ڕێبازی دوکتور قاسملوو

💎بۆ مەرگی باوکم ئەزمیرا کچی بۆ هونەرمەند بەرزانی قالەی خەڵوز: ڕیشەی بون و باڵی فڕینم ویستم بۆت بڕێژم، هەرچەند هێنام... بردم... نەمزانی چی و چۆن بنوسم... بە هەزاران خەیاڵ و جوانی تۆ بونە میوان… هۆش و گۆشیان لێبردم چەند بە چێژە یادت چەند جەرگبڕە “کۆچی سور”ت. دۆش دامام و دڵم نەهات هیچی بەیان بکەم، نەوەدا بە وشەکانم ستەم لە بونی نەمرت بکەم. نەبا سنوردارت بکەم، نەبا لە ڕازی دڵم خیانەت بکەم. لە تاو بیری بۆنی ئاشنای شەمیم و موشکبارت سەوداسەرم، ڕێ ئەپێوم، وێڵم... لە تاو بیری ماچی دەستەکانت، فەرهاد ئاسا کێو ئەکۆڵم پەرێشانم و چەشنی پاساری، سەمای داغی دوریت ئەکەم، من کە بەشم دوری و شیوەنە، بە کڵپەی یادت ڕۆحی کڵۆڵم تاو ئەدەم. ڕۆحم فیدای سەرفرازی و “بەرزی” ناوت بێ، هەناوم بوە مانی ماتەم و بێدەنگی، کە دیم گەردونی بونی تۆ لە تەنگیی دێڕەکانمدا ون ئەبێ