الدعم النفسي | نحنا معاك🤍.

🪄أو ممكن السبب تفكيرنا نفسو يعني اول ما زول يقول ليك اسمع بتاع التنميه البشريه دا تقول ليهو عليك الله اسكت ديل بتكلمو ساي أو انت نفسك ما اخترت انك تتأثر بيهم يعني حصل بحثت عن فيديو تحفيزي في التيك توك وما اتاثرت بيهو؟ في الغالب حتكون اتاثرت بيهو ليه؟ لانك الفتشتو لانك انت عاوز تتحفز ف لو لقيت صورة ساي مكتوب فيها أسعى عادي تقوم على حيلك وتقول ايوا انا حسعى 🔥 انا حكمل سعي 🔥 انا ححكم العالم انا لازم اجتهد بس لو لقيت نفس الصورة دي وانت بتتصفح الفيس حتقول طيب حسعى وحتكمل تصفح ف رغبتنا في التحفيز هي برضو بتساعدنا نتحفز وحتى لو لفترة مؤقته يعني مثلا عايز تتحفز الفترة دي لانو عندك امتحانات عشان كدا أول ما الامتحانات تنتهي لو لاقاك فيديو تحفيزي ما حتشتغل بيهو 🪄وممكن من الأسباب برضو الايجابيه انك تفكر بإيجابية وصدر رحب💕 يعني اي كلام إيجابي ومحفز حتتقبلو لو دخلت التيك توك ولقيت فيديوهين الاول عن الاجتهاد والسعي وتحقيق الاحلام و التاني عن خسارة النفس والأحلام البعيدة والظروف الصعبة انت ك بني ادم إيجابي وقت تشوف الفيديو التاني حتقول عليك الله الدنيا صباح ما ناقصين ما تسدو لينا نفسنا أو تقول ما تفتحو لينا جروح ما بتتقفل وحترجعو للفيديو الاول ليه؟ لانك زول ايجابي وعايز تفكر ب ايجابيه ف احنا ما بنتأثر بفيديوهات التحفيز ليه : 1/لانو احنا مرات ما بنكون جاهزين للتحفيز 2/أو لانو بنسمع الكلام قبل ما نعيش معناه 3/أوالسلبية طاغية علينا ف رايكم شنو المره دي تشوفو التحفيز بطريقه تانيه؟ بطريقه اكتر فعاليه رايكم شنو تخشو التيك توك أو اليوتيوب وتكتبو فيديوهات تحفيزية واكتبو بدون اغاني عشان اكون بريئه من الذنب دا واول فيديو يظهر ليكم شوفوهو بعين تانيه بعين جديده عين مليانه إيجابية ورغبة في التحفيز💗 حتى لو ما عشتو المعنى حاولو أشعرو بيهو

📌ليه ما بتستفيدو من فيديوهات التحفيز ؟؟ حصل سألتو نفسكم ليه الكلام المحفز وكلام ناس التنميه البشريه ما بأثر فينا؟ انا طبعا منكم وفيكم يخوانا كان عندنا حصه اجتماعيات في المدرسه كنا بنقول ليها حصه نفسيات إن شاء الله الاستاذه تعفي لينا بس ليه الكلام بتاع تخيل انك اسد ستصبح اسد ما بجيب معاك نتيجه؟ حتى في زول من شده ما الكلام دا باقي ليهو بايخ ومسيخ قال ما حتصبح اسد ولا شيء حتصبح زول مغمض عيونو ما حاجه تانيه🤣🤣 هل المشكلة فينا؟ ولا في الفيديوهات نفسها؟ ولا الناس البتكلمو في الفيديوهات ؟ ولا رغبتنا احنا في انو نتأثر بالحاجه دي؟ انتو عارفين الموضوع دا جا في بالي كيف؟ تخيلو سمعت لي فيديو تحفيزي كنت بسمعو قبل الحرب تخيلو وانا بسمع استوعبت اني يادوب فهمت هو بقول في شنو اي تخيلو بعد 3 سنين يادوب استوعبت كلامو سالت نفسي ليه ما فهمت الكلام بالطريقة دي وقت كنت ممتحنه؟ ليه هسي الطريقه اتغيرت؟ هل زمان ما كانت عندي تجارب وهسي عندي عشان كدا فهمتو؟ واكتشفت انو سبحان الله طريقه تفكيرك ونظرتك للأمور وبرضو تجاربك بتحدد فهمك الفيديو عبارة عن دكتور مصري بقول اوعك تستسلم وانت قربت من النهاية اوعك تستسلم وانت في نص السنه اوعك تستسلم لانو الجاي ممكن تغير فيه اوعك تستسلم لانو عندك فرصه انك تلم الفات اوعك تستسلم بعد كل التعب دا ما هو ما ممكن تستسلم بعد كل تعبك واجتهادك وسعيك ف انت لو استسلمت مع حتزعل على نتيجتك حتزعل على انك ما بذلت كل جهدك وطاقتك ونفس الدكتور بقول في فيديو تاني وهو بشرح انو عيان وتعبان وبالرغم من دا قاعد يشرح ليه ؟ لانو عندو مسؤولية لانو عندو اسمو لانو عندو حلم لانو ما دايما حتعمل اي شيء في الدنيا دي وانت مرتاح طبعا وانا بكتب ليكم في معنى الفيديو مستغربه انا ليه ما فهمتو بالطريقه دي الزمن داك؟ انتو عارفين ليه؟ لاني جربت بس دا الجواب 🪄التجارب سبحان الله قال ليك ماف زول بفهم الشعور الا يجربو ماف زول بفهم معنى الصبر الا يجربو ومعنى التضحيه ومعنى الالم ومعنى الفراغ وعدم الشغف انا ممكن اتكلم ليك عن السعادة اليوم كلو بس انت ما جربت السعاده في يوم تفتكر حتفهمني؟ انت حتتاثر ب كلامي وتأيدني بس ما حتفهم معنى الكلام ليه ؟ لانك ما عشت الشعور وكيف حتفهم المقصود بدون ما تعيشو؟ عشان كدا ما كنت بفهم معنى الفيديوهات دي كنت بتأثر والله احتمال بسبب طريقه الإلقاء أو لانو في النهايه كانت نصايح أو لانو في فيديو عجبني للدكتور ف بقيت بحب كل فيديوهاتو وأسباب كتيرة تانيه بس عمري ما فهمت معنى كلامو ما فهمت يعني شنو عدم استسلام = الا بعد نتيجه تالت الجاتني زي الصاعقه ورفضت استسلم وبحول الله وقوته اتفوقت💗 متذكرين كان قلت ليهم السفير الصيني كرم الطلاب المتفوقين في الجامعه؟ طبعا اتمنيت يكون عندو ولد يعرسو لي بس حزينة جا براهو لاكين ما فقدت الامل حاسه انو وقت اداني الشهادة ختاني في بالو ومشى قال لولدو عندي ليك عروسه ما معروف🙊 المهم الايام بيناتنا وقفت وين انا 📌المهم فهمت انو الزعل ما بكون على النتيجه بكون على انك ما بزعلت كل طاقتك = في نتيجه تالت والله نهائيا ما زعلت على نفسي لاني عملت كل البقدر اعملو ووقت زعلت على النتيجه قلت ل نفسي انو النتيجه دي حقت ربنا في زول بزعل من قضاء ربنا؟ وهنا استوعبت المعنى ! 📌فهمت معنى كلامو انو الجاي ممكن تغير فيه = وقت بقيت افكر في الجاي ما في الفات السمستر التاني دا ضيعت فيهو زمن مبالغه والله لا وراكم الاستهتار ف ادونا إجازة اسبوعين وقررت ما اعاين للزمن الضيعتوو واعاين للجاي وسبحان الله أنجزت في الاسبوعين ديل ال ما قدرت انجزو في شهرين 💕🤏🏻 وهنا فهمت المعنى 📌وانو ما اي حاجه في الدنيا دي حنعملها واحنا مرتاحين واحنا في أفضل أحوالنا = فهمت النقطه دي بعد بقيت بقرا حتى وانا ما عايزة وقت اكون تعبانة جسديا وبرضو اقرا أو انضف البيت وقت اقاوم النوم ال مرات بكون محتاجاهو شديد عشان امشي ال جامعه الفرق بين تفكيري الفات وتفكيري القديم 3 سنين 3 سنين !! ويجيك واحد يزرع الليله ويكون عايز يحصد بكرا التحفيز ما بيشتغل في الزمن البتشوف فيهو الفيديو التحفيز بيشتغل لما الحياة تديك تجربة بتشبه الكلام البتسمعو عشان كدا : نفس الفيديو قبل التجربة = كلام عادي نفس الفيديو بعد التجربة = وجع + وعي + قرار الفيديو ما اتغير إنت البقيت مختلف بس برضو سبحان الله في ناس بتفهم من الوعي قبل التجربه* يعني بدل يعرفو المعنى بعدين يفهمو بتعملو من الكلام نفسو بدل يجربو براهم التحفيز مشكلتو ما في الكلام مشكلتو في التوقيت في ناس لسه ما عاشت الكلام وناس عايشة الكلام يوميًا بدون ما تنتبه إنه نفس الرسالة > عشان كدا نفس الفيديو ممكن يمر على زول عادي… ويهز زول تاني من جوّاه تمامًا

ما تقولو لي الدنيا ضهر الصباح ببدا وقت انا اصحى

صبحكم الله بالخير 💗

السلام عليكم ورحمه الله وبركاته 🌸

هل دايما لطيف في تعاملك مع نفسك ومع الناس ولا شديد وقاسي؟ هل حتستمر في السعي رغم الالم؟ رغم الإرهاق رغم الدموع؟ هل بعد كل وقعه حتقوم ولا حتكون قاعد في محلك؟ هل عندك إصرار وعزيمة يخلوك تكمل في مشوارك ويخلوك تعزم انك تجيب أعلى الدرجات وتصر على انك تجيبها ولا بس اهم شيء تنجح وتعدي؟ الشخصيات دي ما صنعت طفولتنا وبس دي ساهمت في بناء شخصياتنا حتى بدون ما نحس والسؤال الحقيقي هنا انو لو الشخصيات دي رجعت لينا الليلة وسألتنا هل طبقتو الحاجات الاتعلمتوها؟ هل بقيتو النسخة الكنتو بتحلمو تكونوها؟ هل حتقدرو تجاوبو؟ هل حتقدرو تقولو ليهم انكم واثقين انو شمس الفرحه حتشرق ☀️💛 ويبقى كل الفات حكاية ❤️❤️❤️!!! #الاء _صلاح #الدعم _النفسي #مبادرة_ نحنا _معاك

ف الفكرة إنو الأمل والتغيير والاهتمام بحييو اي شيء كونك عندك بصيص أمل يبقى انت حتسعى انك تحاول تتغير للاحسن دام التغيير ممكن انك تهتم بالحاجات المفترض تهتم بيها عشان تشوف نتايج اهتمامك مع الزمن المحقق كونان :🔍 يكتشف الغامض والمثير يستنتج بالعقل الكثير كونان الرجل الصغير يسعى دائما💗 المحقق كونان يبدو واثقا💗 يعمل جاهدا 💗 لا يخشى المحن💗 اآآآآآآ كونان اسرع فالزمن يجري يا كونان كونان هيا يا كونان كونان،كونان ومن يجابه كونان🤏🏻 سينشي جسمو اتقلص واتحول لطفل صغير بالرغم انو جسمو اتغير الا انو عقلو فضل زي ما هو✨ وواصل يكشف الجرائم بعقلو وما خلا جسمو الصغير يعيقو وكان بيتدسا تحت اقرب طربيزة نظام احنا ما حنشوفو هههههههه ف جسمو اتغير وكمان اسمو وحتى شخصيتو بس الذكاء ال فيهو ما اتغير شغفو للبحث عن الحقيقه ما اتغير ولا حتى الشجاعه وبتذكر في حلقه كان ضحى بحياتو عشان يحمي خطيبتو ديك كان اسمها منو ف الانمي دا علمنا نفكر ونخرج من الصندوق وانو نفتش على الحقيقه وما نصدق اي كلام بتقال لينا أو ما ننخدع ب أي زول🤏🏻 وما نخاف نواجه الصعوبات 💪🏻 ولي هسي لو صحبك اكتشف معلومه حتى لو واضحه وضوح الشمس يقول ليك معاك المحقق كونان اعمل حسابك بقينا ما بنحضرو بس لسه ثابت في عقولنا البؤساء 🌸: حلمت حلما في زمان ما كان عندها مستحيلا بحب من دون اثمان وللمغفرة الف وسيله💗 قصه كوزيت ال بت ال امها اتوفت وخلتها لي عائله ضوقوها طعم الظلم والفقر بالرغم انو حياتها كانت تعيسه الا انها كانت صبورة🤌🏻 لحد ما اتكافئت بصبرها دا وعرست الود الحليوة الجلابي اب شعر بني داك🙊💗 ف الفكرة الاتعلمناها من الكرتون انو نصبر نصبر حتى على الظلم حتى على الفقر وانو حنلقى نتيجه صبرنا ولو بعد سنين البرامج دي وغيرها كتير من البرامج الدبلجتها اسبيستون ب كل احترافيه متبعين لغه القران وتعاليم الدين👏🏻🤍 في تعليمنا للشكر والاستئذان والاعتبار واحترام الكبير وتوقير الصغير بارك الله فيهم🤍 بس انا ما جايه اتكلم عن القناة جاية اتكلم عن الحاجات ال كانت بتعلمنا ليها بدون وعي مننا انو احنا قاعدين نتعلم ما بس بنستمتع ب مشاهدتها يمكن كنا بنشوفها زمان كأنها قصص للتسلية… لكن الليلة فهمنا إنها كانت دروس للحياة لو ركزنا حنلقى إنو كل قصة كانت مختلفة لكن الرسالة واحدة قاوم اصبر اتعلم وواصل تخيلو روميو يجي يسالكم اها كيف علاقتكم مع اصحابكم؟ هل حتقولو ليهو زي الزفت وكلهم بتاعين مصالح وأصدقاء سوء ولا حتقولو ليهم انكم اخترتو صح واصدقائكم داعمين ومحبين ليكم وانكم مبسوطين بوجودهم معاك ولو كونان سألكم اها بقفيتو تفكروا صح ولا لسه ما بتفهمو أو ما عايزين تفهمو ولا بتعملو نفسكم مساكين ولا حتقولو ليهو انكم بقيتو تفكروا بعقلانيه وتشوفو المواضيع بعدة مقاييس وما بتحكمو على الناس والمواقف بسطحيه وبسرعه لو ام شعر اصفر سالتكم هل غيرتو حاجه فيكم أو في غيركم أو احييتو حاجه ماتت حتقولو ليها شنو انو انتو ال متو؟ انو انتو ما قادريين تحيو نفسكم وتقيفو على حيلكم خلي قال تساعدو الناس؟ انكم بدل تتفتحو للحياة ضلمتو ولا انكم قاعدين تسعو للتغير ولي مستقبل أفضل وانكم كنتم متمسكين بالأمل ولازلتم🤍 وفلونة لو سالتكم هل اتكيفتو مع بيئتكم الجديده ولا لسه وهل راضين بحياتكم؟ حتقولو ليها انتي قايلة بيئتنا الجديدة بتفتح على الشاطئ والمحيط زي جزيرتكم وانو ما قادرين تتقبلو حياتكم الجديدة ولا قادرين تتقدمو فيها ولا حتقولو ليها انكم اتكيفتو معاها واتاقلمتو مثلا مع الجامعة وايام الجامعه وتعب الجامعه وانكم راضين ب حياتكم العايشنها ومكانكم الوصلتو ليهو بطلوع الروح وانكم حتحاولو قدر ما تقدر تتكيفو لي بيئتكم وترتاح و ليها اكتر من كدا🤍 غون وكيلوا لو قالو ليكم هل لسه مصرين تحلمو؟ لسه عندكم هدف وقاعدين تسعو ليهو؟ هل بتتعاملو مع المواضيع بشفافيه وإيجابية ؟ هل واثقين من نفسكم ؟ هل لسه متحلين بالاصرار والعزيمة ؟ هل حتجاوبو ب اي ولا لا؟ كوزيت لو سالتكم* عن الصبر؟ هل لسه صابرين على الالم؟ على تعب القرايه والجامعه والامتحانات؟ هل صابرين على الظروف الصعبة والمعيشه الغاليه؟ هل صابرين على الغربه وفراق الاهل عشان القرايه؟ هل صابرين على الألم الجسدي والنفسي الناتج عن القرايه؟ هل صابرين لانو عندكم امل انو الاضواء حتظهر في آخر النفق ؟ وبرضو الجواب يا اي يا لا ابطال الكرة لو سالوكم هل بتتعاونو على البر والتقوى؟ هل بتشاركو المعلومات بيناتكم ولا بتتخاسسو وتتغاتتو؟ هل بتحفز نفسك واخوانك واصحابك القراب منك ولا كلكم في السهلة؟

انتو عارفين احنا منو ؟ احنا جيل اتربى على قيم قبل ما يعرف معناها احنا شباب المستقبل احنا الاسبيستون كانت معانا خطوة بخطوه في طفولتنا عشان تغرز في عقولنا افكار وتربينا على الافكار والقيم دي ف ال احنا فيهو هسي ما جاء من فراغ اسبيستون كانت ولازالت بتعلمنا ابطال الكرة ⚽: في القلب طاقه كالرياح تدفعنا نحو النجاح مهما اثقلنا بالجراح شفاؤنا يكمن في الفلاح هيا هيا هيا هيا هيا هيا قفو من جديد هيا هيا هيا هيا هيا قولو النصر نريد فالشدة تصنع الابطال مع العزم لا محال💗 في الكرتون دا أو ممكن نعتبرو انمي بدون وعي زرعو فينا الاصرار النهوض بعد السقوط وانو الجروح ما بتوقفنا بل بتقوينا وانو بعد كل وقعه بنقوم اقوى وانو الشدة هي البتصنعنا في مباراه بين فريق النسور وفريق العواصف الحلقه كلها 17 دقيقه بس لو ركزتو فيها حتلقو الموضوع اكبر من مجرد مباره عامر واصحابو تعبو من المباره وقربو يخسرو بس قام زين صحبو متذكرنو؟ واحد كدا شعرو ابيض حلاه الدنيا عليهو🙈🤍 قال ليهو انو احنا اتعاهدنا على الفوز وأنهم ما جو عشان يخسرو وأنهم حيستمرو في اللعب مهما كانت الظروف وانو رأية النسور لازم تبقى مرفوعة🏴 لو جينا ركزنا مع الحلقه دي حنلقى انهم ما استستلمو بالرغم من التعب واتعاونو وحفزو وشجعو بعض على الاستمرار وأنهم كان عندهم هدف انو رأية النسور تفضل مرفوعة وبالرغم إنو فرقه العواصف خالفوا القوانين ما عارفه كان شربو مشروبات طاقه ولا حاجه بالشكل دا المهم بالرغم انهم كانو متفوقين عليهم جسديا الا إنو روحهم وإصرارهم وعزيمتهم وعقليتهم خلوهم يتفوقو عليهم💪🏻 الحلقه كلها 17 دقيقه رايكم شنو ترجعو تحضروها؟ احتمال تشوفوها بعين مختلفه وتشوفو فيها درس ما انتبهتو ليهو زمان احنا زمان كنا بنشوفها ك تسلية والليله حنشوف معناها ما اظن فيها حاجه تاخدو بريك تلت ساعه شوفو الحلقه ال احنا كنا مستمتعين فيها وبنشجع فريق النسور ومبسوطين معاهم قدر شنو كان عندها افكار خفيه والأفكار دي اتغرست جوانا وهي للان جوانا بس احنا ما مستوعبين الحاجه دي القناص :🌷 قد لمعت عيناه بالعزم انتفضت يمناه في هدوء الليل💗 قصه غون السافر من مكان لمكان عشان يلقى ابوهو ويحقق حلمو و مر بتحديات كبيره انمي علمنا انو لازم نكون مصرين على تحقيق أهدافنا ونسعى وراها ونثق في أنفسنا عهد الاصدقاء: 🎗️ حلمنا نهار نهارنا عمل نملك الخيار وخيارنا الامل وتهدينا الحياة اضواء في آخر النفق💗 تدعونا كي ننسى الما عشناه💗 روميو والفار الابيض المعاهو والفريدو رسمو لينا فكرة عن الصداقه الحقيقه🤏🏻 والتضحيه روميو باعوهو عشان يشتغل ويساعد اهلو بس بعد دا ما استستلم واشتغل اتعلمنا انو الحلم براهو ما كفايه الليل كان للحلم والنهار للعمل والسعي والأمل المتمسكين بيهو انو حيظهر ضوء في آخر النفق ينسينا الآلام العشناها 🌸 و الفكرة بتاعت الكرتون انو مهما كانت الحياه قاسية الصحبة الصاح بتخففها ريمي:💕 مررتِ بخاطر فكره عبرتي ظلت الذكرى نسيتي الحزن شوقا للغد الافضل💗 دروب قد قطعتيها💗 ريمي عاشت وحيدة في الشارع والزول الوحيد ال لقتو في الطريق وحست معاهو بالدفئ والأمان هو العم فيتالس واتوفى في ليلة ثلجية عاصفه وخلاها براها للمره الثانيه في حياتها واضطرت تمشي باريس براها بالرغم من الفقدان دا صبرت واتحملت وعمرها ما فقدت الامل مع انها كانت طفله بس كانت عارفه انو الحزن ما دايم وانو ما لازم تستسلم *ايميلي:🪷🎀* قد تبدو الايام كمياه راكدة قمر لا ينام وليال باردة💗 ايميلي ايميلي بالصبر تجملي💗 ايميلي ايميلي حاولي لن تفشلي💗 بت عسولة🎀 عندها خيال واسع وطموح كبير واجهتها ظروف صعبة بس برضو ما استسلمت علمتنا يعني شنو احلام ويعني شنو صبر وانو لازم نؤمن بنفسنا ونتاكد انو احنا قادرين نحقق احلامنا فلونة :🩰💞 اسمى فلونة تضيف لونا يسحر دنيا باهية الجمال💗 الكرتون بحكي عن أسرة عاشت في جزيرة معزولة واتعلمو يعتمدو على نفسهم وعلى بعض فيها وقدرو يتجاوزو الصعوبات طبعا فلونه كانت بتغيظني عشان بتحوم حفيانة 🩰 ياخ انتي في جزيرة مقطوعه كلها حشرات وعقارب اديني سبب واحد يخليك تحومي حفيانة يعني امها وأبوها قدرو يزرعو مزعة في الجزيرة ويبنو بيت فوق شجرة غالبهم يصنعو سفنجه لي بتهم؟🩴 غايتو الله يهديها طفله المهم سبيستون وصلت لينا فكره انو الإنسان بطبعو متكيف بتكيف في أي بيئه بمشي فيها الحديقه السرية :⛲🩵 لحديقتنا في قريتنا باب ولها اسوار لا يعلم أحد ما فيها تخفي عنا الاسرار أقبلت بجد اسقيها اروي الأشجار احييها وغدا من اجمل ما فيها زهر لا كالازهار💗 ماري👩‍🦱💛 اكتشفت حديقه مهجورة في قريتها واهتمت بيها وسقت الزهور والأشجار🌴 الموجوده فيها لحد ما اعادت ليها الحياة (بفضل الله سبحانه وتعالى طبعا)

صبحكم الله بالخير 💗

السلام عليكم ورحمه الله وبركاته 🌸

بالمناسبه التعب الجاي من الالتزام والانضباط والتضحية والله عمركم ما حتحسو بيهو تعب💗 والله لو شفتو نتيجتو تتمنو تتعبو يوميا التعب دا 💗 حتوصلو مرحلة انكم تستمتعوا بالتعب ليه؟ ما هدا انتو شفتو النتيجة قبل كدا شفتو نتيجه التزامكم باهدافكم وتضحيتكم عشان تنضبطو وتنفذوها ف صدقوني لو بكيتو دم وانتو بتسعو ما حيكون عندكم مشكلة في الحاجه دي وانا ما قاعدة أبالغوقاعدة اقول ليكم الكلام دا من اعماق قلبي والله💗 اول مرة الموضوع حيكون صعب وحتضطرو تصبروا وتنتظروا النتيجه... لكن اول ما تشوفوها ما حيكون عندكم مشكله تعيدو نفس التعب💗 يعني زول تعب مره ولقى نتيجه تعبوتفتكروا حيكون عندو مشكله يتعب نفس التعب دا مره تانيه؟ ف وانتو بتجتهدو وانتو بتسعو ختو في بالكم انو ما فيها حاجه إذا تعبنا🌸 ما فيها حاجه إذا تعبتو وانتو بتقرو عشان تتفوقو وتنجحو ما فيها حاجه إذا ضحيتو ب ٥ ساعات من يومكم ال عبارة عن ٢٤ ساعه عشان خاطر اهلكم وعشان ترفعو راسهم ما فيها حاجه إذا نمتو ٥ ساعات يوميا(لفترة معينة) وضحيتو بالمعدل الطبيعي مقابل تكونو مبسوطين وانتو داخل قاعة الامتحان أو ضحيتو ب طلعاتكم وعدد ساعاتكم في التلفون والتلفزيون عشان تقدرو تلتزمو بعدد الساعات المحدده ما فيها حاجه إذا جبرتو نفسكم وخالفتو هواكم وقاومتو التعب والنعاس عشان تحسو فعلا انكم بتعملو في حاجه والحاجه دي ليها قيمة وانكم بتعملو حاجه في الدنيا دي ف انا عايزة اصل ل إنو التعب جزء طبيعي من الطريق ومفترض نعيشو ما نهرب منو⭐🤏🏻 بس يخوانا ما كل تعب عندو نفس القيمه في تعب بيوصلك وفي تعب بيستهلكك يعني ممكن تتعب في القراية و السهر و الانضباط ومقاومة نفسك ودا تعب مؤقت لكن نتيجتو حتفيدك وفي المقابل ممكن تتعب في التأجيل الندم الخوف التشتت وانك تقارن نفسك بالناس أو إنك ما عملت الحاجة المفترض تعملها الاتنين تعب لكن الفرق: الأول تعب بيدفعك لقدام➡️ والتاني تعب بيرجعك لورا⬅️ عشان كدا الفكرة ما في انو كيف نهرب من التعب؟ الفكرة الحقيقية في انو أي تعب تستاهل تعيشو؟ ف الراحة ما في عدم التعب مرات الراحة الحقيقية بتجي بعد التعب ف انا مشيت في الطريق دا وعايزة اوريكم شكلو💗🔥

التضحية 🎗️ الالتزام ☀️ الانضباط 💛طيب ب ما انو اتكلمت عنهم الثلاثه تعالو نعرف العلاقة بينهم شنو التضحيه هي السعر البتدفعو الالتزام هو القرار الحتمشي عليهو الانظباط تنفيذ القرار الاتخذتو كيف يعني؟ انت أول حاجة بتحدد هدفك وتقرر تمشي ليهو — دا التزام بعدين عشان تمشي في الطريق دا لازم تتنازل عن حاجات كتيرة وتحرم نفسك من حاجات مؤقتًا — دي تضحية لكن عشان التضحية دي تستمر وما توقف في أول يوم تعب أو أول يوم ما يكون عندك مزاج فيهو أو اول عترة حتلاقيك هنا بجي دور الانضباط باختصار ممكن نقول العلاقة بينهم انو: الالتزام بوريك الطريق التضحية هي السعر أو المقابل البتدفعو في الطريق والانضباط هو البخليك تكمل الطريق لحد النهاية أو لحد ما تصل🔥 وبدونهم : التزام بدون انضباط = كلام كتير وقروش حبه تضحية بدون هدف = تعب ضايع ومجهود عالفاضي انضباط بدون التزام واضح = مجهود ما عارف ماشي وين أو حيوديك وين طيب كيف هم بكملو بعض؟🫴🏻 يعني عشان تصل لي هدفك لازم ال تلاتة يكونو موجودين ما تقول خلاص حلتزم وانضبط بدون تضحيه لانو ما بجي هم بكملوا بعض لأنو كل واحد فيهم عندو دور ما بقدر التاني يقوم بيهو الالتزام هو البداية هو اللحظة البتقرر فيها إنت داير شنو وبتحدد فيها هدفك لكن القرار والأهداف المحددة براها ما كفاية هنا بتجي التضحية لأنو أي قرار حقيقي عنده سعراي هدف عايز تحققوا لابد تتنازل وتضحي ب حاجات كتيرة عشان تصل ليهو ف أول ما تلتزم بهدف تلقائيًا حتضطر تتنازل عن حاجات تانية شفتو هم بكملو بعض كيف؟ لكن برضو التضحية براها ما كفاية! لأنك ممكن تضحي يوم أو يومين وبعدها توقف لانك مثلا ما لقيت نتيجه في اليومين ديل (ذكروني اتكلم عن نقطه الاستعجال للانجاز) وهنا بيجي الانضباط وهو البخليك تستمر في الالتزام وتواصل التضحية حتى لو تعبت أو فقدت الحماس يعني التسلسل الطبيعي ليهم عامل كدا:⛓️ أول حاجة تلتزم بعدين تضحي بعدين تنضبط عشان تواصل مثال بسيط : عايز تجيب امتياز قررت إنك حتقرا يوميًا ساعتين → التزام لغيت الطلعات قللت التلفون ونمت متأخر عشان تكمل → تضحية قريت حتى في الأيام البتكون تعبان فيها وما عندك نفس تقرا → انضباط لو واحد منهم اختفى حيحصل شنو؟ بدون التزام ما حتعرف هدفك ال مفترض تمشي عليهو بدون تضحية ما حتقدر تدفع سعر الهدف دا بدون انضباط حتوقف في نص الطريق واحتمال في بدايتو عشان كدا هم زي السلسلة كل حلقة ماسكة التانية⛓️ والانضباط يخوانا هو من اقوى اشكال حب النفس 💗 اي والله انك تتجاهل حاجات عايزها هسي عشان حاجات احسن لقدام كدا انت بتوري نفسك قدر شنو انت بتحبها وما بترضى ليها بالحاجه القليلة💗 الانضباط بكشف الالتزام ال عندك تجاه احلامك⭐ بالذات في الأيام ال بتكون حاسي فيها انك ما عايز أو ما قادر والالتزام انك تتخذ قرار النجاح 🤏🏻 انك تحدد الهدف والوجهه ال عايز تصل ليها وتبدا تحققها بالانضباط لو لاحظتو كل ما اتكلم عن الانضباط الالتزام تلقائيا بجي ونفس الشيء وقت اتكلم عن الالتزام الانضباط بجي والتضحيه موجوده في نصهم طيب لو جيت سالتكم شوية اسئله ؟ حاولو جاوبو عليها فيها شنو لو تعبتو؟ لا بالجد كدا فيها شنو؟ في أية في سورة البلد بتقول {ولقد خلقنا الإنسان في كبد}والعلماء فسرو الآية دي ب انو الإنسان خلق في مشقة وتعب ومكابدة لأمور الدنيا والآخرة من ولادتو لحدي مماتو لانو الدنيا دار عمل وبلاء ما راحه أو جزاء دي طبيعه الحياه الدنيا عاملة كدا ف دام ربنا خلقنا في الحياه الدنيا عشان نتعب فيها ونشقى ليه بتزعل وقت تضطر تتعب؟ ليه بتضايق من التعب؟ عارفه ماف زول بحب التعب حتى العقل البشري دا ما بحبو واول ما يحس انك قاعد تخاطر بي راحتك طوالي بعمل ليك أمور وحركات المهم بالجد كدا فيها شنو لو تعبنا؟ وين المشكلة إذا تعبنا؟ هو حتى الناس وقت يدعو لينا بقولو ربنا يديكم على قدر تعبكم لو ما تعبنا حنلقى؟ لو ما تعبنا حنصل؟ لو ما تعبنا حننجح؟ ماف حاجه اسمها نجاح بدون تعب اتعبو ما هو انتو جايين تتعبو عشان ربنا يديكم على قدر تعبكمو عشان ما تتعبو التعب النفسي الحيخليكم سنين كارهين نفسكمه و انتو كدا كدا حتتعبو اختارو عايزين تتعبو ياتو تعب التعب بتاع القرايه ال كلها كم سنة وتخلص منو ولو عاينت ل كل سمستر براهو يكون احسن يعني وجع ساعه ولا وجع كل ساعه ولا التعب التاني ال ما بروح عايزة انط ليكم واوريكم التعب ال ممكن تحسو بيهو يوم النتيجه بس احنا لسه في مرحله التفكير ما وصلنا مرحلة التطبيق ف احس لسه شوية بدري المهم ف التعب النفسي عمرو ما بروح ممكن تتناساهو بس اثرو بكون موجود لاكين التعب الجسدي أو النفسي ال مؤقت بسبب القرايه هل حيكون معاك طول عمرك ؟ وقت تخلص امتحانات السمستر وتأجز اسبوع اسبوعين لسه حتكون حاسي بالتعب؟ القراية حتكون واجعاك لسه ؟ ولا خلاص شوفو انتو عايزين تعب يلازمكم ولا تعب ينتهي🫵🏻

صبحكم الله بالخير 💗

السلام عليكم ورحمه الله وبركاته 🌸

تخيلو وقت جيت البروف في وحده قالت لي بختك والله دا بسبب الحظ ياخ انا اتمنين امسكها واجضمها واكفتها وادخل رأسها في برميل مليان موية باردة وفيهو تلج 🧊 معقولة لاكين المهم النجاح ما بجي فجأه ولا بجي من حركه كبيره وحده بجي من أفعال وتصرفات صغيره ومتكررة ساعتين قرايه يوميا لو التزمت بيهم ممكن تقرا ٦٠ ساعه في الشهر متخيلين؟ و١٢٠ ساعه في شهرين ودا إذا قررت تقرا ساعتين بس كل ٢٤ ساعه يعني لو ذدت عدد الساعات مجموع الساعات الكلية حتذيد الساعتين ممكن يقلبو مستواك ما لأنهم كتار أو كافيين لانهم ثابتين الثبات اقوى من الكثره ساعتين يوميا افضل من ٨ ساعات ل يوم واحد ف لو عاينت ل بعد شهور حتلقى نفسك وصلت مكان ما كنت متخيلو بسبب شنو؟ الالتزام والانضباط فاهمين انا بتكلم ليكم عن شنو؟ انتو معاي؟ شايفين الفوائد والعظمه ال ممكن تحصلوها بسبب الحاجتين ديل؟ مستوعبين انهم جوكر ؟🃏 9/بخلوك تعتمد على نفسك ما كل مره حتلقى زول يشجعك وما كل مره حتلقى زول يذكرك بالحاجات المفترض تعملها في لحظه معينه حتلقى نفسك براك ف لازم تكون الزول ال بلزك عشان تمشي قدام لانو الناس ما حيكونو متوفرين ليك ٢٤ ساعه ما هم برضو عندهم حياتهم ومسؤولياتهم ودراستهم وعلى سيرة الناس البشجعوك انا ممنونه لكل الناس الوقفو معاي وقت كنت قايله اني ممكن ما اصل الناس ال كانو واثقين فيني وفي قدراتي ومقدرتي على النجاح والتفوق واني وقت احتجتهم لقيتهم ف هسي حتى بعد بقيت قادرة اقيف على حيلي براي حفضل محتاجاهم وحفضل ارسل ليهم عشان يقولو لي الاء اشطر كتكوت واني بقدر💗🌷 وفي النهاية... مستقبلك ما حيبنيه مزاجك حيبنيه التزامك وانضباطك 🔥💗 وديل ممكن يكونو سبب في انو شمس الفرحه تشرق ☀️💛 ويبقى كل الفات حكاية ❤️❤️❤️!!! #الاء _صلاح #مبادرة _نحنا _معاك #الدعم _النفسي

📌يعني شنو التزام وانضباط؟؟ والفرق بينهم شنو؟ عاينو ما تشوفو كلامي دا بمفهوم فلسفه أو كلام ناس التنمية البشرية حاولو بالجد تفهموني انا عايزة اوصل ليكم شنو والفوائد الحتكتسبوها لو طبقتو الكلام دا اول شيء الالتزام والانضباط ما واحد بس ممكن تقولو بكملو بعض أو الاول بجيب التاني يعني بمشو سوا 📌الالتزام باختصار هو وعد انت بتقطعو لي نفسك يعني تقرر انك تعمل حاجه وفعلا تعملها بمساعده الانضباط 📌لانو الانضباط هو انك تخالف هواك عشان تلتزم بالوعد ال انت قطعتو ل نفسك يعني الالتزام هو القرار والانضباط تنفيذ القرار والاستمرار فيه الالتزام = قررت تقرا ساعتين مهما حصل تقرا الساعتين ديل ويوميا حتى لو اليوم كان صعب أو الظروف ما ساعدتك تحاول قدر ما تقدر تقرا الساعتين ديل الانضباط =انك تخالف هواك وتقرا الساعتين حتى لو ما عندك مزاج أو حتى لو حاسي روحك تعبان وحتى لو ما عندك شغف وعندي كلام في نقطه الشغف ممكن نتعمق فيهو بعدين "لو انت بتقرأ بالشغف يبقى انت قاعد تتخذ اغبى واسوأ قرار في حياتك"🔇 المهم نكمل الانضباط= انك تكون عايز ترتاح بس تقرر تقوم تقرا ما نمت كويس وعايز تكمل نومك بس تجبر نفسك انك تقوم طيب فايدة الالتزام والانضباط شنو؟✨ 1/انهم بخلوك تتحرك حتى في الأيام البتكون فيها واقف يعني تقرا ما لانو القراية سمحه وعاجباك أو عشان تجيب معدل عالي تقرا عشان انت ملزم بينك وبين نفسك انك تقرا الساعتين القررت تقراهم كل يوم مثلا انك تبتعد عن الملهيات والمغريات والحاجات النفسك تعملها مؤقتا عشان القرايه لانك منضبط ما لانك ما عايز ترتاح 2/ بخلوك تستمر حتى لو الشغف انتهى والشغف حتكلم ليكم عنو بالتفصيل لانو خطير شديد 3/بخلوك تعتمد على نظام ما على احساس مؤقت الكلام دا قرونا ليهو في إدارة الأعمال قالو لينا انسان بدون خطه عبارة عن "زول ساي" لابد يكون عندك خطه تمشي عليها لابد انك تكون ماشي بنظام معين وعارف انت بتعمل في شنو وحتعمل شنو لو حصل أي عارض مثلا المدير الناجح هو العندو خطه ونظام معين ماشي عليهو والمدير ما ضروري يكون شغال في مؤسسه المدير ممكن يكون انت🫵🏻 مدير في إدارتك لي وقتك وتنظيمك لي يومك وقرايتك وحياتك عموما نظام معين تمشي عليهو افضل مليون مره من احساس مؤقت زي الشغف والحماس ونتايجو احسن* 4/بخلوك تعمل الحاجه المفترض تعملها حتى لو ما عندك مزاج ليها يخوانا انتو عارفين انكم لو بتقرو اذا كان عندكم مزاج وما بتقرو اذا ما كان عندكم يبقى انتو بتظلمو نفسكم اي والله بتظلموها عديل كدا انت بتأذي نفسك اذيه شديده كدا انت بتخت قرايتك ال ياها مستقبلك في يد شيء ممكن فجأة يتحول ضدك طبعا دا لو استمريتو في القراية وما عرستو راجل حلبي طويل عندو 4×4🤷🏻‍♀️ تخيل يوم يكون عندك مزاج تقرا للامتحان وتقرا وتجيب معدل كويس ويوم ما يكون عندك مزاج وما تقرا وما تجيب معدل كويس أو ترسب كدا معدلك بقى مربوط ب مزاجك مزاجك كويس يبقى معدلك حيرتفع↖️ مزاجك ما كويس معدلك حينخفض↙️ المزاج والحماس ديل عبارة عن مشاعر مؤقته ممكن يستمرو كم يوم بس صعب أو مستحيل عديل يستمرو اكتر من اسبوع بس الالتزام والانضباط ممكن يستمرو شهور او حتى سنين ديل الحيوصلوك ل هدفك حتى لو الطريق كان طويل حتى لو تعبت وانت بتحاول تلتزم وتنضبط على الاقل حتلقى النتيجة في النهاية النجاح ما بتحددو الايام البتكون فيها متحمس للقراية بتحددو الايام البتكون ما داير تقرا فيها وبرضو تقرا⭐ 5/بخلوك تحترم نفسك تخيل تقرر تقرا 3 ساعات وفعلا تقراهم حتحس انك زول خطير وأنت قررت تعمل حاجه وبقيت راجل وعملتها كل ما تنفذ قرار كل ما ثقتك في نفسك حتذيد واذا ما نفذتو ثقتك حتقل يعني الموضوع ما بس قراية الموضوع ليهو علاقه مع نفسك ومع ذاتك تخيل انك تقرر تعمل حاجه وما تعملها داير الناس يصدقوك وقت تقول ليهم انك حتعمل حاجه؟ هو انت نفسك دي ما صادق معاها عايز الناس تصدقك؟ 6/بخلوك اقوى من اعذارك وانا بشوف انو دي من أهم وأعظم الحاجات البنستفيد فيها منهم💗🤏🏻 لانو الأعذار ما بتنتهي تعبان زهجان ما عندي نفس الجو ما مناسب البيت مزعج الساعه ١١:٠٠ حبدا لاكين ١١:٠٣ ما حبدا يخوانا ال عايز اعذار دا بلقى ممكن حبوبة حبوبتك ال عمرك ما شفتها ولا سمعت بيها ولا عارفها عايشه اصلا تموت تقوم تقول خلاص ما حقرا 3 يوم حداد ليها ف تخيل بسبب الانضباط والالتزام تكون اقوى من كل الأعذار دي؟ تخيل ماف عذر يقيف في طريقك ؟ شتت والله✌🏻 7/بخلوك تسيطر على نفسك بدل ما نفسك تسيطر عليك ودي قوة بالمناسبه💪🏻 لانو كدا انت بتخالف هواك والهوى دا من أسباب الهلاك كان في القراية كان في غيرو النفس بتحب الراحه وبتحب التأجيل وبتحب الساهل ف لو سمعت ليها ومشيت بي كلامها الترابه في خشمك ف الانضباط بخليك انت القائد ما نفسك ولا مزاجك✨ 8/بخلوك تبني عادة النجاح النجاح عادة يخوانا النجاح عمرو ما كان حظ

السلام عليكم ورحمه الله وبركاته 🌸

بس خلاص نرجع محل وقفنا