1 810
Підписники
-324 години
-187 днів
-6830 день
Архів дописів
1 810
සාර්ථක වීමට නම්...
සාර්ථකත්වයට පත් කිසිම කෙනෙක් වෙලාව එනතුරු බලා සිටියේ නැත. ඔවුන් කිසිම වැඩක් කල් දැම්මේ නැත. පස්සේ කරන්නම් කියා සිතුවේත් නැත. වැඩ කල් දමනවා කියන්නේ වෙලාවට වැඩ නොකරනවා කියන එකයි. එයින් අපට විශාල අවාසියක් සිදු වේ. සිත සිතා ඉන්න ගියොත් හැමදේම පස්සට යයි. අප කළ යුත්තේ මේ දැන්ම ආරම්භ කිරීමයි. ඔබට අවශ්ය දේ දැන්ම පටන් ගන්න. හෙට වෙනතුරු කල් දැමීමට අවශ්ය නැත. සාර්ථකත්වය ලැබෙන්නේ එහෙම ක්රියා කරන අයටයි. ඒ සඳහා ඔබ තුළ උනන්දුව තිබිය යුතුය.
උනන්දුව කියන්නේ යමක් සාර්ථක කරගන්න, විභාගයකින් ජය ලබාගන්න, තරගයක් දිනාගන්න දැනෙන ආශාවයි. හැම දෙයක්ම සාර්ථක වන්නේ උනන්දුව තිබෙන විටයි. උනන්දුවෙන් තොර සාර්ථකත්වයක් ලෝකයේ නැත.
මිනිසා තුළ තිබෙන හැකියාවන් අතර ප්රමුඛතම හැකියාව අපට හිමි වී තිබෙන කල්පනා ශක්තියයි. අද නවීන ලෝකයේ සොයාගෙන ඇති සියලු දේ සොයාගෙන ඇත්තේ මිනිසාගේ එම කල්පනා ශක්තිය තුළින්ය. උසස් නිර්මාණශීලී හැකියාවන් ඒ තුළින් ඇති කර ගත හැකිය. එබැවින් අප අවධානය යොමු කළ යුත්තේ එවැනි වටිනා ශක්තීන්ගෙන් නිසි ප්රයෝජන ලබාගෙන අපේ ජීවිතයට ආලෝකයක් ලබා ගැනීමටයි.
බොහෝ දෙනා කිසිම දෙයකට උනන්දු වන්නේ නැත. උත්සාහ කරන්නේද නැත. එවිට කිසිම දෙයක් තමන්ට කරගන්නට නොහැකි වේ. ඇතැම් අය රැකියාවකට බැඳෙන්නේ ලිපිකරුවෙකු ලෙසය. ඔහු විශ්රාම යන්නේද එම ලිපිකරු ලෙසමය. ඔහු උසස්වීමක් ලබා නැත. ඒ සඳහා උත්සාහ කරලත් නැත. පුංචි කඩයක් ආරම්භ කරන සමහර අය ජීවිතය පුරාම එම තත්ත්වයේම සිටිති. ඒ සඳහා හේතුව කිසිම දෙයක් ගැන සොයා බැලීමක් නොමැති වීමය. උත්සාහ නොකිරීමය. කිසිම දෙයක් නිකම්ම සිදු වන්නේ නැත. හැම දෙයක්ම ලබා ගැනීමට නම් අප උත්සාහ කළ යුතුය.
බොහෝ අය ඇසුරු කරන්නේ නැගී සිටින අය නොව වැටී සිටින අයයි. එවිට ඒ අයගෙන් තමන්ට ආදර්ශයක් හෝ උපදේශයක් ලැබෙන්නේ නැත. අප ඇසුරු කළ යුත්තේ දක්ෂ අය, බුද්ධිමත් අය, දියුණු අයයි. ඒ වගේම හොඳ ගුණ යහපත්, බුද්ධිමත් හිතමිතුරන් ඇසුරු කළ යුතුය. තමන්ද හොඳ කෙනෙකු විය යුතුය.
කපුටන් රංචුවක ගිරවෙක් සිටිනවා දැක තිබේද? ස්වභාවධර්මයේ නීතිය එයයි. යහපත් අය එකට එකතු වේ. නරක අයට එකතු වන්නේත් එවැනිම අයයි. සොරකම් කරන අය එකතු වන්නේ සොරකම් කිරීමට කැමති අය සමඟය. අපරාධ කරන කණ්ඩායම්වල සිටින්නේත් එවැනිම අයයි.
ඔබ මේවා තේරුම්ගෙන ජීවත් විය යුතුය. තමන්ගේ යහපත ගැන අවංකව සිතා බැලිය යුතුය. ඔබට හොඳ මඟ පෙන්වන, ඔබව දිරිමත් කරන, සුබවාදී අදහස් ඇති අය තමයි ඇසුරු කිරීමට හොඳ. එවැනි අය ඇසුරු කළොත් තමයි සාර්ථක ගමනක් යාමට පුළුවන් වන්නේ.
හොඳ යහපත් මනුෂ්යයෙකු වශයෙන් අප තුළ යහපත් පෞරුෂත්වයක් ගොඩනැඟී තිබිය යුතුය. දියුණුවට, සාර්ථකත්වයට යහපත් පෞරුෂය අවශ්යය. පෞරුෂය කියන්නේ බාහිර පෙනුම පමණක් නොවේ. පිළිවෙළට ඇඳුම් පැළඳුම් තිබීම අවශ්යය. එහෙත් සමාජය තුළ ගලා එන සියලු විලාසිතාවලට ගැති නොවිය යුතුය. හොඳ පෞරුෂයක් ඇතිවන්නේ ප්රථමයෙන් යහපත්, සුබවාදී සිතුවිලි අදහස් ඇති අයෙකුගෙන්ය.
සුබවාදී නොවන අය බාහිර පෙනුමෙන් අලංකාර කළාට වැඩක් නැත. බොහෝ අයගේ මුහුණෙන් පෙනෙනවා ඒ අයගේ වංක බව. කරන කියන දේවලින් පෙනෙනවා ඒ අයගේ තරම. අපේ වචන ඉතාමත් යහපත් ඒවා විය යුතුය. ඕනෑම චරිතයක ආභරණය තමයි කටින් පිට කරන වචන. යහපත්, සෞම්ය වචන භාවිතා කරන්නේ ඒවා අපේ යටි සිතේ පවතින විටයි. ගඳ ගසන, දුගඳ හමන විෂබීජ වැනි දුෂ්ට, අශිෂ්ට වචන සමහර අයගේ සිත් සතන්වල පිරී ඇත. ඔවුන්ගේ කතාවෙන් පිටවන්නේ එම විෂ දුමය. ඒවා තමන්ටත් අනුන්ටත් හානි කරයි. එතැන හොඳ පෞරුෂයක් නැත.
