Jeta bashkëshortore

Shtëpi të qeta Shejh Aziz Ferhan (Allahu e ruajttë!) Sa e sa njerëz kërkojnë zgjidhje për një problem bashkëshortor, ndërkohë që, po të mund të ktheheshin disa vite pas, do të zbulonin se zgjidhja e vërtetë nuk duhej kërkuar pas martesës, por para saj. Sepse, vëllezër e motra, familjet nuk fillojnë ditën kur lidhet martesa; ato fillojnë që në ditën e zgjedhjes. Prandaj, shumë prej lumturisë ose mjerimit, qetësisë ose trazirës, harmonisë ose konflikteve nuk lindin pas martesës, por farat e tyre mbillen në çastin kur burri zgjedh bashkëshorten e tij ose gruaja zgjedh shokun e jetës. Pikërisht për këtë arsye, Sheriati i ka kushtuar kësaj çështjeje një rëndësi të jashtëzakonshme. Sepse nuk bëhet fjalë për një vendim kalimtar apo për një marrëdhënie të përkohshme, por për zgjedhjen e shokut të jetës, babait të fëmijëve, nënës së brezave dhe shoqëruesit të një rruge që mund të zgjasë për dhjetëra vite. Prandaj, Profeti ﷺ nuk i la njerëzit të udhëhiqeshin vetëm nga dëshirat e tyre, nga zakonet apo nga kriteret e ndryshueshme të shoqërisë. Përkundrazi, ai u vendosi një kriter hyjnor e të përjetshëm, duke thënë: “Gruaja martohet për katër gjëra: për pasurinë e saj, prejardhjen e saj, bukurinë e saj dhe fenë e saj. Zgjidhe atë që ka fe, që të jesh i lumtur!” Vëllezër e motra, ky hadith nuk është thjesht një përshkrim i asaj që njerëzit zakonisht bëjnë; ai përcakton rregullin e parë mbi të cilin ndërtohet familja. Mendoni me mua: Profeti ﷺ nuk tha se nuk duhet parë pasuria. Nuk tha se bukuria nuk ka vlerë. As nuk tha se prejardhja nuk merret në konsideratë. Përkundrazi, ai ﷺ pranoi se zemrat e njerëzve priren drejt këtyre gjërave dhe se ato janë ndër faktorët që ndikojnë në zgjedhje. Këto janë prirje të natyrshme, të cilat Islami nuk i mohon. Por ai i vendosi në rendin e duhur: nuk i bëri themel të zgjedhjes, por i vendosi pas fesë. Ndërsa themeli mbi të cilin duhet të ngrihet ndërtesa e familjes — dhe që duhet të jetë në krye të përparësive të burrit dhe gruas — është feja. Pse pikërisht feja? Sepse bukuria mund të venitet, pasuria mund të humbasë, prejardhja nuk e krijon karakterin, ndërsa pozitat dhe statusi ndryshojnë. Kurse feja, nëse ngulitet thellë në zemër, mbetet me njeriun dhe e bën atë ta ndiejë mbikëqyrjen e Allahut të Madhëruar edhe kur nuk ka askënd që e mbikëqyr; t’i përmbushë të drejtat e të tjerëve edhe kur askush nuk ia kërkon; të falë kur zemërohet; të durojë kur sprovohet; të bëjë mirë kur ka mundësi; dhe të kërkojë falje kur gabon. Gruaja e devotshme nuk ruan vetëm veten e saj. Ajo e ruan edhe bashkëshortin e saj kur ai mungon, i ruan fëmijët përmes edukimit të tyre dhe e mbron shtëpinë e saj nga shkaqet që mund ta çojnë drejt shkatërrimit. Kështu sillet ajo, sepse e ndien mbikëqyrjen e Allahut të Madhëruar si në vetmi, ashtu edhe mes njerëzve; si në fshehtësi, ashtu edhe haptazi. Ajo e di se ndërtimi i familjes është një adhurim para se të jetë thjesht një zakon. Prandaj, kjo është këshilla e Profetit ﷺ, e cila duhet të jetë një udhëzim themelor në jetën e çdo burri dhe çdo gruaje dhe që duhet ta mbajnë gjithmonë para syve: “Zgjidhe atë që ka fe, që të jesh i lumtur!” Përktheu: Unejs Sheme islamiautentik