Oromia Communications Bureau

"Hojiin tajaajila lammummaa ba'aa jireenya keenyaa ittiin salphisnudha" Obbo Abdulhakiim Muluu ------ Hojiin tajaajila lammummaa gannaa bara kanaa qindeessummaa Biiroo Dhimma Dubartootaafi Daa'imman Oromiyaan magaalaa Adaamaatti jalqabsiifame. Saganticharratti Sadarkaa Itti Aanaa Pirezidaantiitti Qindeessaan Kilaastera Hawaasummaa Obbo Abdulhakim Muluu ergaa dabarsaniin garaagarummaan kamiinuu osoo hin daangeeffamiin namummaarratti dhaabbachuun hojii tajaajila lammummaatiin rakkoon hawaasa keenyaa hiikamaa dhufeera jedhan. Hojiin tajaajila lammummaa ba'aa jireenyaa keenyaa ittiin salphisnuudha kan jedhan Obbo Abdulhakiin mana harka qalleeyyii heddu ijaaruun ba'aa jireenyaa abbootiifi hadholii keenyaa salphisuun kan danda'ame ta'uu dubbataniiru. Mootummaan namooma dursuun jiruufi jireenya hawaasaa jijjiiruuf humna, qabeenyaafi beekumsa jiru walitti qindeessuun wal tumsuun hariiroofi obbolummaa cimsuun rakkoo waloo waliin hikkachuurratti hojjechaa jira jedhan. Hawaasni keenyas mul'ata duudhaa ganamaatti deebi'uu mootummaan karoorfame gammachuun simachuun karaa guutuu ta'een hirmaachuun aantummaasaa agarsiisaa jira jedhan. Bara itti aanus mana harka qalleeyyii Kuma 130 ijaaruuf karoorfameera. Hooggantuun Biiroo Dhimma Dubartootaafi Daa'imman Oromiyaa Aadde Mabraat Baacaa hojiin kenna tajaajila lammummaa duudhaa ganamaa Sirna Gadaa waan ta'eef hojii qajeelaa kana hawaasa keenya sadarkaa sadarkaan jiran fayyadamaa taasisuuf hojjetamaa jiraachuu himaniiru. Waggoota shanan darbanittis osoo qormaanni adda addaa jiruu hojii hojjetameen dubartootaafi maatii harka qalleeyyiif manni kuma 65 fi dhibba 5 ol ijaarameera, daa'imman mil. 3.6f meeshaaleen deeggarsaa kennameera. Bara kanas hojii kenna tajaajilaa lammummaa raawwatamuun hawaasa mil. 12.3 hirmaachisuun namoota mil. 4.8 fayyadamoo taasisan ni raawwatama jedhan. Kantibaan Magaalaa Adaamaa Obbo Hayiluu Jaldee Magaalaan Adaamaa galmoota misoomaa hojiirra oolchuun fayyadamummaa ummataa mirkaneessuuf hojjechaa jira jedhan. Humnoota waloo arfan qindoominaan hojiirra oolchuun rakkoo ummata keenyaa hiikuuf hojjetamaa jiraachuus dubbataniiru.

Mareefi Marabbaan Biyya Waloo Keenyaa Ijaarra! ~~~ Itoophiyaan kuufama qormaataawwan keessaafi alaa mudachaa turan qolachaa har'a geesse. Saboonni, Sablammoonniifi Uummattoonni Itoophiyaa biyya birmadummaa qabdu ijaarrachuuf lafeen isaanii waliin cabee dhiigni isaanis waliin dhangala'e. Kun dhugaa haalamuu hin dandeenye dha. Haata’u malee, sirnoonni darban ijaarsa biyyaa keessatti dhugaa waloo sabootaa moggaatti dhiibaa seenessa qeenxee leellisuun sabdaneessummaa xiqqeessaa rakkoon siyaasaa hidda akka gadi fageeffatu taasise. Kuufama qormaatilee dhalootaa dhalootatti darbaa dhufan mareefi marabbaan furuu dadhabuun idaa bule irratti hiyyummaa, wal gaarreffannaafi qoqqoodinsi golgaa afaanii, aadaa, amantaafi sabummaa bu’uureeffate waliin jireenya sabootaa miidhuu bira darbee tokkummaa biyyaalessaa gaaffii keessa galchuun hudhaa ijaarsa biyyaa ta’eera. Kanaafis wal utubuurraa wal takaaluu, jaalalarra jibba, tokkummaarraa garaagarummaa, badhaadhina waloo milkeessuurra waraana labsuu, seenessa sobaa leellisuufi wal jibbiinsa facaasuun baramaa turee jira. Kuufamni qormaatilee rogdaneessiifi wal xaxoo ta’an kunneen biyya hunda keenyaaf taatu, hunda keenyas fakkaattuufi hundarraas ijaaramte waloon milkeessuuf qormaata hamaa turan. Kanaafis mareefi araarri biyyaalessaa akka biyyaatti gaggeeffamuuf jedhu rakkoo keenya duguugnee furuu kan dandeesisu waan ta’eef uummanni Oromoo ajandaa tarkaanfataafi moo’ataa dhugaa waloo ijaaru qabatee dhiyaachuu qaba. Dhaloonni har'aa ajandaa seena qabeessa kana milkeessuun kuufama idaa kaleessaa mareefi marabbaan furee boqonnaa haaraa akka banuuf seenaan abbaa carraa taasiseera. Carraan argame kun yoo sirnaan itti fayyadamne rakkoo waloo keenyaa furree araara biyyaalessaa mirkaneessuun nageenya waaressee biyya hunda keenyaaf taatu ijaarrachuuf boqonnaa murteessaadha. Kanaafis dhimma dhuunfaarra dhimma sabaafi biyyaa caalchisuu, wal dhaga’uu, tokkoomuun ajandaa moo’ataa bu’uura ijaarsa biyyaa cimsu waloon qabaachuufi garaagarummaa hir’ifnee dhimma waloo jabeessuun qormaataaf idaa kuufame osoo hin taane biyya badhaate dhaloota dhaalchisuuf hojjetamuu qaba. Mootummaan Naannoo Oromiyaa naannichatti nageenya waaressuu, duudhaa ganamaa jabeessuufi maree biyyaalessaaf haalli mijaawaan akka uumamuuf kutannoon gumaacha irraa eegamu hunda taasisaa jira. Imala kanaan dhibdeen siyaasaa ni furama, ijaarsi biyyaas bu'uura cimaa ni argata. Sirna federaalizimii sabdaneessaattis ulfina horuun tokkummaan biyyaalessaaf bu’uurri cimaan ni kaa’ama. Oromiyaan ijaarru, Itoophiyaan utubnuufi gaanfi Afriikaa tasgabbeessinu imala Kanaan milkaa’a. Biiroo Kominikeeshinii Oromiyaa Caamsaa 23/2016 Finfinnee

"Qormaata kutaa 6ffaa, 8ffaafi qormaata biyyaaleessaa kutaa 12ffaaf qophiin xumuramuu ibsame. = = = Qormaata kutaa 6ffaa, kutaa 8ffaa sadarkaa naannootti kennamuufi qormaata biyaaleessaa kutaa 12ffaaf qophiin kan xumurame ta'uu Hoogganaan Biiroo Barnootaa Oromiyaa Dr Tolaa Barisoo ibsan. Dr. Tolaan qormaata bara kanaa kennamu ilaalchosuun ibsa miidiyaaleef kennaniin bara kana Naannoo Oromiyaatti qormaata kutaa 6ffaa barattoota 731,955 ,qormaata kutaa 8ffaa barattoota 672,500 fi kutaa 12ffaa barattoonni 246,575 waliigala naannichatti barattoonni 1,651,030 kan qoraman ta'uu himaniiru. Qormaata kutaa 6ffaa waggoottan dheeraa booda yeroo jalqabaaf kennamuufi kutaa 8ffaa sadarkaa naannootti kennamuuf qophiin gahaa taasifameera jedhan. Qormaatichi wiirtuu qormaataa 1,424 keessatti kan kennamu ta'uu ibsanii yeroo ammaa qormaatichi giddugalarraa geejjibsiifamuun Godinaaleefi bulchiinsa magaalotaatti qaqqabeera jedhan. Barattoonni gosa barnootaa hunda baratanii akka xumuraniifi titooriyaaliin gahaa kennuun akka qophaa'an taasifameera. Qormaanni kutaa 6ffaa Caamsaa 29 fi 30 akkasumas qormaanni kutaa 8ffaa waxabajjii 4 fi 5 kan kennamu ta'a. Qormaata biyyaaleessaa kutaa 12ffaa Adooleessa 3 hanga 5 kennamuufis qophiin gahaa kan taasifame ta'uu Dr Tolaan dubbataniiru. Rakkoo xiqqaachuu qabxii jiru fooyyeessuuf rakkoowwan jiran adda baasuun irratti xiyyeeffachuun barattoonni akka qophaa'an taasifameera. Barattoonni qormaata moodeelaa sadarkaa biyyaaleessaatti kennamu dabalataan sadarkaa naannootti qopheessuun akka fudhatan taasifameera. Bara kana qormaatichi onlaayiniidhan kennamuun kan eegalamu ta'uu isaatin barattoonni kuma 7 manneen barnootaa 40 keessatti jiran akka shaakalaniifi of qopheesan taasifamuu eeraniiru. Qormaanni kennamuu hundi milkaa'inaan akka xumuramu hawaasni manneen barnootaa nageenyummaa qormaatichaa eeguu akka qabu hubachiisuun maatiin barattootaas barattoonni tasgabbaa'anii qormaaticha akka fudhatan gorsa kennuu akka qaban Dr. Tolaan dhaamaniiru.

Pirojektoota Yeroo Qabameefi Qulqullinaan Xumuruun Badhaadhina Milkeessa --- Mootummaan Naannoo Oromiyaa fedhii misoomaafi gaaffii bu'uuraalee misoomaa uummanni naannichaa qabu deebisuuf pirojektoota qulqullinaafi yeroo gabaabaa keessatti xumuruun tajaajila hawaasaaf geessisaa jira. Keessumattuu waggoota jijjiiramaa darban keessatti hooggansa pirojektootaa cimsuun aadaan pirojektoota xumuruun eebbisiisuu hundeerraa jijjiirameera. Kanarraa ka'uunis, pirojektoonni kumaatamatti lakkaa'aman eebbifamuun rakkoo bulchiinsa gaarii bulchiinsa pirojektiin walqabatee kanaan dura ka'aa ture hambisuun danda'ameera. Kunis ta'uu kan danda'eef fayyadamummaa uummataa mirkaneessuuf hooggansi sadarkaan jiru aantummaan hojjechuu, hirmaannaan uummataa cimuu, hordoffiifi deeggarsi akkasumas bulchiinsi pirojektii hoogganuu cimaa dhufuufi kan biroon gumaacha taasisaniiru. Bara kanas pirojektoonni misoomaa uummataaf tajaajila adda addaa kennan ariitiifi qulqullinaan maallaqa guddaan hojjetaman xumuramuun eebbaaf qophaa'anii jiru. Bulchiinsa magaalaa Naqamteettis bara bajata 2016 kanatti pirojektoonni haaraafi buleeyyiin 27 ta’an qarshii miliyoona 200 oliin hojjetamaa jiran xumuramuun eebbaaf gahaa jiru. Bulchiinsa magaalichaatti bara kana pirojektoota gosa addaa addaa 27 hojjechuuf karoorfame keessaa pirojektiwwan 21 xumuruun yeroo dhiyootti tajaajila haawasaaf qophaa'anii jiru. Kanneen hafanis akka xumuramaniif ariitiin hojjetamaa jiru. Pirojektoonni kunneen pirojektii haaraa 22 fi kan bule 5 walii gala pirojektoonni 27 qarshii miliyoona 200fi miliyoona 18 oliin hojjetamaa jiran yeroo ammaa xumuramuun ebbaaf qophaa’aa jira. Pirojektoonni kunneenis manneen qusannaa, sheediiwwan IMX, daandii dhagaa bocamaa, marfata magaalaa, miidhagina daandii gidduu fi kan kana fakkatan of keessaa qaba. Pirojektoonni kunneen yemmuu xumuraman hawaasa kuma 30 ol fayyadamaa kan taasisan yoo ta'u lammiilee hedduutiifis carraa hojii uumaniiru. Facebook: https://www.facebook.com/oromiabc ------ Telegram: https://t.me/Oromiacommunicationaffairsbureau ------ Twitter: twitter.com/OromiaBureau ------ YouTube: https://www.youtube.com/@OromiaCommunicationBureau ------ TikTok: tiktok.com/@oromiacommunicationbureu ------ Website: https://www.oromiacommunication.gov.et/ ------ kallachaOromia: https://m.facebook.com