Ethiopian Press Agency/ Afaan Oromoo/

Invastaroota paarkiilee indutiriitti argaman keessaa %55 abbootii qabeenyaa biyya keessaati ******************* Gaazexaa Bariisaa Invastaroota 131 paarkiiwwan indastirii keessa jiran keessaa % 55 abbootii qabeenyaa biyya keessaa ta’uu Korporeeshiniin Paarkii Indastirii Itoophiyaa beeksise. Hojiraawwachiisaan Olaanaa korporeeshinichaa Obbo Akliiluu Taaddasaa, carraa addaa korporeeshinichi invastaroota biyya keessaaf qopheesse ilaalchisee invastaroota biyya keessaaf ibsa kennaaniiru. Ibsasaaniin, waggoota lama dura hirmaannaan invastaroota biyya keessaa paarkii indastirii keessatti gadaanaa ture jedhan. Kunis qooda waliigalaa invastaroota biyya keessaa paarkiiwwan keessatti qaban keessaa %10 ta’a ture jedhan. Amma garuu hirmaannaan invastaroota biyya keessaa % 55 ta'aniiru jedhanii, kanaaf mootummaan waan hedduu hojjeteera, fooyya'iinsa addaddaa taasifamuus dubbataniiru.

Oromiyaatti qormaanni ga’umsa ogummaa barsiistota kennamaa jira ****************** Gaazexaa Bariisaa Naannoo Oromiyaatti qormaanni ga’umsa ogummaa barsiisummaa, barsiistota kuma 33 oliif kennamaa jira. Barsiisotaafi hoggansi manneen barnootaa sadarkaa dippiloomaa kuma 24fi 703 sadarkaa digirii kuma saddeetiifi 816, waliigalaan barsiisota kuma 33fi 519f madaallii gahumsa ogummaa kanaaf galmaa’uun eerameera. Haaluma kanaan har’a barsiisota kuma 33fi 519f qormaatichi kennamaa jiraachuu odeeffannoon biiricharraa argame ni mul’isa. Qormaatichi buufataalee qormaataa 192tti kennamaa jiraachuu Biiroon Barnootaa Oromiyaa beeksiseera.

Qamadii jallisiirraa omishni kuntaala miliyoona 106 ol argame ***************** Gaazexaa Bariisaa Bara omisha 2016 qamadii jallisiin omishni kuntaala miliyoona 106 argamuu Ministeerri Qonnaa beeksise. Hojiraawwachiisaan Garee Misooma Midhaanii ministeerichaa Obbo Issaayyas Lammaa DhPItti akka himanitti, bara omisha bara 2016tti lafa heektaara miliyoona 3.2 qamadii jallisiin misoomsuuf karoorfamee, lafa heektaara miliyoona lama. Kuma 978 fi 122 sanyiin uwwisuun danda’ameera. Kanaanis bara omisha baranaatti lafa sanyiin uwwifame keessaa lafa heektaara miliyoona lama, kuma 199fi 402 karaa aadaa, akkasumas kuma 741fi 304 kombaayinaraan walitti qabuun omisha kuntaala miliyoona 106fi kuma 856 argameera jedhan. Akka Obbo Issaayyas akka ibsanitti, qamadiin jallisii naannolee Amaaraa, Sidaamaa, Itoophiyaa Kibbaa, Itoophiyaa Giddugalaa, Kibba Lixaa, Affaar. Gaambeellaa, Somaaleefi Beenishaangul Gumuziitti bal’inaan omishameera.

Tajaajilichi aangoosaa malee qajeelfama tilmaama adabbii qopheessuun maallaqa walittiqabaa ture ********** Gaazexaa Bariisaa Tajaajilli Immigireeshiniifi lammummaa aangoosaa malee qajeelfama tilmaama adabbii qopheessuun namoota guyyaa beellamasaanii dabarsanirraa maallaqa walitti qabaa turuu Odiitarri Olaanaan Federaalaa saaxile. Qajeelfamichis daarektara olaanaatii ragga’uusaafi kanaanis qarshiin miliyoona 18 walitti qabamuun ibsameera. Kana malees tajaajilichi dhaabbata dhuunfaa eeyyama daldalaa hinqabneefi gibira hinkanfalle waliin hojjechaa turuu odiitarichi mirkaneesseera. Manni Maree Bakka Bu’oota Ummataa walgahii 32ffaa bara hojii sadaffaa taa’een Odiitara Olaanaa Federaalaa gabaasa odiitii bara 2015 odootii seerummaa faayinaansii raawwii waajjiraalee mootummaa federaalaa dhaggeeffateera. Gabaasicha kan dhiyeessan Odiitarri Olaantuun Aadde Masarat Daamxoo, tajaajilichi aangoosaa malee qajeelfama tilmaama adabbii qopheessuuniifi daarektara olaanaatiin raggaasisuun namoota guyyaa beellamasaanii dabarsanirraa maallaqa walitti qabaa turuu ibsaniiru. Dabalataanis herrega baankii mootummaa banuufi cufuun aangoo Ministeera Maallaqaa ta’ee otoo jiruu, Baankii Daldala Itoophiyaatti maqaa namoota dhuunfaatiin herrega banuun galii walittiqabaa turuu dubbataniiru. Guutummaa oduu kanaaf liinkii kana cuqaasaa https://press.et/?p=130219

"Tajaajilli tola ooltummaa humna ida’ameen, beekumsaafi dandeettiidhaan adeemsa biyya ijaaruudha" -Obbo Tamasgeen Xurunaa ********************* Gaazexaa Bariisaa Tajaajilli tola ooltummaa humna ida’ameen, beekumsaafi dandeettiidhaan adeemsa biyya ijaaruu akka ta’e Ministirri Muummee Ittaanaa Tamasgeen Xurunaa ibsan. Waltajjiin sosochii jalqabsiisa tola ooltummaa gannaa biyyaalessaa bara 2016 eegalchiisameera. Saganticharratti Ministirri Muummee Ittaanaa Tamasgeen Xurunaa, Sadarkaa Ministirri Muummee Ittaanaatti Hogganaa Wiirtuu Qindeessa Sirna Dimokiraasii Adam Faraah, Ministira Dhimma Dubartootaafi Hawaasummaa Doktar Ergoogee Tasfaayee, Ministira Barnootaa Piroofeessar Biraanuu Naggaa, hoggantoota hojii olaanaafi kanneen biroon argamaniiru. Wa;tajjicharratti Ministirri Muummee Ittaanaa Tamasgeen Xurunaa tajaajilli tola ooltummaa humna ida’ameen, beekumsaafi dandeettiidhaan adeemsa biyya ijaaruudha jedhan. Kanaan dura tajaajila tola ooltummaatiin rakkooleen hawaasaa baay’een hiikameera jedhanii, ganna baranaatiinis miliyoononni deeggaramu jedhan.

Taltalleetti dubartiin tokko altokkotti daa'imman afur deesse ** Gaazexaa Bariisaa Godina Booranaa hospitaala sadarkaa jalqabaa Taltalleetti dubartiin tokko daa'imman afur nagumaan oofkalte. Dubartiin Bokkayoo Dullachaa jedhamtu tun jiraattuu Aanaa Taltallee, Ganda Hadhooti. Dubartiin tun hospitaalichumatti hordoffii taasisaa turtee kaleessa ganama tajaajila baqaqsanii wal'aanuutiin altokkotti daa'imman afur (dhiira lamaafi dubra lama) deesse. Hojii gaggeessaan hospitaallichaa Obbo Soraa Sharee dubartiin tun kanaan dura daa'imman shan qabaachuu himan. Fayyaan haadhaafi daa'imman kanneeniis yeroo ammaa haala gaariirra jiraachuu ibsaniiru. Kominikeeshinii aanichaarraa odeeffanne.

“Sosochiin maaddii guutuun eegalame manii biyyaalessaa nyaataan ofdanda’uufi hiyyummaa hir’isuu kan milkeessuudha” - Obbo Tamasgeen Xurunaa *********** Gaazexaa Bariisaa Sagantaa maaddii guutuutii bu’aaleen naannawichatti galmaa’e manii biyyaalessaa nyaataan ofdanda’uufi hiyyummaa hir’isuu kan milkeessu ta’uu Ministirri Muummee Ittaanaan Obbo Tamasgeen Xurunaa ibsan. Pirezdaantiin Naannoo Beenishaangul Gumuz Obbo Ashaadilii Hasan gamasaaniin, naannichi maaddii guutuu dabalatee damee qonnaan gara fuulduraatti imalaa jira jedhan. Obbo Tamasgeen hojiilee misoomaa keessumaa sagantaalee maaddii guutuufi ashaaraa magariisaatiin hojjetaman daawwataniiru.

Tigraayitti barattoonni kuma 122 ol qormaata kutaa 8ffaa fudhachaa jiru *************** Gaazexaa Bariisaa Naannoo Tigraayitti barattoonni kuma 122 ol qormaata naannoo kutaa 8ffaa fudhachaa jiru Daarektarri Ejensii Mirkaneessa Qulqullina Barnootaa Bulchiinsa yeroo naannichaa Doktar Taaddasaa Kaahisaay TOItti akka himanitti, har’a qormaanni naannoo kutaa 8ffaa naannichatti kennamaa jira. Qormaatichi har’a dabalatee guyyoota sadan ittaananiif kan kennamu ta’a jedhan. Qoramtoota qormaatichaa keessaa barattoonni kuma 62fi 732 dubartoota yoota’an, barattoonni hundinuu karaa tasgbbii qabuun qormaaticha fudhachaa akka jiran ibsaniiru.