Маркази миллии тестии назди Президенти Ҷумҳурии Тоҷикистон

Cеминарҳои омӯзишӣ барои кормандони муваққатии марказҳои имтиҳонӣ Маркази миллии тестии назди Президенти Ҷумҳурии Тоҷикистон дар доираи корҳои омодагӣ барои ташкил ва баргузории имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии ҷумҳурӣ (ИМД) дар соли 2024 семинарҳои омӯзиширо барои кормандони муваққатӣ: роҳбарони марказҳои имтиҳонӣ, ёварони роҳбарони марказҳои имтиҳонӣ, маъмурони калон, маъмурони имтиҳон ва бақайдгирандагони марказҳои имтиҳонӣ доир карда истодааст. Семинарҳои омӯзишӣ дар 34 муассисаи таълимии 20 шаҳру ноҳияи ҷумҳурӣ, ки дар онҳо барои баргузории ИМД-2024 марказҳои имтиҳонӣ, ташкил карда мешаванд, аз 10-ум то 16-уми июни соли 2024 гузаронида мешавад. Мувофиқи эълон барои иштирок дар семинарҳои омӯзишӣ 3295 нафар хоҳишманд ҳуҷҷат супорида буданд. Ҳуҷҷатҳои пешниҳодкардаи хоҳишмандонро Раёсати кадрҳо ва таъминоти ҳуқуқии Марказ баррасӣ карда маълум кард, ки ҳуҷҷатҳои 3251 нафари онҳо мувофиқи талаботи муқарраршуда пешниҳод карда шудаанд. Мувофиқати номзадон ба талаботи тахассусии муқарраршуда аз рӯйи ҳуҷҷатҳояшон аз ҷониби раёсати ташкил ва идораи имтиҳони Марказ муаян гардид. Дар натиҷа ба 2825 нафар довталаби барои кор ариза пешниҳод карда барои ширкат дар семинарҳои омӯзишӣ иҷозат дода шуд. Шунавандагони семинар аз рӯйи панҷ гурӯҳи зерини вазифаҳо тақсим карда шуданд, ки ба онҳо 60 нафар тренер (ҳамчун корманди муваққатӣ) ва 32 нафар корманди доимии Марказ дарс медиҳанд: 1) роҳбари маркази имтиҳонӣ, 2) ёвари роҳбари маркази имтиҳонӣ, 3) маъмури калони имтиҳон, 4) маъмури имтиҳон, 5) бақайдгирандаи маркази имтиҳонӣ. Ҳайати гурӯҳи корӣ пас аз ду рӯзи дарсҳои назариявию амалӣ донишу маҳорати шунавандагонро дар асоси дарсҳои омӯхтаашон арзёбӣ карданд. Баъди арзёбии донишу маҳорати шунавандагон дар асоси талаботу принсипҳои муқарраршуда аз байни онҳо 2006 нафарро тибқи вазифаҳои номбурда интихоб ва ба кори муваққатӣ дар Марказ ҷалб мекунанд. Лозим ба зикр аст, ки тибқи фармоиши вазири маориф ва илми Ҷумҳурии Тоҷикистон дар 20 шаҳру ноҳияи ҷумҳурӣ 45 маркази имтиҳонӣ ташкил карда мешавад. Фаъолияти марказҳои имтиҳонӣ аз 1-уми июл оғоз мешавад ва кормандони интихобшуда дар ин марказҳо фаъолият хоҳанд кард.

ДАВРАИ ДУЮМИ БАҚАЙДГИРӢ ВА АЗНАВБАҚАЙДГИРИИ ДОВТАЛАБОН БАРОИ ИШТИРОК ДАР ИМД-2024 Ба таваҷҷуҳи шахсони хоҳишманди иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон (ИМД) дар соли 2024, ки худро дар давраи якум (асосӣ)-и бақайдгирӣ (аз 1-уми март то 2-юми май) номнавис карда натавонистаанд, расонида мешавад, ки давраи дуюми бақайдгирии довталабон барои иштирок дар имтиҳонҳои мазкур аз 10-ум то 30‑юми июн аст. Давраи дуюми бақайдгирии довталабон барои иштирок дар ИМД-2024 дар нуқтаҳои бақайдгире, ки дар заминаи муассисаҳои таълимии шаҳрҳои Душанбе, Хуҷанд, Панҷакент, Хоруғ, Бохтар, Кӯлоб ва ноҳияҳои Данғара ва Рашт ташкил карда мешаванд, ба роҳ монда мешавад. ‼️ТАВАҶҶУҲ! Довталабоне, ки худро дар давраи дуюми бақайдгирӣ (аз 10‑ум то 30-юми июн) номнавис мекунанд ё дар давраи дуюми азнавбақайдгирӣ (аз 10-ум то 30‑юми июн) интихобҳои аввалаи худро иваз мекунанд, имтиҳонҳоро дар даври иловагӣ месупоранд. Соли ҷорӣ даври иловагии имтиҳонҳо – қисмҳои А (имтиҳон дар заминаи таҳсилоти умумӣ) ва Б (имтиҳон дар заминаи таҳсилоти умумии асосӣ) 12-уми июл дар шаҳрҳои Душанбе, Хоруғ, Хуҷанд, Панҷакент, Бохтар ва Кӯлоб баргузор карда мешавад. Аз ин лиҳоз, довталабони мазкур ҳангоми бақайдгирӣ ё азнавбақайдгирӣ барои имтиҳонсупорӣ яке аз ин чор шаҳрро интихоб карда метавонанд. Маълумоти муфассал дар сомонаи Марказ: https://www.ntc.tj/tj/hamai-khabarho/davrai-duyumi-ba-ajdgir-va-aznavba-ajdgirii-dovtalabon-baroi-ishtirok-dar-imd-2024.html

‼️ Довталаб ба маркази имтиҳонӣ дар рӯзи муқарраршуда бояд бо даъватнома, шиноснома ё ҳуҷҷати дигари тасдиқкунандаи шахсияташ бо муҳр ва сурат (барои хатмкунандагони синфи 9-ум ‒ шаҳодатномаи таваллуд ва маълумотнома бо муҳр ва сурат аз ҷойи зист) 1 соату 30 дақиқа пеш аз оғози имтиҳон ҳозир шавад. ❕Дар ҳолати дастрас нагардидани гунаи чопии даъватнома ба довталаб ва ё онро гум кардан довталаб нусхаи электронии даъватномаашро (баъди нашри он дар кабинети инфиродӣ) барои худ метавонад сабт ва чоп кунад ё бевосита ба Марказ ё яке аз бахшҳои минтақавии он муроҷиат намояд. ☎️ (+992 37) 224-53-66 ☎️ (+992 37) 224-53-67