ЖОН ВАТАН
Ҳар тонг ўпиб юзимдан, бахтдан кўйлак бичарсан,
Болам, энди қаддингни баланд тут, деб қучарсан,
Зоғлар қолсин, сен кўкда лочин бўлиб учарсан,
Ўшал сор парвозингдан айирмасин, жон Ватан!
Алпларингнинг кўкси тоғ, Барчининг беғуборим,
Эгасини қуёшга элтгучи Бойчиборим,
Юрагимда зўр чаман улғайтирган баҳорим,
Нурли кўклам, ёзингдан айирмасин, жон Ватан!
Оғзингдаги луқмингни ютмай тутган онамсан,
Бобомсан, кулгучида бахт ўйнаган боламсан,
Кўз очиб илк кўрганим, якка-ёруғ оламсан,
Алла айтган созингдан айирмасин, жон Ватан!
Отаси доно уйнинг томини баланд дерлар,
Отаси доно уйнинг номини баланд дерлар,
Қара, байроғинг тутиб бораётир не эрлар!
Отанг, ҳам устозингдан айирмасин, жон Ватан!
Толейинг кўролмаслар хордир эшикларингда,
Темурийлар улғаяр олтин бешикларингда,
Кумушнинг соф ишқи бор қалби ўт бекларингда,
Ишқу-сарафрозингдан айирмасин, жон Ватан!
Қирларингга алвон сеп ёйса қизғалдоқларинг,
Новдаларда кўпириб кўз очса бодроқларинг,
Жаннатларда борми, айт, бундай гўзал чоғларинг!
Нурли поёндозингдан айирмасин, жон Ватан!
Қуёшни ҳув далада уйғотган деҳқонимсан,
Манглайдаги томчидан юксалган хирмонимсан,
Юракнинг ҳар зарбида уриб турган жонимсан,
Берган кўп-у, озингдан айирмасин, жон Ватан!
Боланг Темур, Муқанна, боланг алпу Бек бўлур!
Қайда бўлсин, айтари тинчлик бўлур, эрк бўлур,
Бошда дўппи, белида белбоғли ўзбек бўлур!
Мардлигинг- белбоғингдан айирмасин, жон Ватан!
Қадамлари залворли, нурли карвоним менинг,
Толейи баланд юртим, кўкси осмоним менинг,
Эрк сўзин баланд айтган булбул забоним менинг,
Ўшал хуш навозингдан айирмасин, жон Ватан!
Сендан буюк суянч йўқ, кўксимни тоғ этарман,
Чорласанг бас, не десанг ортга қайтмай кетарман,
То тирикман, гардингни кўзга суриб ўтарман,
Чорлаган овозингдан айирмасин, жон Ватан!
✍️Шаҳло Ахророва
https://t.me/Shaxlo_Axrorova