الدعم النفسي | نحنا معاك🤍.

فرحونا معاكم🩵.. اكتبوا لينا: الاسم الثلاثي + النسبة متحمسين نشوف نسبكم ونفرح بإنجازكم معاكم🩵🔥

بسم الله الرحمن الرحيم 🤎🕊️ أسرة مبادرة «نحنا معاك» بتتقدّم بأجمل التهاني وأصدق التبريكات لكل طلابنا وطالباتنا بمناسبة ظهور النتيجة. اليوم ما بنحتفل بالدرجات بس، بنحتفل بيكم إنتو… بالرحلة الطويلة، بالتعب، بالخوف، بالقلق، وبكل الظروف الصعبة اللي واجهتوها، ومع ذلك واصلتوا وما استسلمتوا لحدي ما وصلتوا للنهاية. لكل زول فرح بنتيجتو: ألف مبروك، وربنا يجعلها بداية لأيام أجمل ونجاحات أكبر. 🌸 ولكل زول النتيجة ما جات زي ما كان بتمنى: ما تحزن، وما تخلي رقم يكسّر فرحتك بنفسك. دي ما نهاية الطريق، ولسه قدامك أبواب وفرص كتيرة، وربنا قادر يعوّضك بما هو أجمل. فخورين بيكم كلكم، بالناجح، وبالما وفقو ربنا المرة دي، لأنو الشجاعة الحقيقية كانت في إنكم واصلتوا رغم كل شيء. من «نحنا معاك» بنقول ليكم: نحنا فخورين بيكم، ومهما كانت النتيجة… إنتو تستاهلوا الفخر. 🤎🕊️ مبروك ليكم جميعًا، ومبروك لأهلكم، ومبروك لكل زول وقف معاكم في الرحلة دي. ربنا يكتب ليكم القادم أجمل، ويحقق ليكم كل الأمنيات، ويجعل تعبكم ده فاتحة خير وفرح كبير في حياتكم. 🤲🏽🤎 #نحنا_معاك #الشهادة_السودانية #اسرة ومبادرة نحنا معاك ❤️

خلي في بالك إنو يوم النتيجة ما هو اليوم البتتحدد فيهو قيمتك، ولا هو اليوم البتتكتب فيهو قصة مستقبلك كاملة. النتيجة مجرد محطة من محطات كتيرة في حياتك، ورقم في ورقة ما ممكن يختصر تعبك، ولا صبرك، ولا الظروف العديت بيها. إنت ما دخلت الامتحان في ظروف عادية؛ إنت جيت من وسط حرب ونزوح وقلق وضغط نفسي ومعيشي، ويمكن مرات ما كان عندك حتى الأمان الكافي عشان تذاكر وتواصل. ومع كل ده، قمت وحاولت، تعبت، قاومت، وصلت قاعة الامتحان وأديت العليك. وصدقني، مجرد إنك وصلت للنهاية وما استسلمت، دي حاجة براها تستاهل ترفع راسك بيها. لو النتيجة فرحت قلبك، احمد ربنا واشكره، وخلي نجاحك بداية لطريق أجمل، ما نهاية الطريق. ولو النتيجة ما جات زي ما كنت بتتمنى، برضو احمد ربنا، وخد نفس عميق واعرف إنو الباب ما اتقفل. في طرق تانية، وفرص تانية، ومحاولات تانية، وربنا قادر يفتح ليك باب ما كنت متوقعو. ما تخلي رقم يخليك تنسى إنت عديت بشنو عشان تصل للمكان ده. وما تقارن رحلتك برحلة زول تاني؛ كل زول عندو وقته، وظروفه، ونصيبو من الأقدار. النجاح الحقيقي ما إنك ما تتعثر، النجاح إنك تعرف تقوم كل ما وقعت. والنتيجة مهما كانت، ما هي آخر صفحة في قصتك… دي مجرد صفحة، ولسه الكتاب طويل، ولسه بإذن الله في صفحات أجمل جاية. 🤎🕊️ #مبادرة_نحنا_معاك #الدعم_النفسي #اواب احمد

نسب تبرد الخاطر💗💗 مبروك لبناتكم امهاتي💗 ومبروك ل اخواتكم واخوانكم وكل الناجحين💗 والجواب نسبه ما عجبتو أو حتى ما نجح مبروك ليهو برضو مبروك على تعبك وسعيك واجتهادتك💗 جلوسك الامتحان برضو نشكرك عليهو💗 النتيجه طلعت وتالت صفحه وانطوت اشربو عصايركم قشقشو دموكم وفكرو في الجاي🔥 ما هسي لاكين دا ما زمن تفكير دا زمن فرح وبوبار وفشار🔥 الكثير والكثير من الفشار والفنكوش وان شاء الله شمس فرحتكم شرقت☀️ 💛 وكل الفات بقى حكاية ❤️❤️❤️!!! وكان ما شرقت هسي بتشرق زمن ربنا يريد ليها الشروق☀️ ✨ #الاء_ صلاح #الدعم_ النفسي #مبادرة _نحنا _معاك

بشرونا نحنا دايرين نفرح معاكم 💙

هيييي وبالله ماف زول يركب الظلط تمام

وتعالو اقول ليكم حاجه شويه محزنة شفتو دي اخر نتيجه ليكم في حياتكم يعبروكم فيها والله في الجامعه كان ذاعو نتيجتك في قناة السودان عديل زول يجيب خبرك ماف يعني الفشار والفنكوش والحلاوه القوية ديك اسمها شنو قزقز؟ والزغاريت والمباركات والببسي وعصير الكركدي الكلام دا تاني ما حتشوفوهو الا في اخوانكم الصغار وفي الجامعه الهدايا من الأهل والكلام دا يختي تاني الا راجلك يجيب ليكي ف شنو استمتعوا ب الأجواء ✨

*ربنا ما بظلم زول* *ربنا عارف الخير وين* *نتيجه تالت بداية الطريق ما نهايتو* *نجاحك ليك انت قبل يكون للناس* *اذا ما فرحو ليك افرح انت* *حتلقى نتيجه سعيك ولو بعد دهر* *لو جبت 100 عديل أسجد وأحمد ربنا ولو جبت 50 برضو احمد ربنا* عسى ولعل السجدة دي ترضيك بعدين💗 ربنا يفرحكم بنسبكم ويفرحنا بفرحكم💗 وتعالو بشرونا لانو *نحنا معاكم🩵* في الامتحانات ومعاكم في النتيجه ويارب شمس فرحتكم بكرا تشرق☀️💛 ويبقى كل الفات حكاية ❤️❤️❤️!! #الاء_ صلاح #الدعم_ النفسي #مبادرة_ نحنا_ معاك

صبحكم الله بالخير 💗

السلام عليكم ورحمه الله وبركاته 🌸

يا أبطال الشهادة السودانية… بكرة يوم النتيجة. 🤍 عارفين الخوف الجواكم الليلة؟ عارفين الأسئلة البتدور في راسكم: «يا ترى عملنا شنو؟ النتيجة ح تكون كيف؟ ح نفرح ولا ح نبكي؟» لكن قبل ما تفتحوا النتيجة، عايزينكم توقفوا لحظة… وتتذكروا المشوار الكلو. تتذكروا الأيام الكنتوا فيها تعبانين وبرضو قريتوا. الليالي النمتوا فيها وأنتم شايلين هم بكرة. المرات الكنتوا عايزين تستسلموا فيها وقلتوا: «خلاص، ما قادرين.» لكن رغم كل ده… واصلتوا. دخلتوا امتحانات ما كانت سهلة، واجهتوا ضغط وخوف وقلق، ومرات يمكن خرجتوا من امتحان وأنتم حاسين إن الدنيا انتهت… لكنها ما انتهت. وإنتو ما انتهيتوا. إنتو خضتوا معركة حقيقية، ومعركة ما كل الناس كانت ح تقدر تكملها للنهاية. عشان كده، بكرة مهما كانت النتيجة، ما تسمحوا لرقم مكتوب في ورقة إنو يمسح كل التعب البذلتوه. لو النتيجة فرّحتكم: احمدوا ربنا، واسجدوا ليهو شكر. ولو ما جات زي ما تمنيتوا: برضو احمدوا ربنا، واسجدوا ليهو، وقولوا: يا رب أنا ما عارف الحكمة، لكني واثق فيك. لأن المؤمن ما بينتهي حلمو عند نتيجة، وما بيقيس حياتو بدرجة. قال رسول الله ﷺ: «عجبًا لأمر المؤمن، إن أمره كله خير» كلو خير… في النجاح خير، وفي التأخير خير، وفي الطريق البتغير اتجاهو خير، وفي الحاجة البنفتكرها خسارة ويمكن تكون هي ذاتها النجاة. وربنا قال: ﴿وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ﴾ فـ لو بكرة النتيجة كانت عكس أحلامك… ما تقول انتهت. يمكن ربنا قفل باب لأنو شايف ليك باب أكبر. يمكن أخّر حاجة لأنو عارف إن وقتها لسه ما جاء. يمكن أخد منك حاجة كنت شايفها مستقبلك، عشان يديك مستقبل أجمل مما كنت متخيل. الكاتبو ربنا ليك ما ممكن يكون غلط. حتى لو عقلك ما فهمو، وحتى لو قلبك اتوجع منو. والدعاء ما كان يوم حاجة بسيطة. ارفعوا أيديكم الليلة، أدعوا ربنا، استغفروا، وأكثروا من الصلاة على النبي ﷺ، وصلّوا ركعتين وخلو قلوبكم عند ربنا. إنتو عملتوا البتقدروا عليه… والباقي ما مسؤوليتكم. النتيجة دي مختص بيها رب العالمين. إنتو ما مطلوب منكم تعرفوا الغيب، ولا مطلوب منكم تتحكموا في المكتوب. المطلوب بس: تسعوا، تدعوا، تصبروا، وترضوا. والصبر ما حاجة سهلة… لكن ربنا ما قال إنو الصبر بلا ثمن. قال تعالى: ﴿إِنَّمَا يُوَفَّى الصَّابِرُونَ أَجْرَهُم بِغَيْرِ حِسَابٍ﴾ فـ يا زول… ويا بت… اهدوا. ❤️‍🩹 بكرة ما يوم للحكم على حياتكم. بكرة مجرد محطة من محطات طويلة لسه قدامكم. لو نجحتوا… نفرح معاكم. ولو ما كانت النتيجة زي ما تمنيتوا… حنكون برضو معاكم. لأنو «نحنا معاك» ما كانت معاكم عشان النتيجة بس… كانت معاكم عشان الرحلة كلها. وآخر حاجة عايزين نقولا ليكم: إنتو ما فشلتوا لأنكم ما جبتوا الدرجة البتمنوها. الفشل الحقيقي إنك تستسلم بعد ما تتعب. وإنتو لحدي اللحظة دي… ما استسلمتوا. فـ مهما كانت النتيجة، قوموا… كملوا… جرّبوا تاني… وخلوا ثقتكم في ربنا أكبر من خوفكم من بكرة. ربنا يفرّح كل قلب منتظر، ويجبر خاطر كل زول تعب، ويعوض كل زول بكى، ويكتب لكل واحد فيكم الخير وين ما كان، ويرزقكم الرضا قبل الفرح، والقوة بعد الخوف، والجبر بعد التعب. اللهم اجعل نتيجة تعبهم فرحة، وإن لم تكن كما تمنوا، فاجعل ما كتبتَه لهم خيرًا مما تمنوا. 🤲🏽🤍 بكرة مهما حصل… ما تنسوا: إنتو خضتوا المعركة… وصلتوا للنهاية… وكلو على رب العالمين. نحنا معاكم… اليوم، وبكرة، وبعد النتيجة. ❤️‍🩹 #مبادرة_نحنا_معاك #الشهادة_السودانية #نحنا_معاك #اواب احمد

📢 تم إغلاق باب التسجيل في المبادرة شكرآ لكل شخص سجل واهتم بالانضمام لينا🩵.. سعداء جدآ بحماسكم واهتمامكم وحنراجع جميع الطلبات ونتواصل مع المقبولين قريبآ بإذن الله. بالتوفيق للجميع ونشوفكم في المبادرة 🔥🩵

بسم الله الرحمن الرحيم قال تعالى: ﴿وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ ۝ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ ۝ أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ﴾ [البقرة: 155–157] ببالغ الحزن والأسى، وبقلوب مؤمنة بقضاء الله وقدره، تنعى مبادرة نحن معاك أختنا وزميلتنا نور محمد التي انتقلت إلى رحمة الله تعالى. نسأل الله أن يتغمدها بواسع رحمته، ويغفر لها ويرحمها ويعفو عنها، ويكرم نُزلها ويوسّع مدخلها وينوّر قبرها ويجعله روضةً من رياض الجنة، وأن يجبر قلوب أهلها وأحبابها وزملائها، ويلهمهم الصبر والسلوان، ويعظّم أجرهم، ولا يحرمهم أجر الصبر عليها، ويغفر لنا ولها، ويجمعنا بها في جنات النعيم. دعواتكم لها بالرحمة والمغفرة أثابكم الله

عاوز أجرك يزيد ويتضاعف؟ عندك معلومة بسيطة ممكن تنقذ بيها طالب شهادة؟ عايز تطور نفسك أكتر وتعمل فرق؟ ليه واقف ؟ مبادرة " نحن معاك " بإنتظارك🔥🩵.. إنضم وكن من صناع الأثر🩵.. قال تعالى : ( ..وَمَا تُقَدِّمُوا لِأَنفُسِكُم مِّنْ خَيْرٍ تَجِدُوهُ عِندَ اللَّهِ هُوَ خَيْرًا وَأَعْظَمَ أَجْرًا.. ) التطوع ما بس بحتاج وقت طويل ولا جهد كبير. يكفي أنك تقدم ساعة من زمنك أو شرح بسيط أو كلمة تشجيع تعين طالب على النجاح. ف عمل بسيط في ظاهره و عند الله أجره عظيم وبركته تمتد إلى حياتك. 🌟وما كدا بس : الأجر بساعدك تنمو وتتطور أكتر، تتعلم مهارات جديدة في التواصل والعمل ضمن فريق، تبني شخصية قيادية، وكمان ح تأخد شهادة تطوع تدعمك🩵... 🔗سجل الأن عبر الفورم وابدأ رحلة الأجر والتطور: https://forms.gle/wsCcMW9ZaRkk9qicA انضم إلينا الآن وكن من صنّاع الأثر 🩵💫

تبقّت ساعة واحدة فقط على اللقاء! ⏳🔥 جهّزوا أسئلتكم وخلونا نشوف حماسكم وتفاعلكم! 🔥🩵

⭐لقاؤنا الليلة الساعة 8:00 مساءً في ورشة عقلك أم الخوارزمية 🩵... على قناتنا الرئيسية: https://t.me/Sudanexams خليكم قراب🔥

ف لسه تفتكروا انو شمس الفرحه حتشرق؟☀️💛 بالنتيجه العايزنها أو لا؟