Dr. Eyob Mamo

የራስ በራስ እይታ ሲዛባ! በአንድ ወቅት የተደረገ ጥናት ነው፡፡ በጥናቱ የሚሳተፉት ቁጥራቸው ሃያ የሚሆኑ ሴቶች ናቸው፡፡ እነዚህ ሴቶች የፊት ሜካፕ እንደሚደረግላቸውና አንድ ጥናት እንደሚደረግ ተነግሯቸው ከተስማሙ በኋላ ጥናቱ ተካሄደ፡፡ ከእነዚህ ለጥናት ከቀረቡ ሴቶች አስሮቹ ጥሩና ውብ ሜካፕ እንደሚደረግላቸውና በሰው ፊት እንደሚቀርቡ፣ ከዚያም ሰዎቹ ምን አይነት ሁኔታን እንደሚያሳይዋቸው በጥንቃቄ እንዲመለከቱ ተነገራቸው፡፡ የቀሩት አስሮቹ ግን ፊታቸው ላይ ጎላ ያለ ጠባሳ የሚመስል ሜካፕ ተሰርተው በሰው ፊት እንደሚያቀርቧቸው፣ ከዚያም ሰዎቹ ምን አይነት ሁኔታን እንደሚያሳይዋቸው በጥንቃቄ እንዲመለከቱ ተነገራቸው፡፡ የመጀመሪያዎቹ አስሮቹ በባለሞያው የተደረገላችው ውብ ሜካፕ በመስታወት እንዲመለኩ ከተደረጉ በኋላ ሰዎቹ ፊት ቀርበው በኋላ ቃለ መጠይቅ ሲደረግላቸው፣ እነሱን የተመለከቷቸው ሰዎች በሙሉ መልካምነትንና ተቀባይነትን የሚያመለክት ሁኔታ እንዳሳይዋቸው ሁሉም ተናገሩ፡፡ የቀሩት አስሩ ሴቶች ጠባሳ የሚመስል ሜካፕ በዚያው በባለሞያ ከተሰራላቸውና ራሳቸውን በመስታወት እንዲመለኩ ከተደረጉ በኋላ ወደ ሰዎቹ ፊት ከመቅረባቸው በፊት ሜካፑን በማስተካከል ሰበብ ባለሞያው እንደገና እንደሚናካካላቸው ከተነገራቸው በኋላ ሳያውቁት ጠባሳ የሚመስለውን ምልክት በማጥፋት ልክ እንደ በፊቶቹ አስሮች ጥሩ አድረጎ ሰራላቸው፡፡ ከዚያም እነዚህ አስር ሴቶች ልክ ጠባሳ እንዳለባቸው የሚያሳየው ሜካፕ እንዳላቸው በማመን በሰዎች ፊት ታይተው ካለፉ በኋላ ሲጠየቁ የተመለከቷቸው ሰዎች ሁሉ የንቀትና የመጸየፍ ሁኔታ እንዳሳይዋቸው ተናገሩ፡፡ በእነዚህ ሴቶች መካከል የነበረው ልዩነት በራሳቸው ላይ ያላቸው አመለካከት ጉዳይ ነበር፡፡ በአንድ አይነት የመዋብ ሂደት ውስጥ ያለፉት ሴቶች፣ ግማሾቹ ጥሩና ውብ ሜካፕ እንደተደረገላቸው ስላሰቡ ብቻ የሰዎቹ ጥሩ ጥሩ ሁኔታ ነበር የታያቸው፡፡ ሌሎቹ አስሮች ግን ጠባሳ የሚመስል ሁኔታ ይዘው እንደቀረቡ ስላሰቡ ብቻ ሰዎች የሚያሳይዋቸውን ሁኔታ ሁሉ ከንቀት፣ ከመገፋትና ካለመፈለግ ጋር አገናኝተው ተረጎሙት፡፡ በራሳችን ላይ ያለን አመለካከት ሰዎች በእኛ ላይ ያላቸውን አመለካከት የምንፈታበት ዋነኛው መፍቻ ነው፡፡ ችግር አለብን ብለን ስናስብ፣ አልመጥንም የሚል አሳብ ሲኖረንና የመሳሰሉት አመለካከቶች ሲጫጫኑን ሰዎችም እኛን እንደዚያው እንደሚያስቡን አድርገን የመውሰድ ዝንባሌ አለን፡፡ በሌላ አገላለጽ ሰዎች በእኛ ላይ ያላቸው ምልከታ የምንመዝነው ቀድሞውኑ “ነኝ” ብለን ባሰብነው ልክ ነው፡፡ ራሱን የናቀ ሰው፣ ችግር እንዳለበት የሚያስብ ሰው፣ ራሱን የሚጠላ ሰው . . . ሰዎች የሚያሳዩትን ሁኔታ ሁሉ ከዚያው በራሱ ላይ ካለው ምልከታ ጋር ያገናኘዋል፡፡ በቅድሚያ በራሳችን ላይ ያለንን ምልከታ እናስተካክለው፡፡ https://t.me/Dreyob https://m.youtube.com/user/naeleyob623 https://www.facebook.com/Dr-Eyob-Mamo-1050816404958639/