News Of Myanmar

တောင်ဥက္ကလာပမြို့နယ်တွင် သားအမိနှစ်ဦး ဓာတ်လိုက်၊ မိခင်သေဆုံး NOM၊ဇွန်၉၊၂၀၂၆ ရန်ကုန်တိုင်း‌ေဒသကြီး၊ တောင်ဥက္ကလာပမြို့နယ်၊ မြင်သာ(၁)လမ်းတွင် သားအမိနှစ်ဦး ဓာတ်လိုက်မှုဖြစ်ပွားခဲ့ရာ မိခင်ဖြစ်သူ သေဆုံးခဲ့ကြောင်း လူမှုကယ်ဆယ်ရေးအသင်းများထံမှ သိရသည်။ ဖြစ်စဉ်မှာ ဇွန်လ ၇ ရက် နံနက် ၇ နာရီခန့်က ဖြစ်ပွားခဲ့ခြင်းဖြစ်ပြီး ဓာတ်လိုက်နေသည့် မိခင်ဖြစ်သူအား သားဖြစ်သူက ဝင်ရောက်ကယ်ဆယ်စဉ် ဓာတ်လိုက်ဒဏ်ရာများ ရရှိခဲ့၍ သားဖြစ်သူအား ဓမ္မစိန်ရောင် လူနာတင်ယာဉ်ဖြင့် မြောက်ဥက္ကလာပ ပြည်သူ့ဆေးရုံသို့ ပို့ဆောင်ကုသပေးခဲ့ကြောင်း သိရသည်။ ဓာတ်လိုက်မှုဖြစ်ပွားရသည့် အကြောင်းရင်းကို သက်ဆိုင်ရာက စုံစမ်းစစ်ဆေးလျက်ရှိကြောင်း သိရသည်။

သမ္မတထရမ့် က သူ​၏အိမ်မက်ကမ္ဘာထဲကနေ၍ - "အီရန်က ကျွန်တော်တို့ လိုချင်သမျှ အရာအားလုံးကို ပေးလာတော့မှာပါ" NOM

ရှေးဟောင်းဝတ္ထုပစ္စည်းများကို တရားမဝင်မှောင်ခိုဝယ်ယူကြသူများရှိရာ ယင်းကဲ့သို့ အရောင်းအဝယ်ပြုလုပ်ကြခြင်းသည် ဥပဒေကို ချိုးဖောက်ခြင်းဖြစ်သည့်အလျောက် အရေးယူအပြစ်ပေး ခံကြရမည်ဖြစ်သည်။ သို့ဖြစ်ရာ ရှေးဟောင်းဝတ္ထုပစ္စည်း တရားမဝင် ရောင်းဝယ်မှုများကို ဝိုင်းဝန်းတားဆီး ကာကွယ်ကြရန်လိုသည်။ ရှေးဟောင်း ဝတ္ထုပစ္စည်းများကို အကြောင်းအမျိုးမျိုးဖြင့် တွေ့ရှိကြသူများသည် ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာန၊ ရှေးဟောင်းသုတေသနနှင့် အမျိုးသားပြတိုက်ဦးစီးဌာနသို့ တာဝန် သိစွာ လာရောက်အပ်နှံပါက လွှဲပြောင်းအပ်နှံသူကို အကျိုးခံစားခွင့် ရှိသူအဖြစ် သတ်မှတ်၍ အထက်ပါအတိုင်း ထိုက်ထိုက်တန်တန် ဂုဏ်ပြုချီးမြှင့်ငွေများ ချီးမြှင့်နေခြင်းဖြစ်ရာ မိမိတို့နိုင်ငံ၏ ရှေးဟောင်းယဉ်ကျေးမှုအမွေအနှစ် ဝတ္ထုပစ္စည်းများ၏ တန်ဖိုးကြီးမားမှုကို နားလည်သိရှိပြီး ကာကွယ်ထိန်းသိမ်းရာတွင် နိုင်ငံသားတာ၀န် ကျေပွန်စွာ ပါဝင်ကြရပါမည့်အကြောင်း။

ရှေးဟောင်းဝတ္ထုပစ္စည်းများ တန်ဖိုးထား တာဝန်သိစွာဖြင့် နိုင်ငံတော်သို့အပ်နှံ မြန်မာနိုင်ငံသည် ကျောက်ခေတ်၊ ကြေးခေတ်၊ သံခေတ်မှ သမိုင်းတင်သည့် ခေတ်အဆက်ဆက်တိုင်အောင် သမိုင်းကြောင်းရှည်လျားသည့် နိုင်ငံတစ်နိုင်ငံဖြစ်သည်နှင့်အညီ သမိုင်းအမွေအနှစ် ရှေးဟောင်းဝတ္ထုပစ္စည်းများစွာ ကြွင်းကျန်ရစ်လျက်ရှိပြီး မကြာခဏဆိုသလိုလည်း တွေ့ရှိနေကြသည်။ ရှေးဟောင်းပစ္စည်းများသည် နိုင်ငံနှင့်လူမျိုး၏ အတိတ်ကာလနှင့် ယဉ်ကျေးမှုအဆင့်အတန်းတို့ကို ပြန်လည်ဖော်ညွှန်း ပြသနေသည့် သက်သေအထောက်အထားများပင်ဖြစ်သည်။ ဝတ္ထုပစ္စည်းတစ်ခုသည် နှစ်ပေါင်း ၁၀၀ နှင့်အထက် သက်တမ်းရှိပြီး သမိုင်းခေတ်ကာလတစ်ခုကို ဖော်ညွှန်းပြသနိုင်ခြင်း၊ အသုံးပြုမှု၊ လက်ရာမြောက်မှု၊ ရှားပါးမှု၊ သမိုင်းတန်ဖိုးရှိမှုတို့ ပေါင်းစပ်နေခြင်းတို့ဖြင့် ၎င်းအား ရှေးဟောင်းဝတ္ထုပစ္စည်းအဖြစ် သတ်မှတ်သည်။ ရှေးဟောင်းဝတ္ထုပစ္စည်းများသည် ရှေးဟောင်းနေရာဒေသများနှင့် ဆက်စပ်ပြီး တည်ရှိနေခြင်းဖြစ်ရာ ကမ်းပါးပြိုခြင်း၊ ယာထွန်ခြင်း၊ ကျင်းတူးခြင်း၊ လမ်းပြင်ခြင်း စသည်အားဖြင့် ပြန်လည်ပေါ်ထွက်လာကြသည်။ ယင်းသို့တွေ့ရှိပါက ရှေးဟောင်းဝတ္ထုပစ္စည်းများ ဖြစ်သည်ကို မသိ၍ဖြစ်စေ၊ သိလျက်နှင့်ဖြစ်စေ ငွေကြေးရလိုဇောဖြင့် ချက်ချင်းဆိုသလို ပြန်လည်ထုခွဲ ရောင်းချလေ့ရှိကြသည်။ စင်စစ် ယင်းကဲ့သို့ ထုခွဲရောင်းချလိုက်ခြင်းသည် ဥပဒေကို ချိုးဖောက်၍ ပြစ်မှုကျူးလွန်လိုက်ခြင်းပင်ဖြစ်သည်။ မိမိတို့နိုင်ငံရှိ ရှေးဟောင်းဝတ္ထုပစ္စည်းများ အဓွန့်ရှည်တည်တံ့စေရန်၊ ပျက်စီးယိုယွင်းပျောက်ဆုံးခြင်းတို့မှ ကာကွယ်ရန်၊ ပြည်သူများအနေဖြင့် ရှေးဟောင်းဝတ္ထုပစ္စည်းများ၏ တန်ဖိုးမြင့်မားမှုကိုနားလည်၍ တာဝန်သိစိတ်ဖြင့် ကာကွယ်ထိန်းသိမ်းနိုင်စေရန်ဟူသော ရည်ရွယ်ချက်များဖြင့် ၂၀၁၅ ခုနှစ်တွင် ရှေးဟောင်းဝတ္ထုပစ္စည်းများ ကာကွယ်ထိန်းသိမ်းရေးဥပဒေကိုပြဋ္ဌာန်းခဲ့ပြီး ၂၀၁၆ ခုနှစ်တွင် နည်းဥပဒေကို ထုတ်ပြန်ခဲ့သည်။ သို့ဖြစ်ရာ ရှေးဟောင်းဝတ္ထုပစ္စည်းများကိုတွေ့ရှိပါက သက်ဆိုင်ရာသို့ သတင်းပေးပို့ခြင်းဖြင့် ဥပဒေကို လိုက်နာရာရောက်သကဲ့သို့ ထိုက်တန်သည့်ဆုကြေးငွေနှင့် ဂုဏ်ပြုမှတ်တမ်းလွှာ ချီးမြှင့်ပေးအပ်မှုတို့ကို ရရှိကြမည်ဖြစ်သည်။ ဆုကြေးဟုဆိုရာတွင် ဝတ္ထုပစ္စည်း၏ ကာလပေါက်စျေး၊ ခေတ်ကာလဆုကြေး၊ ခေတ်လက်ရာဆုကြေးတို့အပြင် အချို့ရှေးဟောင်းဝတ္ထုပစ္စည်းများဆိုလျှင် ရှားပါးလက်ရာ ထပ်ဆောင်းဆုကြေးကိုပါ ရရှိနိုင်ကြသည်။ ဆုကြေးထုတ်ပေးရာတွင်လည်း စတင်အပ်နှံချိန်မှ ရက်သတ္တနှစ်ပတ်မှ လေးပတ်အတွင်း ထုတ်ပေးခြင်းဖြစ်သည်။ ပြီးခဲ့သည့် ဇွန်လ ၄ ရက်နေ့က ရှေးဟောင်းဝတ္ထုပစ္စည်းများ လာရောက်အပ်နှံခြင်းအတွက် ဂုဏ်ပြုအခမ်းအနားကို အမျိုးသားပြတိုက်(နေပြည်တော်)၌ ကျင်းပခဲ့သည်။ အဆိုပါအခမ်းအနားတွင် ရှေးဟောင်းဝတ္ထုပစ္စည်းအပ်နှံသူ နှစ်ဦးတို့က ကုန်းဘောင်ခေတ်သတ္တုစပ်ပြား ၃၂၈ ပြားနှင့် ပျူခေတ်ငွေဒင်္ဂါး ၃၃၃ ပြားတို့ကို ရှေးဟောင်းသုတေသနနှင့် အမျိုးသားပြတိုက်ဦးစီးဌာနသို့ အပ်နှံခဲ့ကြသည်။ ယင်းသို့အပ်နှံရာတွင် ကုန်းဘောင်ခေတ်သတ္တုစပ်ပြား ၃၂၈ ပြားကို ဆုကြေးတွက်ချက်မှုအရ ကြေး ၂၅ ပိဿာအတွက် ကာလပေါက်ဈေး ကျပ် ၃၇၅၀၀၀၀၊ ခေတ်ကာလဆုကြေးအဖြစ် ကာလပေါက်ဈေး၏ ၅၀ ရာခိုင်နှုန်းဖြစ်သော ကျပ် ၁၈၇၅၀၀၀ စုစုပေါင်း ဆုကြေးကျပ် ၅၆၂၅၀၀၀ နှင့် ဂုဏ်ပြုမှတ်တမ်းလွှာ၊ ပျူခေတ် ငွေဒင်္ဂါး ၃၃၃ ပြားကို ဆုကြေးတွက်ချက်ရာတွင် ငွေဒင်္ဂါးပြားများ၏ စုစုပေါင်း အလေးချိန်အရ ကာလတန်ဖိုးကျပ် ၁၅၆၅၅၆၄၀၊ ခေတ်ကာလ ဆုကြေးအဖြစ် ကာလတန်ဖိုး၏ ၈ဝ ရာခိုင်နှုန်းဖြစ်သော ကျပ် ၁၂၅၂ ၄၅၁၂ ၊ ခေတ်လက်ရာ ဆုကြေးအဖြစ် ကာလတန်ဖိုး၏ ၈ဝ ရာခိုင်နှုန်းဖြစ်သော ကျပ် ၁၂၅၂၄၅၁၂ ၊ ရှားပါးလက်ရာ ထပ်ဆောင်းဆုကြေးအဖြစ် ကာလတန်ဖိုး၏ ၅ဝ ရာခိုင်နှုန်းဖြစ်သော ကျပ် ၇၈၂၇၈၂၀၊ စုစုပေါင်း ဆုကြေးငွေကျပ် ၄၈၅၃၂၄၈၄ နှင့် ဂုဏ်ပြုမှတ်တမ်းလွှာတို့ကို ချီးမြှင့်ခဲ့သည်ကို တွေ့ရသည်။

ဒုတိယဝန်ကြီး ဦးသွင်အောင် ဝါကြိတ်စက်ရုံ(တောင်တွင်းကြီး)နှင့် အမှတ်(၁)အထည်စက်ရုံ(ရွှေတောင်) ကြည့်ရှုစစ်ဆေး ဇွန် ၇၊ ၂၀၂၆ စက်မှုနှင့် အသေးစား၊ အငယ်စား၊ အလတ်စားနှင့် စီးပွားရေးလုပ်ငန်းများဖွံ့ဖြိုးတိုးတက်ရေးဝန်ကြီးဌာန ဒုတိယဝန်ကြီး ဦးသွင်အောင်သည် ယနေ့နံနက်ပိုင်းတွင် အမှတ်(၁)အထည်စက်ရုံ (ရွှေတောင်) ဧည့်ရိပ်သာခန်းမ၌ စက်ရုံမှူး၊ တာဝန်ရှိသူများနှင့်တွေ့ဆုံပြီး စိုက်ပျိုးမွေးမြူရေးအခြေပြု အထည်အလိပ်စက်မှုလုပ်ငန်းများ (Agro-base Textile Industries) ဖွံ့ဖြိုးတိုးတက်ရေးဆိုင်ရာ ကိစ္စရပ်များနှင့်စပ်လျဉ်း၍ ညှိနှိုင်းဆွေးနွေးပြီး စက်ရုံအတွင်း လှည့်လည်ကြည့်ရှုစစ်ဆေးသည်။ ယမန်နေ့ကလည်း ဒုတိယဝန်ကြီးသည် ဝါကြိတ်စက်ရုံ(တောင်တွင်းကြီး)နှင့် ပဲခူးတိုင်းဒေသကြီး ရွှေတောင်မြို့ရှိ အမှတ်(၁)အထည်စက်ရုံ (ရွှေတောင်)တို့မှ စက်ရုံမှူးများ၊ တာဝန်ရှိသူများနှင့် သက်ဆိုင်ရာခန်းမများ၌ သီးခြားစီတွေ့ဆုံပြီး စက်ရုံအလိုက် လိုက်နာဆောင်ရွက်ရန်လိုအပ်သည့် လုပ်ငန်းပိုင်းဆိုင်ရာများကို ဆွေးနွေးပြောကြားကာ စက်ရုံအတွင်း စက်များတပ်ဆင်ထားရှိမှု၊ လုပ်ငန်းများလည်ပတ်ဆောင်ရွက်နေမှု၊ စက်ရုံမှထွက်ရှိလာသည့် ရေဆိုးများကို ဗေဒါကန်များတည်ဆောက်၍ စနစ်တကျစွန့်ပစ်နေမှု အခြေအနေတို့ကို လှည့်လည်ကြည့်ရှုစစ်ဆေးခဲ့ကြောင်း သတင်းရရှိသည်။

ထရမ့်က ဟစ်ဇဘိုလာကို တိုက်ခိုက်ရန် ဆီးရီးယားအား တိုက်တွန်း အမေရိကန်သမ္မတ ဒေါ်နယ်ထရမ့်က တည်ငြိမ်မှုပြန်လည်ရရှိအောင် ကြိုးပမ်းနေသည့် ဆီးရီးယားခေါင်းဆောင်ပိုင်းကို ချီးကျူးလိုက်ပြီး သမ္မတ အာမတ် အယ်လ်-ရှာရာ (Ahmad al-Sharaa) အနေဖြင့် လက်ဘနွန်ရှိ ဟစ်ဇဘိုလာ (Hezbollah) အဖွဲ့ကို ဆန့်ကျင်ရာတွင် အခန်းကဏ္ဍတစ်ခုမှ ပါဝင်နိုင်ကြောင်း ပြောကြားခဲ့သည်။ "ဆီးရီးယားဟာ သူတို့ရဲ့ လုပ်ရပ်တွေကို ပြန်လည်ပြုပြင် တည့်မတ်ဖို့ အလွန်ကောင်းမွန်တဲ့ အလုပ်တစ်ခုကို လုပ်ဆောင်နေပါတယ်" ဟု ဇွန်လ ၇ ရက်နေ့က ထုတ်လွှင့်ခဲ့သည့် NBC News နှင့် အင်တာဗျူးတစ်ခုတွင် ထရမ့်က ပြောကြားခဲ့သည်။ ထို့အပြင် ၎င်းက ရှာရာကို ဒေသတွင်းလုံခြုံရေး ကြိုးပမ်းမှုများတွင် အမေရိကန်အား ကူညီရန် ဆန္ဒရှိမည့် "အလွန်ကောင်းမွန်သည့် ခေါင်းဆောင်တစ်ဦး" အဖြစ်လည်း အမွှမ်းတင်ခဲ့သည်။ ထရမ့်က ဆီးရီးယားအနေဖြင့် ဟစ်ဇဘိုလာအဖွဲ့အပေါ် ပိုမိုတိကျသေချာသည့် ပစ်မှတ်ထား တိုက်ခိုက်မှုများပြုလုပ်နိုင်ရန် လမ်းဖွင့်ပေးနိုင်ကြောင်း ဆက်လက်ပြောကြားခဲ့ပြီး လက်ဘနွန်ရှိ ပြည်သူများအတွက် "ပိုမိုကောင်းမွန်သော ဘဝ" ကို ရရှိစေချင်ကြောင်း ပြောဆိုခဲ့သည်။ အစ္စရေးသည် မိမိတို့ပိုင်နက်ကို ပစ်မှတ်ထားတိုက်ခိုက်မှုများအတွက် လက်တုံ့ပြန်ခြင်းဖြစ်သည်ဟုဆိုကာ ဟစ်ဇဘိုလာတို့၏ အမာခံနယ်မြေဖြစ်သော ဘေရွတ်မြို့တောင်ပိုင်း ဆင်ခြေဖုံးရပ်ကွက်များကို ဇွန်လ ၈ ရက်နေ့တွင် တိုက်ခိုက်မှုများ ပြုလုပ်ခဲ့သည်။ ယင်းနောက်တွင် အီရန်က အမေရိကန်နှင့် ရရှိထားသည့် အပစ်အခတ်ရပ်စဲရေး သဘောတူညီချက်ကို ချိုးဖောက်သည်ဟု အကြောင်းပြကာ အစ္စရေးအပေါ် တိုက်ခိုက်မှုများ ပြန်လည်စတင်ခြင်းဖြင့် တုံ့ပြန်ခဲ့သည်။ အီရန်အစိုးရက လက်ဘနွန်အတွင်း ရန်လိုသည့် တိုက်ခိုက်မှုများ အားလုံးကို လုံးဝရပ်တန့်ရန် အဆိုပါ အပစ်အခတ်ရပ်စဲရေးတွင် အကျုံးဝင်သည်ဟု အခိုင်အမာ ပြောဆိုထားသည်။ ဆီးရီးယားသည် အီရန်အပေါ် ဆင်နွှဲနေသည့် အမေရိကန်-အစ္စရေး စစ်ပွဲကို တိုက်ရိုက်အတည်ပြု ထောက်ခံခြင်း မရှိသော်လည်း၊ အိမ်နီးချင်း ပင်လယ်ကွေ့နိုင်ငံများကို ပစ်မှတ်ထားသည့် အီရန်အစ္စလာမ္မစ်သမ္မတနိုင်ငံ၏ လက်တုံ့ပြန်တိုက်ခိုက်မှုများကိုမူ ထပ်ခါတလဲလဲ ပြစ်တင်ရှုတ်ချခဲ့သည်။ စစ်ပွဲစတင်ပြီးသည်နှင့် အရပ်ရပ်မှ ထွက်ပေါ်လာသော သတင်းများအရ အမေရိကန်၏ တောင်းဆိုချက်အရ ရှာရာသည် အီရန်၏ မဟာမိတ်များ၊ အထူးသဖြင့် လက်ဘနွန်ရှိ ဟစ်ဇဘိုလာအဖွဲ့ကို တိုက်ခိုက်နိုင်သည်ဟု ခန့်မှန်းတွက်ဆခဲ့ကြသည်။ ဆီးရီးယားသမ္မတကိုယ်တိုင်ကလည်း စစ်ပွဲအတွင်း ဟစ်ဇဘိုလာအဖွဲ့ လက်နက်ဖြုတ်သိမ်းရန် တစ်ကြိမ်ထက်မက ပွင့်ပွင့်လင်းလင်း တောင်းဆိုခဲ့ဖူးသည်။ ဟစ်ဇဘိုလာအဖွဲ့သည် လွန်ခဲ့သည့် တစ်နှစ်ကျော်က ရှာရာ ဦးဆောင်သည့် သူပုန်မဟာမိတ်အဖွဲ့၏ ဖြုတ်ချခြင်းကို ခံခဲ့ရသော ဆီးရီးယားသမ္မတဟောင်း ဘာရှာ အယ်လ်-အာဆတ် (Bashar al-Assad) ၏ ရင်းနှီးသော မဟာမိတ် ဖြစ်ခဲ့သည်။ ဆီးရီးယားဘက်က တရားဝင် ငြင်းဆိုထားသော်လည်း၊ ယင်းအခြေအနေကြောင့် အီရန်အစိုးရနှင့် ဆိုးရွားသော တင်းမာမှုများ ဖြစ်ပွားခဲ့ပြီး ဒမတ်စကတ် (ဆီးရီးယားမြို့တော်) ရှိ ပစ်မှတ်များကို တိုက်ခိုက်မည်ဟု အီရန်က ပေါ်ပေါ်ထင်ထင် ခြိမ်းခြောက်ခဲ့သည်။ ထရမ့်၏ နောက်ဆုံးမှတ်ချက်များသည် ဟစ်ဇဘိုလာအဖွဲ့အပေါ် ဖိအားများ ပိုမိုတိုးမြှင့်ရန်အတွက် ဆီးရီးယားအား ဟစ်ဇဘိုလာနှင့် တိုက်ပွဲတစ်ခုအတွင်းသို့ ဆွဲသွင်းရန် အမေရိကန်က ဆက်လက်စဉ်းစားနေဆဲဖြစ်ကြောင်း ပြသနေသည်။ ဟစ်ဇဘိုလာအဖွဲ့နှင့် ကြီးမားသော သဘောထားကွဲလွဲမှုများ ရှိနေသော်လည်း ရှာရာအနေဖြင့် ထိုအဖွဲ့ကို ဝင်ရောက်စွက်ဖက် တိုက်ခိုက်ရန် လိုလားပုံမရပေ။ ဆီးရီးယားအနေဖြင့် ကြီးလေးသော ပေးဆပ်မှုမျိုး ကြုံရနိုင်သည်။ စစ်ဒဏ်ကြောင့် ပျက်စီးနေရသော ဆီးရီးယား၏ အခြေခံအဆောက်အအုံများသည် လက်ဘနွန်၊ အီရတ်နှင့် အီရန်တို့မှ လက်တုံ့ပြန်တိုက်ခိုက်မှုများအောက်တွင် လုံးဝထိခိုက်လွယ်သည့် အနေအထားသို့ ရောက်ရှိသွားမည်ဖြစ်သည်။ သို့သော်လည်း ဆီးရီးယားသမ္မတသည် ထရမ့်၏ တောင်းဆိုချက်ကို ငြင်းပယ်နိုင်သည့် အနေအထားတွင် မရှိဘဲ ဖြစ်နေနိုင်ပါသည်။ NOM

ဇွန်လ ၄ ရက်နေ့က လက်ဘနွန်တောင်ပိုင်းရှိ သမိုင်းဝင် ဘူးဖို့ဒ်ရဲတိုက် (Beaufort Castle / Qalaat al-Shaqif) အနီးဝန်းကျင်တွင် အစ္စရေးစစ်တပ်​၏ မာကပါ (Merkava) တင့်ကားတစ်စီးကို ပဲ့ထိန်းတင့်ကားခွင်းဒုံးကျည်ဖြင့် ပစ်မှတ်ထားတိုက်ခိုက်ခဲ့သည့်ဗီဒီယိုဖိုင်ကို ဟစ်ဇဘိုလာ လက်နက်ကိုင်အဖွဲ့က ထုတ်ပြန်လိုက်သည်။ NOM

လာအိုပြည်သူ့တပ်မတော်၏ စစ်ဦးစီးဌာန၊ ဒုတိယအကြီးအကဲဖြစ်သူ Major General Vanthong BOUTTAVONG ဦးဆောင်သော ချစ်ကြည်ရေးကိုယ်စားလှယ်အဖွဲ့ ရန်ကုန်မြို့သို့ရောက်ရှိ ဇွန် ၈၊ ၂၀၂၆

အီရတ်နိုင်ငံမြောက်ပိုင်း၊ အာဘေးလ်မြို့ (Erbil) ၏ အရှေ့ဘက်၊ ကိုယာခရိုင် (Koya district) ရှိ အာဇာဒီစခန်း (Azadi camp) တွင် အခြေစိုက်ထားသော အစ္စရေးကျောထောက်နောက်ခံပြု အကြမ်းဖက်သမားများ၏ စခန်းများကို အီရန်က ရှာဟစ်-၁၃၆ (Shahed-136) ဒရုန်းသုံးစင်းဖြင့် ပစ်မှတ်ထား တိုက်ခိုက်ခဲ့သည်။ NOM

အစ္စရေးတို့ သိမ်းပိုက်ထားသည့် ဂျက်ဖာ (Jaffa) နယ်မြေ (တယ်လ်အဗစ်မြို့) အတွင်းရှိ အရေးပါသော အစ္စရေးစစ်ဘက်ဆိုင်ရာ အဆောက်အအုံများကို ပစ်မှတ်ထား၍ ယနေ့ ဒုံးကျည်အမြောက်အမြား ပစ်ခတ်တိုက်ခိုက်ခဲ့သည့် ရုပ်သံမှတ်တမ်းကို ယီမင်လက်နက်ကိုင်တပ်ဖွဲ့က ထုတ်ပြန်လိုက်သည်။ NOM

နိုင်ငံတော်နှင့် တပ်မတော်၏ ငြိမ်းချမ်းရေးလုပ်ငန်းစဉ်များကို လက်ခံယုံကြည်သည့် AA အဖွဲ့ဝင် အမျိုးသား ၅ ဦးနှင့် PDF  အမည်ခံအဖွဲ့ဝင် အမျိုးသား ၁ ဦး ဥပဒေဘောင်အတွင်းသို့ ထပ်မံဝင်ရောက် ဇွန် ၈၊ ၂၀၂၆

နိုင်ငံတော်နှင့် တပ်မတော်၏ ငြိမ်းချမ်းရေးလုပ်ငန်းစဉ်များကို လက်ခံယုံကြည်လာသည့် PNLO၊ DPLA၊ KNDF နှင့် PDF အမည်ခံအဖွဲ့ဝင် ၄၀ ဦး လက်နက်၊ ခဲယမ်းများနှင့်အတူ ဥပဒေဘောင်အတွင်းသို့ ထပ်မံဝင်ရောက် ဇွန် ၈၊ ၂၀၂၆

ဂျာမနီနိုင်ငံ ဘာလင်မြို့ရှိ ဘရန်ဒန်ဘာ့ဂ် ဂိတ် (Brandenburg Gate) ရှေ့တွင် ယနေ့ လူပေါင်းသောင်းချီ စုဝေးခဲ့ကြပြီး ပရောဂျက်မီလီယမ် "Project M1llion" ဟု အမည်ပေးထားသည့် လှုပ်ရှားမှုအောက်တွင် ဂျာမန်အစိုးရအား ရာထူးမှ ချက်ချင်းနုတ်ထွက်ပေးရန် တောင်းဆိုဆန္ဒပြခဲ့ကြသည်။ ဂျာမနီနိုင်ငံတော်အလံများကို ကိုင်ဆောင်ထားကြသည့် ဆန္ဒပြပြည်သူများသည် တိုက်ရိုက်ဒီမိုကရေစီစနစ် ကျင့်သုံးရန်၊ လက်ရှိရွှေ့ပြောင်းနေထိုင်မှု (migration) ဆိုင်ရာ မူဝါဒများကို ရပ်ဆိုင်းရန်၊ အများပြည်သူဆိုင်ရာ ရုပ်သံထုတ်လွှင့်မှု အခကြေးငွေများ ကောက်ခံခြင်းကို ဖျက်သိမ်းရန်နှင့် နိုင်ငံရေးသမားများ၏ တာဝန်ခံမှုကို တင်းတင်းကျပ်ကျပ် လုပ်ဆောင်ရန် အချက် ၁၁ ချက်ပါဝင်သော အစီအစဉ်ကို ကိုင်စွဲကာ လူထုဆန္ဒပြပွဲ ပြုလုပ်ခဲ့ကြခြင်း ဖြစ်သည်။ ဤဆန္ဒပြပွဲသည် တစ်ခုတည်းသော သီးခြားဖြစ်ရပ်မဟုတ်ပေ။ ဂျာမနီနိုင်ငံ၏ အဓိက အလုပ်သမားသမဂ္ဂအဖွဲ့ချုပ်ကြီး ဖြစ်သော DGB သည်လည်း လာမည့် ဇွန်လ ၂၇ ရက်နေ့တွင် အဓိက ဆန္ဒပြပွဲကြီးတစ်ခု ပြုလုပ်ရန် သီးခြားစီစဉ်နေသည်။ ယင်းဆန္ဒပြပွဲကို အစိုးရ၏ ပင်စင်လစာ ပြုပြင်ပြောင်းလဲရေး အဆိုပြုချက်များ မထွက်ရှိမီနှင့် ညွန့်ပေါင်းအစိုးရအဖွဲ့၏ အရေးကြီးသော ထိပ်သီးအစည်းအဝေး မတိုင်မီ အချိန်ကိုက် ပြုလုပ်ရန် တမင်တကာ ရည်ရွယ်စီစဉ်ထားခြင်း ဖြစ်သည်။ လက်ရှိတွင် ဂျာမနီအဓိပတိ မာ့ဇ် (Merz) အပေါ် လူထုထောက်ခံမှုနှုန်းသည် သမိုင်းတစ်လျှောက် အနိမ့်ဆုံးအဆင့်သို့ ကျဆင်းနေပြီး ဂျာမန်ပြည်သူ ၇၇% က ၎င်း၏ စွမ်းဆောင်ရည်အပေါ် မကျေနပ်ကြကြောင်း ဖော်ပြနေသည်။ ထို့ကြောင့် ဂျာမန်အစိုးရသည် လမ်းပေါ်ထွက် ဆန္ဒပြမှုများ၊ အလုပ်သမားသမဂ္ဂများ၏ ဖိအားများနှင့် ၎င်းတို့အစိုးရအဖွဲ့အပေါ် လူထုထောက်ခံမှုနှုန်း ထိုးဆင်းသွားခြင်း စသည့် ဖိအားပေါင်းစုံကို တစ်ပြိုင်နက်တည်း ရင်ဆိုင်နေရသည်။ NOM

အမေရိကန်သမ္မတ ဒေါ်နယ်ထရမ့်ကိုယ်တိုင် ကြားဝင်စွက်ဖက် တောင်းဆိုခဲ့ပြီးနောက်၊ အစ္စရေးနိုင်ငံအနေနဲ့ အီရန်အပေါ် တိုက်ရိုက်တိုက်ခိုက်နေမှုတွေကို ယာယီရပ်ဆိုင်းထားကြောင်း ဟီဘရူး (အစ္စရေး) မီဒီယာတွေမှာ ဖော်ပြထားပါတယ်။ အစ္စရေးရဲ့ Channel 12 သတင်းဌာနကလည်း အဆင့်မြင့်အစ္စရေးအရာရှိတစ်ဦးရဲ့ ပြောကြားချက်ကို ကိုးကားပြီး ထရမ့်အစိုးရအဖွဲ့ရဲ့ တောင်းဆိုချက်တွေကို လိုက်လျောတဲ့အနေနဲ့ အီရန်အပေါ် လုပ်ဆောင်နေတဲ့ စစ်ဆင်ရေးတွေကို အစ္စရေးဘက်က ခေတ္တရပ်နားထားကြောင်း အတည်ပြုပြောဆိုခဲ့ပါတယ်။ NOM

တောင်ငူမြို ဖွံဖြိုးရေးစီမံကိန်းများ ကြည့်ရှုစစ်ဆေးသည့် နိုင်ငံတော်သမ္မတ၊ မီးရထားနှင့် အားကစားအခြေခံအဆောက်အအုံများ အဆင့်မြှင့်တင်ရေး အလေးထားမှာကြား ပဲခူးတိုင်းဒေသကြီး တောင်ငူမြို၌ အကောင်အထည်ဖော် ဆောင်ရွက်လျက်ရှိသော ဖွံဖြိုးရေးစီမံကိန်းများကို နိုင်ငံတော်သမ္မတ ဦးမင်းအောင်လှိုင်က ဇွန် ၆ ရက်တွင် သွားရောက်ကြည့်ရှုစစ်ဆေးခဲ့ပြီး မီးရထားပိုဆောင်ရေးနှင့် အားကစားအခြေခံအဆောက်အအုံများ ရေရှည်ဖွံဖြိုးတိုးတက်စေရေးအတွက် လိုအပ်သည့် လမ်းညွှန်မှာကြားမှုများ ပြုလုပ်ခဲ့ကြောင်း သိရသည်။ စစ်ဆေးမှုအတွင်း နိုင်ငံတော်သမ္မတသည် နေပြည်တော်–တောင်ငူ မီးရထားလမ်းပိုင်း အဆင့်မြှင့်တင်ထားမှုများ၊ မီးရထားလမ်းတစ်လျှောက် သန့်ရှင်းသာယာလှပရေးနှင့် စိမ်းလန်းစိုပြည်ရေးလုပ်ငန်းများ၊ စိုက်ပျိုးရေးလုပ်ငန်းများ ဆောင်ရွက်ထားရှိမှုနှင့် ဘူတာဝင်ထွက်နေရာများကို စနစ်တကျ စီမံခန့်ခွဲထားမှုတိုကို လေ့လာကြည့်ရှုခဲ့သည်။

ရွှေကုက္ကိုလ်နယ်မြေအတွင်း အွန်လိုင်းလိမ်လည်လောင်းကစားမှုကျူးလွန်ရာတွင် အသုံးပြုခဲ့သည့် တရားမဝင် ၃ ထပ်လူနေအဆောက်အအုံ ၃ လုံး အား စနစ်တကျ ထပ်မံဖြိုချဖျက်ဆီး၊ တရားမဝင်အဆောက်အအုံ ၄၅ လုံးဖြိုချဖျက်ဆီးပြီးဖြစ် ဇွန် ၈၊ ၂၀၂၆

ဇီယွန်ဝါဒ (အစ္စရေး) ဆန့်ကျင်ရေး ဟက်ကာအဖွဲ့က ယူကရိန်းအား ‘အလ္လာဟ်အရှင်မြတ်၏ ရန်သူများကို အစေခံနေမှု’ ကြောင့် တိုက်ခိုက်မည့်ပစ်မှတ်အဖြစ် ကြေညာ ဆိုက်ဘာ အစ္စနဒ် ဖရန့် (Cyber Isnaad Front) အဖွဲ့က ကရုကော့ဗ်စကီး (Kryukovsky) ရထားတွဲတည်ဆောက်ရေးစက်ရုံကို ဟက်ခ်လုပ် (Hack) (စနစ်ထဲသို့ ခိုးဝင်) ပြီး ၂၅၀ တေရာဘိုက် (Terabytes) ကျော်အရွယ်အစားရှိ အချက်အလက်များ ကို ဖျက်ဆီးပစ်ခဲ့ကြောင်းပြောကြားခဲ့သည်။ ယူကရိန်း၏ ‘အရေးကြီး အခြေခံအဆောက်အအုံများ’ သည် နောက်ထပ်ပစ်မှတ်ဖြစ်ကြောင်း သတိပေးထားသည်။ NOM

မြန်မာ-တရုတ် သံတမန်ဆက်ဆံရေး ၇၆ နှစ်ပြည့် အထိမ်းအမှတ် တရုတ်ရုပ်ရှင်သီတင်းပတ်ဖွင့်ပွဲသို့ နိုင်ငံတော်သမ္မတ ဦးမင်းအောင်လှိုင်နှင့် ဇနီး ဒေါ်ကြူကြူလှတို့တက်ရောက် ဇွန် ၈၊ ၂၀၂၆ မြန်မာ-တရုတ် သံတမန်ဆက်ဆံရေး ၇၆ နှစ်ပြည့် အထိမ်းအမှတ် တရုတ်ရုပ်ရှင် သီတင်းပတ်ဖွင့်ပွဲအခမ်းအနားကို ယနေ့ နေပြည်တော်ရှိ Ocean Center ၌ ကျင်းပခဲ့ရာ နိုင်ငံတော်သမ္မတ ဦးမင်းအောင်လှိုင်နှင့် ဇနီး ဒေါ်ကြူကြူလှ တက်ရောက်ခဲ့သည်။ အခမ်းအနားတွင် နိုင်ငံတော်သမ္မတသည် တရုတ်နိုင်ငံဆိုင်ရာ သံအမတ်ကြီး Ma Jia နှင့်အတူ အမှတ်တရ လက်မှတ်ရေးထိုးခဲ့ပြီး China Media Group (CMG) ၏ မေးမြန်းမှုများကို ဖြေကြားခဲ့သည်။ ထို့နောက် တရုတ်ရုပ်ရှင်သီတင်းပတ် အထိမ်းအမှတ် ပရိုမိုဗီဒီယိုကို ကြည့်ရှုခဲ့ကြပြီး နိုင်ငံတော်သမ္မတနှင့် တရုတ်နိုင်ငံသံအမတ်ကြီးတို့က နှစ်နိုင်ငံ ယဉ်ကျေးမှုနှင့် ပြည်သူချင်းချစ်ကြည်ရင်းနှီးမှု ပိုမိုတိုးတက်စေရေးဆိုင်ရာ အမှာစကားများ ပြောကြားခဲ့ကြသည်။ ဖွင့်ပွဲအခမ်းအနားအပြီးတွင် နိုင်ငံတော်သမ္မတနှင့် တက်ရောက်လာသူများသည် တရုတ်ရုပ်ရှင်လောက၏ လူကြိုက်များသည့် "Lighting Up the Stars" ရုပ်ရှင်ဇာတ်ကားကို ကြည့်ရှုအားပေးခဲ့သည်။

အွန်လိုင်း အချစ်ရှာဖွေရေးအက်ပ် မှ သက်ကြီးပိုင်းအမျိုးသားများကို ဆေးခတ်လုယက်ခဲ့သည့် အသက် ၄၄ နှစ်အရွယ် အမျိုးသမီးတစ်ဦး ဖမ်းဆီးခံရ၊ သားကောင်ဖြစ်ရသူတစ်ဦး သေဆုံး အမေရိကန်-မက္ကဆီကို ကတ္တားနှစ်မျိုးခံယူထားသူ အိုရိုရာ ဖဲလ်ပ်စ် (Aurora Phelps) ဆိုသူ အမျိုးသမီးသည် အနည်းဆုံး အမျိုးသား ၃ ဦးကို ချဉ်းကပ်မြှူဆွယ်ခဲ့ပြီးနောက် ဆေးခတ်လုယက်ခဲ့ကြောင်း စွပ်စွဲခံထားရသည်။ သူမသည် သားကောင်ဖြစ်ရသူတစ်ဦးထံမှ အမေရိကန်ဒေါ်လာ ၅ သောင်းကျော်ကို ခိုးယူခဲ့သည့်အပြင် ထိုသူ့အသွင်ဆောင်ကာ ၎င်း၏သားဖြစ်သူထံသို့ ဖုန်းမက်ဆေ့ခ်ျများ ပေးပို့ခဲ့ကြောင်း သိရသည်။ သူမ၏ခင်ပွန်းဖြစ်သူကမူ ၎င်း၏ဇနီးတွင် ယခုကဲ့သို့ စရိုက်ဆိုးမျိုး ရှိနေလိမ့်မည်ဟု တစ်ခါမျှ မတွေးတောခဲ့ဖူးကြောင်း ပြောကြားခဲ့သည်။ သတင်းရင်းမြစ် - FBI (အမေရိကန် ဗဟိုစုံစမ်းစစ်ဆေးရေးဗျူရို) NOM

ပြည်ထောင်စုဝန်ကြီး ဦးကိုကိုလွင် ဦးဆောင်သော ကိုယ်စားလှယ်အဖွဲ့ မော်စကိုမြို့ရှိ Smart Meter ထုတ်လုပ်သည့်စက်ရုံသို့ သွားရောက်လေ့လာ ဇွန် ၇၊ ၂၀၂၆ ရုရှားဖက်ဒရေးရှင်းနိုင်ငံ၌ ရောက်ရှိနေသည့် လျှပ်စစ်နှင့်စွမ်းအင်ဝန်ကြီးဌာန ပြည်ထောင်စုဝန်ကြီး ဦးကိုကိုလွင်ဦးဆောင်သော ကိုယ်စားလှယ်အဖွဲ့သည် ယနေ့မွန်းလွဲပိုင်းတွင် ရုရှားဖက်ဒရေးရှင်းနိုင်ငံ မော်စကိုမြို့ရှိ Telematic Solution Co., Ltd. ၏ Smart Meter ထုတ်လုပ်ရေးစက်ရုံသို့ သွားရောက်လေ့လာရာ တာဝန်ရှိသူများက စက်ရုံအတွင်း ဆောင်ရွက်နေမှု လုပ်ငန်းစဉ်များအား ရှင်းလင်းပြောကြားသည်။ ရှင်းလင်းမှုများအပေါ် ပြည်ထောင်စုဝန်ကြီးက ကိုယ်ပိုင်အဆင့်မြင့်နည်းပညာသုံး တပ်ဆင်ထုတ်လုပ်ထားသည့် Smart Meter စနစ်ကို မြန်မာနိုင်ငံ၌ လက်ရှိအသုံးပြုနေသည့်စနစ်တွင် ပေါင်းစပ်အဆင့်မြှင့်တင်ရာ၌ လာရောက်ရင်းနှီးမြှုပ်နှံလိုသည့်အပေါ် ကြိုဆိုပါကြောင်းနှင့် နည်းပညာဆိုင်ရာ ပူးပေါင်းဆောင်ရွက်ခြင်းများ ပြုလုပ်လိုပါကြောင်း ပြန်လည်ဆွေးနွေးသည်။ ညနေပိုင်းတွင် ပြည်ထောင်စုဝန်ကြီးအား Inter Rao Co., Ltd. မှ တာဝန်ရှိသူများက လာရောက်တွေ့ဆုံ၍ သဘာဝဓာတ်ငွေ့သုံး လျှပ်စစ်ထုတ်လုပ်သည့် တာဘိုင်များအား စွမ်းဆောင်ရည်မြှင့်တင်နိုင်ရေးနှင့် ပြန်လည်ပြုပြင်နိုင်သည့် လုပ်ငန်းစဉ်များကို ရှင်းလင်းတင်ပြရာ ပြည်ထောင်စုဝန်ကြီးက သဘာဝဓာတ်ငွေ့လေလွင့်ဆုံးရှုံးမှုများ လျှော့ချနိုင်ရန်အတွက် တာဘိုင်များအားပြုပြင်ခြင်း၊ စွမ်းဆောင်ရည်မြှင့်တင်ခြင်း၊ နည်းပညာရရှိရေးအတွက် ပူးပေါင်းဆောင်ရွက်ခြင်းတို့ကို လာရောက်လေ့လာရန် ဖိတ်ခေါ်ခဲ့ကြောင်း သတင်းရရှိသည်။