آيــة 𓂆🇵🇸.

"ثمنُ النقاءِ في هذا العالم باهظٌ جدًّا ، فأنت لا تدفعه من راحتك فحسب .. بل تقتطعه خوفًا و ارتيابًا من كُلِّ يدٍ تمتدُّ إليك 🤎!" في لحظة ما .. بتحس كأن في زول سحب الموية من روحك ، رغم إنك لسه بتسقي الناس من آخر قطرة فيك بصيبك جفاف مُفاجئ و انت في قمة عطائك .. لمّا تعرف انو عشمك الأخضر ارتطم بجدران من القسوة .. بتمر عليك أيام بتكشف فيها انو العالم دا بقى اشبه بآلة ضخمة بتفرم المشاعر .. بقى زي حجر رحى .. ما بفرّق بين القمح و الورد الناس بقت تتعامل بنظام المقايضة ؛ بتوزن العطاء بميزان الربح و الخسارة .. لمّا تمد إيدك و مليانة بالخير و اللُّطف و النية السليمة ، و تتفاجأ بجفاء قاطع يرجعك و ايدك فاضية بتحس زي كأن الصدق بقى بضاعة كاسدة في اسواق مُزدحمة الوجوه المتلوّنة 🤎!.. البُركان الجوّاك بِتعاظم و خاصةً لمّا تعاين للمساحات اللي زرعتها بالمحبة و اللُّطف بكل صدق و تلقاها اتحولت لحُطام بفعل التخلّي بكل بساطة .. يراودك شعور مؤلم و بتكون مستغرب جدًّا "كيف ! كيف النفوس .. و الأشخاص اللي فضلتهم على كل شيء بخصك .. يستسهلوا قطع الحبال المتينة دي ؟! و كيف قلوبهم بتختار تمشي في طرق الحسابات الضيقة .. و تخلّيك واقف في نص الطريق المقطوع و ما عندك بوصلة ترجعك !" بترافقك الأسئلة الأكثر ألمًا : معقول العيب في بياض نيتي ، ولا شُح الوداد اللي حواليّ ؟ دي ياها الصدمة اللي ممكن قليلٌ مننا يكون مُدرك بيها صدمة الأنفس الهينة لمّا تُجرح بجحود عالم بعتبر الحنية ضعف ، الوفاء سذاجة . دا الانطفاء المباغِت بخليك تتراجع لورا ، و تقفل شبابيك عفوية صِباك .. بتحس بتيبُّس غريب في مفاصيل مشاعرك ، كأنك بتفرغ من النور بسبب الإحباط و بتخاف تفتح يدك تاني لشخص عشان ما يرمي فيها رماد الخذلان مرة ثانية بتكتشف انو أصعب وجع هو "البرد الداخلي" ؛ لمّا تعدّي عليك المواقف اللي محتاجة لفزعتك ، و تلقى إحساسك النبيل بقى يتردد .. و بفتّش عن الضمانات و الأعذار .. خوفًا من انو يفتّح الندوب .! "أن تكون نفسك في عالم يحاول بإستمرار أن يجعلك شخصًا آخر ، فهذا أعظم إنجاز 💜." — رالف والدو أيمرسون. وسط كل هجير النكران دا ، بفضل العثور على إنسان ما اتلوّث ، بغسّل عنك تعب السنين دي كلها .. الدفء العظيم بتولد وقتها كم هو جميل و دافي لمّا تصادف روح محتفظة ب نداوة طبعها ، ما قسّتها التجارب ولا شوهتها الخيبات .. إنسان بقدم ليك السند كأنه واجب بديهي ، بدون ما يستنى منك مُقابل او يمسك دفتر حسابات عشان يمنّ عليك ب وقفته طوق النجاة الحقيقي اننا نتمسّك "ببياضنا الداخلي" ، و ما ندّي الدنيا تسرق مننا حلاوة الطبع .. احموا ماء قلوبكم من الجفاف ، خلوا يقينكم ثابت انو اللُّطف النضيف عمره ما حيضيع ، حتى لو وقع في أرض غير صالحة للزراعة .. خليك انت الظل البارد اللي يتمناه أيّ عابر سبيل ، و اعرف انو أعظم انتصار على قسوة الأيام .. هو إنك تطلع من عواصفها و انت لسه قادر تطبطب ، و تجبر الخواطر بنفس السخاء الأول .. من غير ما تتلوّث بخدوشهم .. اعرف حاجة كمان .. انو طينتك الأولى ما زالت صالحة للإزهار ؛ لمّا تلقى شخص بلمس تصدّعاتك بلُطف و عناية ، بدون ما تطالبه بإنه يغيّر ملامحه او يلبس دروع الحذر .

عارف! في حقيقة واحدة لو رسخت جوّاك ، ح تختصر عليك كثير من الخيبات : "حُب الناس مواسم." 🤎 الحوار ما في ان الفصول بتتبدّل .. المشكلة اننا بنعامل بعض الناس كأنهم صيفٌ دائم ، و بنفرش ليهم قلبنا بكل لُطف و لهفة و حنية .. على اساس انو الجو ما ح يتغيّر و فجأة .. الهواء ببرد ، و الورق الأخضر الكان مظلل روحك ، ببدأ يقع ورقة ورقة .. و انت لسه واقف في نفس المكان بملامحك العتيقة البريئة : ليه حصل كدا ؟ بتفتّش على الونس العتيق ، و على السؤال البجي بدون مناسبة ، و على اللهفة البتسبق الكلام .. لكن الموسم خلص و الناس مرّات ما بتتغيّر .. هي بس بترجع لطقسها الحقيقي ، بعد ما ينتهي الموسم اللي كان جامعها بيك 🤎! في ناس بتحبك طالما انت قادر تضحك ، و تحتوي ، و تجبر الخاطر .. لكن اول ما يمُر عليك شتاءك ، و تحتاج كتف بدل ما تكون الكتف ، بتكتشف ان الزحمة كانت أخف مما كنت متخيّل و ساعتها ما بيفضلوا معاك الا الناس البتعرف قيمة وجودك في كل المواسم ، ما في موسم واحد 🤎! لذا .. أكبر خدمة ممكن تقدمها لنفسك ، إنك ما ترهن أمانك الداخلي بِمواسِم الناس .! معدنك .. ما بيتغيّر بتغيّر الفصول. و آخر القول: " لو انتهى موسمهم .. خليك الشجرة البتعرف تورّق من جديد ، حتى لو مشى آخر عابر كان مستظل بضلها 🤎."

في أخر المطاف كُل الناس الإتباهينا بيهم في العَلن، خَذلونا في العلن.. مؤمنة بفكرة إنو الحياة بتمرحلك لحدي ما توصلك للزول الصح في الوقت الصح.. بس أحياناً يدخلو  علينا ناس مرة واحدة بس في حياتنا و بشيلو مشاعرنا كلها و يمشو.. لو خيروني بين إنسان بحبو و إنسان بحبني حأختار البحبني، وكيف بيقدر الواحد يخلي زول بحبو بكل مشاعر الدنيا دي و يمشي يفتش زول تاني..؟ معليش لكل الناس الضاقت طعم الخُذلان.. معليش لكل الناس الزرعت حياتها كلها ورد و فجأة صيفت..

و في نهاية المطاف ، بعد ما موج السنين يكسر جواك ألف خاطر و خاطر .. بتلقى روحك رست أخيرًا في مرفأ هادئ 🤎! مرفأ هادي .. بتلقى فيه قلبك تعب من المشافاة ، و فرّد اصابعينهُ من اللهفة .. لا بقيت تجري ورا أشخاص قرروا يفتّشوا درب بعيد منك ، لا بقيت تحسب في دفتر الأيام منو السأل في غيابك اتطمئن عليك ، و منو الطلع من بابك و نسى العشرة حتى الخذلان اللي كان ساكن في ضلوعك .. بقى مجرد غيمة مرّت ، و نست شكل المطر 💘 ما بتعود تفتش في العيون عن نية ، ولا في الكلام عن طمأنينة .. و ما بتعود تخاف من الشخص المستني منك هفوة عشان يبني فوقها حكم كامل عليك . خلاص الفتيل اتملى .. ح تصل مرحلة انك اكتفيت بذاتك بتصفي حساباتك مع الدنيا .. و تقفل كل الدفاتر ، إلا دفتر السلام مع نفسك بتعاين للحياة زي البحر ؛ الموج يجي ، يضرب الشاطئ ، و يرجع .. و البحر يفضل بحر .. ناس تجي ، و ناس تمشي ، ناس طالعة .. و ناس نازلة و إنت بقيت ما عندك رغبة إلا في راحة بالك ، و ستر خاطرك ، و سكينة تسكن في قلبك و بس #على_هامش_اللطف بتكتشف ، بعد عمر كامل من الركض ، إن أعظم انتصار ما كان إنك تكسب الناس .. هو إنك أخيرًا ما بقيت تخسر نفسك❤.

كوني دائمًا أمانًا لنفسك.. جميلة بقلبك، قوية بقراراتك، لا تنتظري أحدًا ليجعلك تشعرين بقيمتك، فأنتِ كافيةٌ كما أنتِ." أجمل قوة أن يعرف الإنسان قيمته، وأجمل سلام أن يجد الأمان في نفسه قبل أن يبحث عنه في الآخرين. حين تؤمن بنفسك، لن تهزك نظرة أحد، ولن تنتظر من أحد أن يمنحك قيمة خلقها الله فيك💜.

في زحام هذه الحياة، قلةٌ هم من يمنحونك صدق المشاعر.. ذلك الذي يرى في ابتسامتك عيداً له، وفي حزنك غصة في قلبه، والذي يبحث عنك بقلبه قبل عينيه متلهفاً لأخبارك. هذا الصادق في وده.. عانق وجوده بشدة، فالأرواح النادرة ثروةٌ لا تتكرر ولا تُعوض من يقتسم معك رغيف الفرح، ويشاطرك مرارة الحزن.. من يجعل من تفاصيلك الصغيرة أهم أولوياته، ويسأل عنك حباً لا تكلفاً.. لا تفرط فيه أبداً؛ فهؤلاء معادن نفيسة لا تصدأ، وهدايا من السماء إذا ضاعت لا تُعوض

ما تتعلق بزول بس لأنك خايف تخسرو أو لأنك متعود على وجودو الاحتياج عمره ما كان سبب كفاية إنك تفضل متمسك بإنسان كل يوم بحسسك إنك لازم تتعب عشان يختارك. الزول البكون عايزك بالجد ما بخليك تدخل في منافسة عشان تكسب مكانك في حياتو وما بخليك تقلل من قيمتك أو تتنازل عن كرامتك عشان يرضى عنك. أوعى تفتكر إنك لازم تثبت إنك تستحق الحب أو إنك كل مرة تكون إنت البتبادر البيعتذر والبيتحمل العلاقة الصح ما فيها زول شايلها براهو وما فيها واحد بيجري والتاني واقف يتفرج. اعرف قيمتك كويس لأنو في ناس مهما عملت ليها ما ح تكتفي وفي ناس من أول يوم ح تختارك من غير ما تطلب وحتتمسك بيك من غير ما تضطر تغير نفسك أو تخبي وجعك أو تتنازل عن احترامك لنفسك. الزول البحبك بصدق ما بخليك تحس إنك حمل ولا بخليك تعيش طول الوقت خايف من الفقد. بخليك مطمن مقدر وحاسس إن وجودك فرق معاه. أما الزول البخليك كل يوم تشك في مكانتك عندو فصدقني المشكلة ما فيك... المشكلة إنك قاعد تطلب اهتمام من المكان الغلط. وأحيانًا أقوى قرار ممكن تاخدو في حق نفسك إنك تمشي بهدوء وتحافظ على كرامتك بدل ما تفضل متمسك بباب كل مرة يقفلو في وشك. لأنو في النهاية الزول العايزك بجد... حيختارك ويتمسك بيك من غير ما يكسرك في الطريق ♡.

رُبما لم يسير شيئًا وفقًا للخُطة التي وضعتها، ولكنني أصبر، وأرضى.. أصبر لأنني أعلم أن العُسر سيمضي، ويأتي بعدهُ يُسر، وأني مهما تألّمت، وبكيت، وبالحُزنِ شعرت، فأمري كُله خير، لأنّه بيدِ الله اللطيف الخبير. وأرضى لأنني مؤمنة بالقدر خيره وشرّه، ومؤمنة بالله الذي يُدبر أمري، وأعلم أنه سُبحانه وتعالى سيكون عند حُسن ظنّي، وأنّه جلّ جلاله كَكُل مرة سينقذني، ولن يضيعني البتّة. صدقني -عزيزي القارئ- الأمر كُلّ الأمر أنه يحتاج إلى رضى والكثير من الصبر. وبَشِّر الْمُؤْمِنِينَ والصَابِرِينَ.

- اللهم صلِ وسلّم وبارك على سيدنا محمد ‎ﷺ وعلى آله وصحبه وسلّم 🤎 .

اللهم في يوم الجمعة ، هب لنا سكينةً تُطفئ ضجيج الحياة ، وقوةً تعيننا على ما نخفيه، وبصيرةً تُرشدنا حين تتشابه الطرق . واجعل أثرنا بين الناس طيباً ، وذكْرنا جميلاً ، وقلوبنا معلّقة بك دائمًا .. جمعة مباركة عليكم جميعًا 🤎

طموحك الأجمل.. والأكثر نُبلًا ، ما يكون انك تسبق الناس .. بل انك تسبق النسخة القديمة من نفسك . تقارن نفسك بـ أمس قبل شهر .. قبل سنة .. وتشوف كم حاجة جواك اتغيّرت ، كم فكرة نضجت ، وكم جرح علّمك ، و كم موقف صنع منك إنسان أهدأ .. واوعى اكتر من قبل .! الحياة ما سباق بينك وبين احد .. لأن كل إنسان فينا ، خُلق في ظروف مختلفة ، في بيئة مختلفة ، في اختبارات مختلفة ، و في توقيت كتبهُ ربنا مخصوص ليهُ . فـما منطق تقارن بدايتك بنهاية شخص تاني . كل زول عنده ال time zone البخصّهُ .. عندو محطاتهُ ، وتأخيرو ، نضجهُ ، سقوطهُ ، و قيامهُ البشبه رحلتهُ هو .. ما رحلة غيرو . نقطة الوعي بتبدأ تكبر لما تبطل تراقب حياة الناس ، وتبدأ تشتغل على حياتك انت . لأن العقول .. بتكبر لمّا تنشغل بنفسها ، وتضيق .. لما تنشغل بغيرها . ف امشِ على مهلك .. لكن بصدق ، واعظم انجاز ممكن توصله .. إنك تصبح نسخة ، يفتخر بيها.."انت القديم" 🩶🫀.'