Jeta bashkëshortore

Shtëpi të qeta - Dashuria dhe mëshira Shejh Aziz Ferhan (Allahu e ruajttë!) Vëllezër dhe motra të mi, vëreni shprehjen e mrekullueshme kuranore. Allahu i Lartësuar thotë: “që të qetësoheni pranë tyre", dhe nuk tha: “që të jetoni me to”,  as nuk tha: “që të bashkoheni me to”, por tha: “që të qetësoheni pranë tyre." Sepse njeriu mund të ketë një shtëpi të madhe, por të mos gjejë qetësi shpirtërore; mund të ketë shumë pasuri, por të mos gjejë qetësi; mund të jetojë mes të gjithë njerëzve, por të ndiejë një vetmi vrastare. Ndërsa kur besimi e gjallëron shtëpinë, shtëpia bëhet vend prehjeje edhe nëse është e vogël dhe e ngushtë dhe zemrat bëhen kopshte edhe nëse bota ngushtohet për banorët e saj. Prandaj Allahu e ka bërë themelin e jetës bashkëshortore dy gjëra që nuk mund të blihen kurrë me para. Kush janë ato? Dashuria dhe mëshira. Dashuria kur jeta është e bukur dhe mëshira kur vijnë ditët e vështira. Dashuria në kohën e fuqisë dhe mëshira në kohën e dobësisë dhe pafuqisë. Dashuria në kohën e shëndetit dhe mëshira në kohën e sëmundjes. Dashuria gjatë rinisë dhe fuqisë, dhe mëshira kur të dy plaken. Prandaj Allahu i Madhëruar nuk e ka bërë marrëdhënien mes bashkëshortëve të mbështetet vetëm te dashuria, sepse dashuria mund të dobësohet, por e ka shoqëruar atë me mëshirën, në mënyrë që familja të mbetet e qëndrueshme përballë luhatjeve të kësaj jete. Prandaj, jo çdo shtëpi ndërtohet mbi dashurinë; përkundrazi, themeli i shtëpive është dashuria dhe mëshira. Përktheu: Unejs Sheme islamiautentik