بەکورتى

حوكمی خەیاڵ كردن بۆ ئافرەتێ تر لە كاتی كاری سەرجێیی لەگەڵ خێزان. پرسیار: لە كاتی كاری سەرجێیی چی بكەم كە خەیاڵم هەر لای خێزانی خۆم بێت ؟ وە حوكمی شەرعی ئەو پیاوە چییە كە لە كاتی جووتبوون لەگەڵ خێزانی خەیاڵی ئافرەتی تر دەكات؟  وەڵام: یەكەم: بۆ ئەوەی تەنها خەیاڵت لای خێزانت بێت ئەم كارانە ئەنجام بدە: وتنی (بسم الله) کاتی جل دانان: بۆ پەردەپۆشکردنی عەورەت لە چاوی جنۆکە و پاراستن لە خەیاڵی خراپ. خوێندنی دوعای پێش جووتبوون: وتنی (بِسْمِ اللَّهِ، اللَّهُمَّ جَنِّبْنَا الشَّيْطَانَ، وَجَنِّبِ الشَّيْطَانَ مَا رَزَقْتَنَا) واتە: (بە ناوی خواوە، خوایە بە دوورمان گرە لە شەیتان و شەیتان دوور بخەرەوە لەوەی كە پێمان دەبەخشیت) تاوەکو شەیتان زیان بە خۆت و نەوەکەت نەگەیەنێت. تەقوای خوا و بەرپەرچدانەوەی وەسوەسە: پەناگرتن بە خوا لە خەیاڵاتی خراپ و گوێنەدان بە فێڵی شەیتان. پاراستنی چاو لە حەرام (نەزەر نەکردن): بۆ ئەوەی وێنەی ئافرەتانی تر لە مێشکدا جێگیر نەبێت. خۆڕازاندنەوە و گفتوگۆی شیرینی هاوسەر: ڕاکێشانی تەواوی سەرنج و کۆنترۆڵکردنی بیروهۆشی پیاوەکە لەلایەن خێزانەکەیەوە لەسەر جێگە. دووەم: حوکمی خەیاڵکردنی ئافرەتی تر لەکاتی جووتبووندا: ئەم کارە حەرامە و دروست نییە، بەهۆی ئەم خاڵانەوە: بێڕێزی و بریندارکردنی هەستی هاوسەر: دەبێتە هۆی تێکچوونی پەیوەندی و لاوازبوونی متمانەی نێوانیان. زینای دڵ و خەیاڵ: چونکە ئارەزووکردنی نامەحرەم لە دڵدا مرۆڤ لە خوا دوور دەخاتەوە. کردنەوەی دەرگای شەیتان: دەبێتە هۆی دڵساردی لە هاوسەر، بەراوردکردنی نادروست، و ڕاکێشان بەرەو تاوانی گەورەتر. دژایەتی لەگەڵ ئامانجی هاوسەرێتی: کە بریتییە لە پاراستنی داوێن، پاکیزەیی، و چەسپاندنی سۆز و خۆشەویستی. پێویستە پیاو سەرنجی تەنها لای خێزانی بێت؛ گەر بەبێ ویستی خۆیشی خەیاڵەکە هاتە مێشکی، دەستبەجێ دووری بخاتەوە، ئیستیغفار بکات و بگەڕێتەوە سەر هاوسەرەکەی. -----------------------  #بەكورتی (٧٠٦) بۆ زانیاری زیاتر ئەم لینكە بكەرەوە  https://walamakan.com/710

ئەگەر هێلکە لە دەرەوە بشکێت... ژیانێک کۆتایی پێ دێت. وە ئەگەر لە ناوەوە بشکێت... ژیانێک دەست پێ دەکات. ———————————————— لە مرۆڤیشدا شتێک هەیە زۆر لەم مانایە دەچێت. ڕەنگە خەڵکی هەوڵ بدەن لە دەرەوە بتگۆڕن... ئامۆژگاریت دەکەن. سەرزەنشتت دەکەن. ئاگادارت دەکەنەوە. دەنگیان بەسەرتدا بەرز دەکەنەوە. ڕەنگە ئامۆژگاری لەدوای ئامۆژگاری بەسەرتدا تێپەڕێت... کتێب لەدوای کتێب... هەڵوێست لەدوای هەڵوێست... بەڵام گۆڕانی ڕاستەقینە دەست پێ ناکات هەتا لە ناخ و دەروونتدا شتێک ڕوو نەدات. تا ئەو ساتەی خۆت بە دەنگی بەرز بڵێیت: بەسە. بەسە بێئاگایی. بەسە دواخستن. بەسە پاساوهێنانەوە. بەسە ڕاکردن لە ڕاستی. بەسە تاوانێک کە دەزانم دڵم وێران دەکات و پاشان دەگەڕێمەوە بۆی. بەسە ژیانێک بە هەمان شێواز بژیم و چاوەڕێی ئەنجامێکی جیاوازی لێ بکەم. جیاوازییەکی گەورە هەیە لەنێوان مرۆڤێک کە گۆڕابێت لەبەر ئەوەی لە خەڵک ترساوە... لەگەڵ مرۆڤێک کە گۆڕابێت لەبەر ئەوەی دڵی بەخەبەر هاتبێتەوە. یەکەمیان ڕەنگە بگەڕێتەوە ئەگەر چاودێری نەمێنێت. بەڵام دووەمیان ژیانە نوێیەکەی لە ناوەوە دەستی پێ کردووە. لەبەر ئەمەش تەنها بەس نییە حەق و ڕاستی ببیسیست... دەبێت ڕێگەی پێ بدەیت بگاتە دڵت. تەنها بەسیش نییە هەڵەکەت بزانیت... دەبێت ساتێک بێت کە دەست لە بەرگریکردن لێی هەڵگریت. تەنها بەسیش نییە ئاوات بخوازیت کە باشتر بیت... دەبێت بە دەستی خۆت هەندێک لە خوو و ڕەوشتە کۆنەکانت بشکێنیت. ترسناکترین بەندیخانە ئەوە نییە کە لە دەرەوە بەسەرتدا دادەخرێت... بەڵکوو ئەوەیە کە لە ناوەوە ڕادێیت بە دیوارەکانی، هەتا ئەوەی بیر لە دەرچوون لێی نەکەیتەوە. چەندین مرۆڤ چاوەڕوانی ڕووداوێکی گەورەن بۆ ئەوەی بیانگۆڕێت؟ موسیبەتێک... نەخۆشییەک... لەدەستدانێک... شۆکێک... پیری... مردنی کەسێک کە خۆشی دەوێت... وەک ئەوەی بە ژیان بڵێت: لە دەرەوە بمشکێنە هەتا بەئاگا بێمەوە. بۆچی؟ بۆچی پێش ئەوەی چەکوشەکە بێت بەئاگا نایەیتەوە؟ بۆچی تەوبەکەت بڕیارێک نەبێت... پێش ئەوەی ببێتە ناچاری؟ بۆچی پەیوەندیت لەگەڵ خودادا چاک ناکەیت لە ڕۆژانی لەشساغی و تەندروستیدا... پێش ئەوەی بە دڵشکاوى و تێکشکاوی بەدوایدا بگەڕێیت؟ بۆچی ئەمڕۆ پێداچوونەوە بە خۆتدا ناکەیت... پێش ئەوەی ڕۆژێک بێت ئاواتی یەک ڕۆژ بخوازیت بۆ پێداچوونەوە و دەستت نەکەوێت؟ هەندێک تێکشکاوەیی هەن دەتبەزێنن و دەتبەنە ناو مردنەوە... هەندێک تێکشکاوەییش لە نوێوە لەدایکت دەکەنەوە. کەواتە مەترسە لەوەی لە ناختدا لووتبەرزی و فیزت بشکێت. نە لەوەش کە وەهمەکانت بشکێن. نە لەوەش کە ئەو وێنە درۆینەیەی لەسەر خۆت دروستت کردبوو بڕووخێت. شەرم مەکە لەوەی دان بەوەدا بنێیت: «من هەڵەم کرد، بێئاگا بووم، پاساوم هێنایەوە، ڕامکرد و دوامخست.» ڕەنگە ئەم شکانە، یەکەم چرپەی ژیانێکی نوێ بێت کە لە دڵتدا لەدایک دەبێت. چاوەڕێ مەکە ژیان لە دەرەوە بتشکێنێت. خۆت لە ناوەوە دەست پێ بکە. خوای گەورە فەرموویەتی: ﴿إِنَّ اللَّهَ لَا يُغَيِّرُ مَا بِقَوْمٍ حَتَّىٰ يُغَيِّرُوا مَا بِأَنْفُسِهِمْ﴾ واتە: بێگومان خوای گەورە دۆخی هیچ گەل و کۆمەڵێک ناگۆڕێت هەتا ئەوەی لە ناخی خۆیاندا هەیە نەیگۆڕن. کەواتە پرسیارەکە ئەوە نییە: کەی ژیانم دەگۆڕێت؟ پرسیارە هەرە سەختەکە ئەوەیە: کەی من خۆم دەست دەکەم بە گۆڕان؟ کەواتە چاوەڕێ مەکە ژیان لە دەرەوە بتشکێنێت. نوسینی : درید إبراهیم الموصلي ---------------------------- #بەكورتی (٧٥٠) https://t.me/ba_kurty

👇👇👇

دەردە بێدەنگەکە! ٧ وێنەی شاردراوەی گومانی خراپ بەرامبەر خودای گەورە كە زۆرێك تێ كەوتووە بێ ئەوەی هەستی پێ بكات گومانی خراپ بەرامبەر پەروەردگار زۆرجار بە ئاشکرا دەرناکەوێت، بەڵکو لە ناخی مرۆڤدا لە پشت ٧ بیرکردنەوەی هەڵەوە خۆی دەشارێتەوە: «ئەگەر خودا منی خۆشبویستایە تووشی ئەم بەڵایەی نەدەکردم»: خۆشەویستیی خودا بە مانای ژیانی بێ‌ئازار نایەت؛ پەیامبەران زۆرترین بەڵایان دیوە. بەڵا نە نیشانەی ڕق لێبوونە و نە بەڵگەیەکی بڕاوەی پێشوەختەیە بۆ خۆشەویستی، چونکە غەیب لای خودایە.   «زۆر دوعام کرد و وەڵام نەدرامەوە»: دواکەوتنی داواکارییەکەت ئەوە ناگەیەنێت خودا دوعاكەتی نەبیستوە؛ لەوانەیە بەو دوعایە زیانێکی گەورەی لێ دوورخستبیتەوە، یان پاداشتەکەی بۆ قیامەت هەڵگرتبێت. تۆ تەنها دەرکەوتەی شتەکان دەبینیت نەک حیکمەتەکەی.   «من گوێڕایەڵم... بۆچی ئەمەم بەسەردێت؟»: ئیمان گرێبەستێک نییە لەسەر نەمانی ئازاری دونیا؛ دونیا سەرلەبەری ماڵی تاقیکردنەوەیە (بە ناڕەحەتی و بە نیعمەتیشەوە).   «فڵانە کەس تاوانبارە و ژیانی لە من خۆشترە»: زۆریی ماڵ و نیعمەتی دونیا نیشانەی ڕەزامەندیی خودا نییە، کەمییەکەشی نیشانەی تووڕەیی نییە؛ قورئان بە ڕاشکاوی دەفەرموێت: ﴿كَلَّا﴾، تەرازووی خودا بەم ڕواڵەتییە ناپێورێت.   «گوناهەکەم گەورەترە لەوەی خودا لێم خۆش ببێت»: گوناهەکەت بە گەورە ببینە بۆ ئەوەی تەوبە بکەیت، بەڵام هەرگیز ڕەحمەتی بێپایانی خودا بە کەم مەزانە کە هەموو تاوانێک دەسڕێتەوە ئەگەر تەوبەکە ڕاستەقینە بێت.   «خودا ئەمەی لێ سەندم تا ئازارم بدات»: مەبەست و کارەکانی خودا بە میزاجی خۆت تەفسیر مەکە؛ ڕەنگە سڕینەوەی تاوان، بەرزکردنەوەی پلە، یان خێرێکی نادیار بێت کە عەقڵی تۆ درکی پێ ناکات.   «خودا هەرگیز دۆخی من ناگۆڕێت»: نائومێدی حوکمدانە بەسەر داهاتوودا. ئەگەر لەم ساتەدا چارەسەر نابینیت، بڵێ: «من ڕێگاکە نابینم»، بەڵام مەڵێ: «هیچ ڕێگایەک بوونی نییە»؛ چونکە خەزێنە و بەزەیی خودا بێسنوورە.  ------------------------- #بەكورتی (٧٠٤) https://t.me/ba_kurty

#خولی_فێرکردنی_زمانی_عەرەبی 1️⃣ ئایا دەتەوێت بە جوانترین شێوە فێری زمانی عەرەبی ببیت؟ 2️⃣ ئایا دەتەوێت بەجوانی بە زمانی عەرەبی قسە بکەیت؟ 3️⃣ ئایا دەتەوێت ئاستی تێگەیشتن و تەعبیر و دەبڕین و توانای نوسینت بە زمانی عەرەبی پێش بکەویت بەباشی؟ 4️⃣ ئایا دەتەوێت بەشدرای خولێکی ئەزمونکراوی زانستی پێشکەوتوو بکەیت کە چەندین ڕێگەی تازە و جیاواز و سەردەمییانەی تێدا بەکارهێنرابێت بۆ فێرکردنی زمانی عەرەبی؟ 🏆 بەبێ دوودڵی بەشدرای خولی فێرکردنی زمانی عەرەبی بۆ قسەکەرانی زمانی تر بکە لە فێرگەی زمانی عەرەبی.🏆 🔷 خولەکە بە ئۆنڵاینە، وانەکان دوو بەشن: یەکەم: وانەی تایبەتی تۆمارکراو. دووەم: وانەی ڕاستەوخۆ و ڕیکۆردیش دەکرێت و بۆ قوتابیان دادەنرێت. لە ماڵەکەی خۆتەوە فێری زمانی عەرەبی دەبیت. 🔷 بەشی بریان و خوشکان جیایە، پۆل پۆلە، ئاستەکان جیان، ئاستی یەکەم و دووەم و سێیەم بەردەستە. 🔷لێرەش وردەکاری خولەکە بەتەواوی نوسراوە: https://t.me/fergayzmanearabe/1771 لێرەش ئەزموونی بەشێک لە فێرخوازانمان دانراوە: https://t.me/EzmooniFerkhovazan/5 ✍️ بۆ زانینی نرخی خولەکە و چۆنێتی بەشداریکردن تێیدا، نامە بنێرە لەم تیلیگرامەوە و بڵێ تکایە وردەکاری خولەکەم بۆ بنێرین: http://t.me/hagba2025 فێرگەی زمانی عەرەبی گەورەترین ناوەندی فێربوونی زمانی عەرەبیە لە کوردستاندا. https://t.me/fergayzmanearabe

👇👇👇

ماڵپەڕی وەڵامەکان https://walamakan.com/ یەکەمین ماڵپەڕی کوردی تایبەت بە پرسیار و وەڵامی شەرعی --- --- --- --- وەڵامەکان تەنها ماڵپەڕ نیە ئەپڵیکەیشنی وەڵامەکان یەکجار دایبەزێنە و زیاتر لە (٣٦٥٠) پرسیار و وەڵامی شەرعی بەبێ ئینتەرنێت بخوێنەوە بۆ ios و android بەردەستە و کلیک ئێرە بکه http://onelink.to/ekb63b

دوایین هەناسەی سەر زەوی لەوانەیە ناوەکانمان، تەمەنمان، سامانمان، پلە و پۆستمان و وڵاتەکانمان جیاواز بن... بەڵام تەنها یەک كات و سات هەیە کە هیچ کەسێک لێی دەرباز نابێت: من دەمرم، تۆش دەمریت، هەمووشمان دەمرین. پرسیارە ڕاستەقینەکە ئەوە نییە: «ئایا دەمرین؟»؛ ئەمە بە دەقی قورئانی پیرۆز یەکلایی بووەتەوە: ﴿كُلُّ نَفْسٍ ذَائِقَةُ الْمَوْتِ﴾ بەڵکو ئەو پرسیارەی کە پێویستە دڵەکان بهەژێنێت و لە خەوی غەفڵەت خەبەرمان بکاتەوە، ئەوەیە: «ئەی دوای مردن چی؟» چونکە مردن کۆتایی چیرۆکەکە نییە... بەڵکو یەکەمین هەنگاوە تێیدا. دیوارێک نییە ژیان دابخات و لەناوی بەرێت، بەڵکو دەرگایەکە بەرەو دواڕۆژ و قیامەت دەکرێتەوە. کوژانەوەی بوون نییە، بەڵکو گواستنەوەیە لە ماڵی کردەوەوە بۆ ماڵی پاداشت و سزا. لە نێو ئەم دونیایەدا هێشتا دەتوانیت تەوبە بکەیت، هەڵەکانت راست بکەیتەوە، داوای لێبووردن بکەیت، چاکسازی بکەیت، و ڕێڕەوی ژیانت بگۆڕیت. بەڵام دوای مردن... نە هیچ چاکەیەک زیاد دەبێت، نە تەوبە لە گوناهـ وەردەگیرێت، و نە هیچ دەرفەتێکی دیکە بۆ گەڕانەوە هەیە. چەندین مرۆڤ هەبوون پلانیان بۆ دە ساڵی داهاتوو دادەنا، لە کاتێکدا دە خولەکی ژیانی خۆیان مسۆگەر نەبوو! چەندین کەس لە ماڵەکانیان بە پێی خۆیان چوونە دەرەوە و دڵنیا بوون دەگەڕێنەوە، کەچی بە سەر شانی خەڵکییەوە وەک تەرم هێنرانەوە ناو ماڵەکانیان! بۆیە خوای گەورە لە قورئاندا ترسناکترین ئامۆژگاری و پەندی لەسەر خودی «مردن» دانەناوە، بەڵکو لەسەر «ئەوەی دوای مردن دێت» دایناوە: گۆڕ کۆتایی ڕێگاکە نییە... بەڵکو یەکەم مەنزڵگەی قیامەتە؛ دوای ئەویش یان نیعمەتێکی بەردەوامە کە زیاد دەکات، یان لێپرسینەوەیەکە کە دەستپێدەکات؛ پاشان وەستان لە بەردەم پەروەردگار، تەرازووی کردەوەکان، پردی سیرات، و پاشان بەهەشت یاخود ئاگر. مرۆڤی ژیر تەنها خۆی بۆ ساتەوەختی مردن ئامادە ناکات... بەڵکو خۆی بۆ قۆناغەکانی پاش مردن ئامادە دەکات. چونکە مردن لێت ناپرسێت: چەندە ماڵ و سامانت کۆکردەوە؟ ناپرسێت: چەندە بەناوبانگ بوویت؟ ناپرسێت: چەند هەزار کەس فۆڵۆویان کردبوویت؟ بەڵکو ئەو پرسیارانە دەستپێدەکەن کە هیچ کەس ناتوانێت لێیان هەڵبێت یان خۆیانی لێ بدزێتەوە. مادام بە یەقینەوە دەزانیت کە ڕۆژێک کۆچ دەکەیت و جێیدەهێڵیت... با گەورەترین خەمت ئەوە بێت کاتێک دەگەیتە لای خوا، ئەو لە تۆ ڕازی بێت. هەموو ڕێگایەکی ئەم دونیایە دەگاتە دەرگایەک... مردنیش ئەو دەرگایەیە کە بەرەو دواڕۆژ دەکرێتەوە... ئایا بە چ کار و توێشوویەک لەو دەرگایە دەدەیت؟ ------------------------- #بەكورتی (٧٠٣) https://t.me/ba_kurty

کاتێک پاسی قوتابخانەى منداڵەکەت لە بانگی بەیانی پیرۆزتر دەبێت! ڕابمێنن لە زۆربەی ماڵەکانمان لە بەیانییەکی ڕۆژێکی خوێندندا: زەنگی مۆبایل لێدەدات، دایک چەندین جار بانگ دەکات، گلۆپ دادەگیرسێنێت و بەتانی لادەبات بە هۆشداریی ئەوەی: «هەستە دوا دەکەویت، پاسەکە هات و مامۆستاکەت لێت تووڕە دەبێت»، گەر خەبەریشی نەبێتەوە، تەواوی ماڵەکە دەکەوێتە شڵەژان. بەڵام لە کاتی نوێژی بەیانیدا... باوک سەیری ڕۆڵە خەوتووەکەی دەکات و لە ناخی خۆیدا دەڵێت: «با پشوو بدات، تاقیکردنەوەی قورسی هەیە و نامەوێت بێزاری بکەم». لێرەدا پەیامێکی بێدەنگ لە دڵی منداڵەکەدا جێگیر دەبێت: قوتابخانە وادەیەکە نابێت لەدەست بچێت، بەڵام نوێژ دەکرێت قەرەبوو بکرێتەوە. منداڵەکە گەورە دەبێت و بە سەرسوڕمانەوە دەپرسین: «بۆچی نوێژ ناکات؟» لە ڕاستیدا ئەو لەناکاو وازی نەهێناوە؛ بەڵکو ساڵانێک لەسەر ئەوە پەروەردە بووە کە هەموو شتێک شایەنی لەخەوهەستانە جگە لە نوێژ! تا درەنگان بۆ یاری و مۆبایل بەخەبەر دەمێنێتەوە و کەس لە ماندوێتیی سبەینێ ناترسێت، بەڵام بۆ نوێژی بەیانی دەوترێت: «منداڵە، ماندووە و خوێندنی زۆرە». بەم شێوەیە جەستە ڕادێت لەسەر پێشخستنی خەو، و دڵیش ڕادێت لەسەر دواخستنی حەقی خودا، تا لەدەستچوونی نوێژ دەبێتە دەرئەنجامی پەیامە بچووکە ڕۆژانەکان. ئێمە لە ململانێدا نین لەنێوان نوێژ و خوێندندا: مەبەست پشتگوێخستنی قوتابخانە نییە؛ زانستی سوودبەخش گرنگە، پابەندبوون ڕەوشتێکی بەرزە، و هەوڵدان بۆ داهاتوو لە بابەتی گرتنەبەری هۆکارەکانە. بەڵام هەڵە گەورەکە ئەوەیە نوێژ وەک ڕێگرێک لەبەردەم سەرکەوتندا ببینیین، یان وابزانین کاتی ڕۆژ بەشی کۆکردنەوەی هەردووکیان ناکات. نوێژ سەرکەوتنی خوێندن لە منداڵ زەوت ناکات، بەڵکو فێری دەکات چۆن خوێندنەکەی بکاتە عیبادەت: · بە ئەمانەتەوە بخوێنێت. · لە قۆپییە و فێڵ دوور بکەوێتەوە. · ڕێز لە کات بگرێت. · بڕوانامە نەکاتە هەموو شتێک بۆ پێوانەکردنی بەهای خۆی. قوتابخانە چەند کاتژمێرێکی کەم لە ڕۆژەکەی دەبات، بەڵام پەیوەندی لەگەڵ پەروەردگار مانا و بەهای ڕاستەقینە بە تەواوی ڕۆژ و ژیانی دەبەخشێت. کێشەکە ئەوە نییە منداڵەکانمان بۆ قوتابخانە لە خەو هەڵدەستێنین، بەڵکو کێشە ئەوەیە خەمخۆریمان بۆ دونیایان گەورەتر و توندتر بێت لە ڕاگرتنیان لە بەردەم پەروەردگاریاندا. ------------------------- #بەكورتی (٧٠٢) https://t.me/ba_kurty

👇👇👇

لەڕۆژانی جومعەدا؛ چۆن یادگارییەکی لەبیرنەکراو بۆ منداڵەکانت دروست دەکەیت؟ ڕۆژی جومعە تەنها پشوویەکی ئاسایی نییە، بەڵکو دەرفەتێکی زێڕینە بۆ کۆکردنەوەی خێزان و گێڕانەوەی گەرمی بۆ ناو ماڵ دوای ماندووبوونی هەفتەیەک، لە ڕێگەی سێ خاڵی سەرەکییەوە: ١. پەرستشی هاوبەش: خۆ ئامادەكردن بۆ نوێژی هەینی و خوێندنی سوورەتی کەهف. ٢. کۆبوونەوەی پڕ لە سۆز: نانخواردنی پێکەوەیی و سەردانی خزم و کەسوکار. ٣. کاتی تایبەت بۆ منداڵان: دانیشتنی بێ مۆبایل، گوێگرتن، گێڕانەوەی یادگاری و بەخشینی سۆز. ئەوەی لە بیری منداڵدا دەچەسپێت و دەمێنێتەوە کەلوپەل و دیاری نییە، بەڵکو ئەو چرکەساتە پڕ لە سۆز و ئیمانییانەیە کە لەگەڵ دایک و باوکیاندا بەسەریان بردووە؛ بۆیە پێویستە هەینی ببێتە وێستگەی نوێکردنەوەی پەیوەندییەکان لەگەڵ خودا و خێزان، نەک جەنجاڵییەکی دیکە. ------------------ #بەكورتی (٧٠١) https://t.me/ba_kurty

👇👇👇👇

مژدە و ئاگاداری خوشك و برایان و هاوڕێیانی ئازیز : إن شاء الله لەمەودوا لەگەڵ بڵاوكردنەوەی بابەتی كورت مانگانە یان دوو هەفتە جارێك نامیلكەیەكی كورتیش بڵاو دەكەینەوە . خوای گەورە یارمەتیدەرمان بێت و ئیخلاصمان پێ ببەخشێ .

٧٠٠ بابەت! سوپاس و ستایش بۆ خواى گەورە کەناڵی بەکورتی گەیشتە ٧٠٠ بابەت! ئامانجی ئێمە لە سەرەتاوە ڕوون بووە: گەیاندنی زانستى شەرعی بە شێوازێک کە کاتت لێ نەگرێت و سوودت پێ بگەیەنێت. حوکمە شەرعییەکان: بە زمانێکی سادە، ڕوون و پوخت. تێشووی ڕووحی: وتە و ئامۆژگاری بۆ ئارامی دڵ و بەهێزکردنی ئیمان. سوپاس بۆ هاوڕێیەتیتان، إن شاء الله بەردەوام دەبین لە خزمەتکردن. https://t.me/ba_kurty

گەورەترین خەسارەت و زەرەرمەندی و دۆڕان ئەگەر لێم بپرسیت: گەورەترین زیان و زەرەرمەندی و خەسارەت چییە؟ دەڵێم: گەورەترین زیان ئەوە نییە بمریت... چونکە مردن ڕێگاى هەموومانە. بەڵام زەرەرمەندیی ڕاستەقینە ئەوەیە... • خواى گەورە تەمەنێکی درێژت پێ ببەخشێ کەچی نەزانیت بۆ کێ دەژیت، بۆچی دروست کراویت، و بەرەو کوێ هەنگاو دەنێیت. • لە دونیا پارە و سامان زۆر کۆبکەیتەوە... بەڵام بە دڵێکی خراپ و وێرانەوە لێی دەربچیت. • خەڵکی بتناسن، ناوت لەبەر بکەن، و ستایشت بکەن… لە کاتێکدا تۆ بایەخت بەوە نەدابێت کە لە نێوان خۆت و پەروەردگارتدا هەیە. • ماڵێکی جوان بۆ منداڵەکانت دروست بکەی... بەڵام لە دڵیاندا ئیمانێک دروست نەکەیت کە کاتێک لە ناویان نەماویت ڕایانبگرێت و بیانپارێزێت. • سامانێکیان بۆ بەجێبهێڵیت کە لەنێوان خۆیاندا دابەشی بکەن... کەچی ناسینی پەروەردگاریان، و نوێژێک کە بیانپارێزێت، و بەهایەک کە ڕێنوێنییان بکات، و سەرمەشقێکیان تێدا بەجێنەهێڵیت کە لەدوای کۆچکردنت یادت پێ بکەن. • ساڵانێکی درێژ سەرقاڵی مسۆگەرکردنی داهاتوویەک بیت کە بێگومان بەجێی دەهێڵیت... و خۆئامادەکردن بۆ داهاتوویەک دوا بخەیت کە ئیتر هیچ جیابوونەوەیەکی لەدوادا نییە. • بگەیتە تەمەنی شەست ساڵی... پاشان حەفتا... پاشان هەشتا... و هەتا کاتی کۆچکردن نزیکتر بێتەوە، زیاتر هۆگری ئەو شتانە بیت کە بەجێیان دەهێڵیت، نەک ئەوەی زیاتر خۆت بۆ دیداری ئەو زاتە ئامادە بکەیت کە پێی دەگەیت. لە هەموو ئەوانەش سەختتر: ئەوەیە خوای گەورە ڕۆژ لەدوای ڕۆژ، دەرفەت لەدوای دەرفەت، ئامۆژگاری لەدوای ئامۆژگاریت پێ ببەخشێت، و دەرگای گەڕانەوەت جار لەدوای جار بۆ واڵا بکات... کەچی تۆ هەر دوای بخەیت تا ئەو ڕۆژە دێت کە ئیتر دەسەڵاتی هیچ دواخستنێکت تێدا نامێنێت. چونکە پەند و بایەخ تەنها بە درێژیی تەمەن نییە... بەڵکو بەوەیە کە تەمەنەکە بە چی پڕ دەکەیتەوە. ماڵوێرانی و ناخۆشیش ئەوە نییە تۆ دونیا بەجێدەهێڵیت... چونکە هەموومان بەجێیدەهێڵین. بەڵکو ماڵوێرانی ئەوەیە دونیا تۆ بەجێبهێڵیت... پێش ئەوەی توێشووی خۆت بەرەو لای خودا لێی هەڵبگریت. ———————————- #بەكورتی (٧٠٠) https://t.me/ba_kurty

{عَلِمَتْ نَفْسٌ مَّا أَحْضَرَتْ} لە سوورەتی (التَّکویر)دا، خودای گەورە باسی دوازدە ڕووداوی سامناکی وێرانبوونی گەردوون دەکات: خۆر دەپێچرێتەوە، ئەستێرەکان هەڵدەوەرێن، دەریاکان گڕ دەگرن و چیاکان لە بنەوە هەڵدەتەکێنرێن. لە دوای ئەو هەموو مەرجە ترسناکانە (إِذَا.. وَإِذَا..)، چاوەڕێ دەکەیت ببیستیت ئاخۆ چی بەسەر مرۆڤدا دێت؟ وەڵامەکە دەگات: {عَلِمَتْ نَفْسٌ مَّا أَحْضَرَتْ}؛ واتە «هەموو نەفسێک دەزانێت چی لەگەڵ خۆیدا ئامادە کردووە و هێناویەتی». لەم دەربڕینەدا دوو حەقیقەتی گەورە خۆیان حەشارداوە: * نهێنی وشەی «أَحْضَرَتْ» : خودا نەیفەرمووە «عَمِلَتْ» یان «فَعَلَتْ» (چی کردووە)، چونکە کردەوەکانت تەنها ڕووداوی تێپەڕ نین لەناو کاتدا بتوێنەوە؛ بەڵکو وەک کەلوپەل و توێشوویەکن کە هەر لەم ژیانەوە پێچاوەتەوە و لەو ڕۆژەدا بە دەستی خۆت دەیانهێنیتە مەیدانی دادگایی. * هاوسەنگییەکی سەرسوڕهێنەر: لە کاتێکدا هەموو نیزامی گەردوون تێکدەچێت و لەناو دەچێت، تاکە شتێک کە نە دەفەوتێت و نە کەم دەبێتەوە، کردەوەکانی تۆیە کە لەگەڵ خۆتدا دەیانهێنیت. * وشەی «نَفْسٌ» (هەر کەسێک بە تەنیا): لەو ڕۆژەدا نە خێڵ و عەشیرەت هەیە و نە پلە و سامان، تەنها تۆیت و ئەو بارەی خستووتەتە سەر شانت. ئەم ئایەتە تەنها باسێکی داهاتوو نییە، بەڵکو هۆشدارییەکی خێرایە بۆ ئێستامان: لە بار و کەلوپەلی جانتاکەت وردبەرەوە پێش ئەوەی سەفەرەکە دەست پێبکات، چونکە لەوێ نە دەتوانیت بارەکەت فڕێ بدەیت و نە هیچ شتێکیشی لێ بگۆڕیت. ———————————- #بەكورتی (٦٩٩) https://t.me/ba_kurty

دوایین چركەساتی سەر زەوی بهێنە پێش چاوی خۆت ئەو چرکەساتە... 🕊🌅 ساتی لادانى پەردەی غەیب، ئەو پەردەیەی لەمێژە باسی لێوە دەبیستین و بە چاو نەماندیوە... ساتی کوژانەوە و بێدەنگبوونی تەواوی ژاوەژاوی سەر ئەم زەوییە... و بیستنی دەنگێکی تر: «ئەی نەفس، کاتی کۆچکردن هات». ئەو چرکەساتەی کە تێیدا جەستە لە ڕۆح دادەبڕێت بۆ یەکەمین جار لەو ڕۆژەوەی فووی پێدا کراوە.. ساتی ماڵئاواییکردن لە هەموو شتە ئاشنا و ڕاهاتووەکان؛ ماڵ، ئازیزان، ئاواتە گەورەکان و تەنانەت هیوا بچووکەکانیش... ئینجا دەرگایەکی تر واڵا دەبێت، دەرگایەک لە هیچ دەرگایەکی تر ناچێت.. گواستنەوەیەکی مەزن و گەورەیە لە زەوییەکەوە کە پڕ بوو لە هەڵخەڵەتان و لەبیرچوونەوە... بەرەو جیهانێک کە تۆزقاڵێک لە حەقیقەت ناشارێتەوە. لە کاتی ڕووبەڕووبوونەوە لەگەڵ فریشتەی گیانکێشاندا مرۆڤ نەفسی خۆی دەبینێت بە جۆرێک کە هەرگیز پێشتر بەو شێوەیە نەیبینیوە: هیچ شتێک سوودی پێ ناگەیەنێت جگە لە دڵی و کردەوەکانی. نە نازناوەکان، نە سەروەت و سامان، نە پلە و پێگە، و نە تەنانەت بانگەشە و قسە ڕازاوەکان. لەوێدا هەموو حەقیقەتەکان هەڵدەماڵرێن... ئەوەی بە ڕاکردن بەرەو خودا دەچوو... ڕوویەکی بەخشندە و ڕێزدار دەبینێت کە چاوەڕێیەتی. و ئەوەی لە بێئاگاییدا نوقم ببوو... لێپرسینەوە و حسابێک دەبینێت کە چاوەڕێیەتی. جیاوازیی نێوان دەرچوونی ڕۆح بە ئاسانی یان بە گرانی و تەنگانە، تەنها ڕێکەوتێکی لەناکاو نییە، بەڵکو دوایین بەرهەمی تەواوی گەشتی مرۆڤە لەسەر ئەم زەوییە؛ هەر چرکەساتێکی ڕاستگۆیی، هەر فرمێسکێکی پەشیمانی، و هەر سوجدەیەکی پەنهان لە تاریکیی شەودا،ڕێڕەوێکی ڕووناک بۆ ئەو ساتە دروست دەکات... هەر لەبەر ئەمەیە پیاوچاکان و چاکەکاران.. لە کاتژمێری مەرگ زیاتر لە هەر کاتێکی تر دەترسان، و زۆر دەگریان کاتێک دەیانگوت: «چۆن پێشوازیمان لێ دەکرێت؟ و بە چ ڕوویەکەوە ڕووبەڕووی فریشتەی گیانکێشان دەبینەوە؟». 🌸🌿 ———————————- #بەكورتی (٦٩٨) https://t.me/ba_kurty

سوپاسگوزاریی هاوسەر؛ کلیلی ڕەزامەندیی خودا پێغەمبەری خوا ﷺ دەفەرموێت: «لا ينظرُ اللهُ تبارك وتعالى إلى امرأةٍ لا تشكُرُ لزوجِها وهيَ لا تَستَغني عنهُ»؛ صحيح الترغيب واتە: «خوای گەورە سەیری ئەو ژنە ناکات کە سوپاسگوزاری مێردەکەی نییە، لە کاتێکدا ناتوانێت دەستبەرداری ببێت و پێویستی پێیەتی.» گوێڕایەڵی هاوسەر، چاکەکردن لەگەڵی، داننان بە چاکەکانیدا و سوپاسگوزاریی، لەو کردەوانەن کە ڕەزامەندی پەروەردگاریان تێدایە؛ پێچەوانەی ئەمەش، تووڕەیی و سزای خوای بەدواوەیە. ڕوانینی خوای گەورە بۆ بەندەکانی کە لە فەرموودەکەدا هاتووە، ڕوانینی ڕەحمەت و سۆزە کە تایبەتە بەوانەی خۆشیانی دەوێت؛ واتە: خوای پەروەردگار بە ڕەحمەتەوە سەیری ئەو ئافرەتە ناکات کە هاوسەرەکەی چاکەی لەگەڵدا دەکات و پێداویستییەکانی دابین دەکات، کەچی ئەو پێنەزانە بەرامبەری و سوپاسی ناکات. * مەبەست لە سوپاسگوزاری چییە؟ سوپاسگوزاری تەنها بە زمان نییە لە کاتێکدا لە ڕەفتاردا ئازاری بدات، بەڵکوو سوپاسگوزاریی ڕاستەقینە بە زمان و کردار پێکەوە دەبێت: دڵخۆشی و ئارامی: دەربڕینی شادمانی و ئاسوودەیی بە ژیانکردن لەگەڵیدا. خزمەت و بایەخدان: جێبەجێکردنی مافەکانی هاوسەر و خزمەتکردنی منداڵەکانی. پشتیوانی لە تەنگانەدا: دەستبەردارنەبوونی لە کاتی ناڕەحەتی و قەیرانەکاندا. چاوپۆشی لە کەمکوڕی: گەڕان بەدوای هەڵەکانیدا و بریندارکردنی لە کاتی هەڵە و کەمتەرخەمیدا نابێت. گوێڕایەڵی و هاوسۆزی: وەڵامدانەوەی داواکارییەکانی، گوێگرتن لێی لە کاتی دڵتەنگی و باسکرنی کێشەکانیدا. پاراستنی نهێنی: هێشتنەوە و شاردنەوەی نهێنییەکانی کاتێک شتێکی بۆ باس دەکات. ———————————- #بەكورتی (٦٩٧) https://t.me/ba_kurty

سێ تەڵەی مەترسیدار کە پیاوان لەناودەبەن! ⚠️💔 مرۆڤ لەم ژیانەدا بەردەوام لە ناو مەیدانی تاقیکردنەوەدایە؛ زۆرجار کەسێک دەبینین کە ساڵانێکی درێژ بە تەقوا و پارێزکاری ژیاوە، کەچی لەناکاو بەهۆی لادانێکەوە هەموو مێژوو و ئایینەکەی دەدۆڕێنێت. زانایان هەمیشە ئاماژەیان بەوە کردووە کە گەورەترین ئەو دەروازانەی شەیتان پیاوانی پێ دەخەڵەتێنت، لە سێ خاڵی سەرەکیدا کۆدەبنەوە: ١. خەڵوەت و تەنیایی (تەڵەی ئیمان و نیفاق): لە پێش چاوی خەڵکیدا تەقوا و لەخواترسان ئاسانە، بەڵام لە ژوورە داخراوەکان و لە پشتی شاشەی مۆبایلەکاندا، ئیمانی حەقیقیی بەندە لە دووڕوویی (نفاق) جیا دەبێتەوە. ئەو کەسەی لە تەنیاییدا چاودێریی خودای لەبیر بچێت، بەرەو داڕمانی دڵ هەنگاو دەنێت. ٢. پارە و سامان (تەڵەی تەماح و حەرامخۆری): زۆر کەس لە تاقیکردنەوەی هەژاریدا سەردەکەون، بەڵام لە تاقیکردنەوەی دەسەڵات و ساماندا دەدۆڕێن. کاتێک ماڵی حەرام، ڕیبا، یان گەندەڵی دێتە پێشەوە، ئەگەر تەقوای ڕاستەقینە نەبێت، بەرەکەت لە ماڵ و ژیاندا بە یەکجاری دەسڕێتەوە. ٣. ئافرەتان و ئارەزووی حەرام (تەڵەی داوێنپیسی): پێغەمبەری خودا ﷺ هۆشداریی داوە و فەرموویەتی: «اتَّقُوا الدُّنْيَا، وَاتَّقُوا النِّسَاءَ؛ فَإِنَّ أَوَّلَ فِتْنَةِ بَنِي إِسْرَائِيلَ كَانَتْ فِي النِّسَاءِ» [رواه مسلم] واتە: خۆتان لە فیتنەی دونیا بپارێزن، و خۆتان لە فیتنەی ئافرەتان بپارێزن؛ چونکە یەکەمین فیتنەی بەنی ئیسڕائیل لە ئافرەتاندا بوو. ڕوانینی حەرام و کەوتنە ناو داوی ئارەزووەکان، شکۆ، کەسایەتی، و داوێنپاکی لە مرۆڤ دادەماڵێت. ئەوەی خۆی لەم سێ چاڵە مەترسیدارە نەپارێزێت، بە یەک دەست دونیای خۆی و بە دەستەکەی تری دواڕۆژەکەی لەدەست دەدات؛ بەرەکەت لە تەمەنیدا دەبڕێت، داوێنپاکی نامێنێت، و ئایین و سامانەکەشی دەبنە پەژارە بەسەریەوە. پێش ئەوەی درەنگ بێت، دەرگای تەنیایییەکانت بە یادی خودا بپۆشە، چاوت لە حەرام بپارێزە، و دەستت بۆ ماڵی حەرام و گوماناوی درێژ مەکە. خوایە گیان، پەنات پێ دەگرین لە فیتنە و تاقیکردنەوەی دونیا، و داوای داوێنپاکی، پارێزراوی، و دڵێکی ساغت لێ دەکەین. 🤲🌸 ———————————- #بەكورتی (٦٩٦) https://t.me/ba_kurty