Coram Deo✨

በዚህ ላይ በየትኛውም መንገድ ትርፍ ማግኘትን ግብ ያደረጉ የምርምር ማዕከላትና መድኀኒት አምራቾች የችግሩ ዘዋሪዎች ናቸው። ለምሳሌ ዐቅመ አዳም/ሔዋን የመድረሻ ምልክት የሆነውን የጉርምስና/ወጣትነት የተፈጥሮ ሂደት የሚገድብ መድኀኒት (puberty blocker) በማምረት የሚታወቀውና የመድኀኒቱን ጐጂ ጐን ሁን ብሎ በመሸሸግ ክስ ላይ ያለው አብቪይ AbbVie፣ ከአንድ ዓይነት ምርቱ ብቻ የ2018 ትርፉ 726 ሚሊዮን ዶላር ነበር። የመሰዊያው መርከስና የአፍሪካ ፈተና የምዕራቡ ክርስትና በብዙ የሞራል ዝቅጠት ውስጥ በተዘፈቀ፣ አምላክ የለሽና እውነትን አንጻራዊ ባደረገ የልቅ ባህል ተጽእኖ ሥር ወድቋል። እንደምናስተውለው ነውር የሆነው እንደ “ኩራት” በአደባባይ በሕጋዊ ፈቃድ ይከበራል፣ ክብር የሆነው “እንደ ነውር” በሕግ ተከልክሎ ይሰደዳል። ይህ ወር በምዕራቡ ዓለም የግብረሰዶም “የኩራት ወር” መሆኑንን ልብ ይሏል! ውደቀቱ የጀመረው ቤተ ክርስቲያን ከዓለም ጋር ወዳጅነት በጀመረች ጊዜ ነው። ቤተ መቅድሱ ሲረክስ፣ የዓለም ጠረን የበለጠ ይሸታል። ለአፍሪካ አገራት ትልቅ የፈተና ጊዜ ነው። በአንድ ጊዜ ርዳታ ፈላጊና የርዳታውን ውል ተደራዳሪ ልንሆን አንችልም። ፈርጀ ብዙ ስብራቶችና አስከፊ የድኽነት ዑደት ለሚያውካት አገራችን ትልቅ እንድምታ አለው። ልቅ ነገረ መለኮት የሚዘውረው የምዕራቡ ዓለም ክርስትናም “በትብብር” ሰበብ ሰይጣናዊውን የጾታ ርእዮተ ዓለም ይዞ ወደ አገራችን መግባት ጀምሯል። የውርጃም ግፊት እንዲሁ ነው። በምድረ አሜሪካ 27% ወንጌላዊው ክርስትና፣ 64% ልዝቡ ፕሮቴስታንት እንዲሁም 59% ካቶሊካዊ ክርስትና ውርጃን ያለገደብ ይደግፋል (Pew Research Center, Public Opinion on Abortion, May 13, 2024)። ባለፈው ዓመት ከ አንድ ሚሊዮን በላይ ውርጃ ተደርጓል። በ2020 ከነበረው 21% ጨምሯል። ለምዕራቡ ክርስትና ተሐድሶ ሊገደንና ልንጸልይ ይገባል። ኾኖም መጽሐፍ ቅዱሳዊ መሠረታችንን እያፈረሰን አይደለም። ይህ መንገድ ለጊዜው ገንዝብ ያስገኝልን ይኾናል። የጨለማው ኀይል ግቡ የወንጌልን እውነት ከእጃችን ማስጣልና ትውልድ አጥፊን መሠዊያ መሥራት እንደኾነ ልብ ልንል ይገባል። በእግዚአብሔርና በታሪክ ዘንድ ተጠያቂዎች ነን። ቅዱስ ቃሉ እንደሚለው የሰው የማይገሠሥ ክቡርነት በእግዚአብሔር አምሳያ መፈጥሩ ነው። “ወንድና ሴት አድርጐ ፈጠራቸው፤” (ዘፍ 1፥27)። ወንድና ሴት እኩል ናቸው፤ አንድ ዐይነት ወይም ተለዋዋጭ ግን አይደሉም። የማኅበረ ሰብ መሠረት ቤተ ሰብ ነው፤ የቤተ ሰብ መሠረት “የወንድና የሴት” እኩልነትና ጾታዊ ልዩነት ነው። ይህ ዘላለማዊ እውነት የቤተ ሰብና የአገር ምሶሶ ነው። ይህን እውነት የሚያፈርስና የቤተሰብን፣ የማኅበረ ሰብንና የአገርን መሠረት የሚያናጋ ዕቅድ ወደ አገራችን እየመጣ ነው። እናስተውል፤ እንንቃ! ድኽነትን በጋራና በትጋት እየተዋጋን ፈሪሓ-እግዚአብሔር ያለው ትውልድ ማትረፍ ይሻለናል። እንደ እውነቱ ከሆነ በቋሚ የውጭ ድጐማ የተለወጠ አገር የለም። በርዳታና በሰብአዊ መብት ሽፋን በአገራችን ላይ ያኮበኮበውን የምዕራቡን ዓለም የግብረ ሰዶም አጀንዳ ቸል ልንል አንችልም። በዘረኝነት፣ በክፍፍል፣ በሐሰት አስተምህሮና በዓለማዊነት ቀውስ ላይ፣ ልጆቻችንን ሊበላ በውጪ ያለው የሞራል ልቅነት አውሬ ተጨምሮበት ምን ይተርፈናል? ልብ እንበል። ልዑል እግዚአብሔር ትውልዳችንን ያስብ፤ ልጆቻችንንም በምሕረቱ ይከልል! አሜን! ወንድም ግርማ በቀለ (ዶ/ር)