سِحر الترتيب

صباح الخير 💛 التنظيف في حد ذاته سهل جدا بس بيتوقف على طبيعه المكان اللي بتنظفيه لو بتنظفي مكان فيه حاجات قليلة هيبقى سهل عن لو بتنظفي مكان مليان كراكيب و حاجات كتيرة ملهاش فايدة ولا استخدام ، صح ولا ايه ؟ 🦋 لو بتستخدمي الحاجة و ترجعيها مكانها هيبقى التنظيف اسهل من لو بتنظفي مكان مفيهوش حاجة في مكانها ، صح ولا ايه ؟ 🦋 لو بتنظفي اول بأول هيبقى التنظيف اسهل من انك تكوني بتنظفي على فترات متباعدة ، صح ولا لا ؟🦋 لو حد بيشاركك في التنظيف هيبقى سهل ، بس لو انتي لوحدك بتتحملي المسئولية كاملة هيبقى صعب صدقيني 🦋 سهلوا حياتكم على نفسكم 💛

عدى نص شهر رمضان المبارك 🌸 بتمنى تكوني قدرتي توازني بين الطاعه و متطلبات الحياة في بيتك .. 💖 أنا عارفه الطريق مش سهل محتاج منك مجاهدة و معافرة كتير .. 🪻🪻 خليكِ عارفه إن الكمال لله وحده ♥️ و إن المرء مطلوب منه بس السعي و النتيجة بيد الله سبحانه وتعالى و إن المرء يؤجر على نيته يعني لو نويتي تصلي قيام الليل و مقدرتيش فانتي كده خدتي الاجر كامل 🌺 بنفس المبدأ ده المفروض نتعامل مع بقية حياتنا في بيوتنا و مع أبنائنا و أزواجنا ، لأنه من باب اولى ان نيتنا اننا نعمل حاجة دي تكفينا منحسش بالذنب لو مقدرناش نعملها 💖 فلا يكلف الله نفساً إلا وسعها أعانكم الله جميعاً على طاعته ☀️☀️ 🌻ملحوظة: أنا بتعمد منزلش اي محتوى على القناة طول شهر رمضان الكريم عشان ننشغل بالطاعه و العبادة فقط 🌹🌹 احبكم في الله ♥️🌻

بكرة ان شاء الله هيبدأ شهر رمضان المبارك 🌸🌸 كل عام وانتم بخير جميعاً 🌸🌸 إليك بعض النصائح : المشاركة حلوة و هتخفف عنك 🌜 من وجهه نظري المشاركة هي اعظم خطوة في تخفيف العبء عن الأم ، مفيهاش حاجة لو خليتي زوجك يقطع البطاطس او يلف السمبوسة او ينظف الطاولة او يصب العصائر ، و كذلك الاطفال احسن من قعدتهم ع الموبايل ، اعطي لكل واحد دور ولو بسيط جدا يعمله (مش لازم السمبوسة تطلع ملفوفة عدل كده كده هتتأكل ) 😂 كده هتخففي عنك و في نفس الوقت هيحسوا بطعم شهر رمضان و هيفضل محفور احساس المشاركة جواهم 💛💛 اعملي الاولويات فقط حالياً 🌜اولويات اي بيت بتكون الاكل اولاً بعدين المواعين و اخيرا الغسيل ، ف الوقت الصعب اعملي الثلاثة دول بس و سيبي الباقي لوقت تاني ، و خلي التنظيف يكون مشاركة بين الجميع 🌸♥️ راقبي وقتك 🌜راقبي وقتك بيضيع ازاي ، راقبي استخدامك للموبايل و وقت نومك و حاولي تضبطي وقت نومك بحيث تقدري تمارسي و تؤدي كل اللي عليكِ بدون ما تقصري في حق حد ( انا شايفه ان انسب وقت للنوم بعد صلاة التراويح كام ساعه لحد وقت السحور و بعد صلاة الفجر و الضحى لحد صلاة الظهر 🕛 ) ♥️♥️ تحياتي للجميع 🌸🌸 وكل عام وانتم بخير. 🌙

وصلتوا لفين في تنظيف الدواخل يا حلوين 👏🏻😍 ( الدواخل هي الادراج و الرفوف و الدرف سواء في دواليب المطبخ او دولايب الغرف و اي وحدات في المنزل) اتفقنا هنظفهم قبل رمضان 🌙 و ننظف البيت تنظيف عميق آخر الأسبوع ده ⏰ و ندخل رمضان و بيوتنا نظيفة من جوة و من برة 🌸🌸 الوقت ينفذ استعجلوا 😬 عاوزين نركز على العبادة و الطاعه و الذكر 💚🌙 أنا قربت اخلص باذن الله 😇 اللي خلصت تدوس ♥️ اللي قربت تخلص تدوس 👍🏻 و اللي لسه مبدأتش هزعل منها 🥲

رمضان قرب 🌙 كل عام و انتم بخير جميعاً يارب 🤲🏻 عاوزين نتجهز للشهر الكريم عشان يكون شغل البيت خفيف علينا و نستغل وقتنا في العبادة و الطاعة و الذكر ♥️ 🌸نظمي كل الادراج من دلوقتي و الدواليب و الرفوف كل يوم جزء زي ما اتفقنا 🌸اغسلي السجاد و الستاير و المفروشات و خلي التنظيف العميق للبيت آخر اسبوع في شهر شعبان 🌸اعملي جدول بالمأكولات اللي هتقدميها لأسرتك هتوفر وقت عليكي و جدول بالمشتريات اللي محتاجاها 🌸اعملي فرز لكل ما هو في الفريزر و حاولي تفضي الفريزر على قد ما تقدري و خلي الفريزر جاهز لمشتريات الشهر 🌸اتفقي مع افراد اسرتك على تقسيم الشغل و اكتبي كل واحد دوره ايه ،حتى لو ابسط الامور زي تحضير العصير و ملئ زجاجات المياة و لم السفرة و رمي الزبالة ** بتمنى لكم شهر رمضان لا مثيل له ، يغسل قلوبكم و أرواحكم ، و يغير حالكم لافضل حال تتمنوه 💕🌙

لتجهيز طبق فاكهه للضيوف و الحفاظ عليه من السواد اعصري ليمون عليه هيفضل طازج لوقت طويل 🍇🍒🍓🍑🍌🍊🍐

بفكركم تحجزوا مع العاملات قبل ما يتحجزوا كلهم و تودوا السجاد يتغسل قبل ما الدراي كلين يقولكم مش بستلم سجاد 😅 و تشتروا طلبات رمضان من غير إسراف طبعاً كل عام و كل متابع في قناتي بالف خير 🌙💕

الاجهزة الكهربائية كلها لازم تتنظف 😎 حتى السخان المتعلق ده لازم يتمسح 🧽 امال نسيبه مترب كده ؟ عيب علينا 😉 المراوح الستاند او السقف لازم تتمسح أول بأول 👏🏻 المكنسة الكهربائية لازم نلمعها و تفضل دائماً اكنها جديدة 🔆 حتى التلفون الارضي لازم نلمعه و نغطيه بمفرش صغير عشان يحافظ عليه ☎️ 📍اي جهاز عندك في البيت لازم يتلمع اول بأول و يفضل كأنه جديد طول العمر😍😍 دمتم بخير احبتي 🌻

🌸يوم الجمعة يبقى لازم نبخر البيت 🩵 لما تيجي تبخري بيتك بخري الستاير ، حطي المبخرة تحت الستارة - بس بعيدة عنها بحيث متتحرقش طبعاً😅- و خلي البخور يطلع على الستاير هتفضل ريحة البخور في بيتك طول الاسبوع 🩵🌸

لو قولت لك في طريقة مجربة تنظفي بها بيتك مرة واحدة في الحياه و مش هتحتاجي ترتبيه تاني بعدها هتسمعي كلامي ؟ بس لازم تمشي على الخطوات اللي هقولها بالضبط 😊😊 🔰اولاً : تمسكي كل غرض من اغراض البيت تجمعيها و تفرزيها و ترمي اللي مش محتاجاه او توزيعه للمحتاجين او تبيعه ((مثلا هتجمعي كل الكتب و تفرزيها اللي محتاجاه تسيبه و اللي مش محتاجاه ترميه نفس الكلام على الملابس ، العدد ، الأدوات المكتبية ، العاب الأطفال ، الملايات ، المفارش …. الخ )) 🔰ثانياً: تعملي مكان محدد لكل غرض و لو طلع في اغراض ملهاش مكان اعرفي ان عندك خلل في البيت لازم تكون الاماكن على قد الاغراض (( مثلا: كل لبس له مكان محدد ولو مثلا في ملابس ملهاش مكان في الدولاب اعرفي ان عندك خلل ولازم تضبطي الوضع ده و تقللي الملابس او تزودي الدولايب )) 🔰ثالثاً : تنظفي البيت تنظيف عميق و هتلاقي شرح مفصل للتنظيف العميق في القناة 🔰رابعا : و دي اهم نقطة و هي سر الترتيب : ترجعي كل غرض من الاغراض لمكانه اللي حددتيه بعد الاستخدام و يبقى ده قانون في البيت يمشي على الكل و بكده صدقيني هتلاقي بيتك كله مرتب مدى الحياه يا دوب هتلمعي التراب و و تمسحي الارض و تغيري الملايات على حسب طبيعه الحياه عندك ✅✅✅ دمتم بسلام وامان 💕

كفاية تجميع كراتين 📦📦 كفاية تجميع اكياس 🛍️🛍️ كفاية تجميع برطمانات 🧂🧂 كفاااااااية كفااااااية 🔊🔊🔊 لما تجمعي الحاجات دي بتزودي على نفسك مجهود في التنظيف وانتِ مش حاسه 😞 لما يبقى عندك كرتونه جديدة او برطمان جديد و حاسه انها هتنفعك شوفي هتنفعك في ايه حالاً و استخدميها او ارمي واحدة بدالها 👍🏻 ممكن تجمعي كذا كيس احتياطي لاي استخدام طارئ بس لما تزيد عن الحد ابدأي ارمي من القديم و احتفظي بالجديد و جمعي كل مقاس من الاكياس مع بعض في مكان واحد ✅✅ بلاش كراكيب 😉

هي اتصدمت وانا اتصدمت معاها 😂😂

بعد خبرة 23 سنه في (ثانوي😂) قصدي في التنظيف و تجربة كل انواع الاختناقات و الحساسية من حساسية جلد و انف و تنفس و غيره من مواد التنظيف 🥹 جايه اقولك لازم يكون عندك في البيت معدات وقاية و حماية لنفسك : 👨‍🚒 🙅🏼‍♀️🥷🏻 كرتونه جونتيات ( جلافز ) كرتونه كمامات نظارة 🥽 اوعي تستخدمي الكلور او مذيب الدهون او الفلاش بدون ما تكوني لابسة جونتي و كمامة و ياريت نظارة و الاماكن المليئة بالتراب او اي مواد كيميائية 💥💥 بلاش تستهروا بأنفسكم لأنكم اغلى ما في بيوتكم الدافئة 🌸🥰

اتخيلوا اني جيت بيوتكم و عملت لكم مسابقة انكم تجيبوا حاجات معينه في خلال عشر ثواني 😎 هل هتفوزوا فيها ؟ عارفين المفك مثلا فين ؟ عقود الشقة فين ؟ الابر فين ؟ صفارة حلة الضغط فين ؟ الشمع فين ؟ اعملوا مكان ثابت للأغراض اللي في البيت هتبقى البيوت سهله في الحياة والله تخيلوا معاناه انكم تدورو على حاجة صغيرة محتاجينها في البيت كله !!! شوفوا هتوفروا وقت قد ايه لما تحددوا مكان لكل حاجة و ترجعوها لمكانها بعد استخدامها صدقوني ثلاث ارباع الراحة في اي بيت في النقطة دي … اهلا بالمتابعين الجدد نورتوا قناتي 💕💕🦋

حبوا بيوتكم يا بنات 💕 البيوت دفا .. البيوت امان .. البيوت مرسى لقلوبنا .. والله الواحد بيشتاق لبيته لما يغيب عنه و اول ما يدخله بيقول يااااه وحشني بيتي 💕 و اكبر اثبات للحب هو اننا ننظم بيوتنا و نرتب كل حاجة فيها و ننظفها من قلوبنا 🍓🍓

كلنا بنحتار نخلي الاكل قد ايه في حلة الضغط ؟ انا هنا جمعت مدة طبخ اكتر الاكلات #عن_تجربة بتمنى تفيدكم 😻😻 اللحمة الضاني 25 دقيقة في حلة الضغط بعد الصفارة 🍖 اللحمة العجالي 30 دقيقة في حلة الضغط بعد الصفارة 🥩 البطاطس 5 دقائق في حلة الضغط بعد الصفارة 🥔 الكوسة 5 دقايق في حلة الضغط بعد الصفارة🥒 اللوبيا 20 دقيقة مع صلصتها و بصلتها و لحمتها في حلة الضغط بعد الصفارة🥘 الدجاج 15 دقيقة في حلة الضغط بعد الصفارة🍗 المكرونة 7 دقايق في حلة الضغط بعد الصفارة🍜 الترمس 10 دقايق في حلة الضغط بعد الصفارة و لازم يكون منقوع من بالليل🥙 البطاطا الحلوة 10 دقايق على البخار (بقليل من الماء) في حلة الضغط بعد الصفارة 🍠 الرز البسمتي 5 دقائق على نار متوسطة و 10 دقائق على نار هادئة في حلة الضغط بعد الصفارة 🍚 لحمة الرأس الضاني تطهى لمدة ساعة في حلة الضغط بعد الصفارة القلقاس 15 دقيقه في حلة الضغط بعد الصفارة البليلة ( القمح ) 15 دقيقة في حلة الضغط بعد الصفارة العدس في حلة الضغط 10 دقايق مع الخضار ( بصلة، جزرة ، طماطمة، بطاطسية ، خمس فصوص ثوم) ، بعد الصفارة الحمص ( حمص الشام) 17 دقيقة في حلة الضغط بعد الصفارة ( بدون نقع ) لعمل الكشري نحط العدس الأسود 10 دقايق في حلة الضغط بعد الصفارة و بعدين نشيله و نحمر الشعرية و نحط الرز عليها و المكرونة و نضيف العدس و المياة و نحطهم على نار هادية 10 دقائق بعد الصفارة ( الصفارة بتاخد 10 دقايق عقبال ما تبدأ ) 😻 كل التوقيتات دي عن تجربة شخصية ✅✅ خدت شهور عقبال ما جمعتها 😇😻 هثبت البوست عشان كل فترة هعدل عليه و يبقى مرجع لينا كلنا 😇♥️✅ #عن_تجربة@sihrEltrteb

مساء الخيرات بعد ايام المرض ما تعدي بنبص لبيوتنا و نحس اننا رجعنا لنقطة الصفر بس لازم نرجع تاني نرجعها زي ما بنحب نبدأ بالتدريج على خفيف ممكن نبدأ بالترتيب السطحي لبيوتنا و الحفاظ على غسيل المواعين اول باول و نغسل الغسيل المتراكم و بعد ما نسترجع قوتنا نبدا تنظيف عميق للبيت كل يوم غرفة واحدة بس بتمنى لي و لكم الصحة والعافية 💛

الحمام هو اكثر مكان بيتبهدل في البيت ، عشان كده لازم نهتم به اهتمام خاص 🌼🌸 >>ادعكي التواليت 🚽 و الحوض و البانيو باستمرار ياريت كل يوم لو تقدري او يوم و يوم🛁🚿🚰 >>خلي ارضية الحمام دائمآ ناشفة >>عطري حمامك بمعطر للجو 🪔 >>اضاءة الحمام خليها صفراء بلاش اضاءة بيضاء 💡💡 >>شغلي الشفاط طول اليوم و اطفيه قبل ما تناموا 👍🏻 >>نبهي على كل افراد البيت يستعمل الحمام بمنتهى النظافة 🧖🏻‍♀️🧖🏻🧖🏻‍♂️ >>اعملي سلة للمهملات في الحمام 🗑 >>حطي مناديل في الحمام 🧻 >>حطي فوطة صغيرة جداً فوق التواليت لتنشيف القاعدة قبل استخدامها 🚽 >>حطي فوطة جديدة كل يومين تكون فوطة مخصوصة لتنشيف الوجه و الايدي انما الاستحمام كل فرد يستخدم البرنس بتاعه 🧖🏻 >>امسحي ارضية الحمام بديتول او كلور🦠 >>اهتمي جداً برائحة حمامك عطريه ، بخريه ، هويه تهوية جيدة 💐 استخدمي الصابون السائل لغسيل الايدي بدل الصابونه العادية 🧴 ((اجعلي حمامك هو انظف مكان في بيتك ))😍🌸🌼😍

ازاله الاستيكر بكل سهولة باستخدام الاستشوار 👏🏻🔥

طريقتي المفضلة و المعتمدة في ترتيب غرف البيت تنظيف عميق من اللي يحبه قلبك 😻😊 *مثلا غرفة الاطفال * اولا: شيلي الملايات و أكياس المخدات اغسليها و خرجي المخدات و البطانيات برة الغرفه ثانياً : شيلي السجاد نفضيه و طلعيه يتهوى في البلكونة ( لو شديد الاتساخ ابعتيه للدراي كلين يتغسل ) ثالثاً : شيلي الستاير اغسليها رابعاً : شيلي كل الاغراض من على ا الكمدينو و شماعه الملابس و العاب الاطفال و اي مكان في الغرفة و لمعيها و خرجيها برة الغرفه . 💍🧢👛👓 خامساً: بعد ما الغرفة بقت فاضية تماما من اي حاجة صغيرة نبدأ تنفيض التراب نبدأ بالشباك و الباب و بعدها السقف و الحوائط ( بالزعافة ) ممكن نغسل الحوائط لو في وقت و صحة 😂 و اخيرا النجفة بعدها نمسح التراب من الأثاث ( الدولاب ، التسريحة ، الكمدينو ، ظهر السرير …) سادساً: نكنس الارض يفضل بالمكنسة الكهربائية 🌸🌸 سابعاً: خلصنا كل التراب كده نبدأ تلميع ، نلمع الشباك و الباب و النجفة و الخشب كله 👏🏻👏🏻 ثامناً : نمسح الارض وانا مش بقتنع غير بالمسح بالمساحه😇 تاسعاً: بعد جفاف الارض نفرش الملاية على السرير و نفرش المفارش و نرجع أغراض الغرفة و الكمدينو ( الضرورية فقط و الباقي يترمي او نبعده ) 😻✅💜👏🏻 🔆الخطوات تتعمل بالترتيب عشان تحافظي على تعبك و تخلصي بسرعه و بنظافة و دقة عاليه 🔆هذه الخطوات تنطبق على اي غرفة في البيت الاول نفضي المكان خالص و بعدها نبدأ خطوات التنظيف بنفس الطريقة وبعدين نفرش الغرفة