سِحر الترتيب

غرفة النوم هي مكان الراحة بعد تعب اليوم ♥️ هي ادفى مكان في البيت كله 🌻🌞 عشان كده لازم نهتم بها جدا من حيث النظافة و الهدوء و الرائحة الحلوة 🌸💐🪻 و انا شخصياً ضد فكرة وجود تلفزيون في غرفة النوم 🤍 و ضد فكرة الامساك بالموبايل على السرير قبل النوم 🤍 و ضد فكرة ان الموبايلات تكون في الغرفة اثناء النوم 🤍 و اخيراً حاولوا تجددوا نظام الغرفة كل فترة و تغيروا السجاد و الستاير و الملايات بإستمرار 💛🌻🌻

بصوا أنا معنديش غسالة اطباق بس رأيي فيها انها مهمه جدا لاي بيت فيه اطفال و خصوصاً لو الام مش بتحب تغسل المواعين ممكن تكون مش مهمه في اول الزواج بس بعد الطفل الاول لازم تدخلي جمعية حتى لو ب 500 جنيه في الشهر و تجيبيها و خصوصاً لو عارفه نفسك انك مش بتحبي غسيل المواعين دي نصيحتي لاي حد يسألني مجرد رأي شخصي بتمنى لكم يوم كله حب 🧡😘

كنت في اولى ثانوي لما امي حبيبتي" الله يرحمها "مرضت و عندي 4 اخواتي اصغر مني (12و 8 و 6 و 4 سنوات ) و لازم اهتم بدراستهم و اكلهم و نظافة البيت و احتياجات امي المريضة و طلبات ابي "الله يحفظه " ف كان لازم حد يساعدني لان المسؤلية كبيرة عليا كـ طفلة 15 سنه ف كنت بلعب مع اخواتي لعبة الورق ، اكتب في كل ورقة ترتيب جزء صغير جدا في البيت مثلا ترتيب كنبه واحدة من كنبات المجلس او طربيزة او رف و هكذا ، كنت بجزء البيت كله بالطريقة دي و نقعد نلعب ( مش فاكرة اوي تفاصيل اللعبه ) و اللي يجي عليه الدور بيروح يختار ورقة و يرتب الجزء اللي عليه بسرعه جدا و يرجع و كانوا بيحبوا اوي اللعبة دي و هو ده الوقت المفضل عندهم في اليوم كله لاني بلعب معاهم 😇 و في نهاية اللعبه بيكون البيت اترتب و بيفضل نظيف لانهم نظفوه بايديهم ، و لحد الان فاكرين لي اللعبه دي واني كنت بلعب معاهم و انا في الاساس كنت بشغلهم 😂😂😂😍

🌼لازم نغير صابون غسيل المواعين كل يوم اول ما ندخل المطبخ ☀️ 🌼مينفعش نستخدم نفس الصابون يومين وراء بعض لأن الاكل العالق بالإسفنجة بيعفن و بيعمل بكتيريا 🦠 🌼و ياريت نعمل كمية صابون على قد استخدامنا اليومي 🧴 🌼و نغير الاسفنجه كل 3 شهور زي ما اتفقنا 👍🏻 🌼و يفضل ترك الإسفنجة ناشفة فترة الليل 🌼و ياريت كمان نستخدم الإسفنجة بنظافه ، و لو في اكل كتير لازق في المواعين نعمله بالفرشاة الاول 🌸💕 و الاختراع اللي في الفيديو ده بيحقق كل اللي بحلم فيه 😂

أنا عارفه ان فكرة ملئ الديسبنسر مملة و متعبة جدا ، في فكرة بنفذها في شغلي في التشطيبات من عشر سنين وهي اننا نأسس وصله مياه من الفلتر مباشرة على الدسبنسر ( المبرد ) و نأسس له صرف كمان في المكان اللي بنكون مخططين مسبقاً اننا هنحطه فيه في الشقة و في حالة انه متعملش حسابه في التاسيس فلو في امكانيه اننا نقرئه من الحوض او من الفلتر ممكن تخلوا و السباك يوصل لكم الفلتر عليه مباشرة و بكده هترتاحوا من التعب و الشيل

تركات طبية اتعلمتها يمكن تفيدكم 🌸🌸 1/ كلنا بنخاف جدا لما نيجي نحط القطرة في عيوننا بس لو حطيناها من طرف العين من برة ناحية ايدينا مش هنخاف ولا هنغمض عيوننا 👀 2/ لو أسنانك صغيرة زيي 😅 و بتعاني مع فرشة الأسنان و بتخلي اللثة عندك تنزف استخدمي فرشاة أسنان الأطفال بتكون صغيرة و لطيفة على الأسنان 🦷 3/ الشد العضلي اللي بيجي لما احيانا في رجلنا ( العضلة اللي تحت الركبة ) عشان تخليها تختفي بسرعه حركة ظهرك في اي اتجاه غير اللي انتي فيه وقت الشد هيختفي الشد العضلي فوراً 💪🏻 مساءكم عافية وهنا 🥰

خطوات التنظيف العميق للغرف بالترتيب 🔆❇️✅🪣🧽 : رجاءاً اتبعي الخطوات بنفس الترتيب ⚠️ *مثلا غرفة النوم* اولا: شيلي الملايه و أكياس المخدات عشان تغسليها و خرجي المخدات و البطانيات برة الغرفه ثانياً : شيلي السجاد نفضيه و طلعيه يتهوى في البلكونة ( لو شديد الاتساخ ابعتيه للدراي كلين يتغسل ) ثالثاً : شيلي الستاير اغسليها رابعاً : شيلي كل الاغراض من على التسريحة و الكمدينو و شماعه الملابس و اي مكان في الغرفة و لمعيها و خرجيها برة الغرفه . 💍🧢👛👓 خامساً: بعد ما الغرفة بقت فاضية تماما من اي حاجة صغيرة نبدأ تنفيض التراب نبدأ بالشباك و الباب و بعدها السقف و الحوائط ( بالزعافة ) ممكن نغسل الحوائط لو في وقت و صحة 😂 و اخيرا النجفة بعدها نمسح التراب من الأثاث ( الدولاب ، التسريحة ، الكمدينو ، ظهر السرير …) سادساً: نكنس الارض أنا بفضل بالمكنسة الكهربائية 🌸🌸 سابعاً: خلصنا كل التراب كده نبدأ تلميع ، نلمع الشباك و الباب و النجفة و الخشب و الرخام و الزجاج 👏🏻👏🏻 ثامناً : نمسح الارض وانا مش بقتنع غير بالمسح بالمساحه😇 تاسعاً: بعد جفاف الارض نركب الستاير و نفرش الملاية على السرير و نفرش المفارش و نرجع أغراضنا على التسريحة و الكمدينو ( الضرورية فقط و الباقي يترمي او نبعده ) و نفرش السجاد 😻✅💜👏🏻 🔆الخطوات تتعمل بالترتيب عشان تحافظي على تعبك و تخلصي بسرعه و بنظافة و دقة عاليه 🔆هذه الخطوات تنطبق على اي غرفة في البيت الاول نفضي المكان خالص من كل الاغراض و بعدها نبدأ خطوات التنظيف بنفس الطريقة حبي و تقديري لكِ على قرأتك المنشور للاخر 😻♥️

أشكال اطباق الايرفراير

نصيحة لما تشتروا ايرفرير متستخدموهاش غير لما تشتروا اطباق الايرفرير ( ورق الزبدة ) او السيليكون عشان الابرفرير بتتبهدل و الدهون بتلزق فيها و الدعك فيها بيجرحها و هتبقى حالتها حالة نصيحة مجرب صباحكم سكر 🩵

مفتقدة اوي احساسي و أنا طفلة لما كنا في السعودية كان عندنا حوش كبير بنطلع السجاد نغسله في الحوش و نفضل نلعب و نكتب اسمائنا بالصابون 😂 على السجاد و ندعكه و نفضل نتزحلق 😂🥰 كانت ايام حلوة اوي و الفرحة بتاعتها متتنسيش ابدا خسارة والله بيوتنا دلوقتي بقت عامله زي علب الكبريت مفيش فيها روح وراحت معاها كل الأنشطة اللي كنا بنعملها زمان واحنا اطفال مين مفتقدها زيي ؟؟ 😻💕

الرز اللازق في الحلة من تحت ده وجبه دسمة و مشبعه للعصافير و الحمام 🐤🐦 الكام رغيف اللي بايتين من امبارح و مش هتاكلوهم و هترموهم دول وجبة يومين للطيور 🐦🐤 بدل ما ترمي نعمة ربنا جهرها في طبق فويل او طاجن قديم و حطيها للعصافير و الحمام هياكلوا و تاخدي اجرين : 🔰اجر احترام النعمة و عدم رميها 🔰و اجر إطعام الطيور 💕 انقعي حلة الرز لحد ما الرز يطرى خالص و حطيه للطيور و العيش انقعيه في مياه 3 دقايق و بعدين صفي المياه و سيبه يطرى خالص و افركيه بايديك لحد ما يتفتفت خالص و حطيه للطيور 😻هتفرحي بصوت الطيور وهي بتغرد عند شباكك و ربنا هيزود الرزق و الخير في بيتك صدقيني عن تجربة 🦋♥️💕

طريقة سهله جدا لتنظيف النحاس في البيت ✅🌸

انجح فكرة أنا معتمداها في حياتي و حاسه انها متوافقه مع نفسيتي و مريحاني هي فكرة تقسيم الشغل .. اقسم الشغل اللي عليا عشان ميبقاش صعب ، واحس انه جزء بسيط هعمله بسرعه و يخلص .. لما بقسم الشغل برتاح و بعمله فعلياً .. و بخلصه ..♥️🤩 بس لما بحاول اعمله بدون تقسيم بتعب و ممكن افضل ايام كتيرة مكسله اعمله .. كان ممكن اكون قسمت الشغل على الايام دي و خلصته .. 🌼☺️ في ناس كتير بيعارضوا الفكرة دي .. و بيقولوا ان الشغل مرة واحدة على بعضه افضل .. طبعاً كله صح المهم الطريقة اللي تناسبك ، الطريقة اللي تخلي بيتك دائما نظيف ..😊💐

بوست مؤقت ⏱️ نفسي اوي اكبر قناتي 🥹 حد عنده افكار اكبر قناتي ازاي بأشخاص حقيقين مهتمين بفكرة القناة ؟ للتواصل @Bayrq_RED

لو عندك تكييف كارير هقولك على نصيحة هتخليكي توفري كهرباء كتير "دايما خلي المود بتاع التكييف على دراي" و هتلاحظي ان التكييف هيبرد المكان جداااا ف هترفعي درجة الحرارة لحد 28 و ممكن تطفيه كمان و بالتالي هتوفري كهرباء ⚡️ دي نصيحة قالها لي عامل صيانه شركة كارير و فعلا نفعتني جداً حبيت اشاركها معاكم تحياتي 💕🌸

في حاجة في الدنيا اسمها ريحة النظافة 🌸🌸 ريحة اللبس النظيف 💕 و ريحة البيت وهو لسه متنظف و ممسوح بمعطر الارضيات 💕 وريحة التلاجة و هي لسه مغسولة و متنظف كل اللي فيها 💕 وريحة الحمام وهو لسه مدعوك دعكة حلوة بالمنظفات و الديتول💕 ريحة المطبخ و هو لسه متنفض تنفيضة حلوة 💕 اللي مش بيشم ريحة النظافة في بيته و لبسه و جسمه فايته كتير اوي

بشوف ناس كتير بيسيبوا الاكل مكشوف نصيحة لازم تغطوا الاكل و المشروبات ، حتى لو هتسيبوه مدة قصيرة لان ممكن في اي لحظة يقع فيها اي حاجة و متناموش أبدا و الاكل مكشوف او حتى كوبايه المياه مكشوفه لازم تقلبوها بفكركم و بفكر نفسي بالحديث الشريف ان رسول الله صلى الله عليه وسلم قال: "غطوا الإناء، وأوكوا السقاء، وأغلقوا الباب، وأطفئوا السراج. فإن الشيطان لا يحل سقاءً، ولا يفتح باباً، ولا يكشف إناءً. فإن لم يجد أحدكم إلا أن يعرض على إنائه عوداً، ويذكر اسم الله فليفعل. فإن الفويسقة تضرم على أهل البيت بيتهم"🌸🌸

اولاً : حابه اشكركم على مشاعركم الطيبة و شكرا لكل اللي عزوني على الخاص تقبل الله دعواتكم ♥️♥️ ثانياً : حابه اتكلم معاكم في موضوع مهم من زمان نفسي اتكلم فيه بلاش تشتروا اي جهاز من شركة يونيون اير Unionaire لان منتجاتها سيئة جدا كخامة و خدمة بعد البيع سيئة و الضمان بتاعهم مش حقيقي و الفنيين معندهم ضمير و الادارة بتماطل في الشكاوي اللي بنقدمها الكلام ده عن تجربة شخصية عشتها مع اخت لينا من اهل غزة عايشة هنا في مصر مكنتش عارفه تتعامل معاهم و فوضتني اني اتعامل بدالها و في الاخر لما هددتهم اني اشتكيهم في جهاز حمايه المستهلك غيروا لها الجهاز بس دفعتهم جزء من تمنه ياريت تنصحوا كل اللي حواليكم بلاش يونيون اير

السلام عليكم ورحمة الله و بركاته اول مرة اكتب على قناتي من زمان اوي مش عارفة هو صح ولا غلط اني افضفض بس حابه افضفض معاكم لانكم جزء بحبه في حياتي و بدعي لكم دايما أنا اتعرضت لظروف صعوبة اوي السنه اللي فاتت دي زوجي وونسي في الحياة توفى ربنا يرحمه و يحسن اليه و يجمعني به في الفردوس الأعلى كانت صدمة كبيرة اوي عليا لانه توفى فجاءة و يوم العيد و الحياه بعده مبقتش زي ما كانت رغم مرور سنة كامله و اكتر الحياه بقت عبارة عن حروب مستمرة و محاكم و قواضي و وحدة لا يعلم بها إلا الله انا بحاول اتمسك بالحياه و اكون مؤمنة بحق و اكمل حياتي ، لازم كنت اخد وقتي و احزن و اعيش الحزن لانه شخص يستاهل احزن عليه العمر كله أنا دلوقتي بحاول ارجع اكمل شغلي كمهندسة و اكمل في كل الأنشطة اللي كنت بعملها في حياتي من قبل الوفاة بس اكيد محتاجة دعم خصوصا اني وحيدة تماماً لا زوج ولا أبناء و كل اللي حواليا مشغولين في حياتهم الخاصة ربنا يكون في عونهم جميعاً مقصروش معايا بس دي سنه الحياة انا بكتب عشان تدعموني معنوياً و تشجعوني اني اكمل في كل حاجة بدأتها في حياتي و محتاجة دعواتكم جداً بتمنى اكون مطولتش عليكم شكرا لوجدكم لحد دلوقتي في قناتي رغم تقصيري في النشر بحبكم جداً 💕