سبيل الأطباء

المبالغة المبالغة في كل شىء هى سمة مهمة من سمات هذا العصر لا وجود للوسطيه على الإطلاق فالماتش الحلو هو حلو أوي أوي أوي واللاعب الماهر هو خطير فظيع مريع ومكان الفسحة الفلاني هو روعه روعه روعه والمطعم العلاني هو خيال خيال خيال والألعن المبالغة في السوء فحسام حسن لما يخسر يتشتم بأقبح الألفاظ ! والدكتور لما يحصل مضاعفات في حاله من حالاته يبقى حسبى الله ونعم الوكيل فيه انا بدعي عليه كل يوم ! ولما تنسى تقفل نور عربيتك في وش المدام اللي جايه قصادك يبقى الله يعميك زى ما عمتنا! المبالغه في الانفعالات بالمشاعر سواء بالسلب أو بالايجاب تأتي من انعدام الوسطية في المشاعر من كام يوم كنت بعمل عملية فتاق عاديه جدا ، الراجل دخل المستشفى ومعاه ٢٠ مرافق بلا مبالغه، وتحفز رهيب مع كل اه يتأوهها المريض .. لدرجة اني قلتلهم يا جماعة هو عامل قلب مفتوح؟ ايه كل ده تذكرت المريض الانجليزي الجميل اللي بيجي الصبح لوحده دون اى مرافق ويخرج من اوضة العمليات يشرب القهوة ويتحرك على رجله ويتمشى ويقولي ثانك يو دكتور ومن ملاحظة مئات المرضى اكتشفت ان المريض عندنا عنده مبالغه غير منطقيه في التعبير عن مشاعره وآلامه ما هو التركيب الفسيولوجي للإنسان الانجليزي والمصري واليوناني والمكسيكي كله واحد انما ليه يخرج المريض المصري من اوضة العمليات بيصوت، ليه الأم المصريه تجيب ابنها الطواريء ويكون يادوب عنده سخونيه وتصرخ ، ليه أب دخل بابنه مسخسخ شويه يقعد ع الأرض ويصرخ ويرتعش كمن اصابه الشيطان من المس ناس كتير هتقولي الانجليز باردين معندهمش مشاعر ولكن من عيشتي مع الانجليز عشر سنوات وبحياديه بحته وانا بقارن المبالغه في الانفعالات بين الانسان المصري والانجليزي اكتشفت اكتشاف مهم هو ان الانسان الانجليزي المنظم في تفكيره وخطواته وقراراته برضه منظم في مشاعره وانفعالاته الموضوع تربيه .. الطفل الانجليزي متربي في وسط اب وام منظمين في مشاعرهم فلا صراخ وقت الموت ولا انبهار غير مبرر بالمتكندرة الحجم الكبير من بلبن لا عويل وقت المرض ولا تأليه للدكتور فلان الفلاني فيه دكاترة كتير للأسف بيتم تأليهها .. في دكاترة معدوده شغالين لحد الصبح وبيعملوا ملايين نتيجة المبالغه الرهيبه في شطارتهم وكفائتهم في حين اغلب الدكاترة قاعدين ف البيت حاطين ايديهم على خدهم والدكاترة اللي شغاله مبيعملوش شىء خارق للي اتعلمناه ولكن سبحان الله ... ارزاق فعلا في الدول المتقدمه مفيش فرق بين دكتور ودكتور مفيش موضوع اشطر واحد واهم واحد الهدف ان كل الدكاترة تكون شاطرة .. اتربوا على كده وفاهمين كده ساقني قدري الى نادي الاطباء في الاسكندريه وللأسف اصبح سىء جدا .. لكنى فوجئت بمنظر معبر جدا .. كان فيه احتفال بأطفال في المدرسه ولقيت كمية اطفال غير طبيعيه كل واحد فيهم يحمل كاس وميداليه ذهبية .. وانفجرت ضاحكا اى لعبه هذه اللي كله فايز ومحدش خسران .. هى دي العقليه اللي عايشين بيها .. انا عايز اكون اشطر واحد واحسن واحد وافوز في حين العقليه اللي الغرب عايش بيها انا عايز اكون اشطر من نفسي في الماضي فقط وماليش دعوة بحد شتان الفرق المبالغه سمة من سمات العصر في مصر والوسطية سمه من سمات ديننا الحنيف .. الوسطية في المشاعر من أهم أركان المفهوم الكلي للوسطية ولن تكون وسطي إلا إذا تعلمت وتقربت إلى الله مقال روعة روعة روعة ... صباح الفل