Pathophysiology

Քանի դեռ ամառային դպրոցը մոտենում է ավարտին, այստեղ ուզում էի անդրադառնալ սիրելի ամսագրին՝ NEJM-ին։ Իմ ամենասպասված ու սիրելի հոդվածները իհարկե եղել են ակնարկների (Review Article) ծորագրի ներքո։ Դրանցից շատերում պատկերված մեխանիզմները հետո հայտնվել են լավագույն դասագրքերում, մի մասը նաև մեր նյութերում։ Իհարկե նաև սիրելիներից են քեյսերը՝ ինչպես ինտերակտիվ, այնպես էլ դասական։ Դրանց մի մասին էլ հաճախ օգտագործում ենք մեր քննարկումներում։ Օրիգինալ հետազոտությունները (Original Articles) իհարկե NEJM-ի կարևորագույն բլոկն են ձևավորում, դրանց կարճ Quick take-երը զգալի հեշտացնում են արագ ընկալումը, նաև սովորեցնում՝ ինչպես արագ ու կարճ ներկայացնել հետազոտությունը։ Դրանցից շատ ենք օգտվում Հետազոտության հիմունքներ դասընթացում։ Ինչևէ, իմ կողմից երկար անտեսվում էր հեռանկարների (Perspective) էսսեների ռուբրիկը, սակայն այժմ դրանց մեծ մասը ևս շատ եմ հավանում։ Փորձեք օրինակ կարդալ այսօրվա համարում լույս տեսած էսսեն՝ Ջեյմս Ռոզենբաումի Last Man Running-ը։ Կարևոր խնդիրներ, մտորումներ, տարակուսանքներ, լուծումներ ու շատ, շատ գեղեցիկ լեզու։ Այդ թվում վազավագալ սինկոպեի էթիոլոգիա, կողմնային ամիոտրոֆիկ սկլերոզի դրաման, սիրտթոքային վերակենդանացման ժամանակ կողոսկրերի կոտրվածքը, երեք հրացանակիրների կերպարը, զուսպ հումորը։ Օրինակ, եթե անգլերենը ուզում եք բարելավել՝ հիանալի ընթերցանության համար։ Պետք է մեր օտար լեզուների ամբիոնին հորդորեմ-խնդրեմ օգտվեն։ Ի միջի այլոց, չեք պատկերացնում ինչքան բախտավոր ենք, որ առայժմ անվճար է NEJM-ը մեզ համար (Հայաստանում բնակվողների համար)։ Ու դա միայն մեր երկրի "աղքատությունից" չէ։ Եվրոպայում լրիվ վճարովի լինելը գիտեի, բայց օրինակ Շրի Լանկայում ևս վճարովի է։ Չեմ զարմանա, որ պարզվի մեզ համար դա մի հրաշալի ամերիկահայ է անում (Եթե իրական պատճառը գիտեք, ասեք իմանամ)։ Եթե մեր երազանքը իրականանա ու հայկական լավ հանդես/ամսագիր ստեղծենք, անպայման այսպիսի խորագիր կունենանք՝ էսսեների, տեսլականների, հեռանկարների համար։ Մեր ամսագիրն էլ կարող է կոչվել Հին Հայկական Բժշկական Հանդես 🤭