የዘር ሐሳቦች/ Yezer Hasaboch

ሰዎች እንዲሰሙን እንፈልጋለን፣ እኛ ግን ሰዎችን እንሰማለንን?፣ ሰዎች እንዲወዱን እንፈልጋለን፣ እኛስ ሰዎችን እንወዳለን?፣ ሰዎች እንዲያከብሩን እንፈልጋለን፣ ሰዎችን ለማክበር ዝግጁ ነንን? የእኛ ነገር እንዲቀድም እንፈልጋለን፣ እኛስ ሰዎችን እናስቀድማለን?፣ ታናናሾቻችን እንዲታዘዙን እንጠብቃለን፣ እኛ ለታላላቆቻችን ታዛዥ ነን?  ያልዘራነው ያጨደ፣ ያልተጋበትን የወረሰ፣ ያላሸነፈውን የገዛ ማነው?  ያልዘራነውን የምንጠብቅ ሞኝ እንዳንሆን፣ እኛ እንዲደረግልን የምንፈልግ ለሌሎች እናድርግ። .. ዘሪሁን ግርማ

#የትኩረት_ናፋቂነት_ሱስ (በሽታ) The great Comeback የተባለለት የ Chris Rock "Selective Outrage" በተሰኘው ስታንድአፕ ኮመዲ ስራ ላይ ካነሳቸው ከብዙ ሐሳቦች አንደኛው የትኩረት ናፋቂነትን አስመልክቶ ነው። በኮሚዲ ስራው ሲናገር " በአሜሪካ ትልቁ ሱስ ትኩረት የመፈለግ ሱስ (the addiction of attention) ነው" ይለናል። ይህ መልዕክት አሁን ያለውን ትውልድ ቅልብጭ አድርጎ ያሳያል። ትኩረትን መፈለግ የሰው ልጆች ሁሉ ጤናማ ፍላጎት ነው። ነገር ግን ትኩረህን በመፈለግ ውጥረት ሱስ መያዝ ግን ጤናማ ያልሆነ ነው። ትኩረት ናፋቂነት ከሚዲያ አንጻር ሲታይ ደግሞ ብዙ ትውልድ የተያዘበት ወጥመድ ነው። ሰዎች በአካል ከሚሰጡን ቦታ ይልቅ በማህበራዊ ሚዲያዎች ፎቶአችን ላይ በሚያደርጉት react ላይክና ኮሜንት የበለጠ እስረኛ እያደረገን ይገኛል። በማህበራዊ ሚዲያ የሰዎችን ትኩረት የመፈለግ ከልክ ያለፈ ፍላጎት (ሱስ) ውስጥ ተጠምዷል። ማህበራዊ ሚዲያዎች ከመጡ በኃላ የሰዎች ህይወት ከሚዲያ በሚያገኘው አድናቆት ፍለጋ ወጥመድ ውስጥ ገብተናል። የትኩረት ናፋቂነት የአድናቆት የኮሜንት እስረኞች ሆነናል። ትኩረት ናፋቂነት ሰዎች በሚዲያ "ዜና" ለመሆን ባልተገባ መንገድ ሚዲያን ሲጠቀሙ እናያለን። በማህበራዊ ሚዲያ ዓለም "ቫይራል" (Viral) መሆን ማለት አንድ ይዘት (ቪዲዮ፣ ፎቶ፣ ጽሁፍ ወይም ድምፅ) በአጭር ጊዜ ውስጥ በበርካታ ሰዎች ዘንድ በፍጥነት መሰራጨት፣ መታየት እና መጋራት (Share) መደረግ ማለት ነው። ​ቃሉ "ቫይረስ" ከሚለው የተወሰደ ሲሆን፣ አንድ ቫይረስ ከአንድ ሰው ወደ ሌላ ሰው በፍጥነት እንደሚዛመተው ሁሉ፣ ይዘቱም ከተጠቃሚ ወደ ተጠቃሚ በከፍተኛ ፍጥነት ስለሚሰራጭ ነው ይህ ስም የተሰጠው። በሚዲያ በተገቢው በምንሰራቸው መልዕክት ሻይራል መሆን በራሱ ችግር የለውም እንደውም ሁላችንም የምንፈልገው ነው። ለቫይራል እና ለትኩረት ብለህ የስነ ምግባር መርሆዎችን መጣስ እንዲሁም ማንነታችንን የምንለካው በምናገኘው ላይክ ኮሜንት እና ሼር ከሆነ ለትኩረት ናፋቂነት ተጋላጭ መሆናችን አይቀርም። ሰው የሰሩትን ምግብ ሲወዱለት፣ የወለዱትን ልጅ ሲስሙለት ደስ ይለዋል። ሰዎች የምናጋራቸውን መልዕክቶች ሰዎች አይተው ቢባረኩ ደስተኞች ነው። ነገር ግን በማህበራዊ ሚዲያ ላይ በምናገኘው አድናቆት ወይም አለመደነቅ ህይወታችን አይለካም። ህይወት ያለችው ሚዲያ ላይ አይደለችምና። ስነ ልቦናችን ሰዎች በማህበራዊ ሚዲያችን ላይ በብዛት ላይክ ስላደረጉን እንደተወደድን የምናስብ፣ ላይክ ካልተደረገ ተቀባነት እንዳጣን እንዲሰማን የሚያደርግ ወጥመድ ውስጥ እየገባን ነው። ከዚህም የተነሳ ብዙዎች "አጀንዳ" በመፍጠር "ከአየሩ" ላይ ላለመጥፋት ያለ የሌለ ነገር በሚዲያው በመንዛት የሰዎችን አይታ በማብዛት ትኩረትን የመግዛት ሱስ ውስጥ ይዘፈቃሉ። ከልክ ያለፈ ትኩረት ናፋቂነት ሱስ ብቻ ሳይሆን በሽታም ነው። በዚህ ዘመን ብዙ ወጣቶች በዚህ በሽታ ተጠቂ ናቸው። ራሳቸውን የሚቀበሉት ሰዎች በሚሰጧቸው ኮሜንት ላይ፣ ማንነታቸውን የገነቡት በሰዎች ላይክ ብዛት ላይ ነው። እነዚያን ነገሮች ሲያጡ ለባዶነት ይጋለጣሉ፣ አትኩሮትን ላለማጣት ያልተገቡ ነገሮችን በቀላሉ በማድረግ ወጥመድ ውስጥ ይመላለሳሉ። ብዙ ወጣቶች ከዚህ በሽታ ራሳቸውን ማስመለጥ አለባቸው። ዘሪሁን ግርማ https://t.me/theideaofs

#ነገ_ዛሬ_ለተዘጋጁላት_ናት!! ህይወት እጅግ ብርቱ ትግል አለው። ህይወት ለሰነፎች አትሆንም። ድል ያለ ትግል፣ ጽናት ያለ ፈተና አይመጣም። ነገ የሚከናወንላቸው ዛሬ በትጋት ለሚሰሩ ነው። እግዚአብሔር ሰዎችን የሚባርክ አምላክ ነው፣ ሰነፎችን ባርኮ ግን አይታወቅም። ዛሬ ያለን ስፍራ ትናንት የነበረን ዝግጅት ውጤት ነው፣ ነገ ደግሞ ዛሬ በተዘጋጀነው መጠን የምንሆነው ነው። በተሰማራንበት ስፍራ፣ ባለን ማንኛውም እቅዶች ዙሪያ ራሳችን ላይ በሰራነው መጠን ነው ውጤታማ የምንሆነው። የምንባረከው በተዘጋጀንበት መጠን ነው። " የልብ መዘጋጀት ከሰው ነው፤ የምላስ መልስ ግን ከእግዚአብሔር ዘንድ ነው።' መጽሐፈ ምሳሌ 16:1 ቀኖች ከእግዚአብሔር የሚሰጡ ስጦታዎች ናቸው። እኛ ውጤታማ የምንሆንባቸው በተዘጋጀነው መጠን፣ ነገ ላነበቡ፣ ተግተው ለጸለዩ፣ በእጆቻቸው ስራን የሰሩ፣ ትላልቅ ራዕዮችን አልመው ለሰሩ፣ በልባቸው እንዳለው ተግተው ለተዘጋጁ ነው። የእግዚአብሔር በረከት ለተዘጋጁት ነው። ከላይ እንደ ርዕስ የጠቀሰኩት ጥቅስን የተናገረው ዶክተር ማርቲን ሉተር ኪንግ ነው። ነገ ዛሬን ለተዘጋጁላት ናት። መልካም አዲስ አመት ዘሪሁን ግርማ

"ማስረዳት ስለቻልክ አትናገርም፣ ቦክስም ስለ ቻልክ አትሰነዝርም፣ ጠቢብ ሰው ጊዜና ሁኔታዎችን አይቶ ለሁኔታዎች ተገቢውን ምላሽ የሚሰጥ ነው።"

የማስበው እንደ ራሴ ነው!! ​"አንድ ዓይነት ማሰብ የምንችል ከሆነ፣ አንዳችንም እያሰብን አይደለም ማለት ነው።" ዎልተር ሊፕማን (Walter Lippmann) ከሰዎች መማርን የማምን፣ አሁን ያለንኝ ማንነት ከብዙ ሰዎች ተምሬ የገነባኋቸው ናቸው። ስለዚህ ከሚያስተምረኝ ሁሌም እማራለሁ። እንደዚያም ሆኖ፣ የማስበው እንደራሴ ነው፣ ህይወቴን የምገነባውን አምኜ በደረስኩበት በራሴ ልክ ነው። በዘር ሐሳቦች መጽሐፌ ላይ "እንደ እኔ ካላሰብክ የእኔ ወገን አይደለህም" የሚል መጣጥፍ አለኝ። ያንን ያልኩት ሰዎች ትክክል የሚሉህ እነርሱ ይህ ነው ትክክል ብለው በነገሩህ መሰረት ስታስብ መሆኑን ለማመልከት ነበር። ሰው ማሰብ ያለበት እንደ ራሱ እንደ እንደ ገባው እንደሆነ በብርቱ አሞናለሁ። ህይወቴን መምራት የምፈልገውም እኔ ባመንኩበት ላይ ነው። ማኅበረሰብ ሁሌም ትክክል ብሎ ያስቀመጠውን መንገድ የሚከተሉ ሰዎች ብዙም ፈተና የለባቸውም፣ ሐሳብም አያስፈልጋቸውም። ይህ ተገቢ የሆኑ በጋራ የሚያስማሙንን የማኅበረሰብ እሴቶችን ይህ አይጨምርም፣ ነገር ግን ሰው እንደ ራሱ እንዲያስብ ነው የተፈጠረው፣ ማሰብ ያለበትም እንደዚያ ነው። ሐሳብን፣ የሐሳብን ነጻነትንና የሚገድቡ ሰዎች፣ ከእነርሱ የተለየ እሳቤ ካለህ ትክክል አይደለም ብለው የሚፈርጁ ሰዎች፣ የእነርሱ ሚዛን ትክክል ነው ብሎ ማን እንዳጸደቀላቸው ሁሌም አይገባኝም። ሰው በእግዚአብሔር ሲፈጠር እንዲያስብ ተደርጎ የተፈጠረ ፍጥረት ነው። ስለዚህ ሰው ሐሳቢ ነው። ሰው ከሰዎች ሁሌም ይማራል፣ ሐሳቡ ግን መገንባት ያለበት በራሱ ነው። የሐሳብ ልዩነት ደግሞ በተፈጥሮ የተሰጠን በረከት ነው። ያለን ትልቁ በረከታችን ሰዉ ሁሉ ማሰብ የሚችልበት የራሱ አቅምን መያዙ ነው። ​"ልዩነት ውበት ነው። ሁላችንም አንድ ዓይነት ብናስብ ኖሮ ዓለም እንዴት ሰልቺ ትሆን ነበር?" ማያ አንጀሉ (Maya Angelou) የሰዎችን ሐሳብ አንድ አይነት የማድረግ አባዜ መጨረሻው ሰዎችን አስገድደን የእኛን ሐሳብ እንዲያስቡ ማስገደድ ነው። ይህ ደግሞ ዘመናዊ ባርነት ነው። የተፈጠርነው እንደ ራሳችን እንድናስብ ነው። ዘሪሁን ግርማ

ብዙዎቹ የትናንት ድክመትህን የሚያወሩት ዛሬ ያለህበት ስኬት ስለሚያስቀናቸውና፣ በዛሬው ማንነትህ ላይ ምን የሚሉት ነገር ስለሌላቸው ነው። ወደ ፊት ቀጥል!!

እውነትን ባታስረዳውም እውነት ነው፤ ውሸት ብታስረዳውም እውነት አይሆንም!!

"ካለማወቅ ጀርባ ድፍረት (ደፋርነት) አለ።" ዶክተር ምህረት ደበበ

"የግማሽ እውነት ልክፍተኞች ነን" ታገል ሰይፉ ሁላችንም ለዚህ ችግር ተጋላጭ ነን። ለምሳሌ ይህም ሐሳብ ለማስረዳት ያህል እኛ በሆነ ምክንያት "ክፉ" ነው የምንለውን ሰው "መልካም" ጎኑ ሲነገረን አንቀበልም፣ ወይም ክፉነቱ ብቻ እንዲነገር እንፈልጋለን። ሙሉ ለሙሉ ክፉ ሙሉ ለሙሉ መልካም ሰው አይኖርም። ሰው በሆነ መልኩ ክፉ ሊያደርግ ወይም ሊሳሳት ይችላል፣ ያ ማለት ያ ሰው የተሳሳተው ብቻ ሳይሆን በሌላ መልኩ ደግሞ መልካም ጎን ይኖረዋል። ዘሪቱ ከበደ "ስህተቴ እኔ አይደለሁ...ስህተቴ ጋር እዚያ አልቀረውም" የሚል ዘፈን አላት። ሰው ተሳስቶ ከስህተቱ ሊታረም ይችላል። ሰው የሚሳሳት እንጂ ሙሉ ለሙሉ ስህተት አይደለም። አዕምሮአችን አንድ ጊዜ 'እንዲህ ነው' ብሎ የተቀበለውን ነገር ለመቀየር ይቸገራል። ማለትም የዚያን ነገር ሌላኛውን ጎን ማየትም አይፈልግም። ለእኛ በሆነ ምክንያት መጥፎ የነበሩ ሰዎች፣ ለሌሎች መልካም ሆነው ሊገኙ ይችላሉ። እነዚያ ሰዎች መጥፎ ጎን ብቻ ሳይሆን መልካም ጎን እንዳላቸው መቀበል ይኖርብናል። ሁላችንም ደግሞ ይህ አይነት ማንነት አለን። ለሁሉም ሰው መልካም ሆነን ላንገኝ እንችላለን። ሰው ስለሆንን!! ሌላው ግማሽ እውነት ማለት የአንድን ታሪክ ሙሉ ጭብጥ ወይም ሙሉ ታሪክ ያለማወቅ ነው። አንዳንድ እውነቶች ሙሉ እውነቶች አይደሉም። የሆነ እውነት የሆነ ጎን ይኖራቸዋል ነገር ሙሉውን ታሪክ ካላገኘነው ግማሽ እውነት ይሆናል። ብዙዎቻችን በግማሽ እውነት ሙሉውን ታሪክ ባለማወቅ ስንሳሳት እንገኛለን። ሙሉውን እውነት ካላገኘን በግማሽ እውነት እንስታለን። ስለ አንዳንድ ሰዎች የሚኖረን ግማሽ እውነት ላይ ብቻ የተመሰረተ ማንኛውም ጥላቻ፣ ሙሉ ማንነታቸውን ስንረዳ እንደተሳሳትን ሊገባን ይችላል። ሰው በማንነቱ አንድ ብቻ ሊሆን አይችልም። ስለዚህ ሙሉውን እውነት ለማግኘት እንሞክር። ከላይ ርዕስ ያደረኩት የታገል ሰይፉ አባባል ነው ለዚህ ጽሑፍ መነሻ የሆነኝ። ዘሪሁን ግርማ

ስግብግነት የእግዚአብሔር ባህሪይ አይደለም፣ የክርስቲያኖች ባህሪይ አይደለም።

​“የታላቅነት ዋጋ ኃላፊነት ነው።” ዊንስተን ቸርችል

መንፈሳዊ መናቃቃት ለምን ያስፈልገናል? Why we need revival? በአሜሪካ የታየው የመጨረሻው ታላቅ መንፈሳዊ መነቃቃት ከሃምሳ ዓመታት በፊት የተጀመረው "የኢየሱስ ንቅናቄ" (Jesus Movement) ነበር። እኔ በዚያ ነበርኩ፤ ከታሪክ መማር ብቻ ሳይሆን በታሪኩ መነሳሳትም እንደምንችል አምናለሁ። ይህ ንቅናቄ ሥር ከመስደዱ ጥቂት ዓመታት ቀደም ብሎ፣ ሚያዝያ 8 ቀን 1966 እ.ኤ.አ. የታይም (Time) መጽሔት ሽፋን "እግዚአብሔር ሞቷል?" የሚል አስደንጋጭ ጥያቄ አቅርቦ ነበር። በተለይ እግዚአብሔር ጣልቃ ሲገባ ጥቂት ዓመታት ምን ያህል ለውጥ እንደሚያመጡ ተመልከቱ። ሰኔ 21 ቀን 1971 እ.ኤ.አ. "የኢየሱስ አብዮት" (Jesus Revolution) የሚሉት ቃላት በታይም መጽሔት ሽፋን ላይ ወጡ፤ ጽሑፉም ፍጹም የተለየ ትዕይንትን እንዲህ ሲል ገለጸ፦ "ኢየሱስ ሕያው ነው፣ በቁጥራቸው እየጨመረ በመጣ አሜሪካውያን ወጣቶች ብርቱ መንፈሳዊ ቅንዓት ውስጥም ይኖራል።  አንድ መለያ ምልክት ካላቸው፣ እርሱም በሚያስደንቅና ከተፈጥሮ በላይ በሆነው በኢየሱስ ክርስቶስ ላይ ያላቸው ሙሉ እምነት ነው፤ እርሱ ከ2,000 ዓመታት በፊት የኖረ ድንቅ ሰው ብቻ ሳይሆን፣ ሕያው አምላክ እንደሆነ ያምናሉ።" መነቃቃት (Revival) እና መንፈሳዊ ተሃድሶ (Spiritual Awakening) መነቃቃት እና ተሃድሶ የሚሉት ቃላት ብዙ ጊዜ ተለዋውጠው ጥቅም ላይ ይውላሉ፤ ነገር ግን የተለየ ትርጉም አላቸው። መንፈሳዊ ተሃድሶ (Awakening) የሚከሰተው እግዚአብሔር በሉዓላዊነቱ መንፈሱን በጠቅላላው ባህል ላይ ተጽዕኖ በሚያሳድር መልኩ ሲያፈስ ነው። በኢየሱስ አብዮት ወቅት እና ዩናይትድ ስቴትስ ሀገር ከመሆኗ በፊትም ጭምር በአሜሪካ ታሪክ ውስጥ በተደጋጋሚ የሆነው ይህ ነው።  ከእግዚአብሔር ጋር ያለዎትን ግንኙነት ያስተካክሉ፤ ለመነቃቃት ለመጸለይ ከሌሎች ክርስቲያኖች ጋር ይሰብሰቡ፤ እንዲሁም እግዚአብሔር ለዓላማው እንዲጠቀምብዎ፣ በተለይም ሌሎችን ወደ እምነት በመምራት ረገድ ራስዎን ለእርሱ ያቅርቡ። በሌላ በኩል መነቃቃት (Revival) ቤተክርስቲያን ሊኖራት የሚገባ ተሞክሮ ነው። ቤተክርስቲያን ወደ ሕይወት ስትመለስ—መሆን ወደ ነበረባት ማንነት ስትመለስ ነው። መነቃቃት ወደ ፍላጎትና ቅንዓት መመለስ፣ ዳግም መታደስ ነው። በመንገድ ላይ እየነዳሁ በሚያስደንቅ ሁኔታ የታደሰ (restored) ጥንታዊ መኪና ካየሁ፣ "ዋው፣ አንድ ሰው ይህን ወደ ሕይወት ለመመለስ ጊዜ ወስዷል" ብዬ አስባለሁ። በሰው ሕይወትም ሆነ በቤተክርስቲያን ውስጥ ተመሳሳይ ነገር ሊከሰት ይችላል። የድዋይት ኤል ሙዲ የዘመን ባልደረባና ታላቅ ወንጌላዊ የነበረው አር.ኤ. ቶሪ (R.A. Torrey) በ1917 በሙዲ መጽሐፍ ቅዱስ ኢንስቲትዩት ባደረገው ንግግር ለመነቃቃት ተግባራዊ መፍትሄ ሰጥቶ ነበር። እንዲህ አለ፦ "ጥቂት የእግዚአብሔር ሰዎች ብዙ መሆን አያስፈልጋቸውም መጀመሪያ ራሳቸው ከእግዚአብሔር ጋር ሙሉ በሙሉ ይስተካከሉ፤ ከዚያ ካልጀመራችሁ በስተቀር የቀረው ነገር ዋጋ የለውም፤ በመቀጠልም እግዚአብሔር ሰማያትን ከፍቶ እስኪወርድ ድረስ ለመነቃቃት ለመጸለይ በአንድነት ይተባበሩ። ከዚያም እግዚአብሔር ደስ እንዳለው እንዲጠቀምባቸው ራሳቸውን ለእርሱ ፈቃድ አሳልፈው ይስጡ። ይህ ለማንኛውም ቤተክርስቲያንና ለማንኛውም ማህበረሰብ መነቃቃትን ያመጣል።" በአጭሩ፦ ከእግዚአብሔር ጋር ያለዎትን ግንኙነት ያስተካክሉ፤ ለመነቃቃት ለመጸለይ ከሌሎች ክርስቲያኖች ጋር ይሰብሰቡ፤ እንዲሁም እግዚአብሔር ለዓላማው እንዲጠቀምብዎ፣ በተለይም ሌሎችን ወደ እምነት በመምራት ረገድ ራስዎን ለእርሱ ያቅርቡ። መንፈሳዊ ተሃድሶ (Spiritual Awakening)ያ ከተፈጥሮ በላይ የሆነ የመንፈስ መፍሰስ ሙሉ በሙሉ በእግዚአብሔር እጅ ነው። እኛ ልናደራጀው አንችልም፣ ነገር ግን በጸሎት ልንማጸንበትና እግዚአብሔር እንዲልከው ልንጠራው እንችላለን። የመነቃቃት ምልክቶች የመነቃቃት ምልክቶች ምንድን ናቸው? አንዱ ዋነኛ ማሳያ ለእግዚአብሔር ቃል የታደሰ ረሃብ መኖር ነው። ይህንን አሁን እያየን ነው እንደ ዜና ዘገባዎች ከሆነ ባለፈው ዓመት የመጽሐፍ ቅዱስ ሽያጭ በ22 በመቶ አድጓል! መጽሐፍ ቅዱስ መጽሐፍ ብቻ አይደለም፤ የእግዚአብሔር የሕይወት ታሪክ ነው። ስናነበውም እርሱን እንገናኘዋለን። ከኢየሱስ አብዮት ዘመን ጀምሮ የነበረኝ የመጀመሪያው መጽሐፍ ቅዱስ አሁንም በእጄ አለ። ያረጀ፣ በማስታወሻዎች የተሞላና በፕላስተር የተጣበቀ ነው። አንድ መጋቢ በአንድ ወቅት እንዲህ ብለው ነበር፦ "የሚበጣጠስ መጽሐፍ ቅዱስ አብዛኛውን ጊዜ የማይበጣጠስ (የማይፈርስ) ሕይወት ምልክት ነው።" ሌላው የመነቃቃት መለያ ምልክት ግላዊ ንስሐ ነው። ኢየሱስ በኤፌሶን ላለች ቤተክርስቲያን እንዲህ አላት፦ "ዳሩ ግን የምነቅፍብህ ነገር አለኝ የቀደመውን ፍቅርህን ትተሃልና። እንግዲህ ከወዴት እንደ ወደቅህ አስብ ንስሐም ግባ የቀደመውንም ሥራህን አድርግ፤ ባታደርግ ግን እመጣብሃለሁ ንስሐም ባትገባ መቅረዝህን ከስፍራው እወስዳለሁ።" (ራእይ 2፡4–5)። እነዚህ ጥቅሶች ለግል መንፈሳዊ መነቃቃት ሦስት መሠረታዊ እርምጃዎችን ያሳያሉ፦  * አስብ (Remember)፦ እምነትህ ቀደም ሲል ምን ይመስል እንደነበር አስታውስ። ይበልጥ ቀናተኛና ታማኝ ነበርክ? እነዚያን ቀናት አስብ።  * ንስሐ ግባ (Repent)፦ አቅጣጫህን ቀይር። ከቸልተኝነት ተመለስና ወደ እግዚአብሔር ፊት ዙር።  * አድርግ/ድገም (Repeat)፦ እምነትህ ንቁ በነበረበት ጊዜ ታደርጋቸው የነበሩትን ሥራዎች ዳግም መሥራት ጀምር። በቤተክርስቲያን ውስጥ መነቃቃት ከመኖሩ በፊት፣ መጀመሪያ በግለሰቦች ውስጥ መነቃቃት መኖር አለበት። የሚጀምረው በአንተ ነው። የሚጀምረው በእኔ ነው። እግዚአብሔር እያንዳንዳችንን በግል ሊያነቃቃን ይፈልጋል። መነቃቃቶች የጊዜ ገደብ አላቸው መነቃቃቶች ለዘላለም አይቆዩም። ጅምር፣ መሃል እና መጨረሻ አላቸው። እንደ ፍንዳታ ናቸው፣ መኪናን እንደ ማስነሳት ነገር ግን በጊዜ ሂደት ቅንዓቱ ሊደበዝዝ ይችላል፣ እኛም ሌላ መነቃቃት እንደሚያስፈልገን እንረዳለን። መነቃቃቶች ለምን ያህል ጊዜ እንደሚቆዩ ወንጌላዊው ቢሊ ሰንዴይ (Billy Sunday) ሲጠየቅ፦ "አይቆዩም፣ ልክ እንደ ገላ መታጠብ ማለት ነው። ነገር ግን አልፎ አልፎ መታጠብ ጥሩ ነው" ሲል መለሰ። መነቃቃት ደጋግመን ልንፈልገው የሚገባ ነገር ነው። በግል ደረጃ፣ እኔ ዘወትር መነቃቃት እንደሚያስፈልገኝ አውቃለሁ። አንተም ያስፈልግሃል። ሁላችንም ያስፈልገናል። የሥራ ጊዜ የ1960ዎቹ መገባደጃና የ1970ዎቹ መጀመሪያ የነበረውን ባህላዊና መንፈሳዊ ሁኔታ ሳስብ፣ ከአሁኑ ዘመናችን ጋር አስገራሚ ተመሳሳይነቶችን አያለሁ። በዚያን ጊዜ አሜሪካ ተከፋፍላ ነበር፣ ነገሮችም በጣም የጨለሙ ይመስሉ ነበር። ነገር ግን ጨለማ ሲሰፍን፣ የእግዚአብሔር ብርሃን ይበልጥ ደምቆ ይበራል። ቢሊ ግርሃም በአንድ ወቅት እንዲህ ብሎ ነበር፦ "በዚህ ሰዓት ያለን ትልቁ ፍላጎት፣ በመላው ሀገሪቱ የግለሰብንና የጋራ ሥነ-ምግባርንና ቅንነትን የሚመልስ መንፈሳዊ ተሃድሶ ነው።" የእርሱ ንግግር እንደ ዛሬው ሁሉ ተገቢ ነበር። አሜሪካ ሌላ መንፈሳዊ ተሃድሶ ያስፈልጋታል፣ ቤተክርስቲያንም መነቃቃት ያስፈልጋታል። ሁለቱም የሚጀምሩት በኛ ነው። እግዚአብሔር ዳግም እንዲንቀሳቀስ እንጸልይ። በግሪን ላውሪ የተጻፈ ከቢሊ ግርሃም ኢንቫንጀሊስት ገጽ የተገኘ ትርጉም- ዘሪሁን ግርማ እያንዳንዱ ሐሳብ ዘር ነው?

​በዩኒቨርሲቲው ውስጥ የሚካሄዱት የመነቃቃት ስብሰባዎች ለጊዜው ቢቆሙም፣ መነቃቃቱ ግን አላበቃም። በአቅራቢያ ባሉና በሩቅ ባሉ ሌሎች ስፍራዎች መነቃቃቱ መቀጠሉ አይቀርም። ዘሪሁን ግርማ

​የካቲት 15 ቀን ስለ አስበሪ መነቃቃት የሚገልጽ ዜና በአሜሪካ ታዋቂ በሆነው "ዘ ዋሽንግተን ፖስት" (The Washington Post) ጋዜጣ ላይ ታተመ። የሰው ቁጥር በጣም በመጨመሩ ምክንያት ወደ ዌስ ኦዲቶሪየም የሚደረገው መግቢያ ዕድሜያቸው ከ26 ዓመት በታች ለሆኑ ወጣቶች ብቻ እንዲሆን ተገደበ። ለሌሎች ሰዎች በሌሎች ኦዲቶሪየሞች ውስጥ የአምልኮ ፕሮግራም ተዘጋጅቷል። ​በዚሁ ዕለት በአላባማ ግዛት ሆምውድ በሚባል ቦታ በሚገኘው ሳምፎርድ ዩኒቨርሲቲ (Samford University) የመነቃቃት ስብሰባዎች ተጀመሩ። ይህ አምልኮ አሁንም ድረስ በመቀጠል ላይ ይገኛል። ሳምፎርድ ዩኒቨርሲቲ የባፕቲስት ቤተክርስቲያን ተቋም ነው። ​የካቲት 15 ቀን በማህበራዊ ሚዲያ ላይ "#AsburyRevival" የሚለው ሀሽታግ (Hashtag) በቲኩቶክ አማካኝነት ወደ 24 ሚሊዮን ለሚጠጉ ሰዎች ደረሰ። የካቲት 18 ቀን ደግሞ የተመልካቾች ቁጥር ወደ 63 ሚሊዮን አደገ። ​የካቲት 16 ቀን ቀጣይነት ያለው የመነቃቃት ስብሰባ ወደ 9ኛው ቀን ተሸጋገረ። በዚያ ዕለት ከጠዋቱ 1 ሰዓት እስከ ቀኑ 12 ሰዓት ድረስ የዌስ ኦዲቶሪየም ተዘግቶ ነበር። ከኦዲቶሪየሙ የሚተላለፉ የቀጥታ ስርጭቶችም ታግደው ነበር። ​ይሁን እንጂ የመነቃቃት ስብሰባዎቹ ቀጥለዋል። በ10ኛው ቀን የዌስ ኦዲቶሪየም እንደገና ለሕዝብ ክፍት ተደረገ። ዕድሜያቸው ከ25 ዓመት በታች ለሆኑ ተማሪዎች በመግቢያው ላይ ቅድሚያ ተሰጥቷል። በዚያው ዕለት ከሰዓት በኋላ 11 ሰዓት ላይ ከአስበሪ ዩኒቨርሲቲ ውጭ በሚገኘው ማውንት ፍሪደም ባፕቲስት ቤተክርስቲያን (Mount Freedom Baptist Church) ለመነቃቃት ስብሰባዎች ክፍት ሆነ። ​የካቲት 18 ቀን ስብሰባዎቹ ወደ 11ኛው ቀን ገቡ። የአስበሪ ዩኒቨርሲቲ ባለሥልጣናትና የከተማዋ አስተዳዳሪዎች እዚያ በሚሰበሰበው የሰው ብዛት ስጋት ማደር ጀመሩ። የካቲት 19 ቀን የሕዝብ ተሳትፎ ያለበት አምልኮ በዩኒቨርሲቲው እንደሚጠናቀቅ ማስታወቂያ ወጣ። ​የካቲት 19 ቀን በማህበራዊ ሚዲያ ላይ "#AsburyRevival" የሚለው ሀሽታግ በቲኩቶክ አማካኝነት በ68 ሚሊዮን ሰዎች ዘንድ ደረሰ። ​የአስበሪ መነቃቃት አገራዊና ዓለም አቀፋዊ ትኩረትን አግኝቷል። ከ22 በላይ ዩኒቨርሲቲዎች የተውጣጡ ተማሪዎች እዚህ መጥተው በአምልኮው ላይ ተሳትፈዋል። ለዚህም ከፍተኛ ቅስቀሳና ድጋፍ እየተደረገ ነው። ከአሜሪካ ብቻ ሳይሆን ከጎረቤት አገራት የመጡ የክርስትና እምነት ተከታዮችም እዚህ በመገኘት በአምልኮው እየተሳተፉ ነው። የቀድሞው የአሜሪካ ምክትል ፕሬዝዳንት ማይክ ፔንስ (Mike Pence) በትዊተር (X) አማካኝነት ለዚህ መነቃቃት ያላቸውን ድጋፍ ገልጸዋል። የመነቃቃት ስብሰባዎቹ ልዩ መለያ እዚህ የሚካሄደው አምልኮ በጣም ሰላማዊ መሆኑ ነው። በዚህ ዘመን እንደሚታየው ዓይነት ጫጫታ የበዛበት ሙዚቃ እዚህ የለም። የታወቁ የዘማሪ ቡድኖች ወይም ታዋቂ ሰባኪዎች እዚህ አይገኙም። ሰዎችን ለመሳብ ተብሎ የሚደረግ ምንም ዓይነት ሰው ሰራሽ ነገር የለም። ያለው ብቸኛው ነገር የእግዚአብሔር ኃይለኛ መገኘት ብቻ ነው። እዚህ የሚመጡ ሰዎች ሁሉ የሚለማመዱትም ይህንኑ ነው። ​በማህበራዊ ሚዲያ የሚሰራጩት ትዕይንቶች ሁሉ እውነተኛ ናቸው። በአንድ ቪዲዮ ላይ አንዲት ወጣት ዓይኖቿን ጨፍና በማይክሮፎን እንዲህ ስትል ትሰማለች፡- “በዚህ ስፍራ ያንተ (የእግዚአብሔር) ክብርና የተትረፈረፈ መገኘት አለ። እኛም ሊሰማን ችሏል። ሁላችንንም እንደሚሸፍን ብርድ ልብስ ያንተን መገኘት እንለማመዳለን።” (You are in this place richly. We can feel you. We feel your presence like a blanket, it covers us all)። በርካታ የፈውስና የነጻ መውጣት ምስክርነቶች ከአምልኮው መድረክ እየተሰሙ ነው። ብዙዎች ከጭንቀት፣ ከተስፋ መቁረጥ እና ራስን የማጥፋት ዝንባሌ ነጻ እየወጡ ነው። ​ሰዎች ከአምልኮው ለመሳተፍ ከሩቅ ቦታዎች እየመጡ ነው። በሆቴሎች እንዲሁም በጓደኞቻቸውና በዘመዶቻቸው ቤት እያረፉ በአምልኮው ላይ ያለማቋረጥ እየተሳተፉ ይገኛሉ። ለእነዚህ ሰዎች የሚያስፈልገውን እርዳታ ለማቅረብ አንድ ልዩ ቡድን ባልተለመደ መለኮታዊ ፍቅር እየሰራ ይገኛል። ለልጆች ምግብ፣ መጻሕፍት እና መጫወቻዎችን ይሰጣሉ። ወላጆቻቸው በአምልኮው ላይ እንዲሳተፉ ፋታ ለመስጠትም ከልጆቹ ጋር ጊዜ ያሳልፋሉ። ጥቁር ዘሮች በነጭ ዘሮች ቤት ውስጥ በፍቅር ሲያርፉ ማየት እጅግ የሚያምር ትዕይንት ነው። ​እዚህ የእግዚአብሔር ፍቅር ብቻ ነው ያለው። በእግዚአብሔር እና በሰው መካከል ሌላ ምንም የለም። ይህ ሁሉ መነቃቃት የክርስቶስ መንፈስ ሥራ መሆኑን ያስታውሰናል። እሱ ስብከት፣ ልቅሶ እና መዝሙር ብቻ ሳይሆን የእግዚአብሔር ፍቅር መገለጫም ጭምር ነው። ​ባለፈው ሳምንት የመጨረሻ ቀን ገደማ 20,000 ሰዎች በአስበሪ መነቃቃት ስብሰባዎች ላይ ተሳትፈዋል። ይህ ሁሉ የሆነው 6,000 ያህል የሕዝብ ቁጥር ባላት ዊልሞር በሚባለች ትንሽ ከተማ ውስጥ ነው። ​የመነቃቃት ስብሰባዎቹ የተካሄዱት በዩኒቨርሲቲው ውስጥ በሚገኙ 5 ኦዲቶሪየሞች ውስጥ ነው። ሁሉም ኦዲቶሪየሞች ሞልተው ተርፈው ነበር። ሰዎች በሜዳ ላይ እና በሳር ላይ ቆመው እግዚአብሔርን አመልከዋል። መንገዶች በተሽከርካሪዎች ተጨናንቀው እስከ ሁለት ማይል ተኩል የሚደርስ የትራፊክ ፍሰት ተፈጥሮ ነበር። የዊልሞር ከተማ ባለሥልጣናት ትራፊኩን ለመቆጣጠር ከፍተኛ ጥረት አድርገዋል። ከተማዋ ማስተናገድ ከምትችለው በላይ የሆነ የሰው ጎርፍ ወደ ስፍራው እየፈሰሰ ነበር። በአስበሪ አሁን እየተካሄደ ያለው መነቃቃት በአሜሪካም ሆነ በዩኒቨርሲቲዎቹ ታሪክ የመጀመሪያው አይደለም። ከዚህ ቀደምም በተደጋጋሚ ጊዜያት ከተማሪዎች ትናንሽ የጸሎት ቡድኖች ተነስተው ትልልቅ መንፈሳዊ መነቃቃቶች ተከስተዋል። በ1740ዎቹ የነበረው “ታላቁ መነቃቃት” (The Great Awakening) እና በ1970ዎቹ የነበረው “የኢየሱስ ንቅናቄ” (Jesus Movement) ለዚህ ምሳሌዎች ናቸው። ​አስበሪ ዩኒቨርሲቲ ሁልጊዜም የመንፈሳዊ መነቃቃት ስፍራ ነበር። በ1905, 1908, 1921, 1950, 1958, 1970, 1992 እና 2006 ዓመተ ምህረቶች እዚህ መነቃቃቶች ተከስተዋል። የ1970ው መነቃቃት ለ185 ሰዓታት ወይም ከ7 ቀናት በላይ ቆይቶ ነበር። ከዚያ በኋላም አልፎ አልፎ የመነቃቃት ስብሰባዎች ይካሄዱ ነበር። ያ መነቃቃት በኋላ ላይ ወደ አሜሪካ እና ወደ ሌሎች አገሮች ተስፋፍቷል። ​አሁን ወደ ዩኒቨርሲቲው የሚመጣው የሰው ብዛት በጣም ከፍተኛ በመሆኑ መደበኛ ስራዎች እየተስተጓጎሉ ይገኛሉ። በመሆኑም የዩኒቨርሲቲው ባለሥልጣናት የሕዝብ ተሳትፎ ያለበትን የመነቃቃት ስብሰባ በዩኒቨርሲቲው ውስጥ ለማቆም ወስነዋል። እሑድ የካቲት 19 ቀን ለሕዝብ ክፍት የሆነ የመጨረሻው ስብሰባ እንደሚሆን አሳውቀዋል። ይሁን እንጂ ሰኞ የካቲት 20 ቀን ከሰዓት በኋላ እስከ 8 ሰዓት ድረስ ለሕዝብ መግቢያ ይፈቀዳል። ከዚያ በኋላ ግን ተራው ሕዝብ በዩኒቨርሲቲው የመነቃቃት ስብሰባዎች ላይ እንዲሳተፍ አይፈቀድም። ሆኖም ለተማሪዎች በመደበኛነት የተዘጋጀው የረቡዕ አምልኮ ይቀጥላል። የተማሪዎች የመነቃቃት ስብሰባዎች እስከ የካቲት 23 (ሐሙስ) ድረስ ይቆያሉ። የካቲት 23 ቀን "ብሔራዊ የኮሌጅ ተማሪዎች የጸሎት ቀን" (National Collegiate Day of Prayer) ነው።

የአስበሪ መነቃቃት 2023 (Asbury Revival 2023) ​የሜቶዲስት ቤተክርስቲያን መስራች በሆነው በጆን ዌስሊ አስተሳሰቦች ላይ ተመስርቶ በ19ኛው ክፍለ ዘመን በአሜሪካ ውስጥ በታወቀው የቅድስና ንቅናቄ (Holiness Movement) ስር የሚገኝ በአንጻራዊ ሁኔታ ትንሽ እና የግል ዩኒቨርሲቲ ነው አስበሪ ዩኒቨርሲቲ (Asbury University)። ይህ ዩኒቨርሲቲ በአሜሪካ ኬንታኪ ግዛት ውስጥ በዊልሞር በሚባል ትንሽ ከተማ ውስጥ ይገኛል። ​በዚህ ዩኒቨርሲቲ ውስጥ በየሳምንቱ ረቡዕ ለተማሪዎች የሚዘጋጀው የአምልኮ ፕሮግራም በዕለቱ ሳይጠናቀቅ ለሁለት ሳምንታት ያህል ቀጥሏል። ይህ ክስተት ነው "የአስበሪ መነቃቃት 2023" ተብሎ የሚጠራው። ቀደም ባሉት ጊዜያትም በዚህ ቦታ ተመሳሳይ መነቃቃቶች ስለተከሰቱ ነው የ2023ን ዓመተ ምህረት በመጨመር የሚጠራው። ​ይህ መንፈሳዊ መነቃቃት በአሜሪካም ሆነ በዓለም ዙሪያ ያሉ የክርስቲያን አማኞችን ትኩረት ስቧል። በክርስትና እምነት መነቃቃት ማለት የመንፈስ ቅዱስ ኃይል እና ያልተለመደ አሰራር ማለት ነው። እሱ ለእግዚአብሔር ያለው ጥም ነው። ከመንፈሳዊ ድርቀት በኋላ እንደገና ከእግዚአብሔር ጋር የመገናኘት ልምድ ነው። በመቀጠልም በሕይወት ውስጥ መቀደስና መጥራት ይኖራል። በመነቃቃቱ ምክንያት የወንጌል አገልግሎቶች ሊጨምሩና አዳዲስ የአካባቢ ስብሰባዎችም ሊጀመሩ ይገባል። ​ሰዎች እግዚአብሔርን ሲጠሙ መንፈሳዊ መነቃቃት ይከሰታል። ከዚህ ጀርባ ያለው አስተሳሰብ የእግዚአብሔር ጣልቃ ገብነት የግድ አስፈላጊ ነው የሚል ነው። በዓለም ላይ ኢፍትሃዊነት፣ ስርዓት አልበኝነት እና ኃጢአት ሲበዛ እንዲሁም ምንም ዓይነት ተስፋ በማይታይበት ጊዜ ነው ለእግዚአብሔር ጣልቃ ገብነት በከፍተኛ ጉጉት የምንመኘው። በአስበሪ መነቃቃት ጀርባ ያለውም ይኸው ምክንያት ነው። ​መንፈሳዊ መነቃቃት በሰው ልጅ ዝግጅት ብቻ የሚመጣ አይደለም። እኛ ስላሰብን ብቻ እንዲከሰት ማድረግ አንችልም። የተወሰኑ ሰዎችን በአንድ ቦታ ሰብስበን መነቃቃትን ማስጀመር አይቻልም። እሱ በድንገት እና በራሱ ጊዜ (spontaneous) ሊከሰት ይገባል። ሰዎች ሊቆጣጠሩት ወይም ሊመሩት አይችሉም። ​በአስበሪ ዩኒቨርሲቲ ቻፕል ውስጥ በስራ ቀናት መደበኛ አምልኮዎች ይካሄዳሉ። በእነዚህ የአምልኮ ፕሮግራሞች ላይ ተማሪዎች በተወሰነ መጠን መገኘት አለባቸው የሚል ደንብ አለ። በየሳምንቱ ረቡዕ በጆን ዌስ ሜሞሪያል ኦዲቶሪየም (John Wes Memorial Auditorium) ውስጥ መሰል አምልኮዎች ይካሄዳሉ። አስበሪ ዩኒቨርሲቲን የመሰረተው ጆን ዌስሊ ሂዩዝ (John Wesley Hughes) ነው። በእሱ ስም የተሰየመው ይህ ኦዲቶሪየም 1,500 ሰዎችን የመያዝ አቅም አለው። እዚህ ቦታ እ.ኤ.አ. የካቲት 8 ቀን 2023 ጠዋት የተካሄደው የአምልኮ ፕሮግራም ነው ለመነቃቃቱ መጀመሪያ የሆነው። በአምልኮው ማጠቃለያ ላይ እዚያ ለተሰበሰቡት ራሳቸውን እንዲሰጡ እና ኃጢአታቸውን እንዲናዘዙ ጥሪ ቀረበ። ዘማሪዎቹ መዝሙሮችን እየዘመሩ ነበር። አንዳንድ ተማሪዎች አምልኮው ካበቃ በኋላም ከዘማሪዎቹ ጋር መዝሙር እየዘመሩ እዚያው ቀሩ። ከመካከላቸው አንዱ ተማሪ ወደ ፊት በመውጣት ኃጢአቱን በይፋ በመናዘዝ ንስሐ ገባ። ​በዚህም እዚያ የነበረው መንፈሳዊ ድባብ ሙሉ በሙሉ ተለወጠ። ከ100 በላይ ተማሪዎች በጉልበታቸው ተንበርክከው ኃጢአታቸውን በመናዘዝ መጸለይ ጀመሩ። ያን ጊዜ የመንፈስ ቅዱስ ኃይለኛ አሰራር እዚያ ተጀመረ። ተማሪዎቹም እዚያው በአምልኮ ቀጠሉ። ​አምልኮው ያለምንም መቆራረጥ ቀጠለ። ስለዚሁ መጀመሪያ የወጣው ዜና "ዘ አስበሪ ኮሌጂያን" (The Asbury Collegian) በሚባለው የተማሪዎች ጋዜጣ ላይ ነበር። ሆኖም በኋላ ላይ በአምልኮው ላይ የተካፈሉ ሰዎች ቪዲዮዎቹን በቲኩቶክ (TikTok) እና በኢንስታግራም (Instagram) በመሳሰሉ ማህበራዊ ሚዲያዎች ላይ አሰራጩ። በእነዚህ ቪዲዮዎች ላይ ተማሪዎች እጆቻቸውን ወደ ላይ አንስተው እየዘመሩ እግዚአብሔርን ሲያመልኩ፣ አንዳንዶችም ሲያለቅሱ ይታዩ ነበር። እነሱ ኃጢአታቸውን ይናዘዙ ነበር፣ በምስክርነታቸውም ሌሎችን ያነሳሱ ነበር። በአጭር ጊዜ ውስጥ እነዚህ ቪዲዮዎች በሚሊዮን የሚቆጠሩ ሰዎች ጋር ደረሱ። ከሀገሪቱ ማዕዘናት ሁሉ ሰዎች በአምልኮው ላይ ለመሳተፍ ወደ አስበሪ መፍሰስ ጀመሩ። ቁጥራቸውም ከጊዜ ወደ ጊዜ እየጨመረ መጣ። በኦዲቶሪየሙ ውስጥ ለመግባት ቦታ ባለመኖሩ ሰዎች ከቤት ውጭ ባሉ ክፍት ቦታዎች ላይ ይጠብቁ ነበር። ​የካቲት 9 ቀን አምልኮው ወደ ሁለተኛው ቀን ተሻገረ። በዚያኑ ዕለት ምሽት 50 የሚጠጉ ተማሪዎች በኦዲቶሪየሙ ውስጥ አምልኮአቸውን ቀጥለዋል። ከተማሪዎቹ በተጨማሪ ተራው ህዝብም በአምልኮው ላይ መሳተፍ ጀመረ። የአካባቢው ጋዜጦች ስለ መነቃቃቱ ዜና ማሰራጨት ጀመሩ። አራተኛው ቀን ሲሆን የጆን ዌስ ኦዲቶሪየም ሰዎችን ማስተናገድ የማይችልበት ደረጃ ላይ ደረሰ። ​የካቲት 12 ቀንም መነቃቃቱ ቀጥሏል። ከተለያዩ አብያተ ክርስቲያናት የመጡ ሰዎች በተሽከርካሪዎች መድረስ ጀመሩ። በመሆኑም የአምልኮ ፕሮግራሙን ለማመቻቸት የዩኒቨርሲቲው ባለሥልጣናት ተጨማሪ ኦዲቶሪየሞችን ከፈቱ። ​በ13ኛው ቀን በቨርጂኒያ ቲኦሎጂካል ሴሚናሪ (Virginia Theological Seminary) ተመሳሳይ የመነቃቃት ስብሰባዎች ተጀመሩ። በኦሃዮ ግዛት በሚገኘው ሴዳርቪል ዩኒቨርሲቲም (Cedarville University) የመነቃቃት ስብሰባዎች ተጀምረዋል። ​(ሴዳርቪል ዩኒቨርሲቲ፣ ደቡብ ምዕራብ ኦሃዮ)። ይህ ከባፕቲስት ቤተክርስቲያን ጋር የተቆራኘ ዩኒቨርሲቲ ነው። እዚህ የአምልኮ ፕሮግራሙን ያዘጋጀው ሜቶዲስት ሶሳይቲ ኦፍ ዘ ኤጲስቆጶስ ቤተክርስቲያን (Methodist Society of the Episcopal Church) የተባለ ድርጅት ነው። ​የካቲት 14 ቀን በአስበሪ ያለው መነቃቃት ወደ 7ኛው ቀን ተሸጋገረ። በአምልኮው ላይ ለመሳተፍ 3,000 ሰዎች መጡ። በዩኒቨርሲቲው ውስጥ 4 ኦዲቶሪየሞች ለአምልኮ ተከፍተዋል። ከሃዋይ፣ ማሳቹሴትስ፣ ኢሊኖይ፣ ሚኒሶታ፣ ቴነሲ እና ኢንዲያና (Hawaii, Massachusetts, Illinois, Minnesota, Tennessee, Indiana) የመጡ ሰዎች ተሰበሰቡ። ​ወደ ኦዲቶሪየሙ ለመግባት ህዝቡ በሰልፍ ይጠባበቅ ነበር። ይህንን ለመቆጣጠር ፖሊስ ከፍተኛ ጥረት አድርጓል። ትራፊክን ለመቆጣጠር ሲሉ ተሽከርካሪዎችን ወደ ሌላ አቅጣጫ አዙረዋል። የዩኒቨርሲቲው ባለሥልጣናት ሁሉም ሰው በአምልኮው ላይ እንዲሳተፍ በሚያስችል ጉጉት ሰርተዋል። ​ቀስ በቀስ የቤተክርስቲያን እና የድርጅት ልዩነት ሳይኖር መነቃቃቱ ወደ ሌሎች ዩኒቨርሲቲዎች እየተስፋፋ መጣ። በኬንታኪ የሚገኘው ካምቤልስቪል ዩኒቨርሲቲ እና በቴነሲ ክሊቭላንድ የሚገኘው ሊ ዩኒቨርሲቲ (Campbellsville University, Kentucky; Lee University, Cleveland, Tennessee) የመነቃቃት ስብሰባዎች ተጀምረዋል። ካምቤልስቪል ዩኒቨርሲቲ ​(ካምቤልስቪል ዩኒቨርሲቲ) የባፕቲስት ቤተክርስቲያን ተቋም ሲሆን፣ ሊ ዩኒቨርሲቲ ደግሞ የቸርች ኦፍ ጎድ (Church of God) ቤተክርስቲያን ተቋም ነው።

#ባጣሁት_ሳይሆን_ፈልጌ_በጣልኩት_ነገር_አታስቀኑኝም! ©ዘሪሁን ግርማ ድሮ ድሮ የሚባሉ እንዳንድ አባባሎች ነበሩ የመጀመሪያው "ቆራጴ" ነው ይባላል ቆራጥ ጴንጤ ነው ማለት ነው። ሁለተኛው "አራጴ" አራዳ ጴንጤ ማለት ነው። ሶስተኛው "ግራጴ" ግራ የተጋባ ጴንጤ ማለት ነው። የቤተክርስቲያን መልክ እያደበሱ ካሉ ነገሮች መሐል ክርስትናን እና አለማዊነትን ለማጋባት የሚደረገው የቅልቅል መንገድ ይመስለኛል። ቤተ ክርስቲያን ከክርስቶስ ኢየሱስ የተቀበለቸውን ንጹህ መንገድ ይዛ የተሰጣትን የወንጌል አደራ በምድር እንድትፈጽም ተጠርታለች። አሁን አሁን አንዳንድ አገልጋዮች በአለም ተትቶ የተመጣውን ኮተት ወደ ቤተክርስቲያን በማስገባት የ "አራጴ" አራዳ ጴንጤ ተግባር ሲያራምዱ ይገርመኛል። ፈልገን አተነው ሳይሆን እኛ አንፈልገውም ብለን ንቀን የጣልነውን ነገር አንስቶ ማንም አያስቀናንም። ለክርስቶስ ወንጌል በአለም ያለን አለማዊነትን እንደ ጉድፍ ንቀን መተን ያንን ተሸክመው በሚመላለሱ ሰዎች እንዴት እንቀናለን? ያሳዝኑናል እንጂ እናፍራለን እንጂ። በዚህ ዘመን አለማዊነትንና-ክርስትናን የምንለይበት ቀዩ መስመር እየጠፋ እንደሆነ ይታያል። መጽሐፍ ቅዱሳዊ መመሪያዎችን፣ የክርስትና ውበቶቻችንን፤ የአስተሳሰብ ንጽህናችን፣ መንፈሳዊነታችን አጥብቀን መጠበቅ ያለብን ጊዜ ይህ ነው። ውጪ የጣልነውን አለማዊነት ይዘው ከክርስትና ጋር አጋብተው የሚሄዱን ልናስተምር፣ ልናርምና ልንገስጽ ይገባል። አለም ላይ ያለን አራዳ አራዳ ጨዋታ በጌታ መንግስት መጫወት የመንግስቱ ስርአት አይፈቅድም። የወንጌልን እና የጽድቅን መንገድ የጣለ አለማዊነት፤ መንፈሳዊነትን ያላማከለ ዘመናዊነት፤ ክርስትናን ከአለም ጋር ለማጋባት የሚደረግ ጥረት በሙሉ በዚህ ጊዜ ያለችው ቤተክርስቲያን ተግዳሮት ነው። ጥለነው በመጣነው ነገር አንቀናም፤ ከዚያ ይልቅ በዚህ አለም ሰዎች "ፋራ" ተብለው ወንጌልን በያዙ፤ የእግዚአብሔር መንግሥት ለማስፋት በሚተጉ፤ ጽድቅንና ቅድስናን የዳኑበት ኑሮ መሆኑን የተረዱ፤ በሰው አለም "የዘገዩ" "ያልነቁ" "ሞኝ" የተባሉ፤ በሰማዩ ርስት የሚመዘገብ ስራ ባላቸው ጀግና የክርስቶስ ደቀ መዝሙሮች እና አገልጋዮች እንማረካለን፤ ደስ ይለናል፤ እንባረካለን። አራጴዎች ሆይ እባካችሁ ቆራጴ እንሁን!! .... የቴሌግራም ቻናሌን ይቀላቀሉ https://t.me/theideaofs

​"ትልቅ እግዚአብሔር እያለህ ትንሽ ማሰብ ለእግዚአብሔር ስድብ ነው።" ሪንሃርድ ቦንኬ

"እግዚአብሔር የሚጠራው ብቁ የሆኑትን ሳይሆን፣ የተጠሩትን ብቁ ያደርጋቸዋል።" ሪንሃርድ ቦንኬ

#አላበቃም_አልዘገየምም!! አንዳንዴ ይህች አለም እንደገና እድል የማትሰጥ ሆና እናያታለን። በዙሪያችን ያሉ አንዳንድ ሰዎችም ነገሮቻችን የእንደገና ዕድል እንዳለው አይነግሩም። ነገር ግን ያበቃ ያከተመና ያለቀ በሚመስሉ ነገሮች ላይ ተስፋ እንዳለን የማመን ተስፋ ሊኖረን ይገባናል። እግዚአብሔር። እግዚአብሔር ለእኛ ያለቀ፣ ያበቃና ያከተመ የተባለውን ነገራችንን ቀጥሎልን አለን። ሁሌም በሰዎች አለም አልፎም በእኛ እሳቤ ነገሮቻችን ያለቀ፣ የዘገየን፣ የተቀደምን ብለን በዘጋናቸው ነገሮቻችን ላይ እግዚአብሔር ሁሌም እንደገና አለው። የተቋረጡ ነገሮች ሊቀጠሉ፣ የሞቱ ነገሮች ህያው ሊሆኑ፣ የተበላሹ ነገሮች ሊስተካከሉ፣ የጠወለጉ ነገሮች ሊለመልሙ፣ ተስፋ በማጣት ጨለማ ውስጥ ያሉ ነገሮች በተስፋ ብርሃን ሊሞሉ፣ ያረጁ ነገሮቻችን ሊታደሱ ዛሬም ይችላሉ። በእግዚአብሔር ነገሮቻችን ሊቀየሩ ይችላሉ። እኛ የእግዚአብሔር የመቻል አቅም ውጤቶች ነን። ዛሬም በሆነ የ" አልችልም አቅቶኛል" በሚል የህይወት መንገድ ላይ አንድ ሰው፣ ነገሩ የተቃናለት፣ ቃናው የጣፈጠለት፣ መአዛው የተቀየረለት፣ ነገሩ የተቀጠለለት ሰው (የእኔ) መልዕክት ይህ ነው። እግዚአብሔር ይችላል፣ በእግዚአብሔር ሁሉም ይቻላል። ዛሬም ተስፋ አለን፣ ነገራችን አላበቃም አልዘገየምም። ዘሪሁን ግርማ