𝓕𝓸𝓻 𝓝𝓮𝓷𝓸...

"يا جماعة، عاملين إيه؟ ❤️ كلامي لبتوع ثانويه عامه.

طبعًا كلكم عارفين إن فاضل حوالي 18 يوم على الامتحانات، وإن كل ما الوقت بيقرب الضغط بيزيد، والقلق بيزيد، وكل شوية الواحد يلاقي نفسه بيفكر: هعمل إيه؟ وهل هعرف أخلص؟ وهل اللي ذاكرته كفاية؟

بس بجد عايزة أقولكم حاجة مهمة جدًا... الثانوية العامة مهمة، محدش يقدر ينكر ده، لكن في نفس الوقت هي مش آخر الدنيا، ومش آخر فرصة في الحياة، ومش ورقة هتحدد قيمتك كشخص أو هتقول أنت ناجح ولا فاشل.

إحنا مطلوب مننا نسعى ونجتهد ونعمل اللي علينا وبس، إنما مش مطلوب مننا نعيش كل يوم في خوف وتوتر ونضغط على نفسنا لدرجة إننا ننسى ناكل أو ننام أو حتى نرتاح شوية.

لو حاسس إنك متأخر، ابدأ من دلوقتي ومتضيعش وقت في الندم. ولو حاسس إنك تعبت، خد راحة قصيرة وارجع كمل. ولو حاسس إنك مش قادر، افتكر كل المجهود اللي بذلته طول السنة، وإن كل صفحة ذاكرتها وكل سؤال حليته ليه قيمة.

ومتقارنش نفسك بحد. كل واحد ليه ظروفه وطريقته وسرعته. ممكن حد يكون خلص المنهج كله ولسه قلقان، وممكن حد يكون لسه عنده أجزاء ناقصة ويعوضها في الأيام الجاية. المهم تركز في نفسك وفي خطتك.

وكمان افتكروا إن ربنا شايف تعبكم كله، شايف السهر، والتعب، والدموع، والخوف اللي جواكم. فاطمنوا، وخدوا بالأسباب، وادعوا ربنا كتير، وحاولوا تكونوا هادئين على قد ما تقدروا.

الـ18 يوم الجايين دول ممكن يفرقوا فرق كبير جدًا، فاستغلوهم كويس، لكن من غير ما تستهلكوا نفسكم نفسيًا. ذاكروا، وحلوا، وراجعوا، وفي نفس الوقت حافظوا على نفسكم.

وفي الآخر، سواء الامتحانات كانت سهلة أو صعبة، وسواء اليوم كان كويس أو لا، افتكروا إن دي مجرد مرحلة من مراحل حياتكم وهتعدي.

أهم حاجة تخرجوا منها وأنتم راضيين إنكم عملتوا اللي عليكم.

ربنا يوفقكم جميعًا، ويشرح صدوركم، ويبارك في تعبكم، ويفرحكم بالنتيجة اللي تتمناها قلوبكم ومتنسونيش في دعواتكم. 💗