👑بيتُكٍ مملكتُك مع أم البنين 👑

السلام عليكم🌸 عساكن بخير هاد المنشور راح تحسوه كي شغل دخلت لبيوتكن ^^ راح نهدر من قلب الواقع👍 المقبلات على الزواج والمخطوبات ركزن جييييدا وماتفوتو حتى نصيحة من واش راح نقول، العروسة الجديدة وسورتو لي ساكنة وحدها ( خاطر لي ساكنة مع اهل الزوج تنوض تخدم شغل خوفا من الكلام عليها  وتاني مهما تراكم الوضع ماتحسش خاطر ماتكونش مسؤولة على كلش هي شادة طياب والاخرى تسياق والاخرى لغسيل ..الخ) لكن لي ساكنة وحدها شهور لولى تجوزهم كالتالي ⬇️ 🌸اول ماتدخل وتلقى كلش جديد هنا تبدا تقول خلي هاداك لموبل مانمسحوش راه نظيف ، خلي هاداك الحيط منجوزش عليه غير ماراه مصبوغ، خلي لماعن لغدوا ياك رانا زوج عباد، القش خليه بليتاش ياك جديد غسلة فلماشينة يتنحاو ،دهون يتراكمو خليهم من بعد نمسحهم وتديها غير تغيير فالافرشة والالبسة والڨصرة فلهواتف وتديها ليا ليك فالعرضات والزيارات فلعرضات والزيارات وهاملة جانب الترتيب والتنظيف تماما تدير غير ضروري فققققط لأنو ماكانش ماماها لا تزير الحالة ماكان عجوزتها لي تعسها والراجل خدام يجي يلقى الضروري ماهموش ، وهي عاجبها لحال في بالها راهي فحرية وراهي فراااااحة ^^ معليش تبعيني قلنا هي راهي مزال دايرة  فراسها انو كلش راه نظيف ونقي وجديد شهر يجيب شهر حتى تقدام شوية تخلاص القصرة مع الناس الجديدة كل واحد يولي لحياتو العادية وهي تولي لحياتها ....القش تبدا توالفو...الزوج يولي للعمل وهي ماهيش تطيب فلغدا تديها نوم صباح كامل وتطيب غير كي يجي لعشا و من بعد يجوزو شهوووور على هاد الحال وهي دايرة فبالها راهي فراحة  وهي راهي غالطة، هاد الروتين راح يولفها الكسل وجسمها يخمل ، تبدا تدخل فالروتين اليومي هنا الصدمة.. تلقا الدنيا مقلوبة رأسا على عقب ،غبابر.. ليتاش... الدهون.. جسمها تعبااان وفشلان ودايخة والفت الهاتف وادمنته ماتقدرش تنوض بكري موالفتش..وخاصة لي تطيح فالزوج لي ينتقد بزاف وينتبه يبدا يشوف الحالة تخلطت هنا يشعل الضوء الاحمر 🔴  تشوف روحها غرقت ولازملها حل ماتعرفش منين تبدا ، وخاصة اذا فهاد الوقت بذات بداها الوحم (  عينك ماتشوف إلا النور :) تبدا البكاء والاكتئاب والشكاوى والمشاكل والجريات وتبحث من صفحة لصفحة على الحل 👍 لذلك اختي المخطوبة المقبلة على الزواج ⬇️ كي تدخلي لدارك ارتاحي يومين وافرزيها رتبيها  كلش يرجع لمكانه، وديري روتين يومي خفيف ظريف بحيث يجمع بين البكور لانه بركة ، المحافظة على صلواتك واذكارك ، فيه علم شرعي فيه الشئ القليل خير من كثير منقطع ، فيه روتين عناية بنفس منتظم ، فيه جدول تنظيف يومي واسبوعي وشهري منتظم ومحدد ، تبتعدي على المشتتات والهواتف تديري حدودك فنفس الوقت استمتعي بحياتك بنظام وترتيب،  والعرضات والزيارات والهاتف والمواقع ماهمش هاربين جايينك جايينك فقط نظمي نفسك قبل ماتطيحي فالحفرة لي طاحو فيها الآلاف قبلك 👍  اكتسبي العادات الجيدة وثبتيها ونتوما زوج عباد خيرمن تخلي كلش يتراكم وتكتسبي الخمول وتحصلي مع التربية من بعد و حتى ولادك مستقبلا إن شاء الله راح يعاندوك فالفوضى لأنك انتِ القدوة وتولي تجري عند الاستشاريات وش ندير لولادي باش يتنظمو .... أما النوم الصباحي والشغل مسائي  هادو نخلوهم للطوارئ تكون عندك خرجة ضرورية....تربية...مرض..هنا معليش كي ترقدي صباحا ترتاحي او تعتمدي روتين مسائي او تحضري امور تجمديها باش تلقاي روحك بصح فحالتك العادية كوني منظمة بكور...صلاة فاوقاتها ...تعلمي حرفة...تعلمي مهارات منزلية تساعدك فالتنظيف بسرعة وفالترتيب ✅ 🔴هادي نصيحتي من قلبي و من الواقع مانيش جايبتها من الخيال لكل اخت مقبلة على الزواج ولي تزوجت وطاحت فهاد المشكل نقولها  مافاتش الحال وماتبقاش تشكي تنوض وتنفض لغبار على نفسها وتعيد ترتيب حياتها كاين يوتيوب كاين دورات مدفوعة كاين استشاريات في جميع المجالات كاين كتب حان وقت التعلٌم ثم التطبيق و اجتناب الشكاوى والكلام الكثير بدون تطبيق  ✔️ 🌸 وربي يوفق كل اخت لما يحبه ويرضاه 🌸 التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

🍃‏"الجمعة كل ساعاتِها مظنَّةُ إجابـة" 📚-ابن باز رحمه الله الإكثار من الدعاء يوم الجمعة: قال الإمام النووي ـ رحمه الله ـ : يستحب إكثار الدعاء يوم الجمعة بالإجماع رَجاء مصادفة ساعة الإِجابة. [المجموع، الأذكار] وقال الشيخ #ابن_باز ـ رحمه الله ـ : جميع أوقات الجمعة كلها محل دعاء وهو وقت تُرجى فيه الإجابة" [نور على الدرب] ✍🏻فمن لازم الدعاء في هذا اليوم أدرك ساعة الإجابة بإذن الله تعالى. 📚📚📚

🌸السلام عليكم🌸 📌 5 أشياء تسبب الفوضى في بيتك ونتي ماكيش جايبة خبر 🏚️ 1️⃣ الاحتفاظ بأمور زايدة بحجة نسحقها من بعد حتى تتكدس الفوضى وماتقدريش تتحركي 2️⃣ ماكانش اماكن محددة للأشياء مكانش مكان لاي شي كلش مرمي،راح تبقاي تحوسي وتدوري وتضيعي وقت كل ماتحتاجيه،راح يبقى يترامى ويدير فوضى بصرية وهاد الأمر راح يسبب حتى مشاكل مع أفراد الأسرة 3️⃣ الشراء بدون خطة تشوفي العروض والتخفيضات تروحي تجري تشري ونتي ماعندكش ميمبا وين تحطيها 4️⃣ عدم وجود روتين يومي بسيط ماعلابالكش وقتاش تسيقي وقتاش تغسلي قشك وقتاش تعتني بنفسك كلش مخلط عايشة ساعة بالساعة فقط 5️⃣ البحث عن المثالية تبقاي غير ديري حجج واهية وتسوفي بحثا عن المثالية تاع لازم كل الظروف تكون مليحة باش نخدم وهادي مستحيلة الحل❓ توكلي على الله وابداي لازم تبداي وتغيري نفسك تبداي بخطوات بسيطة + خطة محكمة وتطبيقها على أرض الميدان تجاهدي نفسك +الاستمراااارية ✅ 🔴ونختم بمثل شعبي دائما نقولو ( بعد توفيق الله عز وجل اذا ماتنفضيش لغبار على نفسك ماتستناي حتى واحد ينفضو عليك) نوضي حان وقت التغيييير ✅ #صباح_الأنواااار التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

🌸السلام عليكم🌸 #عالسرييع✍✍ لي عندهم الرطوبة في منازلهن راهي جات سخانة وجاتكم الفرصة لصباغة الجدران قبل حلول فصل الشتاء وتتراكم الرطوبة ويولي الوضع كارثي ، خلو الحيوط تنشف مليح ونقوهم جيدا من الرطوبة والتعفنات بمنظف نخليهولكم في التعليقات إن شاء الله، ماتصبغوش مباشرة على التعفنات لازم يتنقاو وينشف الحيط تماما ثم اصبغو واصبغو في فصل الصيف هكذا تجوزو الشتاء بأخف الأضرار ✅ مادابيكم تصبغوها بالنوع لي تقدرو تمسحوه وتغسلوه ومايتقشرش ومايطيرش ويكون ضد الرطوبة ( لي والدها او زوجها صباغ تفيدنا في التعليقات بأنواع الصباغة لي تكون ضد الرطوبة ووش نديرو كقاعدة اساسية قبل الطلاء...الخ ) ⬇️⬇️ ثم بعد الصباغة : 📌ماننساوش التهوئة مهمة جدا في جميع الفصول يالوكان يصب الثلج يوميا ✅ 📌تشميس الأثاث أحيانا خاصة لي عندهم بالكونات كبار وسطح ✅ 📌مسح الجدران دوريا من الرطوبة اذا عاودت ظهرت ✅ 📌إصلاح أي تسرب تاع ماء من الأنابيب أو من السقف أو الجدران 📌بعدو الاثاث على لحيط ب 10 سم خزانة..أسرة ...الخ( هادي قريتها كمعلومة من عند مختص) ✅ 📌استعملو اكياس الملح الخشن المعطرة لكن بعدوهم على الملابس ماتخلوهمش مباشرة يتلامسو معاهم، علقوهم في الخزانات ✅ 📌الملابس تتنشر فالهواء أولا مهما تكون حالة الطقس ثم مساءا إذا مانشفتش دخلوها للمدفئة بالاكو تبقاو شتا كامل ونتوما تنشرو غير لداخل راهي دير امراض ماتستهينوش بالأمر خاصة ملابس الاولاد الصغار✅ واخيرا وش تحبو الوان في صباغة البيوت⁉ انا نحب كرام...باج...كابوتشينو...latte ...الخ ^^ التلغرام: https://t.me/Baytouki16 الفايسبوك: https://www.facebook.com/share/1HyvV2CED6/

الحديث والمغزل 🧶🪡 هذا مثل شعبي، يقولوه زمان كانو يغزلو الصوف ويجو الجيران يڨصرو مع بعض، لكن مايلتهاوش غير للڨصرة ويخلو شغلهم،فمهم يحكي ويدهم تخدم تغزل فالصوف لذلك اجتنبي وابتعدي عن مضيعات الوقت كالهواتف...والتسويف والڨصرة اليومية لي ماعندها حتى معنى والداخل والخارج والتفكير الزايد والتلفاز ...الخ✔️ 🌸 أسعد الله صباحكن 🌸 #بيتُكِ_مملكَتُكِ_مع_أم_البنين #_أم_البنين التلغرام: https://t.me/Baytouki16 الفايسبوك: https://www.facebook.com/share/1HyvV2CED6/

السلام عليكم، عساكن بخير حال ❓ اكيد يالوكان مرة فحياتك تلاقيتي مع إنسانة ڨصرتو وقاتلك ⬇️ 🔴 انا مانيش حابة نفرش هاداك الدرا حتى نروح لداري الجديدة باش نفرشو 🔴انا مانيش حابة نشري ماشينة لافي قلت كي نخرج من دار لكرا ساهل الحال 🔴لحيوط معممممرة رطوبة وغمال ولادي جافو بصح راكي تعرفي دار الكرا ماراحش نخدمها 🔴معليش راني مرتبة في علب وكراطن حتى نرحل راكي تعرفي راني فلكرا مراحش نشري خزانة حتى نرحل لداري الجديدة 🔴بل كاين حتى لي ماتحبش تنظم نفسها وترتب بيتها وتدير برنامج تقولك خلي نطبع برك حتى نروح لبيتي الجديد والمشكل انو بيتها الجديد كاين لي راح ترحلو على عام أو على عوام او حتى ماترحلش كامل تبقى كارية حياتها كامل هنا صراحة دائما نتفكر القاعدة المهمة لي قالها الشيخ العثيمين رحمه الله " العبرة بالمنظور لا بالمنتظر" يعني واقعنا المعاش الآن اولى أن نهتم به من احلام بعيدة المدى تقدر تتحقق وتقدر ماتتحققش. شكون رآه ضامنلك راح تلحقي هاداك اليوم ❓ حتى اذا لحقتي لهذاك اليوم هل ياترى تلحقي بصحة جسدية ونفسية سليمة ❓ تلحقي تعيشي نفس المراحل مع زوجك وولادك، راح تجمديهم حتى ترحلي مثلا ❓ تعيشي الحرمان لنفسك وأولادك وزوجك علاجال أمر بعيد قادر يتحقق وقادر لالا ❓ تطيحي صحتك وتبقاي ميتة بالحسرة وتتشهاي فالناس حتى ترحلي ❓ 🌹عيشي سعادتك ولحظاتك في أي مكان اصنعي سعادتك، ماتبقايش تقولي كي نرحل باش نشري الالات لالا استثمري في صحتك ورااااحتك كي نرحل باش نشري شمبرة لولادي لالا اشريلهم خليهم يتمتعو بالاك ماتجي ترحلي ولادك كبرو وخرجو يقراو وتزوجو و تلقاي روحك ابسط الأمور ماعشتيهاش معاهم حتى كارية اصبغي الحيوط باش تعيشي فالنقا ...ديري باروداج لسلامة أفراد أسرتك ( هنا نقصد ديري الامور لي تحققلك سلامتك النفسية والجسدية والأمور تان لي كي تشريها تقدري ترحليها معاك عادي، ماشي نقصد الأمور لكبيرة ماقلتش تريبي الحيوط وتبنيلو لالا ). زيني بيتك بما تملكين،عيشي سعادتك بما تستطيعين، لاتؤجلي السعادة لوقت قد يأتي وقد لايأتي.... فلتكن قاعدتك في هذه الحياة #العبرة_بالمنظور_لا_بالمنتظر ✅ #_أم_البنين التلغرام: https://t.me/Baytouki16 الفايسبوك: https://www.facebook.com/share/1HyvV2CED6/

إذا تعذَّر الإنجاز في زمنٍ فات؛ فإنَّه يُمكن استدراكه في زمنٍ آت، فالمُنجِز لا يعجز، أتمُّوا أعمالكم مستعينين بالله مولاكم. -الشيخ صالح العُصيمي -حفظه الله-                     #أسعد_الله_صباحكن