𝑲𝒏𝒐𝒘𝒍𝒆𝒅𝒈𝒆 𝒂𝒏𝒅 𝒇𝒖𝒏𝒏𝒚

ငါ့အချစ်က မင်းပြီးရင် မင်းပဲ။ -ပိုင်သစ်နွယ်

ကဗျာစာစဉ်အမည် - တစ်ပွင့်သာလျှင်

ကဗျာအမှတ်စဉ် (၃) အရာရာတိုင်းဟာ ပေါများနေရင်မကောင်းဘူးလို့ ထင်ရပေမဲ့ တစ်ခုတည်းရှိပြီး ထင်ရှားနေတာတွေကတော့ ကျွန်တော်တို့ ပတ်ဝန်းကျင်မှာလည်း အများကြီးပါ။ ဒီအပတ်မှာ‌လည်း မတူညီတဲ့ အတွေးပေါင်းစုံနဲ့ စာပေချစ်သူတွေကို ဘယ်လိုရသတွေ ခံစားသွားစေမလဲဆိုတာကို ရင်သက်ရှုမောဖွယ် စောင့်မျှော်လျက်ရှိပါပြီ။ ကဗျာချစ်သူများအားလုံး ပါဝင်ရေးသားပေးကြဖို့ ဖိတ်ခေါ်လက်ကမ်းလိုက်ရပါတယ်ခင်ဗျာ..🗯️။ ကဗျာစာမူပိတ်သိမ်းချိန် - ၂၈ရက်နေ့ ည ၉နာရီ ကဗျာစာစဉ်အတွက် ကဗျာစာမူများကို @Alp_ll2010 ဒီအကောင့်ဆီ ပေးပို့နိုင်ပါပြီခင်ဗျ။ -ကဗျာဗဟိုပြု စာပေကလပ်စည်း #poetry_series #A_poetryhub #literary_club

မူးယစ်ဆေး တန်ဆေးလွန်ဘေး မူးယစ်ဆေး ဝေးဝေးရှောင်ပါ တစ်သက်တာ။ လူငယ်များကြား ရေပန်းစား အမှားရှောင်ကာ ပြင်ခန္ဓာ။ ကိုယ့်ကိုယ်ကိုယ်ပဲ ဆင်ခြင်ဆဲ မှီဝဲဖို့ရာ စောင့်ထိန်းလာ။ ကိုယ့်လူတို့ရေ စဉ်းစားလေ အသေမြန်တာ သူ့ကြောင့်ကွာ။ ဆိုးကျိုးများနှင့် မူးယစ်ဖြင့် သုံးလင့်သူဟာ ကျေးကျွန်ပါ။ ရာစု-၂၁ရာစု ရေးသူ-အံ့လွန်းပျို အမျိုးအစား-‌သံပေါက်

"ခြင်္သေ့ နှင့် ကျည်ပွေ့"

ထိုနေ့ညက မင်္ဂလာဒုံဘက်က ဘီယာဆိုင်တစ်ဆိုင်၏ ထောင့်အကျဆုံးဝိုင်းတွင် သွေးသောက်သူငယ်ချင်း ၄ ယောက် ဆုံဖြစ်ကြသည်။ ဘီယာ ၃ ပုလင်းခန့် ဝင်သွားပြီးနောက် မာနတလူလူနှင့် ခါးကိုမတ်၊ ရင်ကိုကော့ကာ စားပွဲကို လက်ဝါးနှင့် ဖြုန်းခနဲ ရိုက်လိုက်သူကတော့ ကျွန်တော် "ရဲလင်း" ပေါ့။ "မင်းတို့ကောင်တွေ တကယ့်ကို ညံ့ဖျင်းလွန်းတယ်ကွာ။ မိန်းမ ဖုန်းဆက်တာနဲ့ ပြာပြာသလဲ အိမ်ပြန်ရအောင် မင်းတို့က ယောကျာ်းတွေလား၊ ကြက်သူခိုးတွေလား? ငါ့ကို ကြည့်စမ်း... ငါ့အိမ်မှာဆို ငါက ဧကရာဇ်မင်းပဲ။ 'အေးချမ်း... ငါ့ကို ရေတစ်ခွက် ခပ်ပေးစမ်း' လို့ အသံခပ်အုပ်အုပ်နဲ့ တစ်ချက်ဟောက်လိုက်ရင်ကို သူခြေဖျားလက်ဖျားတွေ တုန်နေတာကွ။ ယောက်ျားဆိုတာ ခြင်္သေ့မင်းလို ခေါင်းဆောင်၊ မိန်းမဆိုတာ တို့ယောက်ျားတွေရဲ့ ခြေဖဝါးအောက်မှာ ထားရတယ်ကွ... ရှင်းလား!" ကျန်သူငယ်ချင်း ၃ ယောက်က ပါးစပ်အဟောင်းသားနှင့် ရိုသေလေးစားစွာ ကြည့်ရင်း "ဆရာကြီးပဲ ရဲလင်း... ဆရာကြီးရဲလင်းက အိမ်ထောင်သည် ယောကျာ်းထုရဲ့ ပြည်သူ့အသည်းစွဲ ခေါင်းဆောင်ပဲ" ဟု ဝိုင်းမြှောက်ပင့်ကြတော့ ကျွန်တော့် မာနတွေက အင်္ဂါဂြိုဟ်အထိ တက်သွားခဲ့သည်။ ဘီယာဝိုင်းကအပြန် သူငယ်ချင်းတွေရှေ့မှာ မာန်ပြချင်သဖြင့် ဖုန်းကို ထုတ်ပြီး မိန်းမဆီကို Voice Message ပို့လိုက်သေးသည်။ "ဒီမှာ... ငါ ညဉ့်နက်မှ ပြန်လာမယ်။ တံခါးဖွင့်ထား၊ ငါ့ကို မစောင့်နဲ့၊ စိတ်ရှုပ်တယ်!" အိမ်ပြန်ရောက်တော့ ညဉ့်နက် ၁ နာရီခွဲ။ ပတ်ဝန်းကျင်တစ်ခုလုံးက သုသာန်တစပြင်လို တိတ်ဆိတ်နေသည်။ ခြံဝင်းတံခါးကြီးကို တွန်းဖွင့်ပြီး အိမ်ထဲကို ခြေသံပြင်းပြင်း၊ ဖိနပ်သံ တုန်တုန်နှင့် စစ်သူကြီးတစ်ဦးလို ဝင်သွားလိုက်သည်။ ဧည့်ခန်းမီးက မှိတ်ထားသော်လည်း ဆိုဖာပေါ်တွင် ခြေထောက်ချိတ်၊ လက်ပိုက်ပြီး ကျောက်ရုပ်တစ်ရုပ်လို ထိုင်နေသည့် သူမ၏ အရိပ်မည်းကြီးကို အမှောင်ထဲတွင် မြင်လိုက်ရသည်။ 'အဟမ်း... ဆိုင်က ကောင်တွေလည်း ငါ့ရဲ့ မက်စိ(Voice Message) ကို နားထောင်ထားတာ။ အခု အိမ်မှာပါ အပတ်အကုပ် နိုင်ပြမှ ဖြစ်မယ်' ဟု တွေးကာ ရင်ဘတ်ထဲက ယောက်ျားမာန်ကို အစွမ်းကုန်ဆွဲတင်ပြီး အသံကို သေမင်းတမန်လို ခပ်ထန်ထန် ဟိန်းဟောက်လိုက်သည်။ "မအိပ်သေးဘဲ ဘာထိုင်လုပ်နေတာလဲ! ငါ့လွတ်လပ်ခွင့်ကို လာမပိတ်ပင်နဲ့။ ငါ ဘယ်အချိန်ပြန်ပြန် မင်း ဝင်စွက်ဖက်ခွင့်မရှိဘူး။ ငါ့မှာလည်း ယောကျာ်းသား မာနရှိတယ်၊ သိက္ခာရှိတယ်။ နောက်တစ်ခါ ငါ့ကို ဒီလို မျက်နှာသေနဲ့ လာမစောင့်နဲ့၊ စိတ်ကုန်လာရင် ကွာရှင်းပြစ်လိုက်မှာနော်!" စက္ကန့်ပိုင်းလောက် တိတ်ဆိတ်သွားသည်။ ကောင်းကင်က မိုးကြိုးသံ ဝုန်းခနဲ မြည်သွားချိန်တွင် အမှောင်ထဲက ဖြည်းဖြည်းချင်း ထရပ်လိုက်သည့် သူမ၏ လက်ထဲ၌ "အမဲရိုးတင်တဲ့ ငရုတ်ဆုံထဲက ကျောက်ငရုတ်ကျည်ပွေ့ကြီး" က ကပ်ပါလာတာကို မြင်လိုက်ရသည်။ သူမက သွားကို ကြိတ်၊ မျက်မှောင်ကြီးကို ကုပ်ပြီး သွေးအေးအေး လေသံနှင့် မေးလိုက်သည်။ "နင်... ခုနက ဘာကို ဖြတ်ချပြီး ဘာလုပ်မယ် ပြောလိုက်တာလဲ ရဲလင်း? အသံလေး နည်းနည်း ထပ်ကျယ်ပေးပါဦး။" ထိုအချိန်တွင် ကျွန်တော့်မျက်လုံးထဲ၌ ကမ္ဘာပျက်ကပ်ကြီးကို မြင်လိုက်ရသလို ခံစားလိုက်ရသည်။ ရဲရင့်တောက်ပြောင်နေသော မျက်ဝန်းအစုံက ချက်ချင်း မျက်ရည်အဝိုင်းသားနှင့် အရည်လည်သွားပြီး၊ ဒူးနှစ်ဖက်ကလည်း အပ်ချုပ်စက် နင်းနေသလို တဆတ်ဆတ် တုန်ခါလာခဲ့သည်။ သူမလက်ထဲက ငရုတ်ကျည်ပွေ့ကြီး၏ အလေးချိန်ကို ခန့်မှန်းရင်း တံတွေးကို ၃ ချက်ဆင့်ပြီး ခပ်မြိုချလိုက်ကာ... ချက်ချင်းပဲ ကြမ်းပြင်ပေါ် ဒူးထောက် ဖင်ထိုင်ချ၊ လက်အုပ်လေး ချီလိုက်ရင်း - "ဟို... ဟိုလေ မိန်းမရယ်...။ ကိုယ်... ကိုယ် ပြောတာက... အခုတလော ခေတ်က မကောင်းတော့ အိမ်ထောင်ရေး သာယာအောင် လင်မယားချင်း စိတ်ဆိုးဒေါသတွေကို ရင်ထဲကနေ အေးအေးဆေးဆေး 'ဖြတ်ချ' ပစ်လိုက်ရအောင်လို့ပါ။ ပြီးတော့... မိန်းမ တစ်နေ့လုံး အိမ်လုပ်ငန်းတွေ လုပ်ရတာ ပင်ပန်းနေမှာစိုးလို့ ညောင်းနေမှာစိုးလို့ ကိုယ်အခုပဲ နှိပ်ပေးပါရစေလို့ ပြောတာပါ မိန်းမရယ်... ဟီး... ငရုတ်ကျည်ပွေ့ကြီး ချလိုက်ပါနော်..." ပြောပြောဆိုဆိုနှင့် ငရုတ်ကျည်ပွေ့ကြီးကို ဆိုဖာပေါ် ဝုန်းခနဲ ပစ်ချလိုက်သည့် သူမ၏ မျက်စောင်းအောက်တွင် ရဲလင်းတစ်ယောက် ဖိနပ်ကို လက်ကကိုင်ကာ ရေချိုးခန်းထဲ အမြန်ပြေးဝင်ပြီး ညသန်းခေါင်ကြီး အဝတ်လျှော်ကန်ရှေ့တွင် ဒူးထောက်ကာ မိန်းမဖြစ်သူ၏ အတွင်းခံများအပါအဝင် အဝတ်တစ်ပုံကြီးကို ငိုယိုပြီး လျှော်ဖွတ်ပေးလိုက်ရပါတော့သည်။ ခေါင်းထဲတွင်လည်း....

"တစ်လောကလုံးကို စိန်ခေါ်ခဲ့တဲ့ ငါ့မာန... မိန်းမလက်ထဲက ငရုတ်ကျည်ပွေ့ရှေ့မှာတင် အစအနရှာမရအောင် ကြေမွသွားခဲ့ရတယ်ဗျာ..."

ဟု အဖန်ဖန်တလဲလဲ တွေးနေမိခဲ့ရပါတော့သည်။ #Khun #Comedy #Angél_Alphá@mirror148

သွေးရောင်လွှမ်းတဲ့ခေတ် အလံလွှင့်ဖို့ ရောင်နီတို့ သွေးစို့ဓားကိုယ်စီ။ လျင်မြန်အောင်ပြေး တို့မနှေး အဝေးကခေတ်ဆီ။ တို့ပြန်ရှာမိ အတိတ်၏ လွှမ်းတိရွှေရောင်ခြည်။ ခေတ်နှင့်စနစ် ပြောင်းပြန်ဖြစ် လက်သစ်သွေးရောင်နီ။ အနာဂတ်ဝယ် ဘယ်မှာကွယ် ရှာဖွယ်မကောင်းသည်။ ရာစု-၂၁ရာစု ရေးသူ-အံ့လွန်းပျို အမျိုးအစား-‌သံပေါက်

ကဗျာ ဆရာ ကဗျာဆရာ၊စာရေးတာသည် ဥစ္စာမမက်၊ဉာဏ်များထက်အောင် သူဆက်ရေးကာ၊လူငယ်ဟာလည်း ကဗျာစာကြောင့်၊လမ်းမှန်ဖြောင့်လို့ ရောင့်ရဲတတ်လေ။ ငါဆရာဟု၊‌မောင်းတိုင်းထုလို့ အတုယူလျှင်၊လမ်းဘေးတွင်သာ ‌အရင်‌တောင်းစား၊အာဏာအားလျှော့ အမှားပြင်ပေး၊လေ‌သံအေးနှင့် ဖာထေးအမှား၊ဆရာကားမှာ အများကိုးကွယ်ရာဖြစ်၏။ ရာစု-၂၁ရာစု ရေးသူ-အံ့လွန်းပျို အမျိုးအစား-လင်္ကာ

ငှက်လွှတ်လိုက်တာမဟုတ်ဘဲ လက်လွှတ်လိုက်ရတာပါ။ လွတ်မြောက်သွားတာချင်းအတူတူ သူကပြန်မ‌လာတော့ဘူး။ -အံ့လွန်းပျို

စိမ်းကားခြင်းမှာ နေသားတကျပါပဲ။ သူစိမ်းအဖြစ်ကနေ သူစိမ်းပြန်ဖြစ်သွားတဲ့ ဆက်ဆံရေးတွေဟာ အစိမ်းသက်သက်..။ ဥပေက္ခာတရားမှာ ကိုယ်ချင်းစာစိတ်ပါရင် ဘယ်လောက်ကောင်းမလဲ။ -အံ့လွန်းပျို

ပန်းတစ်ပွင့်က အရှုံးတစ်ခုနဲ့ ညီမျှခဲ့ရင် ငါဟာ အရှုံးကို လွယ်လွယ်နဲ့ ပေးတတ်တဲ့ လူညံ့မဟုတ်ဘူး။ မင်းကေသာထက်မှာတော့ ပန်းတွေဝေပါစေ ခင်...။ -အံ့လွန်းပျို

နွေးထွေးပါစ ဆုတောင်းပါမည်၊ ဒေါင်းစစ်သည်သို့ ရင်စည်အတွင်း၊ နှလုံးထွင်းလျက် သင်းပျံ့ပါစေ၊ ရေစင်အေးမြ ဘဝလှကို၊ ပိုင်ရပါစေ ကြာဖူးငယ်မျှ၊ ပွင့်ထုံကြွလို့ အများငြိမ်းချမ်း၊ ဆွတ်ယူလှမ်းသူ တမ်းတမှုနှင့် နွေးပါလေ။ ရာစု-၂၁ရာစု ရေးသူ-အံ့လွန်းပျို အမျိုးအစား-လင်္ကာ

မွေးနေ့ဆုတောင်းကဗျာစာစဉ်

ယနေ့ ၁၉ရက် ၆လ ၂၀၂၆တွင် ကျရောက်သည့် ဒေါ်အောင်ဆန်းစုကြည်၏ အသက်၈၁နှစ်မြောက် မွေးနေ့ရက်မြတ်၌ ကျွန်ုပ်တို့ ကဗျာဗဟိုပြု စာပေကလပ်စည်းမှ မွေးနေ့ဆုတောင်းကဗျာများကို ကဗျာစာစဉ်အနေနှင့် တင်ပြပေးသွားမည်ဖြစ်သည်။ ‌ သို့ဖြစ်ပါ၍ အမေစုအတွက် ‌မွေးနေ့ဆုတောင်းပေးလိုသော ဆန္ဒရှိသူ မည်သူမဆို ပါဝင်နိုင်ကြောင်းပြောကြားရင်း အမေဒေါ်အောင်ဆန်းစုကြည် မွေးနေ့မှစ အသက်ရာကျော်ရှည်ပါစေ၊ အနာရောဂါကင်းဝေးပါစေ ဟု ဆုတောင်းမေတ္တာပို့သလိုက်ရပါသည်။ ကဗျာစာမူပိတ်သိမ်းချိန် - ယနေ့ည၉နာရီ ပေးပို့ရန် - @Alp_ll2010

တင့်တယ်လှစေ အမိသခင် အမိနိုင်ငံ၊ ရွှေရောင်ဟန်နှင့် ဂုဏ်ပန်လှရန်၊ ဒေါင်းသွေးထန်ကာ မွမ်းမံကြိုးစား၊ သူတို့တားမည် ခါးသီးအမှန်၊ လက်မခံလည်း တို့စံသခင်၊ ဤအရှင်အား ဘုရင်ကဲ့သို့၊ နှလုံးပို့မည် မြင့်မြတ်သည်ထက် တင့်စေသား။ -အံ့လွန်းပျို

#poetry_series #A_poetryhub #literary_club

Happy birthday mother How are you mother. Everyday we miss you mom.I guess all sons and daughters feels the same way. It doesn't matter how old you get. We'll always worry for our mother. It's been 5 years since I've been heard her voice. We don't know how she is (or) the condition she's in (or) even if she's still alive . We simply want to proof of life as a Children. We want to know our mother is alive. I think all sons and daughters can understand that. #Kim

“၂၀၂၆ ခုနှစ် ဇွန်လ (၁၉) ရက်နေ့တွင် ကျရောက်သော အမေဒေါ်အောင်ဆန်းစုကြည်၏ (၈၁) နှစ်ပြည့် မွေးနေ့အခါသမယမှစ၍ ကိုယ်ကျန်းမာ စိတ်ချမ်းသာ၍ အသက်ရှည်ပါစေကြောင်း လေးလေးနက်နက် ဆုမွန်ကောင်းတောင်းပေးလိုက်ရပါတယ်ခင်ဗျာ အမေ၏ မေတ္တာ၊ သတ္တိ၊ ဇွဲလုံ့လနှင့် အနစ်နာခံစိတ်တို့သည် ပြည်သူလူထုအတွက် အားတက်ဖွယ် အလင်းရောင်တစ်ရပ်အဖြစ် အစဉ်အမြဲ တည်ရှိနေပါစေ။ မည်သည့်အခက်အခဲ၊ မည်သည့်စိန်ခေါ်မှုများကိုမဆို ကျော်လွှားနိုင်သည့် ခွန်အားနှင့် စိတ်ဓာတ်ကြံ့ခိုင်မှုများ အမြဲတမ်း ပြည့်ဝနေပါစေ။ မွေးနေ့မှစ၍ နောင်လာမည့်နေ့ရက်တိုင်းသည် ကျန်းမာခြင်း၊ ချမ်းသာခြင်း၊ စိတ်အေးချမ်းသာယာခြင်းနှင့် မင်္ဂလာအပေါင်းတို့ဖြင့် ပြည့်နှက်နေသော နေ့ရက်များဖြစ်ပါစေ။ အမေကို ချစ်ခင်လေးစားကြသော ပြည်သူများ၏ မေတ္တာနှင့် ဆုတောင်းမေတ္တာများသည် အစဉ်အမြဲ အားအင်ဖြစ်စေပြီး ကောင်းကျိုးမင်္ဂလာအဖြာဖြာတို့ကို အမေရရှိနိုင်ပါ‌စေ။ အသက် (၈၁) နှစ်ပြည့်မှသည် နှစ်ပေါင်းများစွာ ကျန်းမာစွာဖြင့် အသက်ရှည်တည်တံ့ကာ မေတ္တာ၊ ကရုဏာ၊ ဉာဏ်ပညာနှင့် ငြိမ်းချမ်းခြင်းတို့၏ အရိပ်အာဝါသအောက်တွင် သာယာအေးချမ်းသော နေ့ရက်များကို ပိုင်ဆိုင်နိုင်ပါစေကြောင်း၊ မွေးနေ့အထူးမင်္ဂလာအဖြစ် အလေးအနက် ဆုမွန်ကောင်းတောင်းအပ်ရပါတယ်ခင်ဗျာ Happy 81st Birthday, Mother Suu. May you be blessed with good health, peace, strength and longevity. With deepest respect and loving-kindness, I wish you a blessed and peaceful life ahead. Happy Birthday, Amay Suu.” #𝐘𝐚𝐦

လူ့လောကမှာနေတတ်ရင် နေပျော်ပါတယ်။ ဖြစ်ချင်တာမှန်သမျှ ဖြစ်မလာတာကစလို့ မင်းကို မပိုင်ဆိုင်ရတာအဆုံး ကိုယ့်အတွက် ပျော်စရာပဲ။ -အံ့လွန်းပျို

ကဗျာ အံ့ဩလွန်းလှ သူ့ဘဝ သူမှခုံမင် ကဗျာအင်။ စာပေရေးသား ကဗျာများ ဓားသွားထက်လျှင် ကလောင်ယဉ်။ မြတ်နိုးမိရာ လူကိုသာ ပေါင်းကာတွဲချင် သူ့စိတ်တွင်။ သူ့လက်ရာ၏ ကာရန်ထိ အက်တိစာစဉ် ပြိုလဲသွင်။ လူတို့စိတ်ဓာတ် မြင်ရလျက် အခက်တွေ့ဉာဉ် ပျက်သုဉ်းနှင်။ ရာစု-၂၁ရာစု ရေးသူ-အံ့လွန်းပျို အမျိုးအစား-သံပေါက်

ဖြစ်လွယ်ပျက်လွယ်နေတဲ့ လောကထဲ ငါဟာမင်းအတွက် တစ်ဘဝစာလူတဲ့လား ခင်။ မင်းရဲ့ ခဏတာတွယ်တာခြင်းမှာ ငါက တစ်ဘဝစာနစ်နာပေးရဦးမယ်။ -အံ့လွန်းပျို

မေတ္တာဆိုတာ တကယ်မရှိဘူးလို့ ပြောခဲ့သူဟာ မေတ္တာမျှမယ်ကြံတော့ နောင်တသာရခဲ့ပါတယ် ။ ခိုလှုံစရာ ရင်ခွင်မရှိတဲ့ညတွေမှာ ကျွန်တော်ဟာ အသက်ကို သိပ်သတိရတယ်။ -အံ့လွန်းပျို

လောကတစ်နေ့တာ မင်းလွင်မြူခိုး အာကာစိုး၌ အုပ်မိုးဖြန့်ကာ ဒေါင်းဖန်ဝါကို ဖုံးကာကွယ်လည်း အစွမ်းနည်း၍ သူလည်းမသန် အချိန်တန်တော့ ဒေါင်းဖန်ဝန်းမှာ ‌သူ့နေရာယူ ရောင်ဝါကွန့်မြူး အရုဏ်ဦး။‌ သူရကံဆက် ဝေယံထက်ဝယ် ဝင်းလျက်ထိန်သာ ရောင်ခြည်လွှာကို ဖွင့်ကာဖြန့်ကျက် တစ်ပြိုင်နက်ဝယ် တံလျှပ်တို့ထ ဟုန်းဟုန်းကြွလို့ မဟိီမြေမှာ မီးပမာလောင် သာချည်းပူသည့် နေ့မွန်းတည့်။ မှောင်ရီတဝါး ညနေများ၌ ငှက်ကြားတို့သည် တေးများသီ၍ ပျံချီကြချိန် လေပြေငြိမ်၍ တိမ်ယံများသည် ပုစွန်ဆီသွေး ပန်းချီသဖွယ် အလှကြွယ်လို့ နေစွယ်မာန်ကျိုး နေဝင်ရိုး။ သန်းခေါင်ယံည လွန်ဝင်းပသည့် ငွေလမင်းသည် ဝင်းဝါထည်၍ ဆေးရည်မကုန် ‌အလှစုံရာ ဝိုးမှုန်တဝါး ကြယ်စုများလည်း နဂါးငွေ့တန်း ဖြူရောင်ဆမ်း၌ ‌သန်းခေါင်ယံည မှုန်ပြပြ။ အချိန်တန်တော့ အိမ်ပြန်ကြရသည်တကား။ -ဒေါင်းနက်

ကျေးလက်ညာချီ ချစ်တဲ့သူငယ်လေ သူငယ်ချင်းကောင်း ယောက်မတို့လေ။ ကျေးလက်အညာ၊ တောရွာဓလေ့ တွေ့ဖူးစရှင်။ မတွေ့ဖူးလို့ တွေ့ဖူးလိုလျှင် ရွှေငင်စပါး၊ ပေါများစနှင့် မြရည်သစ်ခက်၊ စိမ်းဖျတ်စနှင့် စမ်း‌လှရွှင်အေး၊ ပြုံးဆေးစနှင့် ချစ်ဖြင့်ဆင်မြန်း၊ ကျေးလက်ပန်းတည့်။ တောမူထုံးတမ်း၊ ကျေးသံလွမ်းခါ နာဖူးစရှင်။ ကြားနာဖူးဖို့ နာဖူးလိုလျှင် ရွက်ကိုကြွေချီ၊ ချွေးသီသီနှင့် ‌လေပြည်ဆောင်တိုင်၊ ရေအိုင်အိုင်နှင့် ချမ်းလှိုင်ပြည့်ဝ၊ အေးမြမြနှင့် နှစ်လရာသီ ပြောင်းလဲချည်တည့်။ ချစ်ညာဇာတ်လမ်း၊ ဝမ်းထက်မေတ္တာ ရှာဖူးစရှင်။ မရှာဖူးလို့ ရှာတွေ့လိုလျှင် မောင့်ရင်ချစ်ဦး၊ ခင်ပျိုထူးကို ချစ်ရူးသူမှာ၊ မြေယာကွက်ငယ် ယှက်နွား‌အိုနှင့်၊ ချစ်သူလင့်ဖို့ တောင်းလို့စမေး၊ ‌နှင်ရသေးကို မနှေးနှုတ်ချက်၊ တင်းကြော‌ဆက်သည် ကျေးလက်နံ့သင်းပါဘိလေး။ ရာစု-၂၁ရာစု ရေးသူ-အံ့လွန်းပျို အမျိုးအစား-အိုင်ချင်း

ကဗျာစာစဉ် (၂) - အက္ခရာများ

မည်သည့်ကလောင်ရှင်မဆို လွတ်လပ်စွာ ပါဝင်ရေးသားနိုင်တာကြောင့် ခံယူချက်မတူတဲ့ အက္ခရာကလောင်ရှင်တွေကို မျှော်လင့်လျက်ရှိပါတယ်။ စာဖတ်သူများအားလုံး ပူးပေါင်းပါဝင်ပေးကြဖို့ ဖိတ်ခေါ်လက်ကမ်းလိုက်ရပါတယ်..။ ကဗျာစာမူပိတ်သိမ်းချိန် - ၁၄ရက်နေ့ ည ၉နာရီ ကဗျာစာစဉ်အတွက် ကဗျာစာမူများကို @Alp_ll2010 ဒီအကောင့်ဆီ ပေးပို့နိုင်ပါတယ်ခင်ဗျ။ -ကဗျာဗဟိုပြု စာပေကလပ်စည်း #poetry_series #A_poetryhub #literary_club