LSGD GUIDE

“വ്യാജ രേഖകൾ നിർമ്മിച്ച് സാമ്പത്തിക തട്ടിപ്പ് നടത്തിയ കേസിൽ നിർമ്മിതി കേന്ദ്ര മുൻ റീജിയണൽ എഞ്ചിനിയറെ 12 വർഷം കഠിന തടവിനും 6 ലക്ഷം രൂപ പിഴ ഒടുക്കുന്നതിനും വിജിലൻസ് കോടതി ശിക്ഷിച്ചു.” ഹൗസിംഗ് സ്കീമിൽ യോഗ്യരല്ലാത്ത ആൾക്കാർക്ക് വ്യാജ രേഖകൾ തയ്യാറാക്കി വീട് നിർമ്മാണത്തിന് ധനസഹായം അനുവധിച്ച് സർക്കാരിന് സാമ്പത്തിക നഷ്ടം ഉണ്ടാക്കിയ കേസിൽ ഇടുക്കി മുട്ടം നിർമ്മിതി കേന്ദ്ര മുൻ റീജിയണൽ എഞ്ചിനിയറും, എറണാകുളം ഫോർട്ട് കൊച്ചി സ്വദേശിയുമായ കൃഷ്ണദത്ത് (വയസ്സ് 74) നെ കുറ്റക്കാരനാണെന്ന് കണ്ടെത്തി മൂവാറ്റുപുഴ വിജിലൻസ് കോടതി 12 വർഷം കഠിന തടവിനും, 6 ലക്ഷം രൂപ പിഴ ഒടുക്കുന്നതിനും ഇന്ന് (24.06.2026) ശിക്ഷിച്ചു. 2007-2008 കാലഘട്ടത്തിൽ പ്രതി കൃഷ്ണദത്ത് ഇടുക്കി മുട്ടം നിർമ്മിതി കേന്ദ്രത്തിൽ റീജിയണൽ എഞ്ചിനിയറായിരിക്കെ നിർമ്മിതി കേന്ദ്രം നടപ്പിലാക്കിയ ഹൗസിംഗ് സ്കീമിൽ, വ്യാജ രേഖകൾ നിർമ്മിച്ച് യോഗ്യരല്ലാത്ത അഞ്ചുപേർക്ക് ഭവന നിർമ്മാണ ഗ്രാന്റ് അനുവദിച്ച് നല്കി 1,75000/- രൂപ തട്ടിച്ചെടുത്തതിന് ഇടുക്കി വിജിലൻസ് യൂണിറ്റ് 2014 ൽ ഒരു കേസ്സ് രജിസ്റ്റർ ചെയ്തിരുന്നു. കേസ്സിന്റെ അന്വേഷണത്തിൽ ഏലപ്പാറ ഗ്രാമ പഞ്ചായത്തിൽ നിന്നും, ഇടുക്കി ജില്ലാ പഞ്ചായത്തിൽ നിന്നും മുൻപ് ഭവന നിർമ്മാണ സഹായം വാങ്ങിയവർക്ക് തന്നെയാണ് പ്രതി കൃഷ്ണദത്ത് വീണ്ടും വ്യാജ രേഖകൾ ചമച്ച് ധന സഹായം അനുവധിച്ച് നല്കിയതെന്ന് തെളിഞ്ഞിരുന്നു. ഈ കേസിലാണ് ഇടുക്കി മുട്ടം നിർമ്മിതി കേന്ദ്രം മുൻ റീജിയണൽ എഞ്ചിനിയറായ കൃഷ്ണദത്തിനെ കുറ്റക്കാരനാണെന്ന് കണ്ടെത്തി വിവിധ വകുപ്പുകളിലായി 12 വർഷം കഠിന തടവിനും, 6 ലക്ഷം രൂപ പിഴ ഒടുക്കുന്നതിനും മൂവാറ്റുപുഴ വിജിലൻസ് കോടതി ശിക്ഷിച്ചത്. മൂവാറ്റുപുഴ വിജിലൻസ് കോടതി ജഡ്‌ജ് ശ്രീ. രാജേഷ്. ജി ആണ് വിധി പുറപ്പെടുവിച്ചത്. ഇടുക്കി വിജിലൻസ് യൂണിറ്റിലെ മുൻ ഡി.വൈ.എസ്.പി രതീഷ് കൃഷ്ണൻ, ഇൻസ്പെക്ടർമാരായ വിശ്വനാഥൻ നായർ, ജിൽസൺ മാത്യു എന്നിവരാണ് ഈ കേസിന്റെ അന്വേഷണം നടത്തിയത്. വിജിലൻസിനു വേണ്ടി പബ്ലിക് പ്രോസിക്യൂട്ടർ ശ്രീമതി. സരിത. വി.എ ഹാജരായി. പൊതുജനങ്ങളുടെ ശ്രദ്ധയിൽ അഴിമതി സംബന്ധിച്ച വിവരങ്ങൾ ലഭിക്കുകയാണെങ്കിൽ വിജിലൻസിന്റെ ടോൾ ഫ്രീ നമ്പരായ 1064 എന്ന നമ്പരിലോ 8592900900 എന്ന നമ്പരിലോ വാട്ട്സ്ആപ്പ് നമ്പരായ 9447789100 എന്ന നമ്പരിലോ അറിയിക്കണമെന്ന് വിജിലൻസ് ഡയറക്ടർ ശ്രീ. മനോജ് എബ്രഹാം ഐ.പി.എസ് അഭ്യർത്ഥിച്ചു. #keralavigilance