𝑨𝒃𝒅𝒖𝒍𝒌𝒆𝒓𝒊𝒎 𝑫𝒆𝒗'𝒔

ልክ እንደ አንዋር ናስር፣ እኔም ሰለሞን ሙሉጌታ ካሳን እያዩ ካደጉት ትውልዶች አንዱ ነኝ። ቴክኖሎጂ ምን እንደሆነ በውል በማይገባን በዚያ የልጅነት ጊዜ፣ "ይሄ ነገር ምን አይነት ተዓምር ይሆን?" ብለን እንድንመራመርና እንድናልም ካደረጉን ሰዎች ግንባር ቀደሙ እሱ ነው። ከዚህ በፊት ከ'ዩኑስ ሚዲያ' ጋር በነበረኝ ቆይታም ይህንን የልጅነት አሻራውን እና ያሳደረብኝን ተጽዕኖ አንስቼው ነበር። በህይወት መንገድ ላይ፣ ሌሎች ላንተ ምሳሌ እንደነበሩ ሁሉ አንተም ለሌሎች መነሳሳት ምክንያት መሆንህን ማወቅ ልዩ ስሜት አለው። ሰሞኑን አንድ የቅርብ ጓደኛዬ መኪና ገዝቶ ነበር፤ በወቅቱ ያጫወተኝ ታሪክ ግን ልቤን በእጅጉ ነክቶታል። ከጥቂት አመታት በፊት ሶፍትዌር ኢንጂነሪንግን ለመማር ሲወስን፣ ቤተሰቦቹ "ሜዲሲን መማር አለብህ" ብለው ጫና አሳድረውበት ነበር። እሱ ግን እነሱን ለማሳመን እና የዘርፉን ተስፋ ለማሳየት የእኔን መኪና (እና የእኔን የህይወት ጉዞ) እንደ ማሳያ ተጠቅሞ ነበር። እኔ እዚህ ግባ የሚባል ትልቅ ነገር ባላደርግለትም፣ አንድ ሰው ህልሙን እንዲከተል እንደ አብነት እና ምሳሌ የሚወስደኝ መሆኑን ማወቅ ለኔ እጅግ ትልቅ ትርጉም አለው። ይህ የጓደኛዬ ታሪክ አንድ ትልቅ እውነትን አስታውሶኛል። ሶል ለአብዛኞቻችን ምሳሌ የነበረና ዛሬ ላለንበት የቴክኖሎጂ ህይወት መሰረት የጣለ ሰው ነው። እኛም በተራችን ለሌሎች ማሳያ መሆን ከቻልን፣ የእሱ ራዕይ ትክክለኛ ፍሬ አፍርቷል ማለት ነው። ስለዚህም፣ አክብሮታችንንም ሆነ ጥልቅ ምስጋናችንን ልናሳየው የምንችልበት እና ባለውለታነቱን በግልጽ የምንመሰክርበት ትክክለኛው አጋጣሚ ይሄው ነው ብዬ አስባለሁ። ነገ መጽሀፉ ይመርቃል። እኔም ለመገኘት ፕሮግራም ይዣለሁ እናንተስ?