ЛЕЗГИ ЧlАЛ (Лезгинский язык)

Мектебар патал акъуднавай лезги чIалан ктабра акьван гъалатIар вучиз авайди я? Абурун патахъай жавабдарвал нин хиве ава?   Ихьтин суалар, наразивилер чаз хейлин муаллимри кхьена ва кхьизва. Мисал яз, Кьурагь районда кIвалахзавай са тежрибалу муаллимди са ктабдик (учебникдик) квай кьван гъалатIар карандашдалди къалурна, а ктаб «Лезги газетдин» редакциядив агакьарнава. (А ктаб чазни акуна; гъалатIрихъ тум-кьил авач). Им, гьелбетда, чIалан патахъай къайгъударвал авунин кар я. Яни чахъ ихьтин татугайвилер аквазвай, абурун патахъай ван хкажиз жедай ксар-пешекарар ава лагьай чIал я. Чна квевай, каналдин иштиракчийривай, учебникрикай фикирар кхьин тIалабзава. Ша чна ихьтин месэлаяр важиблубур яз гьисабин ва абур къарагъарин. Чна ахьтин авторар, редакторар, корректорар (вужар ятIани) инсафсузвилелди критика ийин. Гележегда абурун ери хъсан хьунин макьсаддалди, гьелбетда.   Салим Салимов, тг-каналдин админ.

📚Лезги гьикаятчи Сардар Абилакай «Славянское слово» фестивалдин лауреат хьана. ФЛНКА-дин ТГ-каналди хабар гузвайвал, мукьвара Подмосковьеда эдебиятдин международный дережадин IX лагьай «Славянское слово» фестивалдин нетижаяр кьуниз талукьарнавай мярекат кьиле фена. «Малая проза» номинацияда 1-чка лезги писателрин Союздин председатель, филологиядин илимрин кандидат Сардар Абилаз гана. Адан къелемдикай хкатнавай гьикаяйрин «Дармовой доход» кIватIалдиз жюриди виниз тир къимет гана. «Лезги газетдин» редакцияди фадлай газетдихъ галаз алакъаяр хуьзвай Сардар Абилаз и агалкьун мубаракзава ва адахъ яратмишунрин рекье мадни чIехи кукIушар муьтIуьгъардай къуватар, мумкинвилер хьана кIанзава.

❓❗️Тапшуругъ-машгъулат №49 Цитатадиз фикир це. Сад лагьай жумладик гъалатl квани? Кватlа, кхьихь ам вуч гъалатl ятlа. (Дуьз жаваб гайидаз "Тапшуругърин кIватIал №2" ктаб пишкешда) Жавабар кхьихь⤵️ #ТапшуругъМашгъулат 📗«ЛЕЗГИ ЧIАЛ (Лезгинский язык)»

📚ЦIийи ктабар ✍️Ялцугъвийрин яратмишунар Зи ктабрин кьацI мукьвара мад са цIийи ктабдалди девлетлу хъхьана. Ам туькIуьрайди кIелзавайбуруз фадлай чизвай, Мегьарамдхуьруьн райондин Советский хуьре яшамиш жезвай журналист, шаир Сулейман Пашаев я. 100 экземплярдин тираж аваз «Мавел» чапханада акъат­навай «Илгьамдин булахар» ктабда ери-бине Ялцугърин хуь­­ряй (Ахцегь район) тир къелемчийрин яратмишунар (шии­рар, гьикаяяр, юморескаяр, ма­къалаяр) гьатнава. Авторди-туь­кIуьрайда къейдзавайвал, 180 кIвал аваз хьайи Ялцугърин хуьряй 17 писатель акъатнавайди малум я. Абурун эсерар кIватIна, 312 чиникай ибарат ктаб гьазурун патал С. Пашаева вижевай зегьмет чIугунва. 

Кьилди къачуртIа, кIватIалда Ялцугъ Эминан (абур Насруллагь Нуридини Майил Эфендиева таржума авунва) шиирри кьетIен чка кьазва. Я.Эминаз маса шаирри бахшнавай шиирар чапнава. Эдебиятдал рикI алайбурувай ктабдай мад Нури­ Эфендидин, Али Муьжруьм Та­гъизадедин, Насруллагь Нуридин, Агьмед Агьмедован, Мегьерам Ризаеван, Майил Эфендиеван, Сулейман Пашаеван, Фатма Гьасаналиевадин, Гуьлбиче Гьабибовадин, Шура Абдурагьмановадин, Эмируллагь Мегьерамован, Арсен Къари­бо­ван, Эсфира Хаспулатовадин, Фазил Гьабибован, Намедин Исмиханован эсерар кIелиз ­жеда.

Заз чиз, алатай ва чи йикъа­рин несилрикай тир ялцугъвий­ри эдебиятдик кутунвай пай ла­йихлуди я. Идан гьакъиндай чи гъиле авай ктабди шагьидвалзава. Автор: Л. Фетгьуьллагь

Гьуьрметлу ватанэгьлияр! Квез виридаз къенин сувар мубаракрай! 📌 ЧIал миллетдин кьилин ярж я 📌 ЧIал миллетдин кьилин девлет я 📌 ЧIал миллетдин кьилин ивир я 📕 «ЛЕЗГИ ЧIАЛ (Лезгинский язык)»

✂️ «ЙИКЪАН ЦИТАТА» рубрикадай 🖌 Лезги Фетгьуьллагь:   Хайи чIаларин патахъай къайгъударвал абур гьеле кIвачел аламаз авун герек я. Дагъустандин мектебра милли чIаларин хейлин векилри чпин аялар хайи чIалан тарсаривай къерех ийизва.(Гьасятда суал арадал къвезва: гьукум гъиле авайбуру ихьтин мумкинвал гунин себеб вуч я?) Жуван чIалан тарсунин чкадал «хайиди яз урус чIал» хкязавай диде-бубайриз регъуь жезвачтIа? Хъуьтуьлдаказ лагьайтIа, им акьулдивай кьатIуниз тежедай кар я эхир. #ЙикъанЦитата 📕 «ЛЕЗГИ ЧIАЛ (Лезгинский язык)»

Пака Россиядин халкьарин чIаларин югъ я. Цlийиз арадал гъанвай и кьетIен югъ цlи сифте яз къейдзава.

📚🖌📚 ЧИРВИЛЕРИН ЮГЪ Гьуьрметлу муаллимар, ученикар, студентар! Къенин сувар — Чирвилерин югъ — квез виридаз мубаракрай! Кlелунин цlийи йис агалкьунар гъидайди хьурай!

✂ «ЙИКЪАН ЦИТАТА» рубрикадай 🖌 Фикрет Хидиров, шаир:

Сабурдин къимет гзаф багьа я.

  #ЙикъанЦитата   📗 «ЛЕЗГИ ЧIАЛ (Лезгинский язык)»

📚 «Самоучитель лезгинского языка» (авторар: Фаина Къазимегьамедова ва Раифа Таирбегова).  

И ктабдин куьмекдалди ашкъи авай гьар садавай лезги чIал чириз жеда. Ктаб 48 тарсуникай, жуьреба-жуьре тапшуругърикай, тестерикай ибарат я. Лезги чIал чирзавай тарсар аудиодин къайдадани ава.  

✔️ Ктабдин къимет 1200 манат я.   📞 Тел. (Макс, ватсап): 8928-560-26-17

Пака Махачкъалада мярекат жеда.

«Фетгьуьллагьа авур ихтилатар» рубрикадай   ФЕТГЬУЬЛЛАГЬАН  ИХТИЛАТ №7   Квез ван тахьана жеч: 2025-йисан эхирда ва 2026-йисан эвел кьилера  «Лезги чIалан орфографиядин къайдайрин своддин» гьакъиндай са шумуд заседание кьиле фена. Тешкилнавай комиссиядик квай ксарин иштираквал аваз, гьелбетда.   Кхьинра хейлин авторри хейлин гафар гьар жуьреда кхьин давам жезва. Им орфографиядин къайдаяр авач лагьай чIал туш, им чиз-чиз ва я течиз къанунрал амал тавун лагьай чIал я. Бязи гафар гьатта пуд жуьреда кхьенваз гьалтзава. Ихьтин «макъамар» жезвайвиляй гьар са чIалан пешекарри орфография жезмай кьван мягькемарунин месэлаяр къарагъарзава. «Буш ва гъуьргъуь» жезвай чкаяр къвез-къвез къайдадик кухтазва, са тайин нетижадал къвезва. Бес Дагъустандин халкьарин чIаларин орфографийрин месэлаяр гьукуматдин дережада къарагъарай чIавуз ни вуч авуна, вуч арадал атана? И хъсан серфедикай чна, лезгийри, гьихьтин менфят хкудна? Завай инал «Лезги газетдин» чинриз акъатай материалрин бинедаллаз лезги чIалан орфографиядин месэлайриз талукь яз комиссияди авур веревирдерикай, арадал гъайи «нетижайрикай» ихтилатиз жеда. Ваъ, яргъи ихтилат ийиз жедач – ахьтин мумкинвал гудай материалар акунач. Асул гьисабдай «Лезги газетдин» къуллугъчийри бязи месэлайрикай чпин фикирар гегьеншдиз кхьена. Комиссиядик квай хейлинбурун фикирар газет кIелзавайбуруз къени чир хьанач, аквадай гьаларай, идалай кьулухъни чир хъжедач. Вучиз ятIани, газетдин чинриз орфографиядин своддин куьгьне вариант акъудна, амма эхирдай арадал хкай, дегишвилер кухтур вариант газетдиз гьеле акъатнавач. Чаз гуя «свод кьабулнава» лугьудай ван хъхьана. Ам газетдиз чап тавунин себеб вуч я? Гьина ава а проект? Ам гьакьван сирлу документдиз элкъвенвани?  Пара къариба аквазва заз и месэла.     Чаз чир хъхьайди са кар я: комиссиядик квай бязибуру (вирибуру ваъ) «хизан» ва «хзан» кьве вариантни орфографиядин сводда тестикьарунин теклиф ганва ва и жуьреяр къанунламишдай фикир ава (авуна акьатIарнавачтIани чидач). Еке гьунар я хьи им! Вири вилик фейила, чун кьулухъ фидани гила? Кьве вариантар генани тIимиларна кIанзавай чкадал, гила чун мад какахьай гьалар арадал гъиз алахъдани? Зияндилай гъейри, ихьтин дегишвилери вуч хийир гузва? Нивай лугьуз жеда? Куьн чIалахъ хьухь, садавайни лугьуз жедач. И суалдиз тайин, илимдал асаслу жаваб гудай алим, пешекар, муаллим алай вахтунда лезгийрин арадай жагъидач лагьана тестикьариз жеда завай.  Тестикьариз кIанзава лугьузвай свод «сирлу документдиз элкъвей» делилди ахьтин шаклувал гъизва хьи, гьинавачтIани, комиссия вилик эцигнавай тапшуругъдив жавабдарвилелди, рикI гваз эгечIнач, гьавиляй эхирдай кьабулай орфографиядин къайдайрин кIватIал чаз къени акунвач.   #Ихтилат   📗 «ЛЕЗГИ ЧIАЛ (Лезгинский язык)»

📌 «ГАФАРГАН» рубрикадай ▪️Къалмакъал - ссора, скандал, перепалка. ▪️Кул-кус - кустарник. ▪️Рапрап - блеск. ▪️Зирзибил - мусор, хлам. #ЛезгиГафар #Гафарган 📕 «ЛЕЗГИ ЧIАЛ (Лезгинский язык)»

⏸️ «ЛЕЗГИ ЧIАЛ (Лезгинский язык)» тг-канал рухсатдиз фенва. Чна августдиз кIвалах давамар хъийида. Куьн чавай къакъатмир!

Квез виридаз къулайдиз ял ядай мумкинвилер хьурай!

 ❗️Рухсат – отпуск.

Аялар патал гад лап ажайиб вахт я.  Мектебра кIелзавайбур патал яргъи тIатIилар давам жезва. Хейлин аялар лагерриз физва, шегьерра яшамиш жезвай бязибур хуьрериз хъфизва. Къачунвай чирвилер рикIелай алуд тавун патал, чирвилер мадни мягькемарун патал, чIал гегьеншарун патал гатун чIавузни аялри ара-ара ктабрикай менфят къачун герек я. ТIатIилрин вахтунда аялрив гьихьтин ктабар вугуз жеда?   📚 «ЛЕЗГИ ЧIАЛ (Лезгинский язык)» тг-каналди ихьтин ктабар теклифзава:   1.     «Лезги чIал чирин». 2.     «Лезги чIаланни урус чIалан шикилар галай гафарган». 3.     «100 тапшуругъ» 4.     «Аялар патал кроссвордар ва маса тапшуругъар». 5.     «Тапшуругърин кIватIал».   #ЛезгиКтабар   📗 «ЛЕЗГИ ЧIАЛ (Лезгинский язык)»