قلوب يعقلون بِها

فيه أفاضل كثر ردوا على الشيخ خليل، وهو ربما كان يريد الخير بمنشوره وينصح الناس بما يراه رغم أن بعض استدلالاته فيها بعض الأخطاء وتحتاج لتوضيح. ولكن أنا هرد من ناحية أخرى ولا أقصد أبدا التقليل من صاحب المنشور الأصلي وإنما هي استفاضة من أخ لأخيه. لو فكرنا بالطريقة دي فهننقرض تقريبا كمان ٥٠ سنة مثلا لأن مفيش حاجة مستقبلا بترخص والتاريخ علمنا كده.. وده معناه إن حد ال ١٠.٠٠٠ هيبقى كمان ٣ شهور هيبقى ١٢.٠٠٠ وهيفضل يزيد لحد ما يوصل ٣٠.٠٠٠ مثلا كمان سنتين مثلا! وبالتالي مش هنلاحق على تحديث المعيار الموضوع ده لأن كل شوية هيتغير وهيبقى برقم شكل! وهيحتاج من الناس إنها مش بس تنحت في الصخر وإنما تبيع كليتها علشان تلحقه! ولو بصينا على الفئة الجارفة من الشباب اللي هتقبض ٣٠ ألف جنيه هنلاقيهم لا شيء يذكر لأن المرتب يعتبر برضو كبير رغم الظروف اللي بنعيشها حاليا.. ولكن خلينا حاليا في ال ١٠ آلاف جنيه.. بيوت كثيرة جدا مفتوحة بالمبلغ ده بل أقل منه ألف أو ألفين جنيه، وبيوت أهلها ممكن يبقوا في درجة المساكين لولا لطف الله بهم. المسكين هو اللي كان مكفي بيته وقايم به على أكمل وجه ثم جاء ابتلاء ما فخسف برزقه، وهو العفيف اللي مكنش بيمد يده للناس ولا هيعمل ده لعفته وكرمه وكبرياءه، ولكن الفئة دي لسا مجابتش الدرجة، متشبثة يا دوب اللي رايح على قد اللي جاي.. الفئة دي مثلا مش لسا متزوجين حديثا، بل رجالا كبارا وعندهم شباب في كليات وثانوية، شغالين في وظايف تدرجاتها الوظيفية مميتة وزيادتها أكثر مواتا.. مع ذلك الحمد لله فاتحين بيوتهم ببركة الله ولسا قائمين عليها بخير. فضابط ال ١٠ آلاف ده غير دقيق بالمرة، لأن اللي بيقبض ١٠ آلاف عنده رفاهيات غير اللي بيقبض ٥ آلاف والاتنين بعتبروا بالنسبة للي بيقبض ٢٠ ألف مش رفاهيات خالص وإنما هي ضروريات وهكذا هلم جرا. وكل ما مرتبك يكبر كل ما هتلاقي إن فيه ضروريات كانت مخفية عنك وتتجنبها علشان تقدر تعيش، ولكنها مش ملزمة للحياة تماما ولا هتقف عليها الدنيا. الزواج بأقل الإمكانيات هو المفروض نبحث عنه ونسهل أمره مش العكس، لأن نسب العنوسة زادت وطفحت، والرجال الشباب بيهاجروا أو متزمتين للغاية في أمر الزواج ظنا منهم إن مفيش حد هيقبل بظروفهم وإن الكل بقى على نبرة واحدة، بلاها زواج! وإحنا هنا بنعمل قنبلة موقوتة، اسمها الزنا؛ مش كل الناس هتصبر بالصوم ومش كل الناس هتعرف تسافر تعمل قرشين وتيجي تتزوج. وبالتالي التيسير هو المطلوب مش مخاطبة الناس بأنهم ميتجوزوش إلا لما يجيب راتب كذا! لأن الراتب ده رزق من الله سبحانه، فيه ناس عايشة بيه وتفتح بيوت بيه، حتى لو في إيجار، وده مش معناه خالص بهدلة بنات الناس، لأن حتى الصبر في بنات الناس مختلف، منهم اللي يقدر يصبر حتى يفتح الله عليهم ويوسع عليهم وفيه اللي لا. وبالتالي إحنا قدام أمر واسع جدا من القبول والرفض والاختيار والسعة ميتحدشش بمعيار معين من مقدار المال اللي أقدر أقول به إنت تقدر ولا لا. وأنا متفهم - ولكن غير متفق - إن الخطاب ده - في ظني - وجد رواجا عند الرجال بالذات ليه، لأن ديدن معظم الرجال العزاب دلوقتي إن محدش منهم بقى يحب يجازف في أي شيء، قُهر من الظروف، ومش عاوز حد يعلّي عليه في أي شيء خاصة لو شبهه. وبالتالي لما كلنا نمرر جزئية ال ١٠ آلاف دي فخلاص أنا كده في المنطقة الآمنة ومش هفكر لا في جواز ولا غيره زي ملايين غيري، طيب لو حد غيري أقدم وعملها، لا كده يبقى فيه خلل وبراحته بقى وهيشيل الطين! وزي ما أنت بتسرد لنفسك وغيرك عن الأمثلة الكثيرة اللي تزوجت وهي غير مقتدرة! مع عدم ذكر معنى عدم الاقتدار، وأنها وقعت في وحل الفقر والحاجة، ممكن أنا أذكرلك برضو أمثلة لا تعد عن كمية متزوجين وسع الله عليهم من لا شيء ومن غير حسبة ورقة وقلم. وأذكركم أخيرا بدعاء نبي الله زكريا؛ قال تعالى: (وَزَكَرِيَّا إِذْ نادى رَبَّهُ رَبِّ لا تَذَرْنِي فَرْداً وَأَنْتَ خَيْرُ الْوارِثِينَ). والسلام. - إسلام منصور #أ_ب_أسرة #ماجريات