السّدم

‏ما أعترضت استغفرالله أنا عبدٍ خشوع ‏أعرف أن الموت حق ولحدٍ يجهله ‏تبت ياربي بعد ما اذنبت وأعلنت الخضوع ‏أعذر الي ودع البارحه خيرة هله

‏اسأله يـا قلب للميّت بعد موته رجوع؟ ‏و اسأله لو مـارجع يا قلب نقدر نوصله؟ ‏واسأله للقبر مفتاح معه باب و طلوع؟ ‏وان تعذّر قل له مُجرد _ مسألة

‏صاح له قلبي وصاحت معه كل الضلوع ‏والحنايا من عناء الصوت جاته تسأله ‏هو صحيح الموت يا قلبي أخذ وافي الطبوع؟ ‏هو صحيح العُـمر عنده _ مُجرّد مرحلة ؟

‏هزني يوم الأحد في الصبح علمٍ يروع ‏ آه ياليت الأحد رجل والله لأقتله ‏ ‏انطفت في ليلته شمعة ولا كل الشموع ‏لا جزاه الله بالخير الهم ما اثقله

افزعي لي ياعيوني وجودي بالدموع ‏ لاتشحي على من فقد خيرة هله ‏وأنحني ياهامه الشعر له في خضوع ‏و أنصفي من له في القلب أعلى منزله

الوتر

‏كتبت القصيد اللي تلافت له الارقاب ‏وغنييت للذكرى وغنيت للماضي ‏كتبته لعينك وادري ان الهوى غلاب ‏عسى من سحابك ينبت العشب بفياضي ‏لو ان الغرض هذا تردى وهذا طاب ‏ملينا الصحايف لو يبي يزعل الراضي ‏اذا انه ينال اعجابك انتي شبي باعجاب ‏هل المحزم المليان والمحزم الفاضي

‏فتانة الحسن مدري ليه طول الجدال ‏اللي غيابه حسب رغبتْه ليه اعذله ‏اعتقت كل الملام ولابقا لي مجال ‏ولاعاد عندي شعور لمن بغاه ابذله ‏للحب عمرٍ سنينه معك راحت طوال ‏ياليت عمره قصير ولا بلغت ارذله ‏ان مرك اسمٍ بتبطي مامحته الليال ‏قولي خذلته وهو مايستحق اخذله

‏وجيه البشر من شكل واحد مهي باشكال ‏ياكثر الوجيه ووجهك الفارق لحاله ‏على مثل وجهك ينبنى الشعر والامال ‏وفي عينك احيا لو يقولون قتاله ‏قبل لاتفل مجدلٍ ماعليه جدال ‏هو الليل قبل الشمس تشرق وتغتاله ‏ماعرف الحسد لكن على عنقك السلسال ‏حسدته على طيب الاقامة والاطلاله

عرفت بجيتك أن للحياة ألوان ‏ياليت أن جيتك ياضحكتي بدري ‏بعثك الله شعور يبث الإطمئنان ‏كأنك تحيي الآمال في صدري

‏"أنت اللي لك لبيه من قلب صدوق ‏يوم غيرك مايحصل سوى كلمة هلا"

ترى التغلي بين الأحباب غربال ولا يبري الذمة كثر التجافي تعال نقعد والمشاريه تنقال بين العيون وبين حضن الملافي إن كان في خاطرك شرهات وآمال هات الزعل كله وعِف وعوافي والله ما أرخصتك ولا هنت بالبّال حبك بصدري مثل ماكنت صافي

"عفى الله عن مدى الغيّ البعيد و ذكريات الطيش ‏ما دامك سلوة العمر الحزين و عافية بالـه"

"نوب عقلي ينبذ أهل التمادي والفساد ‏ونوب رغباتي بليس إيتولّا عرشها"

"أقرب من حدود الوهم وأبعد من حدود اليقين لا قاطعٍ فيك الامل ولا لي بك رجاء"

‏" ياحزينة " كل الأفراح قيد الإنتظار ‏لين تبتسمين و تطيب أحاديث السمر ‏ما يليق بـ خدّك الغضّ دمع الإنكسار ‏ دمعك أول دمع يمشي على سطح القمر ‏آمري و أخطي علي .. و علي الإعتذار ‏أنتي عينك حرف عطف و جمالك فعل أمر

كساك النور من لون الضحى يا عودها سربال تبارك من وهب ذيك الوصوف وجل خالقها مهاً بين الصبايا لا مشت تمشي وهي تختال فريدة زين كن اللّه عن التلعات فارقها ملاها سحر بُعد أقراطها عن موضع السلسال سماويّة حسن حتى المراية ما تصدّقها غزالية معنّق فاتنة مبسم عريبة خال يا سلسال الذهب وش قيمتك لولا معنّقها ! يا قلبي ما قدرت تكون دون اللي تبي حيال بعد بالغت في تقدير الأشياء حسرتك ذقها ولا تندم على الماضي ولا تبكي على الأطلال مثل ما الشمس مغربها هناك هناك مشرقها عرفت إن الخسارة في العمر وإن العمر زوّال يعيّشنا وجود أحلامنا لو ما نحققها وش الروض الخضر لولا السحاب المغدق الهطّال ! وكلمة مرحبا من غير لهفة عين تسبقها ليال الوصل لو طالت قصيرة والوله قتّال يا كم لحظة فرح كنا بعّز الضيق نسرقها نهلت الحب صافي من غرام الناهد المكسال وشفت " أحبك " مْن عيونها من قبل تنطقها خذت قلبي وصارت ملهمة شعري ورأس المال تركت أجمل عشيقاتي بعد ما صرت عاشقها لها مني على عرش الترف تجلس وهي تختال وأجيب أحلى القصايد بين لبتها وعاتقها

‏اليا حصل من بنات الريح شرواها ‏ما عاد أبي غيرها . . لو إنها قبله ‏ريميةٍ هازها . . التفّاق و أخطاها ‏و عقب التذيّار لاذت في شنق عبله ‏أسمى من الغيمة الغـرّا و منشاها ‏و أطهر من الرايح اللي صادق وبله ‏أتعبني الشوق تالي الوقت و أبكاها ‏يا جعل يسقى قبل لا تلبس الدبله ‏فارس الحشار

أيّامنا ماهي بماضي و تذكار عشان تكفيني معك ذكرياتي ما شفتها في يوم صوره و إيطار دعوه وعيّت لا تفارق شفاتي عليك قلبي عايش بنفس الاصرار أكثر من اصراره على أُمنياتي محبّتك تبقى رغم كل ما صار من أجمل اقدار العُمر في حياتي