БСТ | Яңылыҡтар

Шәйехзада Бабич исемендәге йәштәр премияһы 500 мең һумға тиклем арттырыла Башҡортостанда быйылдан Шәйехзада Бабич исемендәге республика йәштәр премияһының күләме 500 мең һумға тиклем арттырыла. Конкурсҡа әҙәбиәт, сәнғәт һәм архитектура әҫәрҙәрен тәҡдим ителергә мөмкин. Ижади эш авторҙары араһынан 3 еңеүсе билдәләнә. Уларға башланғыстарын тормошҡа ашырыу буйынса дәүләт ярҙамы күрһәтеләсәк. Документтар 1 июлгә тиклем ҡабул ителә

Бүздәк-Саҡмағош-Дүртөйлө юлының 14 километры яңыртылды "Тормош өсөн инфраструктура" милли проектына ярашлы был юлда эштәр әле дауам итә. Юл билдәләре һыҙыла. Транспорт һәм юл хужалығы министрлығынан белдереүҙәренсә, трассанан көн һайын 3 мең ярымдан ашыу машина үтә. Ул Благовар, Бүздәк, Саҡмағош, Дүртөйлө райондарын федераль юлдар менән тоташтыра.

Өфөнөң 153-сө лицейын тамамлаусы Алексей Лобов Берҙәм дәүләт имтихандарында 300 балл йыйҙы Өфөнөң 153-сө лицейын тамамлаусы Алексей Лобов Берҙәм дәүләт имтихандарында 300 балл йыйҙы. Был республика тарихында тәүге күренеш. Уның белеме физика, информатика һәм профилле математика буйынса максималь балл менән баһаланған. Шулай уҡ Алексей рус теленән дә имтиханын 94 балға яҙған. Егетте уҡытыусылары намыҫлы һәм фекерле уҡыусы булараҡ билдәләй. Алексей айырыуса теүәл фәндәрҙе ярата икән. Киләсәктә мәғлүмәт технологиялары йүнәлешен һайларға ниәтләй.

Башҡортостан Конституцияһына төҙәтмәләр индерелде Документты республика парламенты ҡарауына Радий Хәбиров тәҡдим итте. Уға ярашлы, Башҡортостан Башлығы һәм Дәүләт Йыйылышы-Ҡоролтайға вәкәләттәр өҫтәлә. Хөкүмәт ҡарауында булған мәсьәләләр аныҡлана. Республика парламенты закондар үтәлешен контролдә тота, премьер-министр һәм уның урынбаҫарҙарына ышаныс буйынса мәсьәләне ҡарай, урындағы үҙидара органдары эшмәкәрлеге тураһында мәғлүмәттәр ҡабул итә. Шулай уҡ йәштәр йәмәғәт палатаһы закон проекттары әҙерләп парламент ҡарауына тәҡдим итеү хоҡуғын ала.

Башҡортостанда «Урман» операцияһы дауам итә Республикала «Урман» операцияһы бара. Оператив -профилактик сарала хоҡуҡ һаҡлау органдары вәкилдәре, урман инспекторзары ҡатнаша. Урманды файҙаланыу ҡануниәтен боҙоу, шул иҫәптән урман ултыртылған урындарҙы законһыҙ ҡырҡыу осраҡтарына юл ҡуймау һәм уларҙы иҫкәртеү өсөн үткәрелгән рейд тураһында тулыраҡ киләһе репортажда.

Баймаҡ районы ирекмәндәре сираттағы гуманитар ылау менән махсус хәрби операция биләмәһенә юлланды Баймаҡ районынан «Беҙ бергә» ирекмәндәр ойошмаһы сираттағы гуманитар ылау менән махсус хәрби операция биләмәһенә юлланды. Был юлы улар үҙҙәренең сәфәрен Бөйөк Ватан һуғышы яуҙарында алышҡан ата-бабаларыбыҙ иҫтәлегенә бағышланы.

Өфөлә бер төркөм яугирҙарҙы махсус хәрби операция биләмәһенә оҙатыу тантанаһы үтте Ҡыҫҡа ваҡытлы ялдан һуң йәнә алғы һыҙыҡҡа. Өфөлә бер төркөм яугирҙарҙы махсус хәрби операция биләмәһенә оҙатыу тантанаһы үтте. Майҙанда Рәсәй һәм Башҡортостан гимндары яңғыраны. Хәрби комиссариаттың хәрби-патриотик эш буйынса бүлексә етәксеһе Альберт Ғилманов үҙ сығышында ил мәнфәғәтен яҡлап хәрби бурысын үтәгән яҡташтарыбыҙҙың ҡаһарманлыҡ өлгөһө булыуын билдәләп, уларға уңышлы хеҙмәт теләне.

Өфөлә Ағиҙел йылғаһы аша күперҙең аркаһы кире урынына ҡуйылған Был турала социаль селтәрҙә Башҡортостан башлығы Радий Хәбиров хәбәр итте. Төбәк етәксеһе арканы баш ҡала символдарының береһе тип атаған. Әлегә күперҙе реконструкциялау дауам итә. Объект 85 процентҡа әҙер. Яңыртылған күперҙе транспорт хәрәкәте өсөн быйыл көҙ асыу планлаштырыла, тип яҙған Радий Хәбиров.

Иглин районы Ҡарамалы ауылында Ҡаймаҡ байрамы уҙҙы Тәүге тапҡыр үҙенсәлекле йола 2003 йылда райондың Меңйетәр ауылында тормошҡа ашырылған булған. 22 йылдан һуң күркәм байрам тергеҙелеп, яңы йолалар менән байытылған. Байрамда хужабикәләр һөт аҙыҡтарын тәҡдим итте, уларҙы әҙерләү серҙәре менән уртаҡлашты.

Яман шеш менән сирләгән балалар Рәсәй йыһангиры Андрей Борисенко менән осрашты Яман шеш менән сирләгән балалар Рәсәй йыһангиры Андрей Борисенко менән осрашты. «Сәнғәт аша йыһан терапияһы» программаһын Республика балалар клиник дауаханаһында ЮНИТИ фонды ойошторҙо. Осрашыуҙа ҡатнашыусылар хыялдары менән уртаҡлашты, һүрәт төшөрҙө, космонавтан иҫтәлекле бүләктәр алды. Өфө - донъяла ошондай программа үткәрелгән 44-се ҡала. Ентекләберәк киләһе сюжетта.

Был аҙнала «Сәләмәтлек поездары» Башҡортостандың ете муниципалитетында эшләй Был аҙнала «Сәләмәтлек поездары» Башҡортостандың ете муниципалитетында эшләй. Архангел районында йәшәүселәр ҙә «Сәләмәт республика - сәләмәт төбәк» акцияһында ҡатнашып, мобиль медицина комплексында табиптарға күренде. Ошонда уҡ ҡан баҫымын үлсәтергә, тейешле анализдар тапшырырға, рентген, флюорография, маммография тикшереүе үтеп була.

Башҡортостанда контракт төҙөргә теләүселәр үҙҙәренә оҡшаған ғәскәр төрөн һайлай ала Башҡортостанда контракт төҙөргә теләүселәр үҙҙәренә оҡшаған ғәскәр төрөн һайлай ала. Хәрби хеҙмәткә айырыуса водителдәр һәм уҡсылар талап ителә. Ғаризаны 18-ҙән 65 йәшкә тиклем ир-егеттәр яҙа ала. Кандидаттың хәрби тәжрибәһе булыуы ла, булмауы ла ихтимал. Контракт төҙөргә теләк белдереп ғариза яҙғас, һайлап алыу этабын үтә. «Защитник» контракт буйынса хәрби хеҙмәткә һайлап алыу үҙәгендә документтарҙы бер көн эсендә рәсмиләштереп медицина тикшереүе үтергә мөмкин. Тулыраҡ мәғлүмәтте хәрби комиссариатта йәки Республика һайлап алыу пунктында белешергә була.

Башҡортостан парламенты Рәсәйҙә тәүгеләрҙән булып хәрби журналистар тураһында закон ҡабул итте Башҡортостан парламенты Рәсәйҙә тәүгеләрҙән булып хәрби журналистар тураһында закон ҡабул итте. Киң мәғлүмәт сараларының был категорияһы өсөн дәүләт ярҙамы саралары булдырыу ҡаралған, улар республика Хөкүмәте тарафынан раҫланырға тейеш. Дәүләт Йыйылышы-Ҡоролтайҙың яҙғы сессиялағы һуңғы пленар ултырышында Башҡортостан башлығы Радий Хәбиров та ҡатнашты. Республика өсөн мөһим ҡануни проекттар тураһында киләһе материал.

Салауат ҡалаһында өлкән йәштәгеләр һәм инвалидтар өсөн көндөҙгө үҙәк асылды Бында көн һайын 25 кеше ваҡытын файҙалы итеп үткәрә ала. Ҡала хакимиәтенән белдереүҙәренсә, үҙәк республика ҡаҙнаһынан финанслана. Ул өлкәндәргә яңғыҙлыҡты еңеләр кисереү, аралашыу маҡсатында булдырылған. Бында китапхана, ял бүлмәһе, фитнес майҙансыҡ бар, ҡул эштәре, йога, кулинария, гимнастика менән шөғөлләнергә була.

«Хәнифәкәй» һәм «Хәтирә» ансамблдәре дуҫлыҡ күпере һалды Дуҫлыҡ ептәрен нығытып. Баймаҡ районы Мерәҫ ауылында урындағы «Хәнифәкәй» фольклор ансамбле Ейәнсура районы Сирғол ауылының «Хәтирә» ансамбле менән осрашты. Ижади байрамға әүерелгән сара хаҡында киләһе яҙмала.

Күгәрсен районында «Мораҙымдың моңло хазинаһы» халыҡ ижады фестивале үтте Күгәрсен районында «Мораҙымдың моңло хазинаһы» халыҡ ижады фестивале үтте. Етенсе йыл рәттән ойошторолған мәҙәни сара Башҡортостандың тәүге президенты Мортаза Рәхимовтың яҡты иҫтәлегенә арналды.Унда республика район-ҡалаларынан тыш, илдең төрлө төбәктәренән 300-гә яҡын конкурсант ҡатнашты. Улар «Данлы ил - Башҡортостан» патриотик йыр һәм «Заманалар мираҫы» тип исемләнгән фольклор бейеү башҡарыусылары араһында ике номинацияла сығыш яһаны.

Бөрйән районында Түңгәүер ырыуының VII йыйыны үтте Бөрйән районында Түңгәүер ырыуының VII йыйыны үтте. Мәртәбәле йыйында түңгәүерҙәрҙең абруйлы вәкилдәре, республикабыҙҙың төрлө райондарынан йыйылған делегаттар ҡатнашты.

Рәсәйҙә яңы каникулын оҙайтыуҙары мөмкин 31 декабрҙән 11 ғинуарға тиклем ял итеү тураһында башланғыс бар. Дәүләт Думаһының Хеҙмәт һәм социаль сәйәсәт буйынса комитеты башлығы Ярослав Нилов белдереүенсә, киләһе йылда беренсе эш көнө 9 ғинуар, йомаға тура килә. Был көндө күптәр эш биреүсе менән һөйләшеп ял аласаҡ. Шуға 3-4 ғинуар, шәмбе-йәкшәмбегә тура килгән бер ялды 9 ғинуарға күсереү мөмкинлеге ҡарала. Яңы йыл каникулы 12 көнгә һуҙылыуы ихтимал.

Өфөлә «Күп фазалы системалар» буйынса халыҡ-ара конференция үтә Рәсәй фәндәр академияһының Өфө федераль тикшеренеү үҙәгенең Рифат Мәүлитов исемендәге механика институты «Күп фазалы системалар: моделдәр, тәжрибә, ҡушымталар» , тип аталған халыҡ-ара IX бөтә Рәсәй йәш ғалимдар конференцияһын үткәрә. Форум Рәсәй фәндәр академияһы академигы Роберт Ниғмәтуллиндың 85 йәшлек юбилейына арналған.

Башҡортостан делегацияһы Екатеринбургта Бөтә Рәсәй сәнәғәт күргәҙмәһендә ҡатнаша "Иннопром" 7-10 июлдә уҙғарыла. Радий Хәбиров хөкүмәткә ошо сараға әҙерләнергә ҡушты Уҙған йылда Башҡортостан делегацияһы "Иннопром"да 9 килешеү төҙөнө. 17 миллиард 800 миллион һумлыҡ инвестиция проекттары буйынса документтарға ҡул ҡуйылды.