أبو نعمان إبراهيم አቡ ኑዕማን

👉 የእቁብ ሰብሳቢዮች ግድፈቶች ! እቁብ ማለት በአንድ ወይም በተወሰኑ ሰዎች አማካይነት የተለያየ መጠን ያለው ገንዘብ እየተሰሰበሰበ ለሰብሳቢው /ዎች የተወሰነና የእቁብ ከፋዮቹ የተስማሙበት የገንዘብ መጠን እንደ ደሞዝ እየተከፈ በአማና አስቀምጠው ሀላፊ ሆነው ሰብስበው በየተራ ለእቁብተኛው በእጣ ወይም ያለ እጣ እንዲሰጥ የሚደረግበት አሰራር ነው ። የዚህ አይነቱ አሰራር ከሸሪዓዊ ህግጋቶች በማይጋጭ መልኩ ከተሰራ በመልካም ከመተባበር ውስጥ ሊመደብ ይችላል ። የዘመናችን የሸሪዓ እውቀት ባልተቤቶች የዚህ አይነቱን አሰራር በመልካም መተባበርና መልካም ብድር ውስጥ ይገባል ይላሉ ። ይህ አሰራር ብዙዎችን የስራ እድል እንዲፈጥሩ የሚያደርግ ሲሆን አብዛኞች በራሳቸው ለእቁብ በሚሰጡት ትኩረት ልክ አጠራቅመው መፈፀም የማይችሉዋቸውን ተግባራት በእቁብ አማካይነት ይፈፅማሉ ። ለምሳሌ የተለያዩ የስራ አይነቶችን መጀመር ፣ ትዳር መያዝ ፣ ቤት መግዛት ፣ መኪና መግዛትና የቤት ቁሳቁሶችን እንደሟሟላት የተወሰኑ ሰዎች በዚሁ መንገድ በማጠራቀም ሐጅና ዑምራ እንደማድረግ ያሉ ተግባራትን በእቁብ በመታገዝ ያከናውናሉ ። ይሁን እንጂ ለእንደነዚህ አይነት መልካም ተግባራት አጋዥ የሆነው እቁብ ከ90% በላይ የሚሆነው በሰብሳቢዮቹ አማካይነት የሸሪዓ ጥሰት ያስተናግዳሉ ። የእቁብ ሰብሳቢዮችም ሆነ ከፋዮቹ አብዛኞቹ ከሸሪዓ እውቀት ጋር ግንኙነት የሌላቸው በመሆኑ ተግባሩን አሉታዊ ገፅታ ያላብሱታል ። በሰብሳቢዮች ከሚሰሩ የሸሪዓ ጥሰቶች ውስጥ የተወሰኑትን እንይ : – አንደኛ – ለአራትና ለአምስት ወር ያለ እጣ ዝም ብለው በመሰብሰብ አማና በተቀመጠባቸው የሰዎች ገንዘብ ያለ ፈቃዳቸው በመነገድ ከየትኛውም ነጋዴ በላይ ይበለፅጉበታል ። ወይም ለሌላ በትርፍ በማበደር ሐራም የሆነ ያልተገባ ጥቅም ያገኙበታል ። አደራ በተቀመጠ የሰዎች ገንዘብ ያለ ሰዎቹ ፈቃድ መነገድ ከባድ ሐራም የሆነ ተግባር ሲሆን ለሌሎች አበድሮ ትርፍ መቀበል ወለድ ነው ። ሁለተኛ – ሰብሳቢዮቹ እቁብ ከፋዮችን በማሳመን አንድ እጣ ወጥቶ ለእቁብተኛ እንዲሰጥና አንድ ደግሞ ሽያጭ እንዲኖር በማድረግ የተቸገረ ሰው እቁቡን ያለ እጣ ወስዶ ለእቁብተኛው ከተወሰነው ክፍያ ውጪ በግዢ መልክ እንዲከፍል ያደርጋሉ ። ይህም የገዛው ሰው ከተወሰነው የእቁብ ክፍያ ውጪ ስለሚከፍል ወለድ ውስጥ ይገባል ። ሶስተኛ – በቀኑ ያልከፈሉ ሰዎችን ቅጣት እንዲከፍሉ የሚደረግ ሲሆን ይህም ሪባ አንነሲኣ ( በጊዜ ምክንያት) የሚመጣ ወለድ ውስጥ ይገባል ። እነዚህ ተግባራት ከሸሪዓ ያፈነገጡና የአብዛኛው እቁብ ሰብሳቢ አላማ ሰዎችን መጥቀም ሳይሆን ያለ አግባብ በሰዎች ለመጠቀም ያለመ መሆኑን ያሳያል ። ከዚህ በላይ እቁቡ ከወለድ ጋር የተነካካ በማድረግ ብዙዎች በማያውቁት መንገድ በገንዘባቸው ከአላህ ጋር ጦርነት ውስጥ እንዲገቡ ያደርጋል ። በመሆኑም እቁብ ሰብሳቢዮች አላህን እንዲፈሩና የተሰጣቸውን ገንዘብ አማናውን ጠብቀው ለከፋዮቹ በስምምነታቸው መሰረት በእጣ ወይም በየተራ በማስረከብ በሚከፈላቸው ደሞች እንዲብቃቁ አደራ ለማለት እወዳለሁ ። ማስታወሻ : – ለሰብሳቢዮቹ የሚከፈለው እቁብተኞቹ የተስማሙበትና መጠኑን ያወቁት ገንዘብ በየተኛውም መመዘኛ ወለድ ውስጥ የማይገባ ሲሆን ትርፍ ከሚያስገኝ ብድርም ጋር ግንኙነት የለውም ። http://t.me/bahruteka