تبسم را‌‌‌‌‌‌ډيو - خبر

نن د کندهار د سپین بولدک ـ چمن له لاري ۹۶ کډوالي کورنۍ چي د وګړو شمیر یې ۵۰۵ تنه کیږي خپل هیواد ته راستانه سول.

له تېرو څلورو ورځو راهیسي د کندهار د سپین بولدک ـ چمن د مازل ګلۍ بنده سوې. دغه لار د ناروغانو او نژدې کلیو د اوسېدونکو لپاره خلاصه وه، خو پاکستاني لوري د افغانستان لوري ناروغانو ته اجازه نه ورکول، ځکه افغان لوري بنده کړه.

د کندهار د معلولینو چارو ادارې د مشرتابه په امر له نژدې ۳۰ تنو هغه معلولینو سره مرسته وکړه، چي په تېرو جګړو کي یې د بدن غړي له لاسه ورکړي وه. هر معلول ته یو نیم لک افغانۍ ځانګړي سوي وې.

د امریکا د بهرنیو چارو وزارت وایي، له طالبانو سره خبرو اترو او تعامل ته چمتو دي. د دغه وزارت مرستیال ویاند وویل چې له طالبانو سره دا ډول خبرې د افغانستان او امریکا د ملي ګټو د ټینګښت لپاره ډېرې مهمې دي. هغه ټینګار وکړ چې دا تعاملات په دوامداره توګه د ترهګرۍ ضد هڅو پیاوړتیا او د بشري حقونو خوندیتابه برخه کې د طالبانو د تعهداتو عملي کېدو ته یو پلیټ فارم چمتو کوي.

‏د امريکا د بهرنيو چارو وزیر انتوني بلېنکن له سعودي عربستان او اردن وروسته اسرائيل ته سفر کړی دی. ‏بلېنکن به د دې سفر په ترڅ کې غزه کې د اوربند پلي کېدو او د يرغمل شويو کسانو د خوشې کېدو په اړه خبرې اترې وکړي.

نړیوال بانک له اقتصادي ناورین سره د مبارزې او په هېواد کې د اقتصادي پروژو د پلي کولو لپاره افغانستان ته ۸۴ میلیون ډالر مرسته منلې ده.

اروپايي ټولنې⁩ د اقلیم له بدلون سره د مبارزې په برخه کې له افغانستان سره ۱۵ مېلیونه یورو ځانګړي کړي دي.

د پنجاب ایالت په دیره غازي خان کې نامعلومو وسله والو د جهنګي په پوسته برید وکړ چې له امله یې اووه پولیس ټپیان شول. ‏تیره شپه د پیښور سره نزدي په ورسک رود سیمه کې هم د پولیسو یو مرکز د وسله والو تر برید لاندې راغلې .

په خوست ولایت کي درې تنه د نامشروع اړیکو او زنا په تور په عام محضر کي په درو وهل سوي.

‏د امریکا د بهرنیو چارو وزارت سیاسي معین «جان بس» په اسلام آباد کې د پاکستان بهرنیو چارو وزارت سرپرست «رحیم حیات قریشي» سره کتلي دي. دې لیدنه کې دواړو خواوو د سوداګرۍ، پانګونې او د سیمې د امنیت برخو کې د همکاریو پر زیاتولو ټینگار کړی. ‏«جان بس» تراوسه اسلام آباد ته د خپل سفر په اړه څه نه دي ویلي،خو د قطر په اړه یې ویلي چې قطر په افغانستان کې د امریکا استازیتوب کوي او ده یې له دې رول څخه د ملاتړ لپاره په دوحه کې د دې هیواد صدراعظم او بهرنیو چارو وزیر «محمد بن عبدالرحمن آل ثاني» سره کتلي دي.