Светлана Тихановская

Как безопасность Европы связана с демократической Беларусью? После начала полномасштабной войны России против Украины риторика режима стала более агрессивной, в том числе в отношении соседних стран. Рассказываем в карточках, почему поддержка демократической Беларуси становится не просто гуманитарной, но и стратегической необходимостью для безопасности Европы.

Упершыню кіраўніца Аб’яднанага Пераходнага Кабінета Святлана Ціханоўская сустрэлася з афіцыйнымі асобамі НАТА Адбылася сустрэча з генеральным сакратаром Арганізацыі Паўночнаатлантычнага дагавора Енсам Столтэнбергам. У сустрэчы таксама браў удзел Валер Кавалеўскі. Таксама ў рамках Паўночнаатлантычнай Рады Святлана Ціханоўская правяла брыфінг для пастаянных прадстаўнікоў усіх краін-удзельніц Альянсу дзеля абмену меркаваннямі па крызісе ў Беларусі і па перспектывах устанаўлення дыялогу дэмакратычнага руху Беларусі і НАТА па палітычным парадку дня. Святлана Ціханоўская, дэмакратычная лідарка, кіраўніца Кабінета: «Я радая, што гэта сустрэча адбылася, і што ў дэмакратычных сіл Беларусі завязваецца такі дыялог. У падмурак Альянсу закладзеныя блізкія для беларусаў каштоўнасці: індывідуальная свабода, правы чалавека, дэмакратыя і вяршэнства права. Я думаю, для кожнай еўрапейскай краіны неабходна выбудоўваць паважлівыя, канструктыўныя адносіны з НАТА. Гэта важна для нацыянальных інтарэсаў і падтрымання рэгіянальнай бяспекі. Мне б хацелася, каб Беларусь успрымалі як надзейнага мірнага прадказальнага партнёра». Валер Кавалеўскі, намеснік кіраўніцы, прадстаўнік па замежных справах Кабінета: «Пачатак дыялогу з НАТА стаў вынікам працы Кабінета па пашырэнні супрацоўніцтва з міжнароднымі арганізацыямі. На працягу ўжо 75 гадоў НАТА з’яўляецца найважнейшым фактарам бяспекі і стабільнасці ў Еўропе. Мы абавязаныя інфармаваць міжнародную супольнасць пра выклікі для нашай краіны». @CabinetBelarus

Франак Вячорка: «Праблемы ўзнікаюць не таму што Еўрасаюз кепскі, а таму што рэжым робіць усё, каб такія праблемы ўзнікалі» Галоўны дарадца Святланы Ціханоўскай Франак Вячорка ў рамках шоу «Мне тоже не нравится» ацаніў абмежаваную мабільнасць людзей унутры краіны і растлумачыў, што робяць дэмакратычныя сілы, каб яе пазбегнуць. Што важнага адзначыў Вячорка: 📌 «Мы прабіваем кампанію «Мільён шэнгенскіх візаў для беларусаў у год» як стандарт. Гэта ўзровень, які быў да вайны і рэвалюцыі. Зараз выглядае нерэалістычна, але трэба да гэтага імкнуцца». 📌 «Вельмі важныя студэнцкія візы. Летась лічба студэнтаў, якія паехалі ў Расію была большая, чым у Еўрасаюз. Гэта кепская тэндэнцыя, таму што праз пяць гадоў у іх будуць расійскія кантакты, сувязі, мысленне. Чым менш кантактаў з Еўропай, тым больш – з Расіяй». 📌 «Трэба, каб беларусы зразумелі, адкуль узнікаюць дыскамфорт і праблемы. Яны ўзнікаюць не таму што Еўрасаюз кепскі, а таму што рэжым Лукашэнкі робіць усё, каб такія праблемы ўзнікалі». 📌 «Беларусы, якія выехалі, павінны праяўляць сябе, паказваць падтрымку Украіне, выходзіць у грамадскасць. Для замежных палітыкаў гэта мае значэнне, калі нас мала відаць. Вялікая адказнасць на нас, на тых, хто ў выгнанні, на беларускіх дыяспарах: быць больш заўважнымі, больш працаваць з палітыкамі». 📌 «Як толькі мы перастанем рабіць міжнародную дзейнасць, нас вельмі хутка запішуць у адзін кошык з расіянамі».

Ушанаванне Дуж-Душэўскага, дыскусія са студэнтамі Універсітэта Вітаўта Вялікага. Святлана Ціханоўская – у Коўне Беларуская лідарка прыехала ў Коўна ўпершыню. На Пятрашунскіх могілках Ціханоўская наведала магілу Клаўдзія Дуж-Душэўскага – выбітнага беларускага дзеяча, вядомага як аўтар нацыянальнага бела-чырвона-белага сцяга. Таксама ён вёў актыўную філалагічную, журналісцкую і літаратурную працу. У прыватнасці, разам з Вацлавам Ластоўскім выдаваў часопіс «Крывіч», стварыў мноства якасных перакладаў падручнікаў па батаніцы, матэматыцы, гісторыі для беларускамоўных школ. Акрамя таго, Дуж-Душэўскі быў дыпламатычным прадстаўніком Рады БНР у дзяржавах Балтыі. Святлана Ціханоўская ўшанавала памяць выбітнага беларуса ўскладаннем кветак на яго магілу. Таксама беларуская лідарка выступіла ў Ковенскім універсітэце імя Вітаўта Вялікага з лекцыяй і адказала на пытанні студэнтаў – з Літвы, Беларусі, Украіны, Іспаніі, Францыі, Албаніі ды іншых краінаў. Дыскусія доўжылася дзве гадзіны і была прысвечаная пытанням бяспекі, вызвалення палітвязняў, выдачы праязных дакументаў для беларусаў.

Святлана Ціханоўская: «Рэжым больш не генеруе новых ідэй і не здольны прапанаваць людзям нічога, акрамя рэпрэсій і вайны» Святлана Ціханоўская дала адкрытую лекцыю ў Ковенскім універсітэце імя Вітаўта Вялікага. Лідарка прысвяціла выступ ролі дэмакратычнай Беларусі ў бяспецы Усходняй Еўропы. Праз прызму таго, што адбываецца ў нашай краіне, яна разгледзела палітычныя і эканамічныя фактары, якія адбіваюцца на стабільнасці ў рэгіёне. Вось самыя яркія цытаты з лекцыі Святланы Ціханоўскай: 📌 «Можа падавацца, што рэжым у Беларусі кансалідаваны і моцны. Але гэта не так. Нават тыя, хто працуюць на дыктатара, разумеюць: Лукашэнка – гэта тупік, і яго палітыка вядзе ў нікуды. Многія з гэтых людзей не жадаюць падзяляць адказнасць за злачынствы рэжыму». 📌 «Рэжым больш не генеруе новых ідэй і не здольны прапанаваць людзям нічога, акрамя рэпрэсій і вайны. Нават прыхільнікі дыктатара пачалі бачыць вялізны кантраст паміж тым, што ён кажа, і рэальнасцю, у якой яны жывуць. Вы спытаеце, чаму ж тады яны не робяць ніякіх дзеянняў? Думаю, гэта страх. Рэпрэсіі, можа, і не прымушаюць вас любіць рэжым, але яны паралізуюць любую дзейнасць і свядомасць людзей». 📌 «Калі чую, што беларускія жаўнеры не ўступілі ў баявыя дзеі дзякуючы агрэсару, то вельмі раздражняюся. Гэта адбылося толькі таму, што беларусы занялі актыўную антываенную пазіцыю. Дыктатар разумее: калі ён аддасць такі загад, то адразу настроіць людзей супраць рэжыму».

У Празе пройдзе Кангрэс па палітычных вязнях Беларусі З нагоды Міжнароднага дня салідарнасці з беларускімі палітвязнямі Офіс дэмакратычных сілаў Беларусі ў Празе, разам з беларускімі праваабаронцамі, актывістамі і структурамі дэмакратычных сілаў, правядзе Кангрэс па палітычных вязнях. Мерапрыемства пройдзе 23-25 траўня ў Празе. Экспертна-палітычны кангрэс сфакусіруецца на сітуацыі вакол палітзняволеных – як тых, хто знаходзіцца ў Беларусі, так і тых, хто пасля зняволення апынуўся за мяжой. Удзельнікі абмяркуюць шляхі вызвалення палітзняволеных і пашырэння падтрымкі рэпрэсаваных. Святлана Ціханоўская: «Кожны дзень у зняволенні – гэта яшчэ адзін дзень, які палітвязні аддаюць за вольную Беларусь. Кожны дзень палітвязняў за кратамі павінен быць днём нашага змагання за іх свабоду. Кангрэс у Празе – магчымасць сабраць ідэі, прапановы і высілкі, каб выпрацаваць напрамкі працы менавіта для гэтай мэты – вызвалення палітвязняў». Па пытаннях удзелу ў Кангрэсе пішыце на адрас [email protected].

«Наша моц – у святле і веры, якую мы нясём праз цемру, нягледзячы ні на што». Святлана Ціханоўская віншуе беларусаў з Вялікаднем Святлана Ціханоўская: «Вялікдзень – гэта свята, якое мы звычайна праводзім у коле сям’і. Чакаем сваякоў у госці, гуляем у біткі, едзем у свае вёскі да бабуль і дзядуляў – есці самыя смачныя ва ўсім свеце паскі. Але многія беларусы не могуць быць побач з роднымі ў гэты дзень. Нявінныя людзі сядзяць у турмах, церпяць пераслед і катаванні. Сотні тысячаў беларусаў вымушаныя жыць у розных краінах – без магчымасці вярнуцца дадому, каб абняць родных на Вялікдзень. Мы з вамі праходзім праз час выпрабаванняў. Давайце не забываць, што Ісус Хрыстос таксама цярпеў за праўду. Наш моц – у святле і веры, якую мы нясём праз цемру нягледзячы ні на што. У падтрымцы, якую даем тым, каму цяжка. Наша моц – дабрыня і спагадлівасць, і ніхто і ніколі не зможа іх у нас адняць. Хрыстос Уваскрос! Сапраўды Уваскрос!»

Падтрымка дэмакратычных сілаў на міжнароднай арэне і стварэнне групы «За дэмакратычную Беларусь»: што Ціханоўская абмеркавала з кіраўніцтвам Мальты? Падчас працоўнага візіту на Мальту беларуская лідарка падпісала дамову аб супрацоўніцтве з прэзідэнткай Еўрапейскага Парламента Рабертай Метсолай, а таксама сустрэлася з шэрагам ключавых палітыкаў дзяржавы. Аб чым ішла гаворка на сустрэчах? ⚪️ З прэзідэнткай Мальты Мірыям Спітэры Дэбона лідарка абмеркавала супрацоўніцтва як на палітычным узроўні, так і на ўзроўні грамадзянскай супольнасці і Парламента. Акрамя таго, Ціханоўская заклікала прэзідэнтку падтрымаць Міжнародны гуманітарны фонд у падтрымку беларускіх палітвязняў, пра стварэнне якога было абвешчана ў Нарвегіі. 🔴 Сёлета Мальта старшынюе ў АБСЕ, і Святлана Ціханоўская прапанавала міністру замежных справаў Яну Боргу прызначыць спецыяльнага прадстаўніка АБСЕ па Беларусі, а таксама ўзняць беларускае пытанне на міністэрскай канферэнцыі. Борг падкрэсліў: Мальта гатова падтрымліваць ініцыятывы дэмакратычных сілаў на міжнароднай арэне. ⚪️ Са спікерам мальтыйскага Парламента Анджэла Фаруджа лідарка абмеркавала стварэнне парламенцкай групы «За дэмакратычную Беларусь» і падтрымку беларускіх ініцыятываў у парламенцкіх асамблеях міжнародных арганізацыяў. Таксама Ціханоўская заклікала спікера правесці слуханні ў Парламенце і прыняць рэзалюцыю па Беларусі. Спікер адзначыў: у Парламенце няма ніводнага дэпутата, які б падтрымліваў рэжым Лукашэнкі. Падрабязней пра сустрэчы чытайце па спасылцы.

Раберта Метсола і Святлана Ціханоўская падпісалі дамову аб супрацоўніцтве паміж Еўрапарламентам і дэмакратычнымі сіламі Беларусі Падчас працоўнага візіту на Мальту Святлана Ціханоўская і прэзідэнтка Еўрапейскага Парламента Раберта Метсола падпісалі дамову аб супрацоўніцтве паміж Еўрапарламентам і беларускімі дэмакратычнымі сіламі. Еўрапейскі Парламент упершыню падпісаў дакумент такога кшталту не з афіцыйным урадам. Дамова дэкларуе дамоўленасць пра наступныя супольныя мэты і напрамкі супрацоўніцтва: 📍Развіццё ўмоваў для ажыццяўлення дэмакратычнага транзіту ў Беларусі, у тым ліку праз аказанне дапамогі дэмакратычным сілам і актывістам грамадзянскай супольнасці, праваабаронцам, незалежным СМІ і прафсаюзам Беларусі ў межах праграмы EU4Belarus і праз нарошчванне адукацыйных ініцыятываў і магчымасцяў; 📍Садзейнічанне змякчэнню міграцыйных праблемаў для беларусаў за мяжой; 📍Прыцягненне да адказнасці ў рамках міжнародных механізмаў прадстаўнікоў рэжыму і асобаў, адказных за парушэнні правоў чалавека і злачынствы супраць чалавечнасці ў Беларусі, а таксама за саўдзел у вайсковых злачынствах супраць Украіны; 📍Забеспячэнне вызвалення палітвязняў у Беларусі; 📍Маніторынг унутранай сітуацыі ў Беларусі, у прыватнасці парушэнняў правоў журналістаў, праваабаронцаў, актывістаў, НДА, рэпрэсаваных. Таксама гэта датычыцца спробаў рэжыму легітымізаваць сябе праз фіктыўныя выбары і ўдзел у агрэсіі супраць Украіны; 📍Маніторынг выканання правоў і свабодаў беларусаў за мяжой.

«Рэжым старанна знішчае «чацвёртую ўладу» – бо першыя тры ён ужо падпарадкаваў сабе»: Святлана Ціханоўская – да дня свабоды прэсы Святлана Ціханоўская: «Нядаўна я прачытала аб тым, што жыхары Мазыра і Петрыкава скардзяцца на неадрамантаваныя дарогі. А ў Жлобіне – на ямы каля дзіцячых садкоў. І хоць мы не заўсёды заўважаем навіны з рэгіёнаў, асвятленне праблемаў важнае для тых, хто сутыкаецца з абыякавасцю мясцовых уладаў. Калі структуры адмахваюцца ад зваротаў людзей, то СМІ і журналісты – адзіны спосаб прыцягнуць увагу да праблемы. Менавіта таму рэжым старанна знішчае «чацвёртую ўладу» – бо першыя тры ён ужо падпарадкаваў сабе. Сёння – Сусветны дзень свабоды прэсы. І гэтай свабоды ў Беларусі няма. У краіне больш за тры дзясяткі журналістаў-палітвязняў: Ларыса Шчыракова, Ігар Лосік, Марына Золатава, Кацярына Андрэева і іншыя незалежныя журналісты незаконна знаходзяцца ў турме за тое, што сумленна і непрадузята выконвалі сваю працу. Дарагія журналісты! Дзякуй, што нягледзячы на складанасці, з якімі беларускія СМІ сутыкаліся гэтыя гады, вы працягваеце гаварыць праўду. Калі на экранах у Беларусі амаль увесь эфірны час займае павестка рэжыму, вы даяце людзям магчымасць бачыць падзеі без хлусні і маніпуляцыяў. Дзякуючы вам беларусы і беларускі не засталіся сам-насам з прапагандай. Пакуль рэжым усталёўвае цэнзуру, яны працягваюць чытаць незалежныя медыя. У барацьбе за свабоду слова і дэмакратычныя каштоўнасці, журналістыка – адзін з найважнейшых інстытутаў. І мы павінныя яго зберагчы. Чытайце і падтрымлівайце нашыя СМІ, калі гэта бяспечна. Дзяліцеся цікавымі матэрыяламі і медыяпраектамі, прынамсі калі вы за мяжой. Бо рэжым не мае права ўказваць, як думаць беларусам!»