Najmiddin Turon

Товатош мисоли қизимоқда ер, Соя жон сақлайди дарахт пинжида. Қуриган майсани топтаганча ел Саросар кезмоқда гул илинжида. Ховучимда сув йўқ тутайин десам... Кўнгил куяверар кунга қасдма-қасд, Кўкка ўрлаб борар куйинди ҳиди. Кутган мен эдиму келган у эмас, Аввал ҳам шунчалар суюклимиди?.. Белги ҳам бермабди борайин десам... Замин манглайимдек ўлчовли ҳудуд, Эрким бўйнимдаги арқонимга тенг. Куйган тулуп каби сиққанда вужуд, Қузғун мисол ҳижрон юрагимни ер. Ўзга бир манзил йўқ кетайин десам... Кечам—саҳифаси нам бўлган китоб, Бугун—дўконига ўт кетган тужжор. Эртам—мавжудлигин этолмай ҳитоб Молининг қийматин билмаган даллол. Бисотим ҳам бўм-бўш олайин десам... Қуриган сойларда тарс ёрилар ер, Соянинг оқшомдан бордир умиди. Гулнинг сўлганидан хабар берар ел, Аввал ҳам шунчалар суюклимиди? Дунё йўл бермади ўтайин десам... Июль, 2022 https://t.me/Najmiddin_Ermatov

Бугун мен бир вақтлар энг кўп тасирига берилган, ўзбекнинг бетакрор шоири - Абдували Қутбиддин туғилган кун!

Dindoshim, eshiting azon ovozin, Undan kelib turar Tangrim unlari. Poyingiz yetmasa Kabatulloga, Yuragimga keling Hayit kunlari. (Nargiza Yunusova) Qutlug‘ ayyom muborak bo‘lsin barchangizga! https://t.me/Najmiddin_Ermatov

Javlon JOVLIga Ushbu she'r Baland minbarlardan allalangan va Aldangan bolalar haqida emas. Unutlig‘ ul bulbul tumshug‘idagi Zanjirband nolalar haqida emas. Ushbu she'r Bu g‘urbat dahrida g‘aribdan g‘arib, Musofir o‘g‘lonlar haqida emas. Ham ro‘zi, ham so‘zi, ham yurtda o‘zi Qahatlig‘ zamonlar haqida emas. Ushbu she'r Kech kuzak qahridan qaltirab dir-dir, Kech ungan yalpizday beumid, besas, Erlari xorijda quldayin yurgan Yarim tul juvonlar haqida emas. Ushbu she‘r Tiniq osmoniga qarsak uchirib, Shoyini maqtovdan qilganicha mast. Xalqiga orzu va zahqum ichirib, To‘ymagan halqumlar haqida emas. Ushbu she'r Juft o‘rim sochlari to‘kilganicha, Oro(l)min yo‘qotgan onaday besas, Ichdan evrilsa-da Har go‘dagidan Umidvor bir Vatan haqida emas. Ushbu she'r Shirin tushlarini suvga oqizib, Bemahal uyg‘ongan odam haqida. © Najmiddin Ermatov may, 2019

Унинг қайтар вақти бўлди, ёронлар Э. Шукур Намхуш ноябрнинг ниҳоясида, Кўлмаклар изингни санашга тушди. Мотамда сочини юлган кампирдай, Мажнунтол бошидан рўмоли учди. Қайтар вақтинг бўлди, ёрижон. Ҳилолнинг юзини тўсди булутлар, Маёғин ёқотган хаёлим дайдир— Кимсасиз боғларнинг қўйнида шамол, Изғийди қадимий бир сирни айтиб. Қайтар вақтинг бўлди, ёрижон. Тун ярми, бемаҳал қичқирди хўроз, Худойим, чироғим қолмасин ўчиб— Минг йиллик мусаллас топган майхўрдай, Дарчадан тамшаниб боқмоқда кеча. Қайтар вақтинг бўлди, ёрижон. Ғамбода тунларда сени кутяпман, Эй, ғамнок ватаннинг ғамгузор қизи. Қўрқиб мўралайман, туман тушибди, Топа олармисан қайтишга изни?.. Қайтар вақтинг бўлди, ёрижон. Сен кетгандан бери шундайдир ҳаёт, Сен йўқ кунларимда шунга қаст қилдим. Не бўлса бўлар деб, чироқ ўчириб, Қанча кечаларни минг бор маст қилдим. Қайтар вақтинг бўлди, ёрижон. Намхуш ноябрдай тугаб боряпман, Қаҳратон келса гар ниҳоя тайин. Сенинг кетганингни кўрганман, етар, Сенинг келмаслигинг кўриб қолмайин. Қайтар вақтинг бўлди, ёрижон. https://t.me/Najmiddin_Ermatov

Бугун катта шоир, жўрам Бек Алининг тувилди куни! БИЛМАЙ ТУРИБМАН Тушимми-ўнгимми, билмай турибман, Ҳаёт бўлсам керак, ўлмай турибман. Соғинмай турибман муштоқлигимни, Во ажаб, йиғига тўлмай турибман. Баҳор нафасидан симирганим йўқ, Дунё ҳавасидан семирганим йўқ, Ҳижрон қафасидан ситилганим йўқ, Во дариғ, озод қуш бўлмай турибман. Шамолга эргашиб кетгим келарди, Осмонга тенглашиб кетгим келарди, Одам-ла кенгашиб кетгим келарди, Издиҳом ичинда тулдай турибман. Меҳр кўрмадилар мендан одамзод, Бемеҳр кўрмадим сендан, одамзод. Зулматда Яқубдек чекиб изтироб Сўқирдай турибман, кўрдай турибман. Қақраб ётибман мен висол онига, Ташна бўлган каби одам қонига. Кўкламда дон сепиб тўрт томонига Ёмғир кутаётган чўлдай турибман. Мурувват кўрсатсин менга ҳам олам, Бу тилсиз дардимни аритсин ором. Соқиё, майдан қуй, эй яхши одам, Пиёла узатган қўлдай турибман. Ҳаммадан чўққилар қадар дард қолди, Ёмондан кўнглимга юққан гард қолди. Рўёбга чиқмаган битта шарт қолди – Майит қўйилмаган гўрдай турибман. Тушимми-ўнгимми, билмай турибман, Ҳаёт бўлсам керак, ўлмай турибман. Балки ўлгандирман, балки ёронлар, Тирилиб кетар деб кўммай турибман. Тушимми-ўнгимми, билмай турибман... Бек АЛИ

Ertak aytmang bolalarga, siz, Shoirlardan uzoqroq oling. -mana bu yoʻl, deng, mana bu qorin: shu gʻam deya tolsin oyogʻing. Ertak aytmang bolalarga, oh, Kimligini bilib qolmasmi: Farogʻiydek yigʻlabon, e voh, Gulxaniydek kulib qolmasmi?.. Ertak aytmang, kitobni yoping, Boqmasin dil tilkalariga. Axir u bolaku, Vatanning gʻami Ogʻirlik qiladi yelkalariga. Hali bir kun oʻzni taniydi, Vatanni taniydi, taniydi alar-- U kun bizga la'nat aytadi, Ertak tinglab oʻsgan bolalar. https://t.me/Najmiddin_Ermatov

Mag‘zun keldi bu yilgi bahor, Uzoq keldi yig‘lash fursati, Ko‘p bo‘zladi bir mazlum yurtning Og‘rig‘ini oshkor ko‘rsatib...

Бугун курсдошим, елкадошим, жўлдошим, катта шоир Алибек Анварийнинг тувилди куни! ҚЎРБОШИ РУҲИ 1. Ошқозонга тушар манглайдан – Сўнг кифтларин ниқтайди бармоқ. Аччиқ таъми кетмас танглайдан, Ибодати – қора нон, ароқ... Масту ростнинг тирқишларидан, Эсиб турар қасдлашган нафас. Асрларнинг қарғишларидан, Ҳали ҳеч ким қутулган эмас –  Уфққа тортган манҳус йўлида, Ҳатто шиша йўқдир йиққани. Жаҳонгирни очган қўлига, Танга ташлаб ўтар туққани. Бахт сатҳида роҳи беркилган, Бадбахтликнинг йўли пайдар-пай. Соғинчлари ташиб кетилган, Бухорхудот олтинларидай! Бозор куни кўчага ёяр, Куйган тарих қурумларини. Шу он мудҳиш мағлублик туяр, Ҳақиқатнинг кўримларидан... Таъқиб этар бир савол бот-бот, Жавобининг юзи қорадир. Кўзларида мовийранг ҳаёт, Орол каби қуриб борадир! Жон шаҳрида – маст шавқу шоди, Зартанларин савдога солмиш. Манглайи шўр кибор зурёди, Қоринларда чалкашиб қолмиш. Руҳи унсиз хаёлга чўмган, Жисми тутун ичида йитар. Рўёблари ҳар тушу ўнгда, Жадидлардай отилиб кетар! Ошқозонга тушар манглайдан – Сўнг кифтларин пайпаслар андуҳ. Юз бурганин ногоҳ англайди: “Ота, ўғил ва муқаддас руҳ”. Нон шаҳрида – яшар қорнига, Бир-бирининг ризқини тунар. Кўчаларда фарзанд ўрнига, Ит етаклаб юради улар... 2. Кулмайман ҳеч инсон ҳолига! Инсон кулган устимдан гарчи. Гар топталса тупроқ – волида, Вужудини уйғотар жангчи! Сиртмоқлари қийган бўғзимдан Эрк сизгани ёдимда элас... Йўл бошида учқур – изимдан Ортда қолган – вужудим эмас! Мангулигим дашти бекафан, Шаҳид еллар эсганда бесас. Қоришувда гиёҳ ўрнидан, Қасос ўсган – вужудим эмас! Вужудим – сиз!  Динимиз ҳаққи! Ширк тўраган озувларини; Йитаётган Тилимиз ҳаққи! Ҳафиз лавҳдан ёзувларини; Қон қотирган Еримиз ҳаққи! Гулшанларни бузувларини; Эл сўраган Элимиз ҳаққи! Томиримиз тўзувларини –  Уйғонинг-да, буткул қутқаринг! Қилмишларин мустаҳиқ санаб. Ул қидирмиш – ипдан ўткаринг! Ичингизга кирарман шунда! Вужудим – сиз! @Alibek_Anvariy

Туркий элат бошида Бегона тахт кўрмасин, Бош эгар омонликни Ўзига бахт кўрмасин, Кун келиб фарзандини Ёвга улфат кўрмасин, Ўзлигинг кўрсатмоқнинг Келди вақти, бовурим, Бизлардан кор сўрмоққа Ватан ҳақли, бовурим. 👇👇👇 https://t.me/Najmiddin_Ermatov/932

Шимолдан ховури яхлаб қайтди ел, Умидвор чечаклар топмоқда завол. Менинг дардим оғир, Оғринмасдан кел, Кузакдан кўнглини узмаган аёл. Кафтимдан дон еган қушларим учди, Илонлар шайланди этмоққа жоду. Лек кўнгил дардисар, Ҳамон саросар, Ҳамон кафтим очиқ, Қўлларинг қушку?.. Эртанга хотирдан тўн тўқиб сотган Умидни зафтига олмоқда кузак. Қўлларим қировга ботмасдан аввал, Юрагим тинмасдан Қўлингни узат. Кузакдан кўнглини узмаган аёл.

Nazm kechasiga marhamat! 😊 Oʻzbekiston Yoshlar ishlari agentligi “Mutolaa” loyihasi hamda O‘zbekiston Milliy kutubxonasi hamkorligida “MUTOLAA’DA SHE’RIYAT” nomli teatrlashtirilgan nazm kechasini taqdim etadi. • Dastur qahramoni: “Shuhrat” medali sohibi, shoir BEK ALI • Mehmon: shoir va aktyor ERKIN BOZOROV 📝 So‘z va adabiyot muxlislarini 29-may (kuni) soat 17:00 da O‘zbekiston Milliy kutubxonasida kutib qolamiz. Ro’yxatdan o’tish uchun ushbu soʻrovnomani to’ldiring: https://forms.gle/LdKWstnmxBg4RPD26 BU UNUTILMAS KECHA BO‘LADI! Telegram | Instagram | YouTube

Ҳай, ёр-а! Куюк кўнгил оҳидан Буғланган Орол қайда, Тунлар зулматни ўрган Ул ҳамроҳ ҳилол қайда, Айғирнинг бўйни мисол Бўронни кесар десанг, Қаддингга ўхшаб турса Айтмоққа савол қайда? Ҳай, ёр-а! Қора тортсанг ёруғлик Кўздан йироқ борадир, Ҳаётидан норизо Эл бесўроқ борадир, Дарди қават-қавату Қўл юпқароқ борадир, Жасорат сўниб борган Умрда малол қайда? Ҳай, ёр-а! Эл алқаб юрган беклар Элнинг қасдига тушса, Оқ қайиндай ой қизлар Ҳижрон рақсига тушса, Отамерос йўқсиллик Тағин наслига тушса, Жортибойи кўп юртда Бут қайда, камол қайда? Ҳай, ёр-а! Қавмим дебон қароғинг Ёшлиғ бўлса, кулсалар, Йўлдошим деб юрганинг Йўлин калта бурсалар, Ҳақ номидан сўз очиб, Халқ нонидан урсалар, Шиори зеб замонда Яшарга мажол қайда? Ҳай, ёр-а! Юз йилларки қийпиниб Эгилган бош биздадир, Суягини унутиб Тентиган лош биздадир, Битмас сабр ҳам бизда Тағин кўзёш биздадир, Зарур вақти мушт бўлар Қўл қайда, қурол қайда? Ҳай, ёр-а! Сўзлай десанг сўзингни Қафас қўрқитиб турса, Ўлай десанг ютилган Нафас қўрқитиб турса, Яра дилни яратган Бесас қўрқитиб турса, Самода борми, билмам, Ерда истиқлол қайда?.. Ҳай, ёр-а! май, 2024 https://t.me/Najmiddin_Ermatov

Mayna tuxum ochdi bulbul inida, Chechaklar undirdi ajnabiy tobut. Ne uchun erk haqda o‘ylayman bunda, Mustaqil bo‘lganku allaqachon yurt. Yog‘iyga tegishli zabon ketsa ham, Bu turkiy elat deb tanisa ham dun. Haliyam boshimda dordek turibdi, Sharifim bog‘lagan gajaksimon dum. “Humolar uchmoqda ko‘kni to‘ldirib”,— To‘ralar bermoqda so‘zlariga zeb. Qafasda turgandek o‘ksindim nega, Ana, tiniq osmon, ista, parvoz et. Bu xalqning buguni hurram, dedi shoh, Haqsiz deb alqadi xalqning shoiri. Ne uchun hurramlik tuymayman unda, Mening ham kechmishim xalqqa doirmi? “Hokim so‘zi vojib, amal qilmoq farz, Sabr”,—deydi mulla tugagach azon. Bir kunda besh mahal uyg‘otib olib, Bir umr uxlashga undaydi hamon. Kimdir ko‘z tiksa ham, aniqki, millat, Dushmanning yo‘lini to‘sishga qodir. Ammo beklarining royiga boqsam, Negadir ko‘zimdan yosh sizayotir. Axir nima uchun ko‘nmaydi ko‘nglim, Baxt deb yozay desam dard tomar oqqa— Yoki bu millatning hurligi yolg‘on, Yoki she’rlarimning bari safsata... N.E. may, 2020

Xabaringiz bor, “Duel” loyihasining yangi mavsumi allaqachon boshlangan. Sizda ariza topshirish uchun 29-maygacha vaqt bor. Yo‘nalishlar: kattalar va bolalar she’riyati Ishtirokchilar 15–30 yosh oralig‘ida bo‘lishi kerak. Kattalar sheʼriyati yo‘nalishi 1-o‘rin egasi – 50 mln. so‘m; 2-o‘rin – 40 mln. so‘m pul mukofoti bilan taqdirlanadi. Xuddi shunday: Bolalar she’riyati yo‘nalishi 1-o‘rin sohibi – 50 mln. so‘m; 2-o‘rin – 40 mln. so‘m pul mukofoti bilan taqdirlanadi. Respulika bosqichi ishtirokchilari – 5 mln. so‘mdan rag‘batlantiriladi. Ro‘yxatdan o‘tish: @duel_ariza_bot

Loyiha haqida chekka hududlardagi iste’dodlar ham xabar topishi uchun o‘z hissangizni ayamang. Tanlov e’lonini shaxsiy sahifalaringizda ulashing.

Batafsil: @duelloyihasi

Баҳром Ирзаевга Арғумоқ кетган сўқмоқ, Заминга чўкиб борар. Уюрдан айри қулун, Жавдираб ўтиб борар. Киприклари қилқалам, Сиёҳин тўкиб борар, Тушовин узган исён, Етовчи юрак бунда. Аср ошган арчанинг Шохларида кўк томчи, Сояси турғун эмас, Бу беш кунлик алдамчи— Тўнглаган ёши дарак, Эй, қулуним, чопсанг-чи, На қўноқ мадор бўлар, На замон тиргак бунда. Кўк бўрин ёлин ўпган Шамолларга қулоқ сол. Эртакка кўчган чиннинг Шу йўлларда изи бор. Мутега кўп суянма, Атагани ҳўл рўмол. Ҳақ на даркор бундайга, На жони ҳалак бунда. Байловга кўникканнинг, Жони-да ширин келар. Бир жойга тўплаётган, Моли-да ширин келар. Бошини қумга суққан, Ҳоли-да ширин келар. Эли ялқов келар ва На подшо сергак бунда. Ҳайқириб кет тоғларни, Зир титратсин кишновинг. Ҳайқиравер қашқирлар, Бузгунича қуршовин, Ҳайқиравер айғирлар, Узгунича тушовин— Ўзинг ҳақ деб кетмасанг, Келмагай дарак бунда. Итларга талаш тушган Карвонни топмагунча, Алпларинг ютиб ётган Зиндонни топмагунча, Эгасиз бадар кетган, Туронни топмагунча, Ўзингни йўлларга сол, Қолмоқ не керак бунда?... 03.2021 https://t.me/Najmiddin_Ermatov

Баҳром Ирзаев билан танишганимизга 4 йилдан ошди чоғи. Шу йиллар мобайнида акадан кўп нарсаларни ўргандим ва бу ўқиса ўзлаштириладан нарсалар эмас эди. Ўтган давр мобайнида илмий ишга чоғланган, номзодлик, докторлик даражасини олган кўплаб олимларни кўрдим. Уларнинг аксари “номзодлик, доторлик қилсам, дарс ўтсам ойлигимга шунча устама қўшилади”, деган қарашлар билан андармон. Илмга шахсий манфаатсиз қарагани, аттангки оз. Баҳром акада бирон марта бундай ёндошувни эшитмадим, сезмадим. Нима қилса шу элнинг, миллатнинг ўмганини кўтариш пайида юрганини кўрдим, жадидлардан мерос гап: юртни “тенглар ичра тенг кўриш” орзусида ёнганига гувоҳ бўлдим. Бир қарасанг архив титкилайди, бир қарасанг архивлардан топганини элга улашиш пайида бўлади. Юз йил муқаддам босқинчилар ва сотқинлар қўлида ўлган 20 яшар қизнинг қисматини кўкайи куйиб гапиради, Баҳром Ирзаев деган ватандоши борлигини ўйлаб ҳам кўрмаган олис юртдаги мусофир қавмининг қийинчиликларидан изтироб чекади, ҳали туғилмаган келгуси авлод учун ёрғу ва умидли хаёллар суради... Баҳром ака, тувилди кун қутли бўлсин. Сиздай ойдинларимиз, шукрки оз эмас, илоҳим, янада кўп бўлсин! https://t.me/Najmiddin_Ermatov

Чопиб кетди тоғларга томон, Ҳар тукида ёвқур бир чирой. Чўққиларнинг шамолгайида, Увиллашга гувоҳ бўлди ой. Итларнинг бўғзига тиқилди ҳадик, Чўпон кетди уйига кириб. Бир тўп тўнғиз ширин жонини Ололмади хавфдан айириб. Сўнгра чопди дашт узра озод, Қонга ботиб лунжлари, тиши. Тонг отарда қайтди ортига Қафасдаги бўрининг туши. ©Нажмиддин Эрматов

Бугун таниқли адабиётшунос олим, адабиётимизнинг асл синчиси Қозоқбой Йўлдошев 75 ёшга тўлди. Чин юракдан табриклаймиз, узоқ умр, фарзанду набиралар камолни кўриб юришларини Оллоҳдан сўраймиз!

Mayna tuxum ochdi bulbul inida, Chechaklar undirdi ajnabiy tobut. Ne uchun erk haqda o‘ylayman bunda, Mustaqil bo‘lganku allaqachon yurt. Yog‘iyga tegishli zabon ketsa ham, Bu turkiy elat deb tanisa ham dun. Haliyam boshimda dordek turibdi, Sharifim bog‘lagan gajaksimon dum. “Humolar uchmoqda ko‘kni to‘ldirib”,— To‘ralar bermoqda so‘zlariga zeb. Qafasda turgandek o‘ksindim nega, Ana, tiniq osmon, ista, parvoz et. Bu xalqning buguni hurram, dedi shoh, Haqsiz deb alqadi xalqning shoiri. Ne uchun hurramlik tuymayman unda, Mening ham kechmishim xalqqa doirmi? “Hokim so‘zi vojib, amal qilmoq farz, Sabr”,—deydi mulla tugagach azon. Bir kunda besh mahal uyg‘otib olib, Bir umr uxlashga undaydi hamon. Kimdir ko‘z tiksa ham, aniqki, millat, Dushmanning yo‘lini to‘sishga qodir. Ammo beklarining royiga boqsam, Negadir ko‘zimdan yosh sizayotir. Axir nima uchun ko‘nmaydi ko‘nglim, Baxt deb yozay desam dard tomar oqqa— Yoki bu millatning hurligi yolg‘on, Yoki she’rlarimning bari safsata... N.E. may, 2020