👑بيتُكٍ مملكتُك مع أم البنين 👑

شكراً من القلب على كل رسالة جميلة، وكل كلمة طيبة، وكل دعم وصلني منكن ملكات 👑 بصراحة، لم أتوقع هذا القدر من المحبة والتفاعل، أسعدتني رسائلكن وكلماتكن جداااا وأدخلتن السرور و الفرح إلى قلبي. وكذلك أرحب بكل المتابعات الجديدات اللواتي انضممن إلى الصفحة، وأقول لكن: أهلاً وسهلاً بكن في مملكة أم البنين 🌹 سعيدة جداً بانضمامكن لنا أتمنى أن أكون دائماً عند حسن ظنكن، وأن أقدم لكن محتوى ممتعاً ومفيداً يلامس اهتماماتكن ويضيف لكن شيئاً جميلاً في بيوتكن والقادم أجمل وأروع بإذن الله، شكراً لكن جميعاً، وأعتز بكل واحدة منكن 🌸 احبكن في الله #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

تدبيرة #ألمسها_مرة_واحدة 👍1⃣ بمعنى تمسي الامر مرة واحدة فقط وهذا يساعدك جدا في ترتيب وتنظيم البيت ✅⬇️ 📍كليتي في صحن ماترفديهش للحوض وتحطيه ❌ بل اغسليه مرة وحدة ✅ 📍دخلتي من الشارع ماتحطيش الصاك فوق الطابلة❌ حطيه فمكانه في خزانتك مباشرة ✅ المسيه مرة واحدة 📍نحيتي ملابس من الحبل ، ماتحطيهمش فوق الكرسي ❌ ألمسيهم مرة واحدة مباشرة اطويهم خبيهم ✅ بحيث نلمسو الشئ مرة واحدة مانبقاوش نرفدو فيه من مكان لآخر 💯 كل اللي ذكرتو لازمتلو جهااااد نفس وماتبقايش تناقشي فروحك مباااااشرة التطبيق ولا للتسويف 🍃 #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

🌸🌸🌸🌸 السلام عليكم 🌸🌸🌸🌸 وشراكم أخواتي عساكن بخير؟ #ركن_الصيانة_في_البيت ❓ هو عبارة عن تمرين نقومو بيه كل سنة ، نديرو جدول من خانتين الخانة الاولى مكتوب فيها الشهر والخانة الثانية مكتوب فيها امور يجب صيانتها 🔨🔧🛠، نكتبو الأشهر من جانفي حتى لديسمبر في الخانة الاولى ثم نشوفو كامل وش كاين امور تحتاج لصيانة في البيت بأكمله ونحطوها في الخانة الثانية ونوزعوها على الاشهر ✅ مثلا : شهر جانفي: نخدم لافابو لي يقطر شهر فيفري :نركب لكادر لي مرمي شهر مارس: نركب باب لخزانة لي طار شهر اوت : صبيغة الركن الفلاني وهكذا تكملو مع جميع الاشهر ✔️ 🔴الهدف من هذا التمرين هو انو ماتغفليش على بيتك باش ميوليش يبان خردة مع الوقت وتبقاي دايما محافظة عليه بأبسط الطرق و تخدمي بيتك تدريجيا بلا ماتحسي من الجهة المالية، خاطر باش تزدمي على زوجك اخدم هادي وهادي وهادي راح تجيه بزاف من جهة المال ومن جهة التعب الجسدي ومايخدمش ، لذلك افضل حل انو تديري جدول تخدمي عليه طيلة السنة وطبعا الجدول تطرأ عليه تعديلات طيلة السنة لي تعدل نحذفوه ولي زاد تخسر ندرجوه في الجدول..الخ 🌸 وهكذا تكوني مُلمة بجميع الامور لي تحتاج صيانة في بيتك طيلة العام وتخدميها بدون ضغط🌸 #بيتُكِ_مملكَتُكِ_مع_أم_البنين التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

السلام عليكم🌸 عساكن بخير هاد المنشور راح تحسوه كي شغل دخلت لبيوتكن ^^ راح نهدر من قلب الواقع👍 المقبلات على الزواج والمخطوبات ركزن جييييدا وماتفوتو حتى نصيحة من واش راح نقول، العروسة الجديدة وسورتو لي ساكنة وحدها ( خاطر لي ساكنة مع اهل الزوج تنوض تخدم شغل خوفا من الكلام عليها  وتاني مهما تراكم الوضع ماتحسش خاطر ماتكونش مسؤولة على كلش هي شادة طياب والاخرى تسياق والاخرى لغسيل ..الخ) لكن لي ساكنة وحدها شهور لولى تجوزهم كالتالي ⬇️ 🌸اول ماتدخل وتلقى كلش جديد هنا تبدا تقول خلي هاداك لموبل مانمسحوش راه نظيف ، خلي هاداك الحيط منجوزش عليه غير ماراه مصبوغ، خلي لماعن لغدوا ياك رانا زوج عباد، القش خليه بليتاش ياك جديد غسلة فلماشينة يتنحاو ،دهون يتراكمو خليهم من بعد نمسحهم وتديها غير تغيير فالافرشة والالبسة والڨصرة فلهواتف وتديها ليا ليك فالعرضات والزيارات فلعرضات والزيارات وهاملة جانب الترتيب والتنظيف تماما تدير غير ضروري فققققط لأنو ماكانش ماماها لا تزير الحالة ماكان عجوزتها لي تعسها والراجل خدام يجي يلقى الضروري ماهموش ، وهي عاجبها لحال في بالها راهي فحرية وراهي فراااااحة ^^ معليش تبعيني قلنا هي راهي مزال دايرة  فراسها انو كلش راه نظيف ونقي وجديد شهر يجيب شهر حتى تقدام شوية تخلاص القصرة مع الناس الجديدة كل واحد يولي لحياتو العادية وهي تولي لحياتها ....القش تبدا توالفو...الزوج يولي للعمل وهي ماهيش تطيب فلغدا تديها نوم صباح كامل وتطيب غير كي يجي لعشا و من بعد يجوزو شهوووور على هاد الحال وهي دايرة فبالها راهي فراحة  وهي راهي غالطة، هاد الروتين راح يولفها الكسل وجسمها يخمل ، تبدا تدخل فالروتين اليومي هنا الصدمة.. تلقا الدنيا مقلوبة رأسا على عقب ،غبابر.. ليتاش... الدهون.. جسمها تعبااان وفشلان ودايخة والفت الهاتف وادمنته ماتقدرش تنوض بكري موالفتش..وخاصة لي تطيح فالزوج لي ينتقد بزاف وينتبه يبدا يشوف الحالة تخلطت هنا يشعل الضوء الاحمر 🔴  تشوف روحها غرقت ولازملها حل ماتعرفش منين تبدا ، وخاصة اذا فهاد الوقت بذات بداها الوحم (  عينك ماتشوف إلا النور :) تبدا البكاء والاكتئاب والشكاوى والمشاكل والجريات وتبحث من صفحة لصفحة على الحل 👍 لذلك اختي المخطوبة المقبلة على الزواج ⬇️ كي تدخلي لدارك ارتاحي يومين وافرزيها رتبيها  كلش يرجع لمكانه، وديري روتين يومي خفيف ظريف بحيث يجمع بين البكور لانه بركة ، المحافظة على صلواتك واذكارك ، فيه علم شرعي فيه الشئ القليل خير من كثير منقطع ، فيه روتين عناية بنفس منتظم ، فيه جدول تنظيف يومي واسبوعي وشهري منتظم ومحدد ، تبتعدي على المشتتات والهواتف تديري حدودك فنفس الوقت استمتعي بحياتك بنظام وترتيب،  والعرضات والزيارات والهاتف والمواقع ماهمش هاربين جايينك جايينك فقط نظمي نفسك قبل ماتطيحي فالحفرة لي طاحو فيها الآلاف قبلك 👍  اكتسبي العادات الجيدة وثبتيها ونتوما زوج عباد خيرمن تخلي كلش يتراكم وتكتسبي الخمول وتحصلي مع التربية من بعد و حتى ولادك مستقبلا إن شاء الله راح يعاندوك فالفوضى لأنك انتِ القدوة وتولي تجري عند الاستشاريات وش ندير لولادي باش يتنظمو .... أما النوم الصباحي والشغل مسائي  هادو نخلوهم للطوارئ تكون عندك خرجة ضرورية....تربية...مرض..هنا معليش كي ترقدي صباحا ترتاحي او تعتمدي روتين مسائي او تحضري امور تجمديها باش تلقاي روحك بصح فحالتك العادية كوني منظمة بكور...صلاة فاوقاتها ...تعلمي حرفة...تعلمي مهارات منزلية تساعدك فالتنظيف بسرعة وفالترتيب ✅ 🔴هادي نصيحتي من قلبي و من الواقع مانيش جايبتها من الخيال لكل اخت مقبلة على الزواج ولي تزوجت وطاحت فهاد المشكل نقولها  مافاتش الحال وماتبقاش تشكي تنوض وتنفض لغبار على نفسها وتعيد ترتيب حياتها كاين يوتيوب كاين دورات مدفوعة كاين استشاريات في جميع المجالات كاين كتب حان وقت التعلٌم ثم التطبيق و اجتناب الشكاوى والكلام الكثير بدون تطبيق  ✔️ 🌸 وربي يوفق كل اخت لما يحبه ويرضاه 🌸 التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/

🍃‏"الجمعة كل ساعاتِها مظنَّةُ إجابـة" 📚-ابن باز رحمه الله الإكثار من الدعاء يوم الجمعة: قال الإمام النووي ـ رحمه الله ـ : يستحب إكثار الدعاء يوم الجمعة بالإجماع رَجاء مصادفة ساعة الإِجابة. [المجموع، الأذكار] وقال الشيخ #ابن_باز ـ رحمه الله ـ : جميع أوقات الجمعة كلها محل دعاء وهو وقت تُرجى فيه الإجابة" [نور على الدرب] ✍🏻فمن لازم الدعاء في هذا اليوم أدرك ساعة الإجابة بإذن الله تعالى. 📚📚📚

🌸السلام عليكم🌸 📌 5 أشياء تسبب الفوضى في بيتك ونتي ماكيش جايبة خبر 🏚️ 1️⃣ الاحتفاظ بأمور زايدة بحجة نسحقها من بعد حتى تتكدس الفوضى وماتقدريش تتحركي 2️⃣ ماكانش اماكن محددة للأشياء مكانش مكان لاي شي كلش مرمي،راح تبقاي تحوسي وتدوري وتضيعي وقت كل ماتحتاجيه،راح يبقى يترامى ويدير فوضى بصرية وهاد الأمر راح يسبب حتى مشاكل مع أفراد الأسرة 3️⃣ الشراء بدون خطة تشوفي العروض والتخفيضات تروحي تجري تشري ونتي ماعندكش ميمبا وين تحطيها 4️⃣ عدم وجود روتين يومي بسيط ماعلابالكش وقتاش تسيقي وقتاش تغسلي قشك وقتاش تعتني بنفسك كلش مخلط عايشة ساعة بالساعة فقط 5️⃣ البحث عن المثالية تبقاي غير ديري حجج واهية وتسوفي بحثا عن المثالية تاع لازم كل الظروف تكون مليحة باش نخدم وهادي مستحيلة الحل❓ توكلي على الله وابداي لازم تبداي وتغيري نفسك تبداي بخطوات بسيطة + خطة محكمة وتطبيقها على أرض الميدان تجاهدي نفسك +الاستمراااارية ✅ 🔴ونختم بمثل شعبي دائما نقولو ( بعد توفيق الله عز وجل اذا ماتنفضيش لغبار على نفسك ماتستناي حتى واحد ينفضو عليك) نوضي حان وقت التغيييير ✅ #صباح_الأنواااار التلغرام: https://t.me/Baytouki16 الفايسبوك: https://www.facebook.com/share/1Ub6ii4iUM/