الجنة، شايف النعيم والقصور، وربنا سبحانه بيقوله: أطلب أي حاجة تخطر على بالك حالاً! تفتكروا طلب إيه؟ لا طلب قصور ولا حور عين! عبد الله من كتر ما داق حلاوة الشهادة وفضلها، قال لربنا بلهفة: ـــ يا رب.. أحيني، فأُقتل فيك ثانية! يعني رجعني الدنيا تاني، عشان أقاتل ويسيل دمي في سبيلك مرة ثانية!. لكن ربنا العليم قال له: ــ أما هذه فلا.. إني قضيت أنهم إليها لا يرجعون، فـ تمنَّ غيرها. فقال عبد الله: "يا رب.. فأبلغ من ورائي!" يعني وصل للصحابة وللمؤمنين الفرحة والنعيم اللي أنا فيه، عشان قلوبهم تقوى وما يخافوش من الموت في سبيلك. 🍁ربنا استجاب له، ونزل آية بتتقرأ لحد يومنا هذا وهتفضل تتقرأ لحد يوم الدين عشان تطمن كل قلب خايف: {وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا ۚ بَلْ أَحْيَاءٌ عِندَ رَبِّهِمْ يُرْزَقُونَ}. جابر رضي الله عنه أول ما سمع الكلام ده، حس بإن السكينة نزلت على قلبه، ودموعه نشفت من الفرحة.. 🍂 ومش بس كده! الدين اللي كان شايل همه؟ النبي صلى الله عليه وسلم راح بنفسه ودعى في محصول التمر بتاع أبوه جابر، وحصلت معجزة والبركة زادت لدرجة إن جابر سد كل ديون أبوه، وفضل معاه تمر كتير جدًا يكفيه هو وأخواته البنات ويفيض! 📌 وبس كده، خلصت، ما تنسونيش من دعواتكم الحلوة❤️ ~هند صلاح الدين. تليجرام: ♡♡ https://t.me/adeeb80 ♡♡